Ena confiance dan parole Jéhovah

“Mo finn ena confiance dan to parole.”—PSAUME 119:42.

1. Kisannla ti ecrire Psaume 119, ek ki l’attitude li ti ena?

PAROLE Jéhovah ti ena valeur pou ecrivain Psaume 119. Kitfois c’est Hizqiya ki finn ecrire sa Psaume-la, kan li ti encore enn prince en Juda. Bann sentiment ki ena dan sa cantik-la faire nou pense l’attitude Hizqiya, ki “ti reste attaché ar Jéhovah” kan ki li ti le roi en Juda. (2 Rois 18:3-7) Enn kitsoz ki nou sur, c’est ki ecrivain Psaume 119 ti conscient so bann besoin spirituel.—Matthieu 5:3.

2. Ki theme Psaume 119, ek couma sa cantik-la finn ecrire?

² Enn point important ki nou trouvé dan Psaume 119, c’est valeur ki parole ou-soit message Bondié, ena.a Pou aide bann dimoune rappel parole sa cantik-la, li ti servi bann lettre alphabet. Toulé 176 verset basé lor bann lettre alphabet hébreu. Dan l’hébreu original, toulé 22 couplet ena 8 la-ligne ki commence par mem lettre alphabet. Sa Psaume-la koz lor parole Bondié, so bann la-loi, so bann rappel, so bann chemin, so bann l’ordre, so bann commandement, ek so bann decision. Dan sa lartik-la ek dan prochain lartik, nou pou examine Psaume 119 dapré enn traduction exact ki finn faire a partir l’hébreu. Nou pou guette situation bann serviteur Jéhovah ki finn vive dan le passé ek dan nou lepok, ek sa pou permette nou pli comprend sa cantik ki Bondié finn faire ecrire-la, ek sa pou aussi augmente nou reconnaissance pou la Bible, Parole ki Bondié finn faire ecrire.

Si nou obeir Parole Bondié, nou pou heureux

3. Expliké par enn l’exemple ki sa vedir: ‘sans defaut.’

³ Nou pou konn vrai bonheur a condition ki nou marche dapré la loi Bondié. (Psaume 119:1-8) Si nou faire sa, Jéhovah pou considere nou couma bann dimoune ‘sans defaut dan nou fason vive.’ (Psaume 119:1) Si nou sans defaut, sa pa vedir ki nou parfait, mais sa montré ki nou faire bann grand zeffort pou faire volonté Jéhovah. Noé ti “sans defaut parmi bann dimoune ki ti pé vive dan so lepok,” parski li ti “marche avek vrai Bondié.” Parski sa serviteur fidel-la ti faire seki Jéhovah ti demann li, Bondié ti sauve li ek so famille, kan ti ena deluge. (Genèse 6:9; 1 Pierre 3:20) Nou aussi pareil, nou pou sauvé kan Bondié pou detruire sa lé-monde mauvais-la, a condition ki nou ‘garde bien bann l’ordre Bondié,’ ek nou faire so volonté.—Psaume 119:4.

4. Ki nou bizin faire pou nou heureux ek pou nou reussi dan nou la-vie?

⁴ Jamais Jéhovah pa pou quitte nou si nou ‘donne Li louange avek enn leker droite,’ ek si ‘nou contigne garde so bann la-loi.’ (Psaume 119:7, 8) Bondié pa ti abandonne Josué, ki ti dirige nation Israël. Josué ti obeir l’instruction ki li ti gagné pou ‘lire dan livre la-loi, la-nuit li-jour, pou li kapav faire tou seki ti ecrire ladan.’ Sa ti permette li pou reussi ek pou agir avek sagesse. (Josué 1:8) Kan li ti pré pou mort, Josué ti pé encore donne Bondié louange, ek li ti kapav rappel bann Israélite: “Zot konn bien avek tou zot leker ek tou zot nâme ki pena enn sel parole parmi tou bann parole ki Jéhovah zot Bondié finn dire zot, ki pa finn realisé.” (Josué 23:14) Pareil couma Josué ek ecrivain Psaume 119, nou aussi nou pou heureux ek nou pou reussi dan nou la-vie, si nou donne louange Jéhovah, ek si nou ena confiance dan so parole.

