Laisse parole Bondié eclaire zot chemin
“To parole, li . . . enn la-lumiere pou mo chemin.”—PSAUME 119:105.
1, 2. Ki nou bizin faire pou ki parole Jéhovah eclaire nou chemin?
PAROLE Jéhovah pou eclaire nou chemin seulement si nou donne li l’occasion pou faire sa. Pou nou kapav profite sa la-lumiere spirituel-la, nou bizin etudié avek serieux Parole Bondié, ek nou bizin applik bann conseil ki ena ladan. C’est zis lerla ki nou pou kapav ena mem sentiment ki ecrivain Psaume 119, li ti dire: “To parole, li enn la-lampe pou mo lipié, ek enn la-lumiere pou mo chemin.”—Psaume 119:105.
2 Asterla, anou examine Psaume 119:89-176. Ena vrai-mem enn quantité renseignement dan sa bann verset-la! Ecrivain-la finn ecrire sa dan 11 couplet. Sa bann verset-la kapav aide nou pou reste lor chemin ki amenn vers la vie eternel.—Matthieu 7:13, 14.
Kifer nou bizin content parole Bondié?
3. Couma Psaume 119:89, 90 montré ki nou kapav compte lor parole Bondié?
3 Kan nou content parole Jéhovah, sa faire nou vinn stable lor plan spirituel. (Psaume 119:89-96) Ecrivain Psaume 119 ti chanté: “Pou touletan, ô Jéhovah, to parole finn etabli dan le ciel. . . . To finn bien fixé la terre, pou ki li tini.” (Psaume 119:89, 90) Grace a parole Bondié, setadir “bann reglement le ciel,” soleil, la lune ek bann zetoile suive zot chemin couma bizin, ek la terre finn fixé pou touletan. (Job 38:31-33; Psaume 104:5) Nou kapav compte lor tou parole ki sorti dan la bouche Jéhovah; tou seki Li dire “pou reussi” pou ki so bann projet realisé.—Isaïe 55:8-11.
4. Parski bann serviteur Bondié content so parole, ki l’effet sa ena lor zot kan zot souffert?
4 Si sa ecrivain-la ‘pa ti content la loi Bondié, li ti pou mort dan so souffrance.’ (Psaume 119:92) C’est pa bann etranger ki ti pé faire li souffert; c’est bann Israélite ki ti ena la haine pou li, ek ki ti pé desobeir la loi Bondié. (Lévitique 19:17) Mais sa pa ti accablé li, parski li ti content la loi Bondié, ek sa la-loi-la ti donne li courage pou contigné. Dan Corinthe, Paul ti “en danger parmi bann fausse frere,” kitfois parmi zot, ti ena bann “super-apotre” ki ti rod enn l’accusation kont li. (2 Corinthiens 11:5, 12-14, 26) Pourtant, Paul ti reste ferme lor plan spirituel, parski li ti content parole Bondié. Nou’si, nou content Parole Bondié, ek ki nou applik seki li dire, sa faire nou ena l’amour pou nou bann frere. (1 Jean 3:15) Mem si le monde ena la haine pou nou, sa pa faire nou blié bann instruction ki Bondié finn donne nou. Nou content nou bann frere, ek ensam avek zot, nou contigne faire volonté Jéhovah pendant ki nou pé attann pou servi Li pou l’eternité.—Psaume 119:93.
5. Couma le roi Asa ti rod Jéhovah?
5 Nou kapav dire Jéhovah ki quantité nou content Li kan nou faire sa la-priere-la: “To-mem mo proprietaire. Sauve moi, parski mo finn rod to bann l’ordre.” (Psaume 119:94) Le roi Asa ti rod Bondié, ek li ti elimine l’apostasie ki ti ena en Juda. Pendant quinzieme l’année so regne (963 a.n.l.), Asa ti faire enn grand l’assemblée kot bann habitant Juda “ti faire enn l’alliance pou rod Jéhovah.” Bondié “ti laisse bannla trouve Li” ek Li “ti contigne donne zot tranquillité tout autour.” (2 Chroniques 15:10-15) Sa l’exemple-la bizin encourage tou bann chrétien ki finn eloigné ar congregation, pou ré-rod Jéhovah. Li pou beni bann ki recommence frequente so peuple, ek Li pou protege zot.
