Harmaguédon—Enn la-fin catastrophik?

HARMAGUÉDON! Ki sa mot-la faire ou pensé? Enn grand destruction ou-soit enn grand explosion dan l’univers? Dan beaucoup pays, “Harmaguédon” li enn parmi bann rare l’expression biblik ki dimoune servi dan zot langage toulé-jour. Pou zot, sa mot-la, li surtout decrire bann situation bien triste ki le monde pé attann. Cinema ek television finn souvent presente bann scene ki faire bien peur, pou montré enn “Armageddon” ki pou arrivé dan l’avenir. Pou bann dimoune, sa mot-la, li entouré ar mystere ek ena enn quantité kitsoz ki mal interpreté. Ena beaucoup different l’idée lor seki Harmaguédon vedir, mais la plupart pa en accord avek seki nou aprann dan la Bible, livre kot sa l’expression-la sorti.

Parski la Bible etabli enn rapport entre Harmaguédon ek “la fin du monde,” eski ou pa d’accord ki li important pou comprend bien seki sa mot-la vedir? (Matthieu 24:3, TOB) Eski li pa logik pou tourne vers Parole Bondié, pli grand source la verité, pou koné ki été vrai-mem Harmaguédon ek ki so consequence pou été lor ou ek ou famille?

Si ou faire sa, ou pou trouvé ki Harmaguédon pa pou amenn la fin du monde, mais plutot enn commencement pou bann dimoune ki envie vive dan enn nouveau lé-monde kot pou ena la justice. Ou pou comprend pli bien sa l’enseignement important ki ena dan la Bible-la, kan ou lire prochain lartik ki expliké ki été vrai-mem Harmaguédon.

[L’encadré lor page 3]

DAPRÉ OU, KI ÉTÉ HARMAGUÉDON?

• Enn la-guerre nucleaire

• Enn catastrophe ki pou detruire l’environnement

• Enn collision entre enn kitsoz ki sorti dan l’espace ek la terre

• Destruction bann mauvais dimoune par Bondié