Parole Jéhovah garde nou pur

5. (a) Couma eski li possible pou reste pur lor plan spirituel? (b) Ki l’aide enn jeune kapav gagné, si li finn faire enn peché grave?

⁵ Nou kapav vinn pur lor plan spirituel si nou faire attention pou obeir parole Bondié. (Psaume 119:9-16) Nou kapav faire sa, mem si nou bann parent pa finn donne nou enn bon l’exemple. Mem si so papa ti adore bann zidole, Hizqiya ti ‘purifié so chemin,’ kitfois parski li pa ti suive bann pratik païen. Mais supposé ki enn jeune ki pé servi Bondié, faire enn peché grave. Ki li bizin faire? Si li repenti, li prié Jéhovah ek li rod l’aide so bann parent ek bann ancien dan congregation, sa kapav aide li pou vinn couma Hizqiya ek pou ‘purifié so chemin ek reste lor so garde.’—Jacques 5:13-15.

6. Ki deux femme ti ‘purifié zot chemin ek ti faire attention pou obeir parole Bondié’?

⁶ Mem si Rahab ek Ruth ti vive bien longtemps avant ki ti ecrire Psaume 119, zot ti ‘purifié zot chemin.’ Rahab ti enn prostitué cananéen, mais li ti vinn enn adorateur Jéhovah, ki ti ena enn grand la-foi. (Hébreux 11:30, 31) Ruth, enn Moabite, ti abandonne so bann bondié, li ti servi Jéhovah ek li ti obeir la Loi ki Li ti donne nation Israël. (Ruth 1:14-17; 4:9-13) Sa deux femme ki pa ti Israélite-la, ti ‘faire attention pou obeir parole Bondié’ ek zot ti gagne enn grand privilege pou faire partie parmi bann ancetre Jésus.—Matthieu 1:1, 4-6.

7. Couma Daniel ek trois lezot jeune Hébreux ti laisse enn bon l’exemple kan zot ti garde zot pur lor plan spirituel?

⁷ ‘L’intention leker enn dimoune, li mauvais depuis so jeunesse,’ mais bann jeune kapav amenn enn la-vie pur, mem dan sa lé-monde pourri ki Satan pé dirigé-la. (Genèse 8:21; 1 Jean 5:19) Kan Daniel ek trois lezot jeune Hébreux ti en exil en Babylone, zot ‘ti faire attention pou obeir parole Bondié.’ Par exemple, zot pa ti oulé vinn impur “avek bann mangé bien raffiné ki ti sorti lor la table le roi.” (Daniel 1:6-10) Bann Babylonien ti mange bann zanimo impur, ki ti interdit par la Loi Moïse. (Lévitique 11:1-31; 20:24-26) En general, zot pa ti habitué verse di-sang bann zanimo ki zot ti touyé, alors kan zot ti mange sa la-viande-la, zot pa ti pé obeir la-loi Bondié lor di-sang. (Genèse 9:3, 4) Li pa etonnant ki sa quatre Hébreux-la pa ti mange bann mangé raffiné ki ti sorti la table le roi! Sa bann jeune fidel-la, ti garde zot pur lor plan spirituel ek zot ti laisse enn bon l’exemple.