6. Ki nou bizin faire pou gagne protection kont bann malheur spirituel?
6 Parole Jéhovah donne nou la sagesse ki kapav protege nou kont bann malheur spirituel. (Psaume 119:97-104) Bann commandement Bondié faire nou vinn pli sage ki nou bann l’ennemi. Kan nou prend compte so bann rappel, nou gagne perspicacité, setadir nou trouve pli loin ki l’apparence, ek kan nou ‘obeir so bann l’ordre, nou vinn pli malin ki bann zom agé.’ (Psaume 119:98-100) Si bann parole Jéhovah zot ‘pli doux dan nou palais ki di-miel dan nou la-bouche,’ nou pou detesté ek nou pou evite tou “chemin fausseté.” (Psaume 119:103, 104) Sa pou protege nou kont bann malheur lor plan spirituel, kan nou bizin faire face ar bann dimoune orgueilleux, sans pitié ek ki pena okenn respé pou Bondié, pendant lepok dernier jour.—2 Timothée 3:1-5.
Enn la-lampe pou nou lipié
7, 8. En accord avek Psaume 119:105, ki nou bizin faire?
7 Parole Bondié donne nou sans faute enn la-lumiere spirituel. (Psaume 119:105-112) Ki nou bann chrétien oint, ou-soit zot bann compagnon, setadir bann membre “lezot brebis,” nou dire: “To parole, li enn la-lampe pou mo lipié, ek enn la-lumiere pou mo chemin.” (Jean 10:16; Psaume 119:105) Parole Bondié couma enn la-lampe ki eclaire nou chemin, pou ki nou pa faire enn faux pas, ni nou tombé lor plan spirituel. (Proverbes 6:23) Seulement, sakenn personnellement bizin laisse parole Jéhovah vinn enn la-lampe pou so lipié.
8 Nou bizin ena mem determination ki ecrivain Psaume 119 ti ena. Li ti bien decidé pou pa eloigne-li ar bann l’ordre Bondié. Li ti dire: “Mo finn faire enn serment, ek mo pou tini li, pou obeir to bann decision ki droite concernant la justice.” (Psaume 119:106) Fodé jamais ki nou neglige l’importance l’etude la Bible regulier, ek l’importance bann reunion.
9, 10. Couma nou koné ki bann dimoune ki finn voué zot la-vie pou servi Jéhovah kapav ‘al loin ar so bann l’ordre,’ mais couma nou kapav evité ki sa arrive nou?
9 Ecrivain Psaume 119 pa ti ‘eloigne-li ar bann l’ordre Bondié,’ mais sa kapav arrive enn dimoune ki finn voué so la-vie pou servi Jéhovah. (Psaume 119:110) Sa-mem ki ti arrive le roi Salomon, ki pourtant ti forme partie dan enn nation ki ti voué ar Jéhovah. Dan premier partie so regne, li ti agir en accord avek la sagesse ki Bondié ti donne li. Mais “mem li, bann femme etranger ti pousse li pou faire peché” kan zot ti influence li pou adore bann fausse bondié.—Nehémia 13:26; 1 Rois 11:1-6.
10 La Bible appel Satan, enn ‘oiseleur,’ (enn kikenn ki installe bann la-trappe pou maye zoiseau), ek Satan installe beaucoup piege. (Psaume 91:3) Par exemple, enn dimoune ki avant ti dan la verité kapav essaye eloigne nou ar chemin ki eclairé par la lumiere spirituel, ek faire nou al dan l’apostasie, kot ena noirté spirituel. Parmi bann chrétien dan la ville Thyatire, ti ena “sa femme Jézabel-la,” kitfois enn group femme ki ti pé enseigne lezot pou adore bann zidole, ek pou commette fornication. Jésus pa ti tolere sa qualité mauvais kitsoz-la, ek nou aussi, fodé pa nou tolere sa. (Révélation 2:18-22; Jude 3, 4) Alors, anou prié Jéhovah pou Li aide nou, pou ki nou pa al loin ar so bann l’ordre, mais plutot ki nou reste dan so la-lumiere.—Psaume 119:111, 112.
Parole Bondié aide nou pou contigne servi Li
11. Dapré Psaume 119:119, couma Bondié considere bann mauvais dimoune?
11 Si nou pa eloigne-nou ar bann la-loi Jéhovah, Li pou aide nou pou contigne servi Li. (Psaume 119:113-120) Zordi, Jésus pa d’accord avek bann dimoune ki pretann ki zot chrétien alors ki zot ‘tiede,’ ek nou aussi, nou pa d’accord avek bann dimoune ki servi Jéhovah avek enn “leker partagé.” (Psaume 119:113; Révélation 3:16) Parski nou servi Jéhovah avek enn leker complet, Li “enn protection” pou nou, ek Li pou aide nou pou contigne servi Li. Li pou ‘rejette tou bann ki al loin ar so bann principe,’ kan zot agir dan enn fason sournois ek kan zot koz menti. (Psaume 119:114, 117, 118; Proverbes 3:32) Li considere sa bann mauvais dimoune-la couma bann “scories,” setadir bann saleté ki tiré dan bann metal ki ena valeur couma l’argent ek l’or. (Psaume 119:119; Proverbes 17:3) Anou toujours content bann rappel ki Bondié donné, parski nou pa’lé al joinde bann mauvais dimoune lor sa tas saleté ki Bondié pou detruire-la!
