La joie ki nou gagné kan nou marche dan l’integrité

“Benediction Jéhovah—sa-mem ki faire vinn riche, ek Li pa ajoute okenn douleur avek sa.”—PROVERBES 10:22.

1, 2. Kifer nou bizin faire attention ki nou l’esprit pa occupé zis avek seki pou arrivé dan l’avenir?

“Si nou trop pense pou plitar . . . sa pou empeche nou pou profite seki nou ena zordi,” c’est seki enn philosophe américain ti dire. Sa concerne surtout bann zenfant. Tellement zot pense seki zot pou kapav faire kan zot vinn grand, ki zot blié seki zot kapav faire kan zot encore jeune. Ek kan zot al realise sa, inn trop tard.

² Mem bann serviteur Jéhovah kapav ena sa qualité pensée-la. Guette par exemple seki kapav arrivé. En tant ki Témoins de Jéhovah, nou pé attann avek impatience kan Bondié pou realise so promesse pou faire la terre vinn enn paradi. Nou pé attann avek impatience kan pa pou ena maladie, vieillesse, douleur ek souffrance. Li bon ki nou attann sa bann promesse-la, mais ki pou arrivé si tellement nou mazinn bann benediction physique ki nou pou gagné dan l’avenir, ki nou blié bann benediction spirituel ki nou pé gagné zordi? Li pou bien triste! Nou pou kapav facilement decouragé, ek sa pou kapav ‘rann nou leker malade, parski seki nou ti pé attann, pé tardé pou realisé,’ ek pé prend plus lé-temps ki nou ti pensé. (Proverbes 13:12) Bann problem ek bann difficulté ki nou gagné dan nou la-vie kapav faire nou decouragé, ou-soit faire nou commence chagrin nou-mem. Lerla, au lieu ki nou faire face ar nou bann problem, nou commence plaigné. Mais nou kapav evite tousala, si nou medite avek reconnaissance lor bann benediction ki nou pé gagné zordi.

3. Ki nou pou examiné dan sa lartik-la?

³ Proverbes 10:22 dire: “Benediction Jéhovah—sa-mem ki faire vinn riche, ek Li pa ajoute okenn douleur avek sa.” Eski prosperité spirituel bann serviteur Jéhovah, li pa enn benediction ki faire nou content? Anou examine certain benediction spirituel ki nou gagné zordi, ek anou guetté ki sa representé pou sakenn parmi nou. Si nou prend le temps pou reflechi lor bann benediction ki Jéhovah inn donne sa ‘dimoune droite ki marche dan so l’integrité-la,’ sa pou faire nou plus decidé pou servi Jéhovah avek la joie.—Proverbes 20:7.

‘Bann benediction ki faire nou vinn riche’ zordi

4, 5. Ki l’enseignement biblik ou pli content, ek kifer?

⁴ Nou ena enn connaissance exact lor seki la Bible enseigné. En general, bann religion la chrétienté pretann ki zot croire dan la Bible. Pourtant, zot pa d’accord entre zot-mem lor seki li enseigné. Parfois, bann membre mem religion, pena mem l’opinion lor seki la Bible enseigné. Zot situation bien different avek bann serviteur Jéhovah! Nou, n’importe ki nou nationalité, nou culture ou-soit nou l’origine, nou tou nou adore vrai Bondié ek nou servi so nom. Li pa enn bondié ki forme partie dan enn trinité ek ki enn mystere. (Deutéronome 6:4; Psaume 83:18; Marc 12:29) Nou koné aussi ki pa reste beaucoup lé-temps pou reglé pli grand question en rapport avek droit ki Jéhovah ena pou gouverne l’univers. Ek nou tou nou ena nou role pou joué kan nou garde nou fidelité envers Jéhovah. Nou konn la verité lor condition bann dimoune mort. Nou koné aussi ki Bondié pa faire bann dimoune souffert dan enn l’enfer kot ena difé, ni Li envoye zot dan purgatoire.—Ecclésiaste 9:5, 10.

