Question bann lecteur

Ki pé faire “bann kitsoz desirable ki sorti dan tou bann nation” rente dan “lakaz” kot ena vrai l’adoration?—Haggaï 2:7.

Jéhovah ti annoncé par prophete Haggaï: “Mo pou sakouye tou bann nation, ek bann kitsoz desirable ki sorti dan tou bann nation pou bizin rentré ek mo pou rempli sa lakaz-la avek la gloire.” (Haggaï 2:7) Eski c’est parski pé sakouye tou bann nation ki “bann kitsoz desirable” ki sorti dan bann nation, setadir bann dimoune sincere, pé tourne-zot vers vrai l’adoration? Non.

Anou guette seki pé sakouye bann nation ek ki consequence sa ena. La Bible dire ki “bann nation finn bouleversé ek bann peuple finn contigne complote enn kitsoz inutile.” (Psaume 2:1) “Kitsoz inutile” ki zot pé contigne ‘comploté,’ ou-soit lor ki zot pé medité, c’est couma pou contigne exerce zot prop l’autorité. Perdi zot pouvoir—sa c’est pli grand menace ki kapav sakouye zot.

Predication ki bann Témoins de Jéhovah pé faire lor Royaume Bondié ki’nn etabli, inn vinn couma enn menace pou bann nation. Apré tou, Royaume Bondié ki dirigé par Jésus Christ pou ‘crase tou bann royaume [ki dirigé par bann humain] ek [pou] fini zot’ (Daniel 2:44) Message condamnation ki forme partie dan nou predication pé sakouye bann nation. (Isaïe 61:2) Ek a mesure ki travail predication pé faire avek enn pli grand zèle partout lor la terre, bann nation pé sakouyé encore plus. Mais, kan Haggaï 2:7 predire ki pou sakouye bann nation, ki sa annoncé pou l’avenir?

Dan Haggaï 2:6, nou lire: “Ala seki Jéhovah, Chef bann l’armée inn dire: ‘Encore enn tigit lé-temps—ek mo pou sakouye le ciel ek la terre ek la mer ek la terre ferme.’ ” L’apotre Paul ti cite sa verset-la kan li ti ecrire: “Li’nn promette kan Li’nn dire: ‘Encore enn fois, mo pa pou sakouye zis la terre, mais le ciel aussi.’ L’expression ‘encore enn fois’ montré ki Jéhovah pou tire bann kitsoz ki Li pé sakouyé parski zot bann kitsoz ki’nn faire [par bann dimoune], pou ki bann kitsoz ki Li pa sakouyé [le Royaume] kapav resté.” (Hébreux 12:26, 27) Oui, tou sa system ki existé zordi-la pou disparette ek monde nouveau ki Bondié pou faire, pou remplace li.

Bann dimoune sincere pé attiré vers vrai l’adoration, mais pa parski pé sakouye bann nation. Seki pé attire zot vers Jéhovah ek so l’adoration, c’est sa mem kitsoz ki pé faire bann nation sakouyé-la. Sa kitsoz-la c’est predication ki pé faire partout lor la terre concernant Royaume Bondié ki’nn etabli. Predication ‘la bonne nouvelle’ attire bann ki ena leker bien disposé vers l’adoration vrai Bondié.—Révélation 14:6, 7.

Message Royaume Bondié, li enn message condamnation ek enn message delivrance. (Isaïe 61:1, 2) Predication sa message-la, li faire deux kitsoz: li sakouye bann nation ek li faire bann kitsoz desirable ki sorti dan bann nation vinn dan la gloire Jéhovah.