12. Kifer li important ki nou ena la crainte pou Jéhovah?
12 Ecrivain Psaume-la ti dire: “A cause la crainte ki mo ena pou toi [Jéhovah], mo finn gagne frisson lor mo la-chair.” (Psaume 119:120) Si nou envie ki Bondié considere nou couma so bann serviteur ek ki Li aide nou, li important ki nou ena la crainte pou deplaire Li, ek ki nou montré sa kan nou rejette bann kitsoz ki Li pa accepté. Job ti ena la crainte pou Jéhovah, ek sa ti pousse li pou amenn enn la-vie droite. (Job 1:1; 23:15) La crainte pou Bondié kapav aide nou pou contigne amenn enn la-vie ki faire Li plaisir, malgré n’importe ki l’epreuve nou bizin enduré. Mais pou nou kapav enduré, nou bizin prié avek tou nou leker, ek avek la foi.—Jacques 5:15.
Prié avek la foi
13-15. (a) Kifer nou kapav sur ki Jéhovah pou reponn nou la-priere? (b) Ki kapav arrivé si nou pa koné ki pou dire dan nou la-priere? (c) Montré couma Psaume 119:121-128 kapav exprime seki nou ressenti kan ‘nou ena bann soupir ki nou pa kapav exprimé par parole,’ kan nou faire la priere.
13 Kan nou prié, nou kapav sur ki Bondié pou aide nou. (Psaume 119:121-128) Pareil couma ecrivain Psaume 119, nou sur ki Jéhovah pou reponn nou la-priere. Kifer? Parski nou content bann commandement Bondié “plus ki l’or, oui, mem plus ki l’or raffiné.” En plus, ‘nou considere couma droite, tou bann l’ordre ki Bondié finn donné lor tou kitsoz.’—Psaume 119:127, 128.
14 Jéhovah tann nou bann supplication parski nou prié Li avek la foi, ek aussi parski nou obeir so bann l’ordre. (Psaume 65:2) Mais ki pou arrivé si nou ena bann problem ki tellement accablé nou, ki nou pa koné ki pou dire dan nou la-priere? Dan sa moment-la, “l’esprit [saint] li-mem plaide pou nou kan nou ena bann soupir ki nou pa kapav exprimé par parole.” (Romains 8:26, 27) Dan sa bann situation-la, Bondié accepté bann declaration ki ena dan so Parole couma bann la-priere ki adapté ar nou situation.
15 Dan la Bible, ena enn quantité la-priere ek bann pensée, ki exprime bien bann soupir ki nou pa kapav exprimé par parole. Par exemple, guette Psaume 119:121-128. Ici, seki ecrivain-la finn dire, kapav applik aussi dan nou situation. Par exemple, si nou peur pangar nou vinn victime bann fraudeur, nou kapav demann Bondié aide nou, pareil couma ecrivain sa Psaume-la ti faire. (Verset 121-123) Supposé ki nou ena enn decision difficile pou prend. La, nou kapav prié Jéhovah pou ki so l’esprit aide nou pou rappel, ek pou mette en pratik, seki Li finn dire dan so Parole. (Verset 124, 125) Mem si nou ‘ena la-haine pou chemin fausseté,’ nou kapav demann Bondié pou aide nou, pou ki nou pa tombe dan tentation, ek lerla desobeir so la-loi. (Verset 126-128) Si nou lire la Bible toulé-jour, bann passage coumsa, ki pou aide nou, kapav vinn dan nou l’esprit kan nou supplie Jéhovah.
Bann rappel Jéhovah aide nou
16, 17. (a) Kifer eski nou bizin bann rappel Bondié, ek couma eski nou bizin considere zot? (b) Couma certain dimoune kapav considere nou, mais ki kitsoz ki compté vrai-mem?
16 Si nou envie ki Bondié ecoute nou la-priere ek donne nou so faveur, nou bizin suive so bann rappel. (Psaume 119:129-136) Parski souvent nou blié, alors nou bizin bann rappel Jéhovah, ki pou faire so l’enseignement ek so bann commandement ré-vinn dan nou l’esprit. Bien-sur, nou content kan la lumiere spirituel faire nou comprend pli bien bann parole Bondié. (Psaume 119:129, 130) Nou content aussi ki Jéhovah finn ‘faire so figure brillé lor nou,’ kan Li donne nou so faveur, mem si coumadir ‘bann la-riviere de l’eau sorti dan nou lizié’ parski lezot dimoune finn desobeir so la-loi.—Psaume 119:135, 136; Nombres 6:25.
