Montré ou la-foi par fason ki ou vive

“La foi, sans bann action, li mort.”—JACQUES 2:17.

1. Kifer la foi ek bann action toulé-deux ti important pou bann chrétien dan premier siecle?

En general, bann chrétien dan premier siecle ti montré zot la-foi par fason ki zot ti vive. Disciple Jacques ti donne sa l’encouragement-la tou bann chrétien: “Vinn bann dimoune ki mette la parole en pratik, ek pa bann ki zis tendé.” Li ti ajouté: “Pareil couma enn lekor sans l’esprit, li mort, la foi aussi pareil, sans bann action, li mort.” (Jacques 1:22; 2:26) Apepré 35 an apré ki Paul ti ecrire sa, beaucoup chrétien ti pé contigne montré zot la-foi par bann bon action, mais malheureusement, pa zot tou ki ti pé faire sa. Jésus ti felicite congregation Smyrne; mais guette ki li ti dire avek beaucoup chrétien dan congregation Sardes: “Mo konn to bann action, ek mo koné ki to ena reputation enn kikenn ki vivant, mais to mort.”—Révélation 2:8-11; 3:1.

2. Ki bann chrétien bizin demann zot-mem concernant zot la-foi?

² A cause sa, Jésus ti encourage bann chrétien dan congregation Sardes pou montré l’amour ki zot ti ena au commencement pou la verité ek pou reste lor zot garde lor plan spirituel. Sa conseil-la ti pou applik aussi ar tou seki ti pou lire so bann parole plitar. (Révélation 3:2, 3) Sakenn parmi nou kapav demann li-mem: ‘Ki mo kapav dire lor mo bann action? Eski mo pé faire tou seki mo kapav pou montré mo la-foi dan tou seki mo faire, mem dan bann domaine ki pena enn rapport direct avek predication ek reunion?’ (Luc 16:10) Nou kapav examine beaucoup domaine dan nou la-vie, mais anou guette zis enn: kan nou faire enn ti-fête, surtout kan nou organise enn reception apré enn mariage.

Bann ti-fête kot pena beaucoup dimoune

3. Ki la Bible dire lor bann bon moment ki nou passé avek lezot?

³ La plupart parmi nou bien content kan bann chrétien invite nou pou passe enn bon moment ensam avek zot. Jéhovah Li enn “Bondié heureux” ki envie ki so bann serviteur heureux zot aussi. (1 Timothée 1:11) Li ti faire Salomon ecrire sa dan la Bible: “Moi, mo finn koz en bien lor la joie, parski pena nanyin pli bon lor sa la-terre-la ki bann dimoune mangé-boire ek trouve la joie, ek ki sa accompagne zot dan travail dur ki zot faire toulé-jour dan zot la-vie.” (Ecclésiaste 3:1, 4, 13; 8:15) Nou kapav trouve sa la-joie-la kan nou prend enn repas avek nou famille, ou-soit kan nou passe enn moment avek bann lezot serviteur Jéhovah.—Job 1:4, 5, 18; Luc 10:38-42; 14:12-14.

4. Lor ki kitsoz enn dimoune bizin reflechi kan li pé recevoir bann invité?

⁴ Si ou pé decide pou recevoir bann invité, ou bizin bien reflechi couma sa pou passé, mem si ou’nn invite zis enn tigit dimoune pou prend enn repas ek pou koz enn tigit. (Romains 12:13) Ou pou envie ki “tou kitsoz passe couma bizin,” ek laisse la “sagesse ki sorti la-haut” guide ou. (1 Corinthiens 14:40; Jacques 3:17) L’apotre Paul ti ecrire: “Kan zot pé mangé, kan zot pé boire ou-soit n’importe ki kitsoz ki zot pé faire, faire tou pou la gloire Bondié. Faire attention ki a cause zot, [lezot dimoune] pa tombé.” (1 Corinthiens 10:31, 32) Ki kitsoz surtout ou bizin prend compte? Si ou reflechi lor sa bann kitsoz-la bien a l’avance, sa kapav aide ou ek ou bann invité pou montré zot la-foi dan tou seki zot faire.—Romains 12:2.

