Parole Jéhovah vivant

Dan so la-priere, enn psalmiste ti demann Bondié: “Eski [bann dimoune] pou proclame to l’amour fidel dan tombe, ek to fidelité dan l’endroit destruction?” (Psaume 88:11) Bien-sur la reponse li non. Si nou pena la vie, nou pa kapav loué Jéhovah. Loué Jéhovah, sa li enn bon raison pou nou contigne vive, ek kan nou ena la vie, sa li enn bon raison pou nou loué Jéhovah.

Troisieme ek quatrieme partie livre Psaumes, setadir Psaume 73 a 106, donne nou enn quantité raison pou loué nou Createur ek beni so nom. Kan nou reflechi lor sa bann psaume-la, sa bizin augmente nou reconnaissance pou “parole Bondié” ek pousse nou pou donne Li encore plus louange ek trouve bann pli joli l’expression pou loué Li. (Hébreux 4:12) Alors anou examine avek enn grand l’interet troisieme partie livre Psaumes avant.

“APPROCHE AR BONDIÉ, LI BON POU MOI”

(Psaume 73:1–89:52)

C’est Asaph ou-soit bann membre so famille ki’nn compose premier 11 psaume dan sa troisieme partie-la. Li commence par enn chanté ki explik nou ki kitsoz finn empeche Asaph entrainé par enn mauvais raisonnement. Li’nn reussi tire enn bon conclusion. Li chanté: “Pou moi, approche ar Bondié, li bon pou moi.” (Psaume 73:28) Dan Psaume 74, psalmiste ploré a cause destruction Jérusalem. Dan Psaume 75, 76 ek 77, li decrire Jéhovah couma Juge ki juste, Sauveur bann ki ena l’humilité, ek Celui ki ecoute bann la-priere. Dan Psaume 78, li repasse lor l’histoire Israël, a partir lepok Moïse ziska lepok David. Dan Psaume 79, li ploré a cause destruction temple Jérusalem. Psaume 80, li enn la-priere lor retablissement peuple Jéhovah. Psaume 81, li enn l’encouragement pou obeir Jéhovah. Psaume 82 ek 83, zot bann la-priere concernant jugement Jéhovah, enn-la lor bann mauvais juge ek lot-la lor So bann l’ennemi.

Bann garson Qorah chante sa bann parole-la: “Mo nâme finn soupiré, ek li finn tellement envie al dan bann la cour Jéhovah.” (Psaume 84:2) Dan Psaume 85, zot demann Bondié pou donne so benediction bann ki sorti en exil. Sa psaume-la montré bien ki bann benediction spirituel ena beaucoup plus valeur ki bann benediction materiel. Dan Psaume 86, David demann Jéhovah pou veille lor li ek pou instruire li. Psaume 87, li enn chanté lor Sion ek bann ki’nn né la-bas. Psaume 88, li enn la-priere pou Jéhovah. Psaume 89 inn composé par Éthân ki kitfois ti enn parmi bann zom sage ki ti existé dan lepok Salomon. (1 Rois 4:31) Sa psaume-la mette l’accent lor l’amour fidel Jéhovah ki parette bien dan l’alliance ki Li’nn faire avek David.

Reponse pou bann question biblik:

73:9—Couma eski bann mauvais dimoune “inn mette zot la-bouche dan le ciel” ek couma eski “zot la-langue pé circule lor la terre”? Bann mauvais dimoune pena okenn consideration pou personne ki li dan le ciel ou-soit lor la terre. Alors zot pa hesité pou blaspheme Bondié avek zot la-bouche. Zot servi aussi zot la-langue pou koz en mal lor bann dimoune.

74:13, 14—Kan eski Jéhovah ti “crase la tête bann monstre marin dan de l’eau, ek . . . crase boute-boute bann la-tête Léviathan”? La Bible appel “Pharaon, le roi l’Égypte, [li-mem] grand monstre marin ki’nn talé au milieu bann canal so [la-riviere] Nil.” (Ézékiel 29:3) Kitfois Léviathan represente “bann [zom] fort Pharaon.” (Psaume 74:14, note) Kan la Bible dire ki finn crase zot bann la-tête, surement sa represente grand defaite ki Pharaon ek so bann l’armée finn koné kan Jéhovah ti delivré bann Israélite ki ti bann esclave en Égypte.

