Har-Maguédôn​—Ki certain dire lor la?

“Ek zot finn rassemblé bannla dan enn place ki, en hébreu, appel Har-Maguédôn.”​—RÉVÉLATION 16:16, English Standard Version.

KI OU pensé kan ou tann mot “Har-Maguédôn”? Surement bann zimage enn grand catastrophe vinn dan ou l’esprit. Mem si sa mot-la parette enn sel fois dan la Bible, souvent radio, television, la gazette, ou-soit Internet ek bann chef religieux koz lor la.

Eski seki bann dimoune souvent pensé lor Har-Maguédôn en accord avek seki la Bible enseigné? Li vaut la peine ki ou konn reponse sa question-la. Kifer? Parski la verité lor Har-Maguédôn kapav faire ou arrete peur pou nanyin, faire ou trouve l’avenir dan enn fason pli clair, ek influence fason ki ou considere Bondié.

Examine sa trois question ki ena dan sa lartik-la ek compare seki bann dimoune pensé en general lor Har-Maguédôn avek seki la Bible vrai-mem enseigné.

1. ESKI HARMAGUÉDÔN C’EST ENN CATASTROPHE KI BANN ZOM POU PROVOKÉ?

Bann journaliste ek bann dimoune ki faire bann recherche souvent servi mot “Har-Maguédôn” pou koz lor bann catastrophe ki bann dimoune provoké. Par exemple, zot finn dire ki Premier ek Deuxieme Guerre mondial ti Har-Maguédôn. Apré sa bann la guerre-la, bann dimoune ti tracassé pangar l’Amérique ek l’Union soviétique lance bann bombe atomik sakenn lor so camarade. Bann media ti appel sa la guerre ki ti kapav arrivé-la enn “ Har-Maguédôn thermonucléaire, ” setadir enn la guerre ki provoké par bann zarme nucleaire. Zordi, bann ki faire recherche peur pangar pollution amenn bann grand changement dan climat la terre. Zot averti bann dimoune ki pou ena enn “climat Har-Maguédôn.”

Seki pou arrivé dapré bann dimoune: Bann dimoune ena enn controle total lor l’avenir la terre ek la vie ki lor la. Si bann gouvernement pa agir avek sagesse, la terre pou konn bann degat ki pa pou kapav reparé.

Seki la Bible enseigné: Bondié pa pou permette ki bann dimoune detruire la terre. La Bible donne nou l’assurance ki Jéhovaha pa finn crée la terre “pou nanyin.” Au contraire, Li’nn crée la terre “pou ki dimoune reste lor la.” (Isaïe 45:18) Au lieu ki Li pou permette ki bann dimoune ravage la terre, Bondié pou “detruire bann ki pé detruire la terre.”​—Révélation 11:18.

2. ESKI HAR-MAGUÉDÔN C’EST ENN CATASTROPHE NATUREL?

Parfois bann journaliste servi mot “Har-Maguédôn” pou faire reference ar bann grand catastrophe naturel. Par exemple, en 2010, enn rapport ti koz lor “‘Har-Maguédôn’ dan Haïti.” Li ti faire reference ar sa grand tremblement de terre ki ti faire beaucoup degat dan sa pays-la ek ki ti faire beaucoup dimoune souffert ek perdi la vie. Bann journaliste ek bann dimoune ki faire bann film applik sa mot-la pa zis ar bann l’evenement ki’nn deja arrivé, mais aussi ar bann l’evenement ki zot peur pou arrivé dan l’avenir. Par exemple, zot finn servi mot “Har-Maguédôn” pou decrire bann consequence ki zot pensé kapav ena si enn astéroïde faire collision ar la terre.

Seki pou arrivé dapré bann dimoune: Har-Maguédôn c’est enn l’evenement ki pou arrivé enn coute coumsa ek pou touye tou dimoune sans faire okenn difference. Ou pa pou kapav faire nanyin pou protege ou-mem.

Seki la Bible enseigné: Har-Maguédôn li pa enn l’evenement ki pou touye tou dimoune sans faire okenn difference. Au contraire, kan pou ena Har-Maguédôn, zis bann mauvais dimoune ki pou mort. La Bible promette ki bientot bann ‘mauvais dimoune nepli pou existé; oui, nou pou rod zot dan zot place, mais zot pa pou la.’​—Psaume 37:10.

3. ESKI BONDIÉ POU DETRUIRE LA TERRE KAN POU ENA HAR-MAGUÉDÔN?

Beaucoup dimoune ki croire dan Bondié pensé ki pou ena enn dernier la guerre entre le bien ek le mal ek sa pou amenn destruction nou planete. Dapré enn sondage ki ti faire en Amérique par Princeton Survey Research Associates, 40 pour cent bann adulte ti dire ki zot croire ki la terre pou detruire dan “enn la guerre kan pou ena Har-Maguédôn.”

Seki bann dimoune enseigné: Bann dimoune pa finn crée pou vive lor la terre pou touletan, ni ki la terre finn crée pou duré pou touletan. Bondié finn crée bann dimoune pou ki kan arrive enn certain moment zot mort.

Seki la Bible enseigné: La Bible dire dan enn fason clair ki Bondié “finn pose la terre lor so bann base bien fixe; jamais, oui jamais li pa pou bougé.” (Psaume 104:5) Concernant bann habitant la terre, la Bible dire: “Bann dimoune juste pou possede la terre, ek zot pou reste lor la pou touletan.”​—Psaume 37:29.

Alors, li bien clair ki bann l’idée ki beaucoup dimoune ena lor Har-Maguédôn pa en accord avek la Bible. Alors, Har-Maguédôn ki li été vrai-mem?

[Note]