⁵ En plus, nou content pou koné ki nou pa’nn vinn lor la terre par hasard, a cause l’evolution. Au contraire, nou finn crée par Bondié, ek nou finn faire dan so ressemblance. (Genèse 1:26; Malaki 2:10) Enn psalmiste ti dire Bondié: “Mo pou loué toi parski to finn faire moi dan enn fason extraordinaire. Tou seki to faire, li extraordinaire, ek mo nâme konn sa bien.”—Psaume 139:14.

6, 7. Ki bann changement ou-mem ou’nn faire ou-soit ki lezot inn faire dan zot la-vinn, ki’nn faire zot gagne bann benediction?

⁶ Nou rejette bann l’habitude ek bann pratik ki faire nou di-tort. Dan la gazette, dan television, ek dan radio, nou gagne beaucoup l’avertissement kont bann danger ki ena kan fumé, kan boire trop beaucoup, ek kan gagne bann relation sexuel immoral. La plupart du temps, bann dimoune pa prend compte sa bann l’avertissement-la. Mais ki arrivé kan enn dimoune sincere aprann ki Bondié condamne sa bann kitsoz-la ek Li chagrin kan enn dimoune pratik sa? Eh bien, sa pousse li pou arrete faire sa bann mauvais kitsoz-la! (Isaïe 63:10; 1 Corinthiens 6:9, 10; 2 Corinthiens 7:1; Éphésiens 4:30) C’est vrai ki si li arrete pratik sa, c’est surtout pou faire plaisir Jéhovah, mais en mem temps, li gagne bann bienfait. Li pou ena enn pli bon la-santé, ek so l’esprit pou en paix.

⁷ Li bien difficile pou beaucoup dimoune arrete zot bann mauvais l’habitude. Mais kan-mem, ena plusieurs millier dimoune ki faire sa chaque l’année. Zot voué zot la-vie ar Jéhovah ek zot prend bapteme. Coumsa, zot faire tou dimoune koné ki zot finn rejette sa bann pratik ki pa faire Bondié plaisir-la. C’est enn grand l’encouragement pou nou tou, pa vrai? Sa faire nou pli decidé pou rejette enn mauvais conduite ki kapav faire nou vinn esclave peché.

8. Ki conseil ki sorti dan la Bible permette nou vive heureux dan nou famille?

⁸ Enn la-vie famille ki heureux. Dan beaucoup pays, la vie famille pé deterioré. Beaucoup mariage fini par enn divorce, ek souvent bann zenfant bien souffert lor plan affectif. Dan certain pays en Europe, ena apepré 20 pourcent bann famille, kot ena enn sel parent. Couma eski Jéhovah finn aide nou pou marche dan nou l’integrité dan sa domaine-la? Lire Éphésiens 5:22–6:4, ek guette bann bon conseil ki Parole Bondié donne bann mari, bann femme ek bann zenfant. Si nou applik seki finn ecrire dan sa text-la ek dan lezot verset la Bible, sa pou faire nou mariage vinn pli solid. Sa pou aide bann parent aussi pou elevé zot bann zenfant couma bizin, ek sa pou permette zot ena enn la-vie famille ki heureux. Eski sa pa enn benediction ki faire nou content?

9, 10. Couma fason ki nou, nou guette l’avenir, li different avek bann dimoune dan le monde?

⁹ Nou ena l’assurance ki bann problem ki ena dan le monde pou fini bientot. Malgré bann progré dan domaine scientifik ek technologie, ek bann zeffort sincere ki certain dirigeant pé faire, beaucoup problem grave pé reste coumsa-mem. Klaus Schwab, ki finn crée l’organisation Forum économique mondial, finn dire ki “la liste bann difficulté ki ena dan le monde pé contigne augmenté alors ki le temps pou reglé sa bann difficulté-la pé diminué.” Li ti koz lor “bann danger ki pé affecté tou bann pays, couma terrorisme, problem l’environnement, ek situation finance ki pa stable.” Dr. Schwab tire sa conclusion-la: “Zordi, plus ki jamais, le monde bizin faire face ar bann realité. A cause sa, tou dimoune bizin cooperé ek prend bann decision vite pou reglé bann problem.” Alors ki nou finn commence 21^eme siecle, l’avenir bann dimoune en general parette bien sombre.

