Eski ou pé prepare-ou pou gagne la vie sauve?
“Rente dan l’arche, toi ek to famille, parski to-mem sa dimoune droite ki mo finn trouvé parmi sa generation-la.”—GENÈSE 7:1.
1. Dan lepok Noé, ki disposition Jéhovah ti prend pou sauve la vie bann dimoune?
DAN lepok Noé, Jéhovah “ti amenn enn deluge lor enn lé-monde mauvais,” mais Li ti aussi prend bann disposition pou sauve la vie bann dimoune. (2 Pierre 2:5) Vrai Bondié ti donne Noé bann instruction bien clair pou li kapav faire enn l’arche, ki ti pou sauve la vie bann dimoune a travers enn deluge ki ti pou vinn lor la terre. (Genèse 6:14-16) En tant ki fidel serviteur Jéhovah, Noé “ti faire dapré tou seki Bondié ti’nn donne li l’ordre pou faire.” Oui, “li ti faire exactement seki ti’nn dire li faire.” Zordi, c’est en partie grace a l’obeissance Noé ki nou vivant.—Genèse 6:22.
2, 3. (a) Couma bann dimoune ki ti vive dan lepok Noé ti reagir kan zot ti trouve Noé pé faire l’arche? (b) Ki confiance Noé ti ena kan li ti rente dan l’arche?
2 Li pa ti facile pou faire l’arche. Surement beaucoup dimoune ti etonné kan zot ti trouve seki Noé ek so famille ti pé faire. Pourtant, sa pa ti assez pou convaink zot ki zot ti bizin rente dan sa l’arche-la pou zot sape zot la-vie. Finalement, Bondié finn perdi patience ar sa lé-monde mauvais-la.—Genèse 6:3; 1 Pierre 3:20.
3 Apré ki Noé ek so famille ti travail bien dur pendant beaucoup l’année pou faire l’arche, Jéhovah ti dire Noé: “Rente dan l’arche, toi ek to famille, parski to-mem sa dimoune droite ki mo finn trouvé parmi sa generation-la.” Avek la foi ek confiance dan parole Jéhovah, “Noé ti rente dan l’arche, ensam avek so bann garson ek so madame, ek bann madame so bann garson.” Jéhovah ti ferme la porte pou protege so bann serviteur. Kan deluge ti vini, l’arche ti moyen ki Bondié ti servi pou sauve la vie bann dimoune.—Genèse 7:1, 7, 10, 16.
Bann ressemblance ki ena entre lepok Noé ek nou lepok
4, 5. (a) Avek ki kitsoz Jésus ti compare lepok so presence? (b) Ki ressemblance ena entre lepok Noé ek nou lepok?
4 “Pareil couma li ti été dan lepok Noé, coumsa-mem presence Fils de l’homme pou été.” (Matthieu 24:37) Kan Jésus ti dire sa, li ti montré ki seki ti pou passé pendant so presence invisible ti pou pareil avek seki ti passé dan lepok Noé, ek c’est seki finn arrivé. Surtout depuis 1919, bann dimoune dan tou bann nation finn tann enn message avertissement pareil couma ti ena dan lepok Noé. En general, zot finn ena mem reaction ki bann dimoune dan lepok Noé.
5 Jéhovah ti servi enn deluge pou detruire enn lé-monde “rempli ar violence.” (Genèse 6:13) Surement tou dimoune ti remarké ki Noé ek so famille pa ti prend okenn part dan la violence; au contraire zot ti pé arrange l’arche dan la paix. Là aussi nou trouve enn kitsoz ki pareil avek nou lepok. Zordi, bann dimoune sincere kapav “trouve difference entre enn kikenn ki droite ek enn kikenn ki mauvais, entre enn kikenn ki servi Bondié ek enn kikenn ki pa finn servi Li.” (Malaki 3:18) Bann dimoune ki pena okenn prejugé, admire bann Témoins de Jéhovah, parski bannla honnete, zot bon, zot favorise la paix, ek zot faire zot travail couma bizin. Grace a sa bann qualité-la, zot trouvé ki peuple Bondié pa pareil couma bann lezot dimoune en general. Bann Témoins rejette tou sorte qualité violence ek zot laisse-zot guidé par l’esprit saint Bondié. C’est a cause sa ki zot pratik la justice ek zot ena la paix entre zot.—Isaïe 60:17.
6, 7. (a) Ki bann dimoune dan lepok Noé pa ti realisé, ek couma bann dimoune pareil zordi? (b) Ki l’exemple montré ki en general, bann dimoune reconette ki bann Témoins de Jéhovah zot different?