17 Nou sur ki si nou obeir bann rappel Jéhovah, nou pou contigne gagne so faveur. (Psaume 119:137-144) En tant ki bann serviteur Jéhovah, nou reconette ki Li ena droit pou attire nou l’attention lor so bann rappel ki droite, ek pou mette sa devant nou couma bann commandement ki nou bizin obeir. (Psaume 119:138) Ecrivain Psaume 119 ti obeir bann commandement Bondié, alors kifer li ti dire: “Mo enn dimoune ki pena valeur, ek dimoune meprise moi”? (Psaume 119:141) Surement, li ti pé mazinn fason ki so bann l’ennemi ti trouve li. Si nou prend enn position ferme pou la justice sans nou cedé, kitfois ena dimoune ki pou meprise nou. Mais seki compté vrai-mem, c’est ki Jéhovah donne nou so faveur parski nou vive en accord avek so bann rappel ki droite.
En securité ek en paix
18, 19. Ki resultat nou gagné kan nou obeir bann rappel Bondié?
18 Kan nou obeir bann rappel Bondié, sa faire nou reste proche ar Li. (Psaume 119:145-152) Parski nou ecoute bann rappel Jéhovah, nou koné ki nou kapav prié Li avek tou nou leker, ek nou kapav attann ki Li ecoute nou la-priere. Kitfois, nou kapav levé “bonne-heure, gramatin” ek nou supplie Jéhovah pou secours nou. C’est enn bon l’heure pou prié Li! (Psaume 119:145-147) Bondié proche ar nou aussi, parski nou rejette enn mauvais conduite, ek pareil couma Jésus, nou considere so parole couma la verité. (Psaume 119:150, 151; Jean 17:17) Nou relation avek Jéhovah soutenir nou dan sa lé-monde kot ena problem-la, et sa bann relation-la pou contigne soutenir nou pendant la guerre Har–Maguédôn.—Révélation 7:9, 14; 16:13-16.
19 Parski nou ena enn grand respé pou parole Bondié, nou konn enn vrai securité. (Psaume 119:153-160) Nou ‘pa finn detourne nou ar bann rappel Jéhovah,’ pareil couma bann mauvais dimoune finn faire. Nou content bann l’ordre Bondié ek sa faire nou reste en securité, entouré par so l’amour fidel. (Psaume 119:157-159) Bann rappel Jéhovah aide nou memoire, ek coumsa nou rappel seki Li demann nou faire dan certain situation. Parkont, bann l’ordre Bondié c’est bann kitsoz ki nou bizin obeir, ek nou pa hesité pou accepté ki nou Createur ena droit pou dirige nou. Nou conscient ki ‘fondement so parole, li la verité,’ ek ki nou pa kapav dirige nou la-vie sans Li. Alors nou accepté so direction avek plaisir.—Psaume 119:160; Jérémie 10:23.
20. Kifer nou ena “enn grand la-paix”?
20 L’amour ki nou ena pou la loi Jéhovah faire nou gagne enn grand la-paix. (Psaume 119:161-168) Persecution pa empeche nou pou ena “la paix Bondié.” (Philippiens 4:6, 7) Nou apprecié tellement bann decision ki Jéhovah prend concernant la justice, ki nou donne Li louange souvent, oui, mem “sept fois par jour.” (Psaume 119:161-164) Ecrivain Psaume ti chanté: “Bann ki content to la-loi ena enn grand la-paix, ek pou zot, pena okenn obstacle ki kapav faire zot tombé.” (Psaume 119:165) Si personnellement nou content la loi Jéhovah, ek nou mette li en pratik, nou pa pou tombé lor plan spirituel a cause seki enn lot dimoune kapav faire, ni par n’importe ki kitsoz ki kapav arrivé.
21. Ki bann l’exemple ena dan la Bible, ki montré ki fodé pa nou tombé lor plan spirituel si arrive problem dan congregation?