¹⁰ Nou bien content ki Jéhovah finn prend enn disposition pou reglé bann problem ki ena dan le monde. Li finn etabli Royaume messianik. Jéhovah, vrai Bondié, pou servi sa Royaume-la pou faire ‘la guerre arreté’ ek pou amenn “la paix en abondance.” (Psaume 46:9; 72:7) Jésus Christ, le roi ki Jéhovah finn choisir, ‘pou sape bann dimoune misere, bann ki dan grand chagrin, ek bann ti-dimoune, li pou delivré zot ar bann ki pé faire dominere ar zot, ek aussi ar la violence.’ (Psaume 72:12-14) Kan Royaume Bondié pou dirigé pa pou ena la famine. (Psaume 72:16) Jéhovah “pou souye tou larme dan [nou] lizié, ek la mort nepli pou existé. Dimoune nepli pou en deuil, zot nepli pou ploré ek nepli pou ena douleur. Bann kitsoz avant finn disparette.” (Révélation 21:4) Royaume Bondié finn deja etabli dan le ciel ek bientot li pou prend bann disposition pou tire tou bann problem ki ena lor la terre.—Daniel 2:44; Révélation 11:15.

11, 12. (a) Si, nou rod plaisir, eski nou pou gagne vrai bonheur? Expliké. (b) Ki kitsoz ki faire nou gagne vrai bonheur?

¹¹ Nou koné ki kitsoz faire nou gagne vrai bonheur. Avredir ki kitsoz ki faire nou heureux? Enn psychologue ti dire ki ena trois kitsoz ki faire nou gagne vrai bonheur: (1) plaisir, (2) kan nou engage nou (setadir nou faire bann activité dan nou travail ek dan la famille), ek (3) kan nou la-vie ena enn sens (setadir kan nou faire kitsoz pou lezot). Parmi sa trois-la, li ti considere plaisir couma moins important, ek li ti dire: “Li bon ki nou attire l’attention lor la, parski ena tellement beaucoup dimoune ki consacré zot la-vie pou rod plaisir.” Mais, ki la Bible dire lor la?

¹² Salomon ki ti le roi en Israël dan le passé, ti dire: “Mo’nn dire, oui mo’nn dire dan mo leker: ‘Vini, laisse moi testé toi par la joie. En plus, profite seki bon.’ Ek, guetté! sa aussi, li dan vide. Mo ti dire ar riyé: ‘To fou!’ ek ar la joie: ‘To pa vaut nanyin’ ” (Ecclésiaste 2:1, 2) Dapré la Bible, n’importe ki bonheur nou kapav gagné ar plaisir, li pou duré zis pou enn ti moment-mem. Mais, ki nou kapav dire lor travail? Nou ena pou faire pli bon travail ki existé—preche Royaume Bondié ek faire bann disciple. (Matthieu 24:14; 28:19, 20) Kan nou preche message delivrance ki ena dan la Bible, nou pé participe dan enn travail ki kapav sauve nou prop la-vie ek la vie bann dimoune ki ecoute nou. (1 Timothée 4:16) Parski nou bann “compagnon ki travail avek Bondié,” nou remarké ki “ena plus bonheur kan donné ki kan recevoir.” (1 Corinthiens 3:9; Actes 20:35) Sa travail-la donne nou la-vie enn sens ek permette nou Createur pou reponn sa kikenn ki provok Li-la, setadir Satan le Diable. (Proverbes 27:11) Oui, Jéhovah montré nou ki kan nou reste attaché ar Li, sa faire nou gagne vrai bonheur, enn bonheur ki pou dure pou touletan.—1 Timothée 4:8.

