Parole Jéhovah vivant

KI TITRE pou pli approprié pou enn livre la Bible kot ena surtout bann louange ki adressé ar nou Createur, Jéhovah? Pa ti pou ena enn nom pli approprié ki Psaumes ou-soit Louanges, pa vrai? Livre Psaumes, li pli longue livre ki ena dan la Bible. Dan sa livre-la ena bann cantik avek bann joli parole ki koz lor bann qualité extraordinaire ki Jéhovah ena, ek so bann action puissant. Sa bann cantik-la koz aussi lor enn quantité prophetie. Beaucoup parmi sa bann cantik-la exprime bann sentiment ki bann dimoune ki ti ecrire zot, ti ressenti kan zot ti pé passe dan bann situation difficile. Seki zot finn ecrire couvert enn period apepré mille an—depuis lepok prophete Moïse ziska apré ki bann Israélite ti sorti en exil dan Babylone. Parmi bann ecrivain, ena Moïse, le roi David, ek lezot encore. C’est pretre Ezra ki’nn compile livre Psaumes dan so forme final.

Depuis bien longtemps, livre Psaumes finn divisé en cinq collection, ou-soit cinq section: (1) Psaumes 1-41, (2) Psaumes 42-72, (3) Psaumes 73-89, (4) Psaumes 90-106, ek (5) Psaumes 107-150. Dan sa lartik-la nou pou considere premier partie. Le roi David ki ti règne lor Israël finn ecrire tou bann psaume ki ena dan sa partie-la, sauf trois. Nou pa koné kisannla ki’nn ecrire Psaume 1, 10 ek 33.

“MO BONDIÉ LI COUMA ENN ROCHE POU MOI”

(Psaume 1:1–24:10)

Apré ki premier psaume dire ki dimoune ki trouve plaisir dan la Loi Jéhovah, pou heureux, deuxieme psaume koz direct lor theme Royaume.a Dan sa partie-la ena pli beaucoup la-priere. Par exemple bann Psaume 3-5, 7, 12, 13, ek 17, zot bann la-priere kot David demann pou sauve li kont so bann l’ennemi. Psaume 8 faire ressorti ki quantité bann humain tipti comparé ar Jéhovah ki bien grand.

David koz lor Jéhovah couma Celui ki protege So peuple ek li chanté: “Mo Bondié couma enn roche pou moi. Mo pou al cachiette kot Li.” (Psaume 18:2) Dan Psaume 19 Jéhovah gagne bann louange en tant ki Createur ek en tant ki Celui ki donne bann la-loi; dan Psaume 20 en tant ki Sauveur, et dan Psaume 21 en tant ki Sauveur le roi ki Li’nn choisir. Psaume 23 presente Jéhovah couma nou Grand Berger, alors ki Psaume 24 presente Li couma le Roi ki rempli ar la-gloire.

Reponse pou bann question biblik:

2:1, 2—Ki “kitsoz inutile” bann nation pé contigne comploté? Sa ‘kitsoz inutile-la’ c’est desir ki bann gouvernement lor la terre ena pou garde zot l’autorité. Li inutile parski jamais zot pa pou reussi faire sa. Eski bann nation kapav vrai-mem attann ki zot pou reussi kan zot prend position “kont Jéhovah, ek kont celui ki Li’nn choisir”?

2:7—Ki ‘l’ordre Jéhovah finn tiré’? Sa l’ordre-la c’est l’alliance pou enn Royaume ki Jéhovah inn faire avek Jésus, so garson ki Li bien content.—Luc 22:28, 29.

2:12—Couma eski bann ki pé dirige bann nation kapav “embrasse le fils”? Dan bann lepok biblik, bann dimoune ti embrassé en signe l’amitié ek fidelité. Sa ti aussi enn fason pou accueillir bann invité. Bann lé-roi la terre gagne l’ordre pou embrasse le Fils, setadir pou accueillir li ek reconette li couma le Roi messianik.

