Parole Jéhovah vivant

Bann dimoune riche kapav dire: “Nou bann garson couma bann ti plante ki’nn bien poussé kan zot ti jeune, nou bann tifi couma bann coin ki’nn sculpté dan style ki ena dan bann palais, nou bann grenier rempli, . . . nou troupeau pé multiplié par millier.” Zot kapav dire aussi: “Heureux peuple ki ena sa qualité la-vie-la!” Mais ecrivain Psaume dire: “Heureux peuple ki ena Jéhovah pou Bondié!” (Psaume 144:12-15) Li normal ki sa coumsa, pa vrai? Jéhovah, Li enn Bondié ki heureux, ek bann ki adore Li, zot bizin heureux zot aussi. (1 Timothée 1:11) Nou trouve sa bien clair dan dernier partie sa bann psaume ki’nn inspiré par Bondié-la, setadir dan Psaume 107 ziska 150.

Cinquieme partie livre Psaumes faire ressorti aussi bann qualité extraordinaire ki Jéhovah ena, parmi ena so l’amour fidel, so fidelité, ek so bonté. Pli nou aprann konn personnalité Bondié, pli nou senti-nou poussé pou content Li ek pou ena la crainte pou Li. Ek sa en retour, rann nou heureux. Sa message ki nou trouvé dan cinquieme livre Psaumes-la, li vrai-mem ena enn grand valeur!—Hébreux 4:12.

NOU HEUREUX A CAUSE L’AMOUR FIDEL JÉHOVAH

(Psaume 107:1–119:176)

Bann Juif ki sorti en exil dan Babylone, chante sa bann parole-la: “Ah, laisse bann dimoune remercié Jéhovah pou so l’amour fidel ek pou bann action extraordinaire ki Li’nn faire pou tou dimoune.” (Psaume 107:8, 15, 21, 31) Pou loué Bondié, David chanté “To fidelité [monte] ziska dan le ciel kot ena bann nuage.” (Psaume 108:4) Dan prochain cantik, li faire sa la priere-la: “Aide moi, ah Jéhovah mo Bondié; sauve moi a cause to l’amour fidel.” (Psaume 109:18, 19, 26) Psaume 110, li annonce règne Messie. Psaume 111:10 dire: “La crainte pou Jéhovah, sa-mem commencement la sagesse.” Ek psaume ki vinn apré dire, “heureux sa dimoune ki ena la crainte pou Jéhovah-la.” —Psaume 112:1.

Psaume 113 ziska Psaume 118 forme seki appel bann psaume Hallel, parski zot servi souvent l’expression “Alleluia,” setadir “Loué Yah!” Dapré Mishna—enn livre ki’nn ecrire dan bann l’année 400 ek ki koz lor bann tradition oral bann Juif—bann Juif ti chante sa bann cantik-la pou Pâque ek pou sa trois fête ki zot ti faire toulé-l’année-la. Psaume 119 sa-mem psaume ek chapitre ki pli longue dan la Bible ek li rann gloire parole ou-soit message Bondié.

Reponse pou bann question biblik:

109:23—Ki David ti pé rod dire kan li ti dire: “Couma enn l’ombrage ki pé al fini, mo obligé allé”? David ti pé servi bann l’expression poetik pou dire ki li ti senti ki so la-mort ti pé approché.—Psaume 102:11.

110:1, 2—Ki Jésus Christ, “Seigneur [David],” ti faire pendant ki li ti assizé dan coté droite Bondié? Apré so resurrection, Jésus ti monte dan le ciel ek li ti attann dan coté droite Bondié ziska ki li commence regné couma le Roi en 1914. Pendant sa lé-temps-la, Jésus ti règne lor so bann disciple ki’nn choisir pou al dan le ciel. Li ti dirige zot dan predication ek dan l’activité pou faire bann disciple, ek li ti aussi prepare zot pou regné avek li dan so Royaume.—Matthieu 24:14; 28:18- 20; Luc 22:28-30.

110:4—Pou ki kitsoz Jéhovah ‘inn faire serment sans ki Li regretté’? Sa serment-la c’est l’alliance ki Jéhovah inn faire avek Jésus Christ pou ki Li vinn le Roi ek Grand Pretre.—Luc 22:29.