13. (a) Couma eski Lekol ministere theocratik, li enn benediction ki faire nou content? (b) Couma eski ou finn tire profit ar Lekol ministere theocratik?

¹³ Enn program formation ki important ek efficace. Gerhard, enn ancien dan enn congregation Témoins de Jéhovah rappel enn problem ki li ti ena kan li ti jeune. Li dire: “Kan mo ti jeune, mo ti ena beaucoup problem pou kozé. Kan mo ti gagne trac, mo pa ti kapav prononce bann mot couma bizin ek mo ti commence begeyé. Mo ti senti-moi inferieur ar lezot ek mo ti commence gagne enn complexe. Mo parent ti faire moi al suive enn cours pou aprann koz bien, mais zot bann zeffort pa’nn servi nanyin. Mo pa ti ena okenn problem physik, mais moralement mo ti bien affecté. Mais, heureusement ti ena enn disposition extraordinaire ki Jéhovah ti’nn prend—Lekol ministere theocratik. Kan mo ti participe dan sa lekol-la, sa ti redonne moi courage. Mo ti faire tou seki mo kapav pou mette en pratik seki mo ti aprann. Ek sa finn marché! Mo ti commence koz pli bien, mo ti nepli ena complexe, ek mo ti ena plus courage pou preché. Zordi, mo mem kapav faire bann discours publik. Mo bien reconnaissant envers Jéhovah, ki finn donne moi coumadir enn nouveau la-vie a travers sa lekol-la.” Eski fason ki Jéhovah forme nou pou faire so travail, pa donne nou enn bon raison pou nou heureux?

14, 15. Kan nou bizin faire face ar bann grand problem, ki l’aide nou ena? Donne enn l’exemple.

¹⁴ Nou ena bann bon relation avek Jéhovah, ek nou bann frere dan le monde entier soutenir nou. Katrin, ki reste en Allemagne, ti bien tracassé kan li ti tann bann rapport lor enn tsunami ki ti’nn arrivé a cause enn tremblement de terre dan sud-est l’Asie. Kan sa ti arrivé, so tifi ti en Thaïlande. Pendant 32 heure, sa mama-la pa ti koné si so tifi ti encore vivant ou-soit si li ti parmi bann dimoune ki ti’nn blessé ou-soit mort. Chaque l’heure-temps sa chiffre-la ti pé augmenté. Mais finalement, li ti bien soulagé kan li ti gagne enn coup d’telephone pou dire li ki so tifi vivant!

¹⁵ Ki finn aide Katrin pendant sa moment kot li ti pé tracassé-la? Li ecrire: “Mo finn passe la plupart lé-temps pou prié Jéhovah. A chaque fois, mo finn remarké ki quantité la force sa finn donne moi, ek mo l’esprit ti en paix. En plus, mo bann frere spirituel ti vinn visite moi ek ti soutenir moi.” (Philippiens 4:6, 7) Situation sa soeur-la ti pou pire si li ti passe sa moment-la sans l’aide la priere ek sans soutien so bann frere ek soeur spirituel. Nou bann bon relation avek Jéhovah ek so Garson, ek nou l’amitié avek nou bann frere, c’est enn benediction ki nou pa pou gagné lot place. Zot ena trop valeur pou nou prend zot couma bann kitsoz banal!

