Bann cantik inspiré ki reconforte nou ek enseigne nou

PLI longue livre dan la Bible c’est enn livre kot ena bann cantik sacré. Sa livre-la finn ecrire lor enn periode 1,000 an. Dan livre Psaumes nou trouve bann parole bien profond ek bien touchant, ek jamais pa finn ecrire bann parole coumsa avant. Dan sa bann cantik ki loué Jéhovah-la, nou kapav retrouve different sentiment ki bann dimoune ena, couma par exemple la joie, reconnaissance, deuil, chagrin ek repentance. Li clair ki bann ecrivain sa bann psaume-la ti ena enn relation bien proche avek Bondié, ek zot ti ena confiance en Li. Anou guette certain theme sa bann cantik-la.

Jéhovah tousel ena droit legal pou gouverné, ek Li merité ki nou adore Li ek loué Li. Dan Psaume 83:18 nou lire: “Toi, ki appel Jéhovah, to tousel Pli Grand lor la terre entier.” Plusieurs psaume loué Jéhovah pou bann kitsoz ki Li finn crée, couma par exemple enn le ciel rempli ar zetoile, bann kitsoz extraordinaire ki ena lor la terre, ek nou lekor humain ki’nn faire dan enn fason extraordinaire. (Psaume 8, 19, 139, 148) Lezot psaume loué Jéhovah en tant ki enn Bondié ki agir dan enn fason extraordinaire pou sauve ek protege bann ki reste fidele envers Li. (Psaume 18, 97, 138) Ena lezot encore ki loué Li en tant ki Bondié la justice, ki amenn enn soulagement pou bann ki pé passe misere ek ki puni bann ki mauvais.—Psaume 11, 68, 146.

Jéhovah aide ek encourage bann ki content Li. Kitfois psaume ki bann dimoune pli koné c’est Psaume 23. Dan sa psaume-la David decrire Jéhovah couma enn bon Berger ki guide, protege ek prend soin so bann brebis. Psaume 65:2 rappel bann adorateur Bondié ki Jéhovah “ecoute la priere.” Beaucoup ki finn faire enn peché bien grave finn trouve bann encouragement kan zot finn lire Psaume 39 ek 51. Dan sa bann psaume-la David dire bann parole bien touchant pou montré so repentance pou bann faute grave ki li’nn faire, ek li exprime so la foi dan pardon Jéhovah. Dan Psaume 55:22, nou trouve enn l’encouragement pou nou mette nou confiance en Jéhovah ek jette tou nou fardeau personnel lor Li.

Jéhovah pou change le monde grace a Royaume Messie. Enn quantité passage dan bann Psaume applik dan enn fason bien clair ar Messie, le Roi ki ti annoncé pou vini. Psaume 2 dire ki sa le Roi-la pou detruire tou bann nation ki mauvais, ki opposé ar li. Psaume 72 faire nou koné ki sa le Roi-la pou tire la famine, l’injustice, ek bann ki faire dominere. Psaume 46:9 dire ki Bondié pou tire la guerre ek Li pou mem detruire tou bann zarme ki servi dan la guerre. Dan Psaume 37, nou lire ki bann mauvais dimoune pou nepli existé, alors ki bann dimoune juste pou vive pou touletan lor la terre, kot zot pou vive dan la paix ek l’harmonie.

—Basé lor livre Psaumes.