75:4, 5, 10—Ki vedir mot “corne”? Corne enn zanimo, li enn zarme bien puissant. Alors, mot “corne,” li represente pouvoir, ou-soit la force. Jéhovah leve bann corne so peuple, kan li faire zot vinn pli grand ki avant, mais li ‘coupe corne bann mauvais dimoune.’ Nou gagne l’avertissement pou pa ‘leve nou corne la-haut,’ setadir pou pa adopté enn l’attitude arrogant ou-soit vinn fiere. Parski c’est Jéhovah ki “eleve” enn dimoune, nou kapav dire ki c’est Li ki donne different responsabilité dan congregation.—Psaume 75:7.

76:10—Couma “grand colere bann zom” kapav loué Jéhovah? Kan Bondié permette bann dimoune tire zot colere lor nou parski nou pé servi Li, sa kapav amenn bann bon resultat. Bann l’epreuve ki nou gagné dan sa situation-la kapav discipline nou dan enn certaine fason. Jéhovah permette la souffrance seulement si sa donne nou sa qualité formation-la. (1 Pierre 5:10) ‘Le reste la-colere bann zom, Jéhovah mette sa lor Li couma enn ceinture.’ Mais ki arrivé si nou souffert ziska la mort? Sa aussi kapav loué Jéhovah, parski bann ki trouve nou l’endurance ek nou fidelité kitfois kapav commence glorifié Bondié, zot aussi.

78:24, 25; note—Kifer appel la manne “la grain le ciel” ek “di-pain bann ange”? Okenn dan sa deux l’expression-la pa vedir ki bann ange ti mange la manne. La manne ti sorti dan le ciel, a cause sa ti appel li “la grain le ciel.” (Psaume 105:40) Bann ange, ou-soit “bann puissant” reste dan le ciel. Alors “di-pain bann ange” vedir kitfois ki c’est Bondié ki reste dan le ciel, ki ti donne sa di-pain-la. (Psaume 11:4) Kitfois aussi ki Jéhovah ti servi bann ange pou donne la manne bann Israélite.

82:1, 6—Kisannla ki la Bible appel bann “bondié” ek “bann garson Très Haut”? Toulé-deux expression applik ar bann juge ki ti ena en Israël. Sa li approprié, parski zot ti servi en tant ki bann porte-parole ek representant Bondié.—Jean 10:33-36.

83:2—Ki l’expression “leve la tête” vedir? Sa geste-la montré desir pou exerce pouvoir, pou faire kitsoz, en general pou agir kont, pou laguerre, ou-soit pou faire dominere.

Bann leson pou nou:

73:2-5, 18-20, 25, 28. Fodé pa nou envié prosperité bann mauvais dimoune ek adopté zot bann maniere ki pa faire Bondié plaisir. Bann mauvais dimoune, zot dan enn situation dangereux. Nou sur ki zot pou “tombé boute-boute.” En plus, li inutile ki nou rod tire mechanceté, parski tant ki bann gouvernement humain imparfait dirigé, zot pa pou kapav enleve mechanceté. Li bon ki nou faire pareil couma Asaph. Pou faire face ar mechanceté, nou bizin “approche ar Bondié” ek trouve plaisir dan bann bon relation ki nou ena avek Li.

73:3, 6, 8, 27. Fodé pa nou vantard, nou arrogant, nou bouffonne lezot ou-soit nou embete zot, mem si li parette ki sa kapav faire nou gagne bann l’avantage.

73:15-17. Kan nou pa trop sur si nou fason pensé bon, fodé pa nou exprime nou bann pensée en publik. Si nou dire “enn kitsoz coumsa,” sa pou decourage lezot. Nou bizin reflechi avek enn l’esprit calme lor seki tracasse nou ek rod enn solution ensam avek nou bann frere ek soeur.—Proverbes 18:1.

73:21-24. Si nou vinn “amer” parski nou trouve bann mauvais dimoune pé prosperé, nou pou couma bann zanimo ki pa raisonné. Sa qualité reaction-la li normal kan nou laisse bann sentiment influence nou. Nou bizin plutot laisse Jéhovah guide nou ek ena confiance ki Li pou ‘trappe nou la-main droite’ ek Li pou soutenir nou. En plus, Jéhovah ‘pou amenn nou vers la gloire,’ setadir, Li pou faire nou vinn proche ar Li.