Couma sa moment-la pou passé?

5. Kifer enn kikenn ki recevoir bann invité, bizin bien reflechi si li pou servi lalkol, ek si li pou mette la musik?

⁵ Beaucoup dimoune ki recevoir bann invité demann zot-mem si zot pou servi lalkol. Pa obligé servi lalkol pou ki enn ti-fête deroule bien. Surement ou rappel ki Jésus ti nourri enn la-foule ki ti vinn ecoute li—li ti multiplié di-pain ek poisson. La Bible pa dire nou ki li ti faire enn mirak pou donne zot di-vin pou boire, mem si nou koné ki li ti kapav faire sa. (Matthieu 14:14-21) Si ou decide pou servi lalkol, servi sa dan enn fason raisonnable, ek faire sur ki ena aussi bann la-boisson sans lalkol pou bann ki prefere sa. (1 Timothée 3:2, 3, 8; 5:23; 1 Pierre 4:3) Mais jamais pa insisté pou ki enn kikenn boire enn kitsoz ki riské ‘morde li couma enn serpent.’ (Proverbes 23:29-32) Ki nou kapav dire lor la musik ek bann chanté? Si ou decide pou mette la musik, surement ou pou choisir bien ki qualité chanté pou ena, ou pou prend compte so parole ek so battement toulé-deux. (Colossiens 3:8; Jacques 1:21) Beaucoup chrétien finn remarké ki ena enn bon l’ambiance kan zot joué bann Mélodies du Royaume ou-soit kan zot chante bann cantik. (Éphésiens 5:19, 20) Bien-sur, pa blié control volume la musik a chaque fois pou ki sa pa derange bann dimoune ki pé kozé ek pou ki sa pa derange bann voisin.—Matthieu 7:12.

6. Concernant bann conversation ek bann lezot activité, couma enn kikenn ki organise enn ti-fête pou montré ki so la-foi vivant?

⁶ Kan bann chrétien invite zot bann camarade, zot kapav koz lor beaucoup sujet, lire bann zistoire ensam, ou-soit raconte bann l’experience interessant. Si conversation-la prend enn mauvais direction, sa kikenn ki’nn organise sa ti-fête-la pou essaye change conversation-la avek tact. Li pou veillé aussi ki pa enn sel dimoune ki koz tou. Si li remark sa tendance-la, li pou attann enn bon moment pou rente dan sa conversation-la ek pou faire lezot aussi participé. Kitfois li pou invite bann jeune pou exprime zot ou-soit li pou koz lor enn sujet ki permette lezot faire bann different commentaire. Bann jeune ek bann agé pou apprecié sa bann conversation-la. Si ou manifesté la sagesse ek tact kan ou organise enn ti-fête, ou bann invité pou ‘koné ki ou enn dimoune raisonnable.’ (Philippiens 4:5) Zot pou trouvé ki ou ena enn la-foi ki vivant, ek li influence ou la-vie dan tou domaine.

Bann mariage ek bann reception

7. Kifer nou bizin prend compte fason ki nou organise enn mariage ek reception ki pou ena apré?

⁷ Mariage enn chrétien, c’est enn l’occasion special ki faire nou bien content. Bann serviteur Bondié dan le passé, parmi ti ena aussi Jésus ek so bann disciple, ti bien content pou al dan bann l’evenement joyeux coumsa, ek dan bann fête ki ti ena apré. (Genèse 29:21, 22; Jean 2:1, 2) Mais zordi, ki nou bizin faire si nou envie ki reception nou mariage montré ki nou bann chrétien ki ena bon jugement ek ki equilibré? Bann l’experience inn montré ki nou bizin faire beaucoup zeffort pou organise sa reception-la. Bann activité en rapport avek enn mariage, zot faire partie dan la vie ek zot donne enn chrétien possibilité pou montré so la-foi.

8, 9. Couma eski beaucoup kitsoz ki faire dan enn mariage ressemblé seki dire dan 1 Jean 2:16, 17?