16. Raconte enn l’experience ki montré ki quantité l’esperance resurrection ena valeur.

¹⁶ L’espoir pou retrouve bann dimoune ki nou content mais ki’nn mort. (Jean 5:28, 29) Enn jeune garson ki appel Matthias ti grandi dan enn famille Témoins de Jéhovah. Mais, li pa ti apprecié sa benediction-la, ek li ti quitte congregation kan li ti enn adolescent. Guette ki li ecrire zordi: “Jamais mo pa finn ena bann conversation serieux avek mo papa. Touletan, nou ti pé la-guerre. Pourtant, mo papa ti envie ki mo ena enn bon la-vie. Li ti bien content moi, ek sa c’est enn kitsoz ki mo pa ti realisé sa lepok-la. En 1996, mo finn retrouve moi pé assize lor rebord so lili, mo ti pé attrape so la-main, ek mo ti pé ploré. Dan sa moment-la mo ti dire li ki quantité mo ti regrette tou seki mo ti’nn faire ek ki mo content li beaucoup. Mais li pa ti kapav tann moi. Li’nn malade pendant enn tipé lé-temps, apré li’nn mort. Si mo vivant kan pou ena la resurrection, mo pou rattrape le temps ki mo finn perdi. Surement mo papa pou content pou aprann ki zordi, mo enn ancien, ek ki mo madame ek moi, nou bann pionnier!” Oui, l’esperance resurrection c’est vrai-mem enn grand benediction!

“Li pa ajoute okenn douleur avek sa”

17. Kan nou medite lor bann benediction ki Jéhovah donne nou, ki l’effet sa bizin ena lor nou?

¹⁷ Jésus Christ ti dire concernant so Papa ki dan le ciel: “Li faire soleil levé lor bann mauvais dimoune ek lor bann bon dimoune, ek Li faire la pluie tombé lor bann dimoune juste ek lor bann injuste.” (Matthieu 5:45) Si Jéhovah beni bann dimoune ki injuste ek ki mauvais, nou sur ki Li pou beni encore plus bann dimoune ki marche dan l’integrité! Psaume 84:11 dire: “Jéhovah pa pou refuse seki bon pou bann dimoune ki marche dan l’integrité.” Kan nou reflechi bien lor l’attention special ki Jéhovah donne bann dimoune ki content Li ek couma Li interessé ar zot, nou leker rempli ar reconnaissance ek la joie, pa vrai?

18. (a) Dan ki sens Jéhovah pa ajoute okenn douleur ar so benediction? (b) Kifer beaucoup serviteur fidel Jéhovah souffert?

¹⁸ C’est grace a “benediction Jéhovah” ki so bann serviteur konn prosperité spirituel zordi. Ek nou sur ki “Li pa ajoute okenn douleur avek sa.” (Proverbes 10:22) Mais alors, kifer eski beaucoup serviteur fidel Jéhovah gagne bann problem ek bann difficulté ki faire zot souffert? Ena trois raison principal. (1) Parski nou imparfait. (Genèse 6:5; 8:21; Jacques 1:14, 15) (2) A cause Satan ek so bann demon. (Éphésiens 6:11, 12) (3) A cause sa mauvais lé-monde-la. (Jean 15:19) Mem si Jéhovah permette ki arrive nou bann malheur, c’est pa Li ki faire sa arrivé. Au contraire, “tou joli don ek tou cadeau parfait sorti la-haut, parski Li sorti kot Papa tou la-lumiere ki dan le ciel.” (Jacques 1:17) Oui, kan Jéhovah donne bann benediction, Li pa ajoute okenn douleur avek sa!

19. Ki pé attann bann dimoune ki contigne marche dan l’integrité?

¹⁹ Pou nou gagne prosperité spirituel, li bien important ki nou approche-nou toujours ar Bondié. Kan nou developpe bann bon relation avek Li, nou ‘pé pose enn bon fondation pou nou-mem pou l’avenir, ek nou pé saisi vrai la-vie’—la vie eternel. (1 Timothée 6:12, 17-19) Dan le monde nouveau ki Bondié pou faire, en plus bann benediction spirituel, nou pou gagne aussi bann benediction physik. Tou bann ki “contigne ecoute la voix Jéhovah,” pou vive enn vrai la-vie. (Deutéronome 28:2) Avek sa determination-la, anou contigne marche dan l’integrité.

Ki ou finn aprann?

• Kifer li pa sage ki nou trop tracassé lor l’avenir?

• Ki bann benediction nou pé gagné zordi?

• Kifer bann serviteur fidel Bondié souffert?