77:6. Si nou ena enn l’interet sincere pou la verité ek nou envie konn plus, nou bizin passe le temps pou etudié ek medité. Pou nou kapav faire sa, li bien important ki nou reserve enn lé-temps kot nou tousel.

79:9. Jéhovah ecoute nou bann la-priere surtout si zot ena enn rapport avek sanctification so nom.

81:13, 16. Kan nou ecoute Jéhovah ek nou marche dan so bann chemin, sa faire nou gagne bann grand benediction.—Proverbes 10:22.

82:2, 5. Kan ena l’injustice, sa kapav faire “bann fondation la terre” bougé. Bann action injuste bouleverse stabilité le monde.

84:1-4, 10-12. Bann ecrivain livre Psaumes inn laisse enn bon l’exemple pou nou. Zot ti ena beaucoup l’appreciation pou l’endroit kot ti adore Jéhovah ek zot ti gagne beaucoup satisfaction dan zot service.

86:5. Nou bizin vrai-mem reconnaissant ki Jéhovah “pré pou pardonné”! Li rod tou signe ki kapav donne Li raison pou pardonne enn dimoune ki repenti.

87:5, 6. Eski enn jour, bann ki pou gagne la vie dan Paradi lor la terre pou konn nom bann ki’nn ressuscité pou al vive dan le ciel? Sa bann verset-la laisse nou comprend ki li possible ki sa arrivé.

88:13, 14. Si nou tardé pou gagne enn reponse pou nou bann la-priere concernant enn certain problem, kitfois c’est parski Jéhovah envie ki nou prouvé ki nou vrai-mem attaché ar Li.

“REMERCIÉ LI, BENI SO NOM”

(Psaume 90:1–106:48)

Quatrieme partie livre Psaumes faire ressorti different raison ki nou ena pou donne Jéhovah la gloire. Anou examine sa bann raison-la. Dan Psaume 90, Moïse montré difference ki ena entre l’existence “le Roi l’eternité” ek la vie enn dimoune, ki bien courte. (1 Timothée 1:17) Dan Psaume 91:2, Moïse koz lor Jéhovah couma ‘so refuge ek so forteresse,’ la Source so securité. Bann psaume ki suive koz lor bann joli qualité ki Jéhovah ena, so bann pensée ki bien pli grand, ek so bann action extraordinaire. Trois psaume commence avek l’expression “Jéhovah Li-mem inn vinn le roi.” (Psaume 93:1; 97:1; 99:1) Ecrivain Psaume koz lor Jéhovah couma Celui ki’nn faire nou, ek li invite nou pou “remercié Li, [pou] beni So nom.”—Psaume 100:4.

Couma eski enn lé-roi ki ena la crainte pou Jéhovah bizin dirigé? Psaume 101, ki ti composé par le roi David reponn sa question-la. Psaume 102 dire nou ki Jéhovah “pou tourne-Li vers la priere bann dimoune ki’nn perdi tou seki zot ti ena, ek Li pa pou meprise zot la-priere.” (Psaume 102:17) Psaume 103 attire l’attention lor l’amour fidel ek misericorde Jéhovah. Ecrivain sa psaume-la mazinn tou bann kitsoz ki Bondié inn crée lor la terre, ek li dire avek admiration: “To’nn faire beaucoup kitsoz, ô Jéhovah! To finn faire zot tou avek sagesse.” (Psaume 104:24) Deux dernier psaume dan sa quatrieme livre-la loué Jéhovah pou bann kitsoz extraordinaire ki Li’nn faire.—Psaume 105:2, 5; 106:7, 22.

Reponse pou bann question biblik:

91:1, 2—Ki été “l’endroit secret le Très-Haut” ek couma nou kapav “reste” ladan? Sa represente enn l’endroit kot nou en securité spirituel, enn condition kot nou gagne protection kont tou seki kapav faire nou di-tort lor plan spirituel. Sa l’endroit-la li secret parski bann ki pa mette zot confiance en Bondié pa konn sa l’endroit-la. Nou faire le Très-Haut vinn l’endroit kot nou resté, kan nou considere Li couma nou refuge ek nou forteresse, kan nou loué Li en tant ki Souverain l’univers, ek kan nou preche bon nouvel so Royaume. Nou senti-nou en securité lor plan spirituel parski nou koné ki Jéhovah touletan paré pou aide nou.—Psaume 90:1.