⁸ Beaucoup dimoune ki pa konn bann principe biblik ek ki pa prend compte sa bann principe-la, pensé ki enn reception mariage c’est enn l’occasion pou depasse limite ou-soit pou ferme lizié lor bann extravagance. Dan enn magazine européen, guette seki enn nouvelle marié ti dire lor so mariage “royal”: ‘Nou ti faire enn defilé dan enn calesse ki ti rissé par quatre cheval, ek ti ena 12 lezot calesse ki ti suive nou ek enn carrosse kot ti ena enn l’orchestre. Apré sa, ti servi enn extra bon repas ek ti ena enn joli la-musik; ti super! Mo ti la reine sa jour-la, sa-mem ki mo ti revé.’

⁹ Li vrai ki bann coutume zot pa pareil dan tou pays, mais seki sa madame-la inn dire confirme seki l’apotre Jean ti ecrire: “Tou seki ena dan le monde—desir la chair, desir lizié, enn kikenn ki faire l’etalage ar seki so moyen permette li ena—tousala pa sorti kot nou Papa, mais sorti dan le monde.” Eski ou pensé ki enn couple chrétien ki mur pou envie faire enn mariage “royal” avek enn grand reception ki pareil couma dan bann livre zistoire lé-roi-la-reine? Non. Dan tou seki zot faire pou zot mariage, zot montré ki zot prend compte sa conseil-la: “Celui ki faire volonté Bondié, pou reste pou toujours.”—1 Jean 2:16, 17.

10. (a) Pou nou faire enn mariage raisonnable, kifer li important ki nou organise bien bann kitsoz? (b) Ki kitsoz enn couple pou prend en consideration concernant zot bann invité?

¹⁰ Bann couple chrétien envie montré-zot realiste ek raisonnable, ek la Bible kapav aide zot dan sa domaine-la. Li vrai ki jour enn mariage, c’est enn l’occasion bien special, mais zot koné ki sa, c’est zis commencement la vie deux chrétien ki ena la vie eternel devant zot. Zot pa obligé faire enn grand reception. Mais si zot decidé pou faire sa, zot pou calcule bien bann depense ek zot pou reflechi lor ki qualité reception zot pou faire. (Luc 14:28) Dapré la Bible, c’est mari-la ki chef dan zot couple. (1 Corinthiens 11:3; Éphésiens 5:22, 23) Alors, c’est futur mari-la ki responsable fason ki reception-la pou passé. Bien-sur, li pou montré consideration si li prend compte seki so futur madame pensé concernant kisannla zot pou invité ek ki quantité invité pou ena dan zot mariage. Kitfois li pa pou possible pou invite tou zot camarade, ni tou zot famille; zot pou bizin prend certain decision ki raisonnable. Si zot pa kapav invite certain chrétien, zot pou ena confiance ki sa bann chrétien-la pou comprend ek ki zot pa pou offensé.—Ecclésiaste 7:9.

“Responsable reception enn mariage”

11. Ki role ‘responsable enn reception’ joué dan enn mariage?

¹¹ Si enn couple decide pou organise enn reception mariage, couma zot kapav faire sur ki tou pou passe dan enn fason digne? Depuis plusieurs l’année, bann Témoins de Jéhovah finn trouvé ki li bon pou prend mem disposition ki ti ena dan reception ki Jésus ti assisté dan Cana. Ti ena enn kikenn ki ti ‘responsable sa reception-la,’ surement enn zom spirituel ki ti konn prend bann responsabilité. (Jean 2:9, 10) Zordi aussi, enn chrétien ki pou marié pou montré ki li ena la sagesse kan li choisir enn chrétien mur lor plan spirituel pou rempli sa responsabilité important-la. Apré ki li’nn gagne tou bann renseignement lor seki futur marié-la envie faire pou so mariage, responsable reception-la pou kapav veillé ki tou passe couma bizin avant ek pendant reception mariage-la.