21 La Bible koz lor beaucoup dimoune ki pa finn laisse nanyin vinn enn obstacle permanent ki ti pou kapav faire zot tombé. Par exemple, Gaïus, enn chrétien, pa ti tombé lor plan spirituel, mais ‘li ti contigne marche dan la verité,’ mem si Diotréphès ti ena enn mauvais conduite ek li pa ti ena respé pou Bondié. (3 Jean 1-3, 9, 10) Paul ti encourage Évodie et Syntyche pou “ena mem pensée dan l’union avek le Seigneur,” surement parski ti ena problem entre zot. Sa deux chrétienne-la finn gagne l’aide pou resoudre zot problem ek pou contigne servi Jéhovah avek fidelité. (Philippiens 4:2, 3) Nou aussi pareil, fodé pa ki nou tombé lor plan spirituel si jamais enn problem arrivé dan congregation. Anou prend determination pou obeir bann l’ordre Jéhovah, ek rappel ki ‘tou nou bann chemin, zot devant Li.’ (Psaume 119:168; Proverbes 15:3) Lerla, nanyin pa pou enleve dan enn fason permanent sa ‘grand la-paix’ ki nou ena-la.
22. (a) Si nou obeir Bondié, ki privilege nou kapav gagné? (b) Couma nou bizin considere bann ki finn quitte congregation?
22 Si nou obeir toujours Jéhovah, nou pou ena privilege pou contigne donne Li louange. (Psaume 119:169-176) Kan nou vive en accord avek bann principe Jéhovah, nou pa zis gagne securité lor plan spirituel, mais aussi ‘nou la-levre contigne dire bann louange Jéhovah.’ (Psaume 119:169-171, 174) Sa-mem pli grand privilege ki nou kapav gagné dan dernier jour. Ecrivain Psaume 119 ti envie contigne vive ek donne louange Jéhovah, mais li pa dire dan ki fason li ti’nn ‘al loin couma enn mouton ki ti perdi.’ (Psaume 119:175, 176) Parmi bann chrétien ki finn quitte la congregation, kitfois certain encore content Bondié ek envie donne Li louange. Anou faire tou nou possible pou aide zot pou retrouve securité spirituel, ek la joie ki ena pou loué Jéhovah ensam avek so peuple.—Hébreux 13:15; 1 Pierre 5:6, 7.
Enn la-lumiere permanent pou nou chemin
23, 24. Ki bienfait ou finn tiré dan Psaume 119?
23 Nou kapav tire beaucoup profit dan Psaume 119. Par exemple, li faire nou compte plus lor Bondié, parski li montré nou ki nou pou trouve vrai bonheur kan nou “marche dan la loi Jéhovah.” (Psaume 119:1) Ecrivain-la rappel nou ki ‘fondement parole Bondié, li la verité.’ (Psaume 119:160) Sa bizin augmente nou l’appreciation pou Parole Bondié en entier. Si nou medite lor Psaume 119, sa bizin pousse nou pou etudié la Bible avek serieux. Plusieurs fois, ecrivain-la ti supplié Bondié ek ti dire Li: “Enseigne moi to bann principe.” (Psaume 119:12, 68, 135) Li ti aussi faire sa supplication-la: “Enseigne moi la bonté, [enseigne moi] pou mo agir dan enn fason raisonnable, ek avek connaissance, parski mo finn ena la foi dan to bann commandement.” (Psaume 119:66) Nou aussi nou bizin prié pareil couma li.
24 L’enseignement ki Jéhovah donne nou, permette nou pou ena enn bon relation avek Li. Plusieurs fois, ecrivain Psaume 119 ti dire ki li enn serviteur Bondié. En realité, li dire Jéhovah: “To-mem mo proprietaire.” (Psaume 119:17, 65, 94, 122, 125; Romains 14:8) Oui, c’est enn grand privilege ki nou ena pou servi Jéhovah ek pou donne Li louange couma enn so bann Témoin! (Psaume 119:7) Eski ou pé servi Bondié avek la joie, en tant ki enn proclamateur so Royaume? Si oui, ou kapav sur ki Jéhovah pou aide ou pou contigne servi Li ek pou beni ou dan sa travail ki ou ena privilege pou faire-la, a condition ki ou toujours mette ou confiance dan so parole, ek ou laisse sa parole-la eclaire ou chemin.
Couma ou pou reponn?
• Kifer nou bizin content parole Bondié?
• Couma parole Bondié donne nou la force pou contigné?
• Dan ki fason bann rappel Jéhovah aide nou?
• Kifer bann serviteur Jéhovah zot en securité ek en paix?
[Zimage, page 9]
Parole Bondié li enn la-source la lumiere spirituel
[Zimage, page 10]
Si nou content bann rappel Jéhovah, jamais Li pou considere nou couma bann “scories”
[Zimage, page 11]
Si nou lire la Bible toulé-jour, bann passage ki pou aide nou, kapav vinn facilement dan nou l’esprit kan nou prié