92:12—Couma eski enn dimoune juste “pou fleuri couma enn palmier”? Enn palmier li enn pié ki rapporte beaucoup fruit toute longue l’année. Enn dimoune juste, li couma enn palmier parski devant lizié Jéhovah, li droite ek li contigne rapporte “bann bon fruit”; parmi sa bann bon fruit-la, ena bann bon action.—Matthieu 7:17-20.

Bann leson pou nou:

90:7, 8, 13, 14. Kan nou faire seki pa bon, sa gate nou bann relation avek Jéhovah. Li trouve tou bann peché ki nou faire en cachiette. Mais, si nou vrai-mem repenti ek nou quitte nou mauvais chemin, Jéhovah pou redonne nou so faveur, Li pou ‘donne nou so l’amour fidel en abondance.’

90:10, 12. Parski la vie bien courte, nou bizin “compte nou bann jour.” Couma nou pou faire sa? C’est kan nou ‘developpe enn leker sage,’ setadir kan nou manifesté la sagesse pou ki nou pa gaspille bann jour ki nou resté pou vive, mais plutot nou servi zot pou faire Jéhovah plaisir. Pou sa, nou bizin etabli bann priorité spirituel ek koné couma nou pou bien servi nou lé-temps.—Éphésiens 5:15, 16; Philippiens 1:10.

90:17. Li bien ki nou prié pou ki Jéhovah ‘etabli travail nou la-main dan enn fason solid’ ek beni bann zeffort ki nou faire dan predication.

92:14, 15. Kan zot serieux dan zot l’etude la Bible ek kan zot frequente regulierement le peuple Jéhovah, bann dimoune agé contigne reste “gras ek frais.” Sa vedir ki zot reste fort lor plan spirituel ek zot vinn bann colonne ki ena valeur pou la congregation.

94:19. N’importe ki raison kifer nou kapav faire ki nou ena ‘bann pensée ki tracasse nou,’ nou pou gagne courage kan nou lire ek medite lor “bann consolation” ki ena dan la Bible.

95:7, 8. Kan nou ecoute bann conseil la Bible, nou prend zot compte ek nou pa hesité pou obeir zot, sa pou empeche nou leker vinn dur.—Hébreux 3:7, 8.

106:36, 37. Sa bann verset-la etabli enn rapport entre l’adoration bann zidole ek faire sacrifice pou bann demon. Sa faire nou comprend ki enn dimoune ki servi bann zidole riské gagne l’influence bann demon. La Bible donne nou sa l’avertissement-la: “Reste loin ar bann zidole.”—1 Jean 5:21.

“Loué Yah!”

Trois dernier chanté ki ena dan quatrieme livre Psaumes, zot termine par sa l’ordre-la: “Loué Yah!” Dernier psaume dan sa quatrieme partie livre-la, li aussi li commence par sa bann mem parole-la. (Psaume 104:35; 105:45; 106:1, 48) Avredir, l’expression “Loué Yah!” apparette souvent dan sa quatrieme partie livre Psaumes-la.

Vrai-mem nou ena beaucoup raison pou loué Jéhovah. Psaume 73 ziska Psaume 106 inn donne nou enn quantité pensée lor ki nou kapav medité, ek zot rempli nou leker avek reconnaissance pou nou Papa ki dan le ciel. Kan nou pense tou seki Li’nn deja faire ek tou seki Li pou faire dan l’avenir, eski sa pa pousse nou pou “loué Yah” avek tou nou la-force?

[Zimage, page 8]

Pareil couma Asaph, nou kapav faire face ar mechanceté kan nou ‘approche ar Bondié’

[Zimage, page 9]

Pharaon gagne defaite dan la mer Rouge

[Zimage, page 9]

Eski ou koné kifer appel la manne “di-pain bann puissant”?

[Zimage, page 11]

Ki aide nou pou elimine ‘bann pensée ki tracasse nou’?