6 Bann dimoune dan lepok Noé pa ti realisé ki Bondié ti pé soutenir li ek ti pé guide li. Alors, zot pa ti prend message ki li ti pé preché couma enn kitsoz serieux, ek zot pa ti agir dapré l’avertissement ki li ti pé donné. Ki nou kapav dire zordi? Mem si beaucoup dimoune impressionné par l’activité ek conduite bann Témoins de Jéhovah, la plupart pa prend la bonne nouvelle ek bann l’avertissement ki zot annoncé, couma enn kitsoz serieux. Kitfois bann voisin, bann patron, ou-soit bann membre la famille, koz en bien lor bann bon qualité ki bann vrai chrétien manifesté, mais apré zot dire avek regret: “Si seulement zot pa ti bann Témoins de Jéhovah!” Seki sa bann dimoune-la pa realisé, c’est ki sa bann Témoins-la manifesté l’amour, la paix, la bienveillance, la bonté, la douceur, la maitrise de soi ek lezot qualité, parski zot laisse l’esprit saint Bondié guide zot. (Galates 5:22-25) Sa ti bizin pousse bann dimoune pou croire message ki bann Témoins de Jéhovah preché.
7 Par exemple en Russie, bann Témoins de Jéhovah ti pé monte enn la-Salle du Royaume. Enn missié ti’nn arreté pou koz ar enn Témoin ki ti pé travail lor sa chantier-la. Li ti faire sa remark-la: “Sa construction-la pa couma tou construction—personne pa fumé, zot pa zouré, ek personne pa sou! Eski par hasard ou pa enn Témoin de Jéhovah?” Témoin-la ti demann li: “Si mo dire ou non, eski ou pou croire moi?” Missié-la ti reponn dé-suite: “Non, mo pa pou croire.” Dan enn lot la-ville en Russie, le maire ti bien impressionné kan li ti trouve bann Témoins pé monte zot nouveau la-Salle du Royaume. Li ti dire ki avant, li ti pensé ki tou religion pareil, mais apré ki li’nn trouvé ki bann Témoins pa egoïste, mais zot manifesté enn l’amour sincere, li’nn change so fason pensé. Sa c’est zis deux l’exemple ki montré ki bann serviteur Jéhovah zot different avek bann dimoune ki pa suive bann principe la Bible.
8. Ki nou bizin faire si nou envie sapé kan la fin vini?
8 Kan “lé-monde ancien” dan lepok Noé ti pré pou detruire dan deluge, Noé ti enn fidel “predicateur la justice.” (2 Pierre 2:5) Zordi, dan lepok dernier jour sa lé-monde-la, bann serviteur Jéhovah pé faire tou dimoune konn bann principe droite ki Bondié finn etabli. Zot pé preche enn bon nouvel lor possibilité ki bann dimoune ena pou gagne la vie sauve ek rente dan enn nouveau lé-monde. (2 Pierre 3:9-13) Pareil couma Noé ek so famille ti gagne la-vie sauve parski zot ti dan l’arche, zordi, bann dimoune ki envie gagne la vie sauve, bizin ena la foi ek zot bizin contigne frequente ek soutenir l’organisation Jéhovah lor la terre.
Li necessaire ki nou ena la foi pou nou sauvé
9, 10. Kifer li bien important ki nou ena la foi si nou envie sapé kan Jéhovah pou detruire le monde Satan?
9 Le monde ki dan pouvoir Satan pré pou detruire. Ki enn dimoune bizin faire pou sapé kan sa destruction-la vini? (1 Jean 5:19) Premierement, li bizin reconette ki li bizin enn protection. Apré, li bizin accepté sa protection-la. Bann dimoune dan lepok Noé ti contigne zot bann l’activité couma zot ti habitué. Zot pa ti trouve l’importance pou rod enn protection a cause sa destruction ki ti pé vini-la. Zot ti mank enn lot kitsoz encore—la foi dan Bondié.
10 Parkont, Noé ek so famille ti reconette ki zot ti bizin enn protection ek enn delivrance. Zot ti aussi ena la foi dan pli grand le Roi l’univers, Bondié Jéhovah. L’apotre Paul ti ecrire: “Sans la foi, li impossible pou faire [Jéhovah] plaisir, parski enn dimoune ki approche ar Bondié, bizin croire ki Li existé, ek ki Li vinn celui ki recompense bann ki rod Li vrai-mem.” Paul ti ajouté: “Par la foi, Noé, apré ki Bondié ti’nn averti li lor bann kitsoz ki dimoune pa ti encore trouvé, ti montré ki li ti ena la crainte pou Bondié, ek li ti construire enn l’arche pou sauve so famille; ek par sa la-foi-la, li ti condamne le monde, ek li ti herite la justice ki la foi produire.”—Hébreux 11:6, 7.