113:3—Dan ki fason nom Jéhovah loué “depuis soleil levé ziska li al couché”? Ici li pa pé koz zis enn group dimoune ki pé adore Jéhovah toulé-jour. Depuis soleil levé dan l’est ziska ki li al couché dan l’ouest, bann rayon soleil eclaire la terre partout. Li pareil pou Jéhovah. Bizin loué Li partout lor la terre. Pa kapav faire sa sans enn travail bien organisé. En tant ki Témoins de Jéhovah nou ena enn grand privilege pou loué Jéhovah ek pou participe avek zèle dan predication so Royaume.

116:15—Ki quantité ‘valeur la mort So bann fidel ena devant lizié Jéhovah’? Pou Jéhovah, bann ki adore Li ena tellement valeur ki Li pa kapav laisse zot tou mort en tant ki enn group, parski sa pou coute Li tellement cher. Si Li laisse sa arrivé, c’est coumadir so bann l’ennemi pli fort ki Li. En plus, pa pou reste personne lor la terre pou forme fondation le monde nouveau.

119:71—Couma sa kapav faire nou di-bien kan nou passe dan bann problem? Kan nou dan problem, nou aprann compte plus lor Jéhovah, nou aprann prié Li avek plus sincerité, nou aprann etudié la Bible plus ek mette en pratik seki Li dire encore plus dan nou la-vie. En plus, fason ki nou reagir kan nou dan problem kapav faire nou decouvert bann defaut ki nou kapav corrigé. Bann problem pa pou faire nou vinn amer si nou laisse zot affine nou.

119:96—Ki vedir ‘enn la-fin pou tou seki parfait’? Sa ecrivain Psaume-la pé koz lor perfection couma enn dimoune li, li trouve sa. Li ti pé surement pensé ki bann dimoune comprend seki parfait dan enn fason limité. Parkont, bann commandement Bondié pena limite. Zot guide nou dan tou domaine nou la-vie. La Bible Louis Segond dire: “Mo trouvé ki tou seki parfait ena bann borne: To bann commandement pena limite.”

119:164—Ki vedir loué Bondié “sept fois par jour”? Chiffre sept souvent faire nou pense seki complet. Alors sa ecrivain Psaume-la pé dire ki Jéhovah merité ki nou donne Li tou nou louange.

Bann leson pou nou:

107:27-31. Sagesse sa lé-monde-la pou ‘dan confusion’ kan Har–Maguédôn pou vini. (Révélation 16:14, 16) Sa sagesse-la pa pou kapav sauve personne dan destruction. Zis bann ki’nn compte lor Jéhovah pou zot gagne la vie sauve, pou kapav vive pou ki zot “remercié [Li] pou so l’amour fidel.”

109:30, 31; 110:5. En general, enn soldat ki ti tini so l’epée dan so la-main droite, ti tini so bouclier dan so la-main gauche. Alors li pa ti kapav protege so la-main droite avek so bouclier. Dan enn sens symbolik, Jéhovah Li dan “coté droite” so bann serviteur, pou laguerre pou zot. Coumsa Li donne zot so protection ek so l’aide. Sa li enn bon raison pou “loué [Li] enn quantité”!

113:4-9. Jéhovah tellement grand ki Li bizin abaisse-Li mem “pou guette le ciel.” Pourtant Li ena pitié pou bann ti dimoune, bann dimoune pauvre, ek bann madame ki steril. Souverain Seigneur Jéhovah Li ena l’humilité ek Li envie ki bann ki adore Li ena l’humilité, zot aussi.—Jacques 4:6.

114:3-7. Kan nou aprann bann kitsoz extraordinaire ki Jéhovah inn faire pou so peuple kot la mer Rouge, la riviere Jourdain, ek montagne Sinaï, sa bizin ena enn grand l’effet lor nou. A cause Jéhovah,“la terre” ki represente bann dimoune, bizin ressenti enn grand la-crainte ek respé, coumadir dan enn sens symbolik, zot bizin dan “bann grand douleur.”

119:97-101. Sagesse, bon jugement, ek capacité pou comprend ki nou gagné grace a Parole Bondié, protege nou kont seki kapav faire nou di-tort lor plan spirituel.