12. Ki le marié pou prend en consideration concernant lalkol?

¹² En accord avek seki nou ti examiné dan paragraphe 5, certain couple decidé pou pa servi lalkol dan zot mariage pou ki certain pa boire trop beaucoup ek gate sa reception-la. (Romains 13:13; 1 Corinthiens 5:11) Mais, si zot decide pou servi lalkol, le marié bizin faire sur ki pou ena ou-soit ki pou servi zis enn quantité raisonnable. Ti servi di-vin dan mariage ki Jésus ti assisté dan Cana, ek plitar, li ti faire zot gagne enn di-vin pli bon qualité. Nou remarké ki responsable sa reception-la ti dire: “Tou dimoune servi pli bon di-vin avant, ek apré, kan bann dimoune inn sou, zot servi di-vin faille qualité. Toi, to finn reserve pli bon di-vin ziska asterla.” (Jean 2:10) Nou sur ki Jésus pa finn encourage dimoune pou boire ziska sou, parski li-mem li ti condamne sa. (Luc 12:45, 46) Kan responsable sa reception-la ti dire ki li ti etonné concernant qualité sa di-vin-la, en realité, li ti pé rod dire ki li’nn deja trouve bann invité boire ziska sou. (Actes 2:15; 1 Thessaloniciens 5:7) Alors, le marié ek responsable reception, enn frere ki li kapav faire confiance, pou faire sur ki tou bann invité suive sa conseil-la: “Pa soule-zot ar di-vin, parski ena conduite immoral ladan.”—Éphésiens 5:18; Proverbes 20:1; Hoshéa 4:11.

13. Ki enn couple pou prend compte si zot decide pou ena la musik dan zot mariage, ek kifer?

¹³ Pareil couma dan lezot fête, si ena la musik, pou bizin veille bien ki sa pa empeche bann dimoune pou tann seki lezot pé dire. Enn ancien finn faire sa remark-la: “Enn tipé plitar dan la soirée, kan zot tou pé kozé-riyé pli fort ou-soit kan commence dansé, parfois volume la musik aussi vinn pli fort. La musik douce ki ti ena commencement, kapav vinn tellement fort ki sa empeche bann dimoune kozé. Enn reception mariage c’est enn l’occasion pou passe bann bon moment avek lezot. Li pou bien triste ki enn la-musik ki joué fort gate sa l’occasion-la!” Là aussi, le marié ek responsable reception bizin prend zot responsabilité. Zot pa pou laisse bann musicien, mem si finn paye zot ou-soit non, pou control qualité ek volume la musik. Paul ti ecrire: “Tou seki zot faire en parole ou-soit en action, faire tou au nom nou Seigneur Jésus.” (Colossiens 3:17) Kan bann invité pou retourne kot zot apré enn mariage, eski zot pou ena sentiment ki la musik ki zot finn tendé montré ki bann nouveau marié finn faire tou au nom Jésus? C’est sa sentiment-la ki zot bizin ena.

14. Ki souvenir bann chrétien bizin ena kan zot sorti enn mariage?

¹⁴ Kan bien organise enn mariage, sa kapav laisse bann bon souvenir. Adam ek Edyta, ki marié depuis 30 an, ti dire lor enn mariage ki zot ti’nn allé: “Ou ti bien kapav senti enn l’ambiance chrétien. Ti ena bann cantik ki ti loué Jéhovah, mais ti ena aussi bann lezot bon divertissement. La musik ek dansé, c’est pa sa ki ti pli important. Sa mariage-la ti agreable ek encourageant, ek tou ti passe en accord avek bann principe la Bible.” Oui, bann nouveau marié kapav faire beaucoup kitsoz pou montré zot la-foi par zot bann action.