Parole Bondié aide nou pou reste fidel

8. Ki l’attitude ek ki connaissance nou bizin ena, pou nou comprend ek applik la loi Bondié?

⁸ Li bien important ki nou content parole Bondié, pou nou kapav reste fidel envers Jéhovah. (Psaume 119:17-24) Si nou couma ecrivain sa Psaume-la, nou pou bien envie rod comprend “bann kitsoz extraordinaire” ki ena dan la loi Bondié. Nou pou ena enn ‘grand desir pou konn bann decision ki Jéhovah prend lor la justice’ ek nou pou montré ki nou ‘content so bann rappel.’ (Psaume 119:18, 20, 24) Mem si nou finn fek voué nou la-vie pou servi Jéhovah, eski nou ‘finn developpe enn grand desir pou di-lait pur ki dan parole Bondié’? (1 Pierre 2:1, 2) Nou bizin comprend bann l’enseignement de base ki ena dan la Bible, pou ki nou kapav comprend ek applik la loi Bondié.

9. Couma nou pou reagir si enn dimoune dire nou faire kitsoz ki kont la loi Bondié?

⁹ Nou kapav content bann rappel Bondié, mais ki pou arrivé si bann “prince” koz kont nou pou enn certain raison? (Psaume 119:23, 24) Zordi, souvent bann dimoune ki ena pouvoir, essaye force nou pou nou faire la loi humain passe avant la loi Bondié. Ki nou pou faire si bann dimoune dire nou faire enn kitsoz ki kont volonté Bondié? Nou l’amour pou parole Bondié, pou aide nou reste fidel ar Jéhovah. Pareil couma bann zapotre Jésus kan zot ti gagne persecution, nou aussi nou pou dire: “Nou bizin obeir Bondié couma nou chef plutot ki bann zom.”—Actes 5:29.

10, 11. Donne enn l’exemple pou montré couma nou kapav reste fidel envers Jéhovah malgré bann situation bien difficile.

¹⁰ Nou kapav reste fidel envers Jéhovah mem si nou konn bann situation bien difficile. (Psaume 119:25-32) Pou nou reussi reste fidel envers Jéhovah, nou bizin laisse Li enseigne nou, ek prié sincerement pou nou gagne so direction. Nou bizin aussi choisir ‘chemin fidelité.’—Psaume 119:26, 30.

¹¹ Hizqiya, ki kitfois ti ecrire Psaume 119, ti choisir ‘chemin fidelité.’ Li ti faire sa, mem si li ti entouré par bann fausse adorateur, ek mem si kitfois bann dimoune dan palais ti bouffonne li. Surement, a cause sa situation-la, ‘so nâme ti tellement chagrin ki li pa ti gagne sommeil.’ (Psaume 119:28) Mais Hizqiya ti mette so confiance en Bondié, li ti enn bon lé-roi, ek li “ti faire seki droite dan lizié Jéhovah.” (2 Rois 18:1-5) Nou aussi, si nou compte lor Bondié, nou pou kapav supporte bann l’epreuve ek garde nou fidelité envers Li.—Jacques 1:5-8.

Parole Jéhovah donne nou courage

12. Couma nou kapav personnellement applik Psaume 119:36, 37?

¹² Kan nou laisse nou dirigé par parole Bondié, sa donne nou courage necessaire pou faire face ar bann problem ki nou gagné dan nou la-vie. (Psaume 119:33-40) Nou rod direction Jéhovah avek humilité, pou ki nou kapav garde so la-loi ‘avek tou nou leker.’ (Psaume 119:33, 34) Pareil couma ecrivain sa Psaume-la, nou aussi nou demann Bondié: “Tourne mo leker vers to bann rappel, ek pa vers bann profit,” setadir “bann profit malhonnete.” (Psaume 119:36; note) Pareil couma l’apotre Paul, nou “garde enn conduite honnete dan tou kitsoz.” (Hébreux 13:18) Si enn patron demann nou pou faire enn kitsoz malhonnete, nou rassemblé nou courage pou reste attaché ar bann la-loi Bondié—ek Jéhovah toujours beni sa qualité conduite-la. En realité, Li aide nou pou control tou nou bann mauvais tendance. Alors, anou faire sa la-priere-la: “Faire mo lizié pa arrete lor bann kitsoz ki pa vaut nanyin.” (Psaume 119:37) Jamais nou pa pou envie content bann mauvais kitsoz ki Bondié detesté. (Psaume 97:10) La-priere pou aide nou evite bann kitsoz couma la pornographie ek bann kitsoz ki ena enn rapport avek spiritisme.—1 Corinthiens 6:9, 10; Révélation 21:8.