119:105. Parole Bondié li enn la-lampe pou nou lipié parski li kapav aide nou pou faire face ar bann problem ki nou joinde dan la vie toulé-jour. Li aussi eclaire nou chemin parski li faire nou konn projet Bondié pou l’avenir.

HEUREUX MALGRÉ BANN GRAND DIFFICULTÉ

(Psaume 120:1–145:21)

Couma eski nou kapav faire face ar bann l’epreuve ek reussi sorti dan bann grand difficulté? Psaume 120 ziska 134 donne nou enn reponse bien clair. Nou kapav reussi sorti dan bann difficulté ek garde nou la-joie kan nou rod secours ar Jéhovah. Sa bann psaume-la appel chants des montées ek bann Israélite ti surement chante sa kan zot ti voyagé pou monte vers Jérusalem pou bann fête ki ti faire toulé-l’année.

Psaume 135 ek 136 decrire Jéhovah couma Celui ki faire tou seki faire Li plaisir. Sa montré bien difference ki ena entre Li ek bann zidole ki pa kapav faire nanyin. Psaume 136 li enn cantik ki’nn composé pou ki enn dimoune chante premier partie chaque verset ek le peuple ensam chante la fin chaque verset pou reponn li. Psaume ki vinn apré raconte grand chagrin ki bann Juif dan Babylone ti ena parski zot ti envie adore Jéhovah dan Sion. C’est David ki’nn ecrire Psaume 138 ziska 145. Li envie ‘loué Jéhovah avek tou so leker.’ Pou expliké kifer, li dire: “Parski to finn faire moi dan enn fason extraordinaire.” (Psaume 138:1; 139:14) Dan Psaume 140 ziska 144, David prié pou ki Jéhovah protege li kont bann mauvais dimoune, discipline li, sape li dan la main bann ki persecute li, ek montré li ki conduite li bizin ena. Li mette l’accent lor bonheur ki peuple Jéhovah ena. (Psaume 144:15) Apré ki li’nn koz lor grandeur ek bonté ki Bondié ena, David dire: “Mo la-bouche pou loué Jéhovah; ek laisse tou dimoune beni so nom ki saint pou touletan, oui pou toujours.”—Psaume 145:21.

Reponse pou bann question biblik:

122:3—Couma eski Jérusalem ti enn la-ville ki ti “attaché ensam couma enn sel”? Pareil couma sa ti été dan bann la-ville longtemps, bann Israélite ti range bann lakaz dan Jérusalem bien pré-pré, enn a coté lot. A cause sa, li ti facile pou defann Jérusalem. En plus, bann habitant ti kapav compte lor zot camarade pou gagne l’aide ek protection. Sa verset-la represente l’unité spirituel ki ti ena entre bann 12 tribu Israël, kan zot ti vinn ensam pou adore Jéhovah.

123:2—Sa verset-la koz lor lizié bann serviteur. Ki sa l’exemple-la vedir? Bann serviteur ek bann servante guette la main zot maitre pou deux raison: pou zot kapav koné ki zot maitre envie ek pou gagne protection ek seki zot bizin pou vive. Nou aussi pareil. Nou tourne nou lizié vers Jéhovah pou nou comprend seki Li envie nou faire ek pou nou gagne so faveur.

131:1-3—Couma eski David ti ‘calmé so nâme pareil couma enn zenfant ki lor so mama mais ki’nn arrete boire avek li’? David ti aprann pou calmé so nâme pareil ‘couma enn zenfant ki’nn arrete boire avek so mama,’ aprann trouve reconfort ek satisfaction dan lé-bras so mama. Couma? So leker ek so lizié pa ti envie bann kitsoz ki li pa ti ena droit gagné ek li pa ti rod bann trop bel-bel kitsoz pou li. Au lieu li rod grandeur, en general, David ti reconette so bann limite ek li ti montré ki li ti ena l’humilité. Li bon ki nou ena mem l’attitude ki li, surtout kan nou pé travail pou gagne bann privilege dan congregation.

Bann leson pou nou:

120:1, 2, 6, 7. Kan nou koz en mal lor lezot pou gate zot reputation ek faire bann remark ki blesse zot, sa kapav faire zot souffert enn quantité. Kan nou control nou la-langue, li enn fason pou nou montré ki nou “represente la paix.”