11. Ki nou kapav aprann lor fason ki Jéhovah ti protege so bann serviteur dan le passé?
11 Pou nou survive la fin sa lé-monde-la, fodé pa nou zis croire ki pou ena enn destruction. Nou bizin aussi ena la foi ek profite tou bann disposition ki Bondié inn prend pou sauve nou. Bien-sur, nou bizin aussi ena la foi dan sacrifice Jésus Christ, Garson Bondié. (Jean 3:16, 36) Seulement, li bon ki nou rappel ki zis bann ki ti dan l’arche Noé ki ti sapé kan deluge ti vini. Li ti pareil aussi pou enn Israélite ki ti faire enn crime sans faire expré. Li ti pou gagne enn protection, a condition ki li sauvé ek li al dan enn la-ville de refuge, ek li reste dan sa la-ville-la ziska la mort grand-pretre. (Nombres 35:11-32) Dan lepok Moïse, kan ti ena dixieme plaie en Égypte, premier-né bann Égyptien ti mort, mais premier-né bann Israélite ti gagne la vie sauve. Kifer? Jéhovah ti donne Moïse sa l’ordre-la: “Zot [bann Israélite] bizin prend inpé di-sang [enn mouton ki ti sacrifié pou la Pâque] ek mette sa lor deux montant ek la-haut lor zot la-porte, dan lakaz kot zot pou mange sa. . . . Ek fodé ki personne pa sorti en dehors l’entrée so lakaz ziska gramatin.” (Exode 12:7, 22) Ki premier né ou pensé ti pou osé ignore sa l’ordre Bondié-la ek sorti en dehors enn lakaz kot finn mette di-sang lor deux montant ek la-haut lor so la-porte?
12. Ki question sakenn bizin pose li-mem, ek kifer?
12 Alors, nou ena bann bon raison pou bien reflechi lor nou situation personnel. Eski nou vrai-mem “endan” setadir eski vrai-mem nou pé accepté ek nou pé profite bann disposition ki Jéhovah inn prend pou protege nou lor plan spirituel? Kan pou ena la grande tribulation, bann dimoune ki’nn rod protection Jéhovah pou extra content ek zot pou reconnaissant envers Li. Mais lezot, zot pou bien chagrin ek zot pou regretté.
Bann changement ki finn faire tigit par tigit prepare nou pou sapé
13. (a) Kifer finn ena bann changement concernant l’organisation bann dan bann congregation? (b) Explik certain changement ki finn ena.
13 Tigit par tigit, Jéhovah finn faire bann changement dan so l’organisation lor la terre. Grace a sa bann changement-la, bann disposition ki Jéhovah finn prend pou protege nou lor plan spirituel, finn vinn pli stable ek pli solid. Depuis 1870 ziska 1932, c’est bann membre congregation ki ti pé voté pou choisir bann ancien ek bann diacre (couma ti appel bann assistant ministeriel longtemps). En 1932, congregation ti’nn arrete voté pou choisir bann ancien, mais zot ti pé voté pou choisir enn comité service pou soutenir enn directeur service ki ti’nn nommé dan congregation. En 1938, ti prend bann disposition pou nomme bann ki servi dan congregation, dan enn fason theocratik. Depuis 1972, College central bann Témoins de Jéhovah gagne bann recommandation, lerla si zot accepté sa, zot envoye bann lettre pou faire bann congregation koné kisannla ki’nn nommé couma ancien ek assistant ministeriel. Avek le temps, College central inn gagne pli beaucoup responsabilité, ek finn faire bann changement pou facilite zot travail.
14. Ki program formation finn commencé en 1959?
14 En 1950, bann frere finn prend en consideration Psaume 45:16, ek zot finn commence enn program formation ki pé contigné ziska zordi. Sa verset-la dire: “Dan place to bann grand dimoune, pou ena to bann garson ek to pou etablir zot couma bann prince lor la terre entier.” Bann ancien ki pé prend la tête dan congregation, pé gagne enn formation pou occupe bann responsabilité zordi dan nou lepok ek apré Har-Maguédôn. (Révélation 16:14, 16) Lekol ministere du Royaume ti formé en 1959. Sa lepok-la, cours-la ti duré pendant enn mois, ek li ti surtout pou bann serviteur congregation, couma avant ti appel bann surveillant president. Zordi, tou bann ancien ek bann assistant ministeriel suive sa cours-la. Ek sa bann frere-la prend la tête pou forme lezot membre dan zot congregation. Sa vedir ki zot tou dan congregation gagne l’aide lor plan spirituel pou vinn plus efficace dan zot ministere en tant ki bann proclamateur la bonne nouvelle.—Marc 13:10.