13. Couma bann disciple Jésus ti gagne courage pou preché kan zot ti gagne persecution?

¹³ Kan nou ena enn connaissance exact lor parole Bondié, sa donne nou confiance pou preche avek courage. (Psaume 119:41-48) Nou bizin ena courage pou nou kapav ‘reponn enn kikenn ki koz en mal lor nou.’ (Psaume 119:42) Parfois, nou pou dan mem situation ki bann disciple Jésus kan zot ti gagne persecution. Zot ti faire sa la-priere-la: “Jéhovah, . . . permette ki to bann esclave contigne koz to parole avek courage.” Ki ti arrivé lerla? “Zot tou ti rempli avek l’esprit saint ek zot ti pé koz parole Bondié avek courage.” Zordi aussi pareil, nou grand le roi Jéhovah donne nou courage pou preche so parole.—Actes 4:24-31.

14. Ki pou aide nou donne temoignage avek courage, pareil couma Paul ti faire?

¹⁴ Nou pou gagne courage necessaire pou preché sans ki nou honté, si nou content “parole la verité” ek si nou ‘obeir la loi Bondié touletan.’ (Psaume 119:43, 44) Si nou serieux dan nou l’etude lor Parole Bondié, nou pou kapav ‘koz lor so bann rappel devant bann lé-roi.’ (Psaume 119:46) La priere ek l’esprit saint Jéhovah aussi, pou aide nou pou dire seki bizin, dan fason ki bizin. (Matthieu 10:16-20; Colossiens 4:6) Paul ti koz avek courage lor bann rappel Bondié avek bann chef ki ti pé dirigé dan premier siecle. Par exemple, li ti donne temoignage gouverneur romain Félix, ki “ti ecoute li koz lor la foi en Jésus Christ.” (Actes 24:24, 25) En plus, Paul ti donne temoignage devant gouverneur Festus ek devant le roi Agrippa. (Actes 25:22–26:32) Avek l’aide Jéhovah, nou aussi nou kapav donne temoignage avek courage, sans jamais nou “honté a cause la bonne nouvelle.”—Romains 1:16.

Parole Bondié encourage nou

15. Couma Parole Bondié encourage nou kan lezot bouffonne nou?

¹⁵ Nou kapav compte lor Parole Jéhovah pou encourage nou. (Psaume 119:49-56) Ena bann moment kot nou bien bizin sa l’encouragement-la. Mem si nou pa peur pou preché en tant ki Témoins de Jéhovah, “bann dimoune orgueilleux”—bann ki agir enn fason orgueilleux envers Bondié—parfois zot ‘bien bouffonne nou.’ (Psaume 119:51) Mais kan nou prié, nou kapav rappel bann kitsoz positif dan Parole Bondié, ek lerla nou kapav ‘gagne enn l’encouragement pou nou-mem.’ (Psaume 119:52) Kan nou pé supplié Jéhovah, nou kapav rappel enn commandement, ou-soit enn principe ki trouve dan la Bible ki kapav encourage nou ek donne nou la force necessaire dan enn moment bien difficile.