120:3, 4. Si nou gagne zaffaire avek enn dimoune ki ena “enn la-langue ki koné couma pou embete dimoune,” nou kapav console-nou parski nou koné ki Jéhovah pou redresse sa situation-la kan so lé-temps arrivé. Bann ki koz en mal lor lezot pou gate zot reputation, pou passe misere ar “enn zom fort.” “Bann la-braise di-bois pié genêt,” zot represente bann jugement enflammé ki surement Jéhovah pou envoye lor sa bann dimoune-la.

127:1, 2. Dan tou seki nou faire, nou bizin rod direction Jéhovah.

133:1-3. L’unité ki existé parmi peuple Jéhovah, li apaise nou, li faire nou di-bien, ek li reconforte nou. Fodé pa nou casse sa l’unité-la kan nou prend l’habitude critiké, discuté, ou-soit plaigné pou tou ti kitsoz ki lezot faire.

137:1, 5, 6. Bann adorateur Jéhovah ki ti en exil, ti attaché ar Sion, ki ti represente l’organisation Jéhovah dan sa lepok-la. Nou, eski nou attaché ek nou fidel ar l’organisation ki Jéhovah pé servi zordi?

138:2. Jéhovah ‘faire so parole vinn encore pli grand ki so nom,’ parski kan Li pou realise tou seki Li’nn promette lor son nom, sa pou depasse par enn quantité tou seki nou kapav esperé. Vrai-mem, bann kitsoz extraordinaire pé attann nou dan l’avenir!

139:1-6, 15, 16. Jéhovah konn nou bann action, nou bann pensée, ek nou bann parole mem avant ki nou prononce zot. Li konn nou depuis ki nou finn formé dan ventre nou mama, avant ki chaque membre nou lekor bien formé. Connaissance ki Bondié ena lor sakenn parmi nou, li “trop extraordinaire” pou nou rod comprend. Li vrai-mem reconfortant pou koné ki Jéhovah pa zis trouve sa situation difficile ki nou pé faire face-la, mais Li comprend aussi ki l’effet sa ena lor nou!

139:7-12. Pena okenn place kot nou kapav allé ki trop loin pou ki Jéhovah fortifié nou.

139:17, 18. Eski la connaissance Jéhovah inn vinn agreable pou nou? (Proverbes 2:10) Si oui, nou finn trouve enn la-source satisfaction ki jamais pa fini. Bann pensée Jéhovah “pli beaucoup ki bann la-grain di-sable.” Nou pou touletan ena plus kitsoz pou aprann lor Li.

139:23, 24. Nou bizin envie ki Jéhovah examine seki nou été endan pou guetté si Li trouve ‘bann kitsoz ki mauvais,’ setadir bann pensée, bann desir, ek bann tendance ki pa bon pou enn chrétien, ek pou Li aide nou deracine tou sa bann kitsoz-la.

143:4-7. Couma eski nou kapav ena l’endurance dan bann grand difficulté? Sa ecrivain Psaume-la faire nou koné ki nou bizin faire: Nou bizin medite lor bann kitsoz ki Jéhovah inn faire, contigne interesse-nou ar seki Li faire, ek prié Li pou Li aide nou.

“Loué Yah!”

Toulé-quatre premier partie livre Psaumes termine par enn l’expression ki loué Jéhovah. (Psaume 41:13; 72:19, 20; 89:52; 106:48) Dernier partie aussi termine pareil. Psaume 150:6 dire: “Tou seki respiré, laisse li loué Yah! Loué Yah!” Sa pou vrai-mem realisé dan le monde nouveau.

Pendant ki nou attann sa lepok joyeux-la avek impatience, nou ena beaucoup raison pou glorifié vrai Bondié ek loué so nom. Kan nou pensé ki quantité nou heureux parski nou kapav konn Jéhovah ek ena bann bon relation avek Li, eski nou pa poussé pou loué Li avek enn leker reconnaissant?

[Zimage, page 31]

Bann kitsoz extraordinaire ki Jéhovah faire, zot bizin faire nou ressenti enn grand la-crainte ek respé

[Zimage, page 32]

Bann pensée Jéhovah “pli beaucoup ki bann la-grain di-sable”