Question Ki’nn Soulevé
◼ Si enn couple envie servi la Salle du Royaume pou faire zot mariage, ki kitsoz zot bizin discute avek bann ancien?
Bann mariage ki faire dapré bann principe ki ena dan la Bible faire Jéhovah gagne l’honneur. Sa li surtout vrai en seki concerne bann mariage ki celebré dan la Salle du Royaume, parski bann dimoune considere bann kitsoz ki faire dan la salle couma enn reflet nou l’organisation. Si enn couple demann la Salle du Royaume pou zot mariage, li bon ki bann ancien discute avek couple-la lor certain question, pou ki “tou kitsoz passe couma bizin ek dan l’ordre.”—1 Cor. 14:40.
Enn couple ki envie servi la Salle du Royaume pou faire zot mariage bizin demann l’autorisation par lettre ar comité service la congregation ki servi sa la salle-la. Zot bizin donne sa lettre-la bien en avance ek dire aussi ki date ek ki l’heure zot envie servi la salle-la. Fodé pa ki couple-la blié ki bann ancien pa pou change programme reunion a cause enn mariage. En plus, bann futur marié bizin ena enn bon reputation, ki zot vive en accord avek bann principe Jéhovah ki trouve dan la Bible ek ki juste.
Pou faire sur ki zot mariage reflecté bien lor nou Bondié ki rempli ar dignité, couple-la bizin koz lor bann l’arrangement ki zot inn faire pou zot mariage avek comité service avant ki zot finalise tou. Bann ancien pa pou essaye impose zot bann preference personnel lor maniere pou faire bann kitsoz. Mais si bann ancien trouve bann kitsoz ki pa acceptable dan bann preparatif, couple-la pou bizin accepté zot conseil ek faire bann changement necessaire. Bizin joué zis la musik ki ena dan Mélodies du Royaume ou-soit ki sorti dan nou livre cantik. Si bizin decore la salle ou-soit change fason ki mette bann chaise, couple-la bizin gagne permission pou faire sa. Si pou tire photo ou-soit pou filmé, fodé pa ki sa detourne l’attention l’assistance lor dignité sa l’evenement-la. Bann ancien kapav autorise enn repetition dan la Salle du Royaume tant ki sa pa derange bann lezot activité ki la congregation faire. Pa pou mette okenn l’invitation lor tableau. Mais bann ancien kapav faire enn ti l’annonce pendant reunion service pou informe la congregation concernant sa mariage ki pou faire bientot dan la Salle du Royaume-la.
Mem si pena okenn regle ki bann fille d’honneur ek bann garson d’honneur bizin baptisé, li pa pou approprié si bann ki participe ladan ena enn la vie ki pa en accord ditou avek bann principe la Bible, ou-soit si zot conduite sok l’assistance. Si possible, c’est enn ancien ki bizin prononce discours sa mariage-la. Bann ancien zot bann enseignant qualifié Parole Bondié, alors c’est zot ki pli bien qualifié pou attire l’attention lor bann principe la Bible ki appliké pendant sa l’evenement important-la.—1 Tim. 3:2.
Parski sa mariage-la ena enn l’effet lor reputation sa ancien ki pou faire sa discours mariage-la, li aussi li bizin konn tou detail en rapport avek ceremonie mariage a l’avance. Li pou joinde couple-la pou prend renseignement lor conduite ki zot inn ena pendant zot bann frequentation; couple-la pou bizin franc ek honnete avek sa ancien-la. Si enn dan couple-la ti deja marié avant, li pou bizin donne preuve ki li libre pou remarié dapré bann principe la Bible, ek dapré la loi. (Mat. 19:9) Sa vedir ki li pou bizin montré ancien-la enn copie papier divorce.
Kan enn couple ena enn bon communication avek bann ancien ek ki zot coopere avek sa bann frere-la, mariage-la pou enn l’evenement bien joyeux pou tou dimoune.—Prov. 15:22; Héb. 13:17.