16. Ki bann serviteur Bondié pa finn faire malgré persecution?

¹⁶ Bann dimoune orgueilleux ki ti bouffonne ecrivain sa Psaume-la, ti bann Israélite—bann membre enn nation ki ti voué ar Bondié. Sa ti enn la-honte terrible! Mais nou, nou pa envie ressemblé zot; au contraire, anou determiné pou jamais nou pa ecarte-nou ar la-loi Bondié. (Psaume 119:51) Mem devant persecution bann nazi ou bann lezot mauvais traitement ki zot finn gagné depuis sa, plusieurs millier parmi bann serviteur Bondié finn refuse ecarte-zot ar bann la-loi ek bann principe ki trouve dan Parole Bondié. (Jean 15:18-21) Li pa enn fardeau pou obeir Jéhovah parski so bann principe, zot couma bann la-musik ki encourage nou.—Psaume 119:54; 1 Jean 5:3.

Anou montré-nou reconnaissant pou parole Jéhovah

17. Si nou apprecié parole Bondié, ki sa pou pousse nou pou faire?

¹⁷ Nou montré ki nou reconnaissant envers parole Jéhovah kan nou obeir seki ena ladan. (Psaume 119:57-64) Ecrivain Psaume 119, ‘ti promette pou garde bann parole Jéhovah,’ ek mem ‘minuit, li ti levé pou remercié Bondié pou so bann decision droite.’ Si nou sommeil cassé a-soir, sa donne nou enn bon l’occasion pou prié Jéhovah, ek dire Li ki quantité nou reconnaissant envers Li. (Psaume 119:57, 62) Parski nou bien apprecié parole Bondié, sa pousse nou pou rod so l’enseignement et, c’est avek plaisir ki nou pou vinn ‘camarade ar bann ki ena la crainte pou Jéhovah,’ setadir bann dimoune ki ena enn grand respé pou Li. (Psaume 119:63, 64) Pena pli bon frequentation ki sa lor la terre!

18. Couma Jéhovah reponn nou bann la-priere kan ‘la corde bann mauvais dimoune pé entoure nou’?

¹⁸ Kan nou prié Jéhovah avek tou nou leker ek kan nou demann Li avek humilité pou enseigne nou, nou pé ‘calmé colere Jéhovah,’ pou ki nou gagne so faveur. Nou bizin surtout prié kan ‘la corde bann mauvais dimoune pé entoure nou.’ (Psaume 119:58, 61) Jéhovah kapav coupe la corde nou bann l’ennemi ki empeche nou preché, ek lerla Li kapav donne nou liberté pou nou kapav contigne preche Royaume Bondié ek faire bann disciple. (Matthieu 24:14; 28:19, 20) Nou finn trouve sa plusieurs fois dan bann pays kot nou l’activité ti interdit.

Ena la foi dan parole Bondié

19, 20. Dan ki sens eski li bon ki nou gagne bann l’epreuve?

¹⁹ La foi en Bondié ek dan so parole aide nou pou supporte bann l’epreuve ek pou faire so volonté. (Psaume 119:65-72) Mem si bann dimoune orgueilleux finn ‘fann bann fausseté lor li,’ ecrivain Psaume 119 ti chanté: “Li bon ki mo finn gagne bann l’epreuve.” (Psaume 119:66, 69, 71) Couma eski sa kapav bon ki enn serviteur Jéhovah souffert a cause bann l’epreuve?

²⁰ Kan nou gagne bann l’epreuve, surement nou supplie Jéhovah avek tou nou leker, ek lerla sa faire nou vinn pli proche ar Li. Li possible ki nou passe plus lé-temps pou etudié so Parole, ek faire plus zeffort pou mette en pratik seki nou aprann. Sa faire nou vinn plus heureux. Mais ki pou arrivé si, kan nou gagne problem, nou perdi patience ek nou montré ki nou ena l’orgueil? Si nou prié Jéhovah avek sincerité, ek nou laisse so Parole ek so l’esprit aide nou, nou pou kapav corrige sa bann defaut-la, ek faire plus zeffort pou ‘mette enn nouveau personnalité lor nou.’ (Colossiens 3:9-14) En plus, nou la-foi vinn pli fort kan nou supporte bann l’epreuve. (1 Pierre 1:6, 7) Paul ti tire profit dan bann l’epreuve, parski sa ti faire li compte plus lor Jéhovah. (2 Corinthiens 1:8-10) Eski nou laisse souffrance ena enn bon l’effet lor nou?