15. Cite deux kitsoz ki permette congregation reste pur.
15 Bann dimoune ki envie forme partie dan congregation bizin rempli certaine condition. Li normal ki bann dimoune ki bouffonne nou, zot pena zot place dan congregation, pareil couma dan lepok Noé, bann moqueur pa ti ena zot place dan l’arche. (2 Pierre 3:3-7) Surtout depuis 1952, bann Témoins de Jéhovah finn applik pli bien disposition ki protege la congregation. C’est disposition ki finn prend pou exclu bann dimoune ki faire peché ek ki pa repenti. Bien-sur, bann ki repenti sincerement, zot gagne l’aide pou ‘marche lor enn chemin droite.’—Hébreux 12:12, 13; Proverbes 28:13; Galates 6:1.
16. Dan ki condition spirituel peuple Jéhovah été?
16 Si zordi bann serviteur Jéhovah pé prosperé lor plan spirituel, li pa enn surprise, ni enn kitsoz ki’nn arrivé par hasard. Guette ki Jéhovah ti dire par prophete Isaïe: “Guetté! Mo bann serviteur pou mangé, mais zot, zot pou faim. Guetté! Mo bann serviteur pou boire, mais zot, zot pou soif. Guetté! Mo bann serviteur pou dan la joie, mais zot, zot pou honté. Guetté! Mo bann serviteur pou crié dan la joie parski zot leker pou content, mais zot, zot pou crié a cause zot leker pou dan la peine, ek zot pou crié fort, parski zot l’esprit pou troublé.” (Isaïe 65:13, 14) Jéhovah contigne donne nou enn grand quantité mangé spirituel ki arrive dan l’heure ki bizin ek ki aide nou pou reste en bonne santé ek fort lor plan spirituel.—Matthieu 24:45.
Prepare-ou pou sape ou la-vie
17. Ki kitsoz kapav aide nou pou prepare nou pou sape nou la vie?
17 Zordi, plus ki jamais, inn arrive l’heure pou nou “interesse-nou sakenn ar nou camarade, pou encourage sakenn parmi nou pou montré l’amour ek faire bann bon action, sans ki nou neglige nou bann rassemblement, couma certain ena l’habitude, mais anou encourage sakenn parmi nou.” (Hébreux 10:23- 25) Zordi ena plus ki 98,000 congregation dan le monde entier. Si nou contigne reste attaché ar congregation kot nou été ek nou reste bien actif, sa pou prepare nou pou gagne la vie sauve. Nou pou gagne l’aide nou bann frere ek soeur a mesure ki nou faire zeffort pou mette “nouveau personnalité” lor nou, ek pou aide lezot pou konn bann disposition ki Jéhovah inn prend pou sauve nou.—Éphésiens 4:22-24; Colossiens 3:9, 10; 1 Timothée 4:16.
18. Kifer ou bien decidé pou reste attaché ar la congregation?
18 Satan ek so lé-monde mauvais bien envie ki nou quitte la congregation. Mais, nou kapav contigne reste dan l’organisation ek survive kan sa lé-monde-la pou detruire. Anou laisse l’amour pou Jéhovah ek nou reconnaissance pou tou seki Li faire pou nou, pousse nou pou faire tou seki nou kapav pou lutté kont bann zeffort Satan! Si nou medite lor bann benediction ki nou gagné zordi, nou pou bien decidé pou reste fidel envers Jéhovah. Dan prochain lartik, nou pou examine certain parmi sa bann benediction-la.
Ki ou pou reponn?
• Couma nou lepok ressemblé lepok Noé?
• Ki qualité nou bizin ena pou nou sape nou la-vie?
• Ki bann changement ki’nn arrivé tigit par tigit finn renforci bann disposition ki Jéhovah inn prend pou protege nou?
• Couma nou kapav prepare-nou personnellement pou nou sape nou la-vie?
[Zimage, page 8]
Bann dimoune dan lepok Noé pa ti prend message ki li ti pé annoncé couma enn kitsoz serieux
[Zimage, page 9]
Li vaut la peine ki nou prend bann avertissement Bondié couma enn kitsoz serieux
[Zimage, page 10]
Kifer finn crée Lekol ministere du Royaume?
[Zimage, page 11]
Zordi, li bien important ki nou reste attaché ar la congregation