3:suscription—Kifer certain psaume ena bann suscription (setadir dé-trois parole avant)? Souvent sa faire nou koné kisannla ki’nn ecrire sa psaume-la, ou-soit dan ki situation li ti compose sa, pareil couma dan Psaume 3. Kitfois sa explik aussi kifer inn ecrire sa psaume-la ou-soit kan pou servi li (Psaume 4 ek 5), ek sa aussi donne bann l’instruction pou la musik ki accompagne sa psaume-la (Psaume 6).

3:2—Ki vedir “Sèla”? En general, bann dimoune pensé ki sa represente enn pause ki permette medite en silence, soit zis dan chanté-la, ou-soit dan chanté-la ek la musik-la toulé-deux. Sa pause-la ti permette ki mette l’accent lor sa pensée ou-soit sa sentiment ki ti fek exprimé-la. Li pa necessaire ki nou lire sa mot-la kan nou lire livre Psaumes en publik.

11:3—Ki sa bann fondation ki pé demoli-la? C’est bann fondation lor ki societé humain tini—la loi, l’ordre ek la justice. Kan pena sa trois kitsoz-la, ena desordre social ek pena la justice. Dan sa bann condition-la, enn ‘dimoune ki droite’ bizin mette tou so confiance en Jéhovah.—Psaume 11:4-7.

21:3—Ki ena special avek “enn couronne l’or raffiné”? Pa dire si couronne-la enn vrai couronne ou-soit si li represente la gloire ki David ti gagné en plus a cause tou so bann victoire. Mais sa verset-la, li enn prophetie ki koz lor couronne ki Jésus ti gagné ar Jéhovah en 1914, kan li ti vinn le roi. Parski sa couronne-la en or, sa faire nou comprend ki so règne pou pli bon règne ki ena.

22:1, 2—Kifer David kitfois ti pensé ki Jéhovah ti’nn abandonne li? Bann l’ennemi David ti tellement mette pression lor li ki ‘so leker ti vinn couma la cire ek ti fonde endan li.’ (Psaume 22:14) Kitfois li ti croire ki Jéhovah ti’nn abandonne li. Kan li ti lor poteau, Jésus aussi ti ena mem sentiment. (Matthieu 27:46) Bann parole David montré bien couma enn humain reagir dan enn situation desesperé. Mais kan nou lire so la-priere ki trouve dan Psaume 22:16-21, li clair ki David pa ti perdi so la-foi en Bondié.

Bann leson pou nou:

1:1. Nou bizin evite frequente bann ki pa content Jéhovah.—1 Corinthiens 15:33.

1:2. Fodé pa nou laisse enn jour passé sans ki nou prend le temps pou reflechi lor bann kitsoz spirituel.—Matthieu 4:4.

4:4. Kan nou en colere, li bon ki nou faire attention nou la-langue pou ki nou pa dire kitsoz ki nou pou regretté apré.—Éphésiens 4:26.

4:5. Bann sacrifice spirituel ki nou faire, zot “bann sacrifice la justice” seulement si nou faire zot avek bann bon mobile ek si nou conduite en accord avek seki Jéhovah demandé.

6:5. Loué Jéhovah: pena pli bon raison ki sa pou faire nou envie contigne vive, pa vrai?—Psaume 115:17.

9:12. Jéhovah veille di-sang ki’nn versé pou Li puni bann ki’nn verse sa di-sang-la, mais Li pa blié ‘bann dimoune ki pé crié dan zot souffrance.’

15:2, 3; 24:3-5. Bann vrai adorateur Jéhovah bizin dire la verité ek evite bann fausse serment ek faire palab lor lezot.

15:4. A moins ki nou realisé ki nou finn faire enn promesse ki contraire ar bann l’enseignement la Bible, nou bizin faire tou seki nou kapav pou garde nou parole, mem si sa bien difficile.

15:5. En tant ki bann adorateur Jéhovah, nou bizin faire attention pou pa mal servi l’argent.

17:14, 15. “Bann dimoune dan sa system-la” faire tou seki zot kapav pou gagne bien zot la-vie, pou occupe zot famille, ek pou laisse enn l’heritage derriere zot. Pou David, li ti pli important pou ena enn bon reputation devant lizié Bondié. Sa ti pou permette li ‘trouve So figure,’ setadir gagne faveur Jéhovah. Kan David ti “levé,” dan gramatin, li ti conscient sa bann promesse ek l’assurance ki Jéhovah ti donné-la; lerla li ti pou senti-li ‘satisfait pou trouve So forme,’ setadir David ti pou content ki Jéhovah ti là avek li. Pareil couma David, nou aussi nou bizin fixé nou leker lor bann tresor spirituel.