Bann cadeau mariage

15. Ki conseil biblik nou kapav appliké en rapport avek bann cadeau mariage?

¹⁵ Dan beaucoup pays, bann camarade ek bann famille habitué donne enn cadeau bann ki pé marié. Si ou decide pou faire sa, rappel seki l’apotre Jean ti dire lor “enn kikenn ki faire l’etalage ar seki so moyen permette li ena.” Li ti montré ki sa l’etalage-la ena enn lien avek ‘le monde ki pé al fini’ ek pa avek bann chrétien ki montré zot la-foi par bann action. (1 Jean 2:16, 17) Si bann nouveau marié prend compte seki Jean ti dire, eski zot pou annonce tou dimoune kisannla ki’nn donne zot tel ou tel cadeau? Bann chrétien dan Macédoine ek Achaïe ti faire bann don pou zot frere dan Jérusalem, mais nanyin pa montré ki ti faire konn zot nom. (Romains 15:26) Beaucoup chrétien ki donne enn cadeau mariage ti pou content ki personne pa koné ki c’est zot ki finn donne sa cadeau-la, ni attire l’attention lor zot. En rapport avek sa, re-guette conseil ki Jésus ti donné dan Matthieu 6:1-4.

16. Couma bann nouveau marié kapav evité embarrasse lezot concernant bann cadeau mariage?

¹⁶ Kan dire kisannla finn donne tel ou tel cadeau, sa kapav crée enn l’esprit “competition” entre bann invité ek pousse zot pou rod donne enn cadeau ki pli joli ou-soit ki pli cher. A cause sa, bann nouveau marié ki ena la sagesse pa pou dire en publik kisannla ki finn donne zot tel ou tel cadeau. Coumsa, zot pa pou embarrasse bann invité ki kitfois pa finn ena moyen pou donne zot enn cadeau. (Galates 5:26; 6:10) Bien-sur, li pa mauvais ki bann nouveau marié koné kisannla ki finn donne zot enn cadeau. Bann invité kapav mette enn ti carte lor zot cadeau, mais bann nouveau marié pa pou lire carte-la devant tou dimoune. Kan nou acheté, kan nou donné ou-soit kan nou gagne enn cadeau mariage, nou tou nou gagne l’occasion pou montré ki mem dan sa domaine personnel-la, nou la-foi ena enn l’effet lor nou action.a

17. Ki l’objectif bann chrétien bizin ena concernant zot la-foi ek zot bann action?

¹⁷ Pou nou montré nou la-foi, li pa assez ki nou amenn enn bon la-vie lor plan moral, ki nou assisté bann reunion, ek ki nou preché. Nou tou nou bizin ena enn la-foi ki influence nou dan tou seki nou faire. Oui, nou kapav montré nou la-foi kan nou faire bann kitsoz “a fond” mem dan bann domaine ki nou finn mentionné dan sa lartik-la.—Révélation 3:2.

18. Couma nou kapav mette en pratik seki dire dan Jean 13:17 dan enn mariage ou-soit dan bann ti-fête?

¹⁸ Jésus ti donne so bann zapotre fidel enn bon l’exemple lor l’humilité kan li ti lave zot lipié. Apré sa, li ti dire zot: “Si zot konn sa bann kitsoz-la, zot pou heureux si zot faire li.” (Jean 13:4-17) Dan l’endroit kot nou resté, kitfois li pa necessaire ni normal ki nou lave lipié enn lot dimoune, couma par exemple enn dimoune ki nou finn invité kot nou. Mais, couma nou finn trouvé dan sa lartik-la, ena lezot domaine dan nou la-vie kot nou kapav montré nou la-foi par bann action ki nou faire avek amour ek avek consideration pou lezot. Ek nou kapav faire sa kan nou passe bann bon moment entre bann camarade ou-soit dan bann mariage—soit dan nou mariage, soit kan nou invité dan mariage lezot. Oui dan sa tou bann l’occasion-la, bann chrétien pou envie montré zot la-foi par zot bann action!

[Note]

Couma ou pou reponn?

Couma ou kapav montré ou la-foi

• kan ou pé organise enn ti-fête?

• kan ou pé organise enn ceremonie ou-soit enn reception mariage?

• kan ou pé donne ou-soit kan ou pé gagne enn cadeau mariage?

[Zimage, page 18]

Mem kan ou invite zis enn tigit dimoune, laisse “sagesse ki sorti la-haut” guide ou