Faire toujours confiance en Jéhovah

21. Ki arrivé kan Bondié faire bann dimoune orgueilleux gagne honté?

²¹ Grace a parole Bondié, nou kapav ena confiance en Jéhovah. (Psaume 119:73-80) Si nou ena vrai-mem confiance en nou Createur, nou pa pou ena okenn raison pou nou honté. Seulement, a cause seki lezot faire, nou bizin l’encouragement ek kitfois nou envie faire sa la-priere-la: “Faire bann dimoune orgueilleux gagne honté.” (Psaume 119:76-78) Kan Jéhovah faire sa qualité dimoune-la gagne honté, sa faire lezot dimoune trouve zot bann mauvais action, ek lerla grand nom Jéhovah sanctifié. Nou kapav sur ki bann dimoune ki persecute bann serviteur Bondié, pa gagne okenn profit. Par exemple, jamais zot pa finn kapav—ek jamais zot pa pou kapav—elimine bann Témoins de Jéhovah, ki mette zot confiance en Bondié avek tou zot leker.—Proverbes 3:5, 6.

22. Dan ki sens eski ecrivain Psaume 119, ti ena l’impression ki li “couma enn bouteille en la peau, ki dan la fumée”?

²² Grace a parole Bondié, nou confiance en Li vinn pli fort kan nou gagne persecution. (Psaume 119:81-88) Kan bann dimoune orgueilleux ti pé persecute li, ecrivain Psaume 119 ti senti-li “couma enn bouteille en la peau, ki dan la fumée.” (Psaume 119:83, 86) Dan lepok biblik, ti servi bann bouteille ki ti faire avek la peau bann zanimo, pou mette de l’eau, di-vin ek lezot liquid. Si, kan enn dimoune pa ti servi sa bann bouteille-la, li ti mette zot enpandan, pré kot difé, dan enn la-chambre ki ti rempli ar la fumée, zot ti kapav retreci. Eski bann l’epreuve ou-soit persecution pé faire ou senti-ou “couma enn bouteille en la peau, ki dan la fumée”? Si oui, mette ou confiance en Jéhovah ek faire sa la-priere-la: “Dapré to l’amour fidel, garde moi en vie, pou ki mo obeir bann rappel ki sorti dan to la-bouche.”—Psaume 119:88.

23. Ki nou finn examiné dan Psaume 119:1-88, ek ki question nou kapav pose nou-mem pendant ki nou pé attann pou etudié Psaume 119:89-176?

²³ Nou finn examine premier moitié Psaume 119, ek nou finn trouvé ki Jéhovah manifesté so l’amour fidel envers so bann serviteur parski zot ena confiance en so parole ek zot content so bann rappel, so bann commandement, ek so bann la-loi. (Psaume 119:16, 47, 64, 70, 77, 88) Li content kan bann ki attaché ar Li, faire attention pou obeir so parole. (Psaume 119:9, 17, 41, 42) Pendant ki ou pé attann pou etudié le reste sa joli Psaume-la, ou kapav demann ou-mem: ‘Eski mo vrai-mem laisse parole Jéhovah eclaire mo chemin?’

[Note]

Ki ou pou reponn?

• Ki nou bizin faire pou nou konn vrai bonheur?

• Couma parole Jéhovah garde nou pur lor plan spirituel?

• Couma parole Bondié donne nou la force ek encourage nou?

• Kifer nou bizin ena la foi en Jéhovah ek dan so parole?

[Zimage, page 4]

Ruth, Rahab, ek bann jeune Hébreux ki ti al en exil en Babylone, ‘ti faire attention pou obeir parole Jéhovah’

[Zimage, page 5]

Avek courage, Paul ti ‘koz lor bann rappel Bondié devant bann lé-roi’