19:1-6. Si la creation ki pa kapav kozé ni raisonné, donne la gloire Jéhovah, alors ki quantité encore nou ki ena capacité pou pensé, kozé ek adoré, nou bizin donne Li la gloire!—Révélation 4:11.

19:7-11. Tou seki Jéhovah demann nou faire, li bon pou nou!

19:12, 13. Nou bizin faire attention bann erreur ek bann peché ki nou faire par arrogance.

19:14. Nou bizin pa zis prend compte seki nou faire mais aussi seki nou dire ek seki nou pensé.

“A CAUSE MO L’INTEGRITÉ, TO FINN DONNE MOI TO SOUTIEN”

(Psaume 25:1–41:13)

Dan deux premier psaume ki trouve dan sa group psaume-la, David exprime vrai-mem so desir sincere ek so grand determination pou garde so l’integrité. Li chanté: “Moi, mo pou marche dan mo l’integrité.” (Psaume 26:11) Kan li prié pou pardon so bann peché, li reconette: “Kan mo pa’nn dire nanyin, mo bann lezo ti pé deperi tellement mo ti pé plaigné.” (Psaume 32:3) Pou bann ki fidel envers Jéhovah, David donne sa l’assurance-la: “Lizié Jéhovah lor bann dimoune juste, ek so zoreille tann zot supplication pou gagne l’aide.”—Psaume 34:15.

Conseil ki ena dan Psaume 37 ti vrai-mem utile pou bann Israélite ek li aussi utile pou nou ki pé vive dan bann “dernier jour” sa system-la! (2 Timothée 3:1-5) Dan Psaume 40:7, 8, enn prophetie lor Jésus dire: “Ala mo’nn vini, inn ecrire lor moi dan rouleau livre. Mo Bondié, mo finn prend plaisir pou faire to volonté, ek to la-loi li dan fond mo leker.” Dernier psaume dan sa partie-la, li enn la-priere ki David ti faire pou demann l’aide Jéhovah pendant bann l’année bien difficile ki li’nn passé apré so peché avek Bath-Shéba. Li chanté: “Moi, a cause mo l’integrité, to finn soutenir moi.”—Psaume 41:12.

Reponse pou bann question biblik:

26:6—Couma eski, pareil couma David, nou marche autour l’autel Jéhovah? L’autel represente volonté Jéhovah kan Li’nn accepté sacrifice Jésus pou sauve l’humanité. (Hébreux 8:5; 10:5-10) Nou marche autour l’autel Jéhovah kan nou exerce la foi dan sa sacrifice-la.

29:3-9—Kan compare la voix Jéhovah ar enn l’orage ki faire peur a mesure ki li deplacé, ki sa representé? Sa represente la force extraordinaire ki Jéhovah ena.

31:23—Couma eski Jéhovah recompense bien enn dimoune ki ena l’orgueil? Sa recompense-la, c’est punition. Enn dimoune juste ki faire bann peché mais pa par expré, gagne so recompense kan Jéhovah discipline li. Mais parski enn dimoune ki ena l’orgueil pa quitte so mauvais chemin, so recompense c’est enn punition severe ar Jéhovah.—Proverbes 11:31; 1 Pierre 4:18.

33:6; note —Ki été “l’esprit,” ou-soit “souffle” la bouche Jéhovah? C’est la force active, ou-soit l’esprit saint, ki Jéhovah ti servi pou crée le ciel physik. (Genèse 1:1, 2) Appel sa, l’esprit so la-bouche, parski pareil couma enn souffle bien fort, Jéhovah kapav envoye li bien loin pou faire seki Li envie.

35:19—Ki David ti pé rod dire kan li ti prié pou ki bann ki ena la haine pou li, pa pese lizié entre zot? Kan so bann l’ennemi ti pou pese lizié entre zot, sa ti pou montré ki zot ti bien content ki zot bann plan rempli ar mechanceté ti reussi. David ti prié Jéhovah ki sa pa arrivé.

Bann leson pou nou:

26:4. Li bon ki nou evite frequente bann ki cachiette zot identité dan bann chat rooms lor Internet, bann ki dan lekol ou-soit dan travail faire coumadir zot nou camarade mais ki ena bann mauvais l’intention, bann apostat ki faire semblant ki zot sincere, ek bann ki amenn enn double la-vie.

26:7, 12; 35:18; 40:9. Nou bizin loué Jéhovah en publik pendant bann reunion.

26:8; 27:4. Eski nou content al reunion?

26:11. Kan li ti koz lor so determination pou garde so l’integrité, David ti aussi demann Jéhovah pou couvert so peché. Nou aussi nou kapav garde nou l’integrité mem si nou imparfait.

29:10; note. Kan Li assize lor “deluge” ou-soit “l’ocean ki dan le ciel,” Jéhovah montré ki Li ena enn control total lor so puissance.

30:5. L’amour, c’est qualité principal ki Jéhovah ena—pa la colere.

32:9. Fodé riss la corde ki attaché ar so la-tête, ou-soit servi enn fouette pou ki enn bourrik obeir. Jéhovah pa’lé nou vinn couma sa bourrik-la. Li plutot envie ki nou choisir pou obeir Li parski nou finn comprend so volonté.

33:17-19. Okenn system humain, mem ki quantité pouvoir li ena, pa kapav sauve nou. Nou bizin mette nou confiance dan Jéhovah ek dan so Royaume.

34:10. Sa li enn grand l’assurance pou bann ki mette Royaume Bondié en premier dan zot la-vie.

39:1, 2. Kan bann dimoune mauvais rod bann renseignement pou faire di-tort nou bann frere ek soeur, li bon ki nou ‘attache nou la-bouche’ ek pa dire nanyin.

40:1, 2. Kan nou garde nou l’espoir en Jéhovah, sa kapav aide nou pou faire face ar depression ek pou sorti “dan enn trou kot de l’eau faire tapage, dan la boue ki dan fond trou-la.”

40:5, 12. Ni bann malheur, ni nou bann faiblesse personnel, mem ki quantité zot été, pa pou faire nou abatte, si nou pa blié ki bann benediction ki nou gagné, zot ‘pli beaucoup ki nou kapav raconté.’

“Anou beni Jéhovah”

Sa 41 psaume ki ena dan sa premier partie-la, zot bien reconforte nou ek encourage nou, pa vrai? Ki nou pé passe par bann l’epreuve ou-soit ki nou conscience pé fatigue nou, nou kapav gagne la force ek l’encouragement dan sa partie Parole Bondié ki puissant-la. (Hébreux 4:12) Dan sa bann psaume-la, ena bann renseignement ki donne nou enn bon direction dan nou la-vie. Plusieurs fois nou gagne l’assurance ki n’importe ki difficulté ki nou kapav gagné, Jéhovah pa pou abandonne nou.

Sa premier partie psaume-la termine avek sa bann parole-la: “Anou beni Jéhovah, Bondié Israël depuis touletan ek pou touletan. Amen ek Amen.” (Psaume 41:13) Apré ki nou finn examine sa premier partie psaume-la, eski nou pa senti-nou poussé pou beni, ou-soit loué Jéhovah?

[Note]

[L’encadré page 30]

Si la creation ki pena la vie, donne la gloire Jéhovah, alors ki quantité encore nou, nou bizin donne Li la gloire!

[Zimage, page 29]

Pa laisse enn jour passé sans ki ou prend le temps pou reflechi lor bann kitsoz spirituel

[Zimage, page 31]

David ti compose la plupart sa 41 premier psaume-la

[Zimage, page 32]

Eski ou koné ki psaume ki presente Jéhovah couma nou Grand Berger?

[Remerciement photo page 29]

Zetoile: Avek permission United States Naval Observatory

[Remerciement photo page 31]

Zetoile, page 30, 31 ek 32: Avek permission United States Naval Observatory