Kouma To Kapav Organiz enn Maryaz ki Donn Zeova Loner?

1-2. Zour to maryaz, ki kitsoz Zeova anvi?

ESKI to pou marye biento? Si wi, nou vremem felisit twa! Sirman to bien okipe pou organiz to maryaz. Zour to maryaz, Zeova anvi ki to zwayea ek ki to ena osi enn zoli lavi apre.—Prov. 5:18; Kantik S. 3:11.

² Li bien inportan ki to maryaz donn Zeova loner. Kifer, ek kouma to kapav fer sa? Li vre ki sa lartik-la li pou bann koup ki pe prepar zot maryaz. Selman, bann prinsip ki nou pou gete, kapav ed nou tou pou donn Zeova loner, sirtou si nou invite pou enn maryaz ouswa si sa koup ki pe marye la pe demann nou bann konsey konsernan zot maryaz.

KIFER TO MARYAZ BIZIN DONN ZEOVA LONER?

3. Kan enn koup pe organiz zot maryaz, ki kitsoz zot bizin fer sir, ek kifer?

³ Kan enn koup pre pou marye ek ki zot pe deside kouma zot pou organiz zot maryaz, bann desizion ki zot pran bizin an-akor ar bann prinsip ki ena dan Labib. Kifer? Parski se Zeova ki’nn kree maryaz. Se Limem ki ti fer premie maryaz kan Li ti marye Adan ek Ev. (Zen. 1:28; 2:24) Alor, kan enn koup pe organiz zot maryaz, zot bizin fer sir ki zot maryaz donn loner Zeova.

4. Pou ki rezon ankor bann koup bizin donn Zeova loner zour zot maryaz?

⁴ Enn lot rezon kifer to bizin donn Zeova loner zour to maryaz, se parski Li to Papa ek Li to meyer Kamarad. (Ebre 12:9) Sirman to anvi gard enn bon lamitie avek Li, pa vre! To pa pou anvi ki zour to maryaz, ouswa enn lot zour, enn kitsoz arive ek ki sa bles to bon Kamarad Zeova! (Ps. 25:14) Kan to reflesi lor tou seki Zeova inn fer pou twa, ek lor tou seki Li pou fer pou twa dan lavenir, eski to pa panse ki Li merite gagn loner zour to maryaz?—Ps. 116:12.

KOUMA TO KAPAV DONN ZEOVA LONER?

5. Kouma Labib kapav ed bann koup pou organiz zot maryaz?

⁵ Labib pa donn enn lalis bann reg ki bizin swiv lor kouma enn seremoni ouswa enn resepsion maryaz bizin deroule. Alor, bann koup kapav organiz zot maryaz kouma zot kontan dapre zot sitiasion, zot kiltir, ouswa kouma abitie fer dan zot landrwa. Selman, bann vre Kretien bizin obeir bann lalwa ki gouvernman mete konsernan maryaz. (Mat. 22:21) Ek kan zot swiv bann prinsip Labib kan zot pe organiz zot maryaz, sa donn Zeova loner ek sa fer Li plezir. Anou gete ki bann prinsip zot bizin rapel.

6. Kifer li inportan ki enn koup obeir bann lalwa ki gouvernman mete konsernan maryaz?

⁶ Obeir bann lalwa ki gouvernman mete konsernan maryaz. (Rom. 13:1, 2) Dan laplipar pei, bann gouvernman ena bann lalwa lor maryaz, ek kan de dimounn desid pou marye, zot bizin swiv sa bann lalwa-la. Si to pe pans pou marye, to bizin konn bann lalwa ki ena dan to pei konsernan maryaz. Ek si to bizin plis ransegnman lor la, pa ezite pou al get bann ansien.b

7. Kouma to maryaz kapav donn laglwar Bondie?

⁷ Seki to’nn organize pou to maryaz bizin donn “laglwar Bondie.” (1 Kor. 10:31, 32) Zour to maryaz, seki to’nn organize bizin montre ki to’nn les twa gide par lespri sin Zeova, pa par lespri sa lemond-la. (Gal. 5:19-26) Dapre Labib, se lemarye ki pou nouvo sef fami, alor se li ki bizin fer sir ki tou pas bien zour so maryaz ek ki so maryaz donn loner Zeova. Kouma enn maryaz kapav donn loner Zeova? Enn diskour maryaz ki baze lor Labib, ek ki fer avek boukou lamour ek respe, pou ed lasistans pou konpran ki maryaz se enn kado Zeova. Koumsa, lasistans pou trouve ki maryaz se enn kitsoz ki sakre. Se akoz sa ki boukou koup demann pou fer zot diskour maryaz dan Lasal Renion. Si to anvi servi enn Lasal Renion pou to diskour maryaz, to bizin ekrir bann ansien enn let ek demann zot si to kapav servi lasal-la.

8. Si to pe fer enn resepsion, kouma to kapav fer sir ki li donn loner Zeova? (Romin 13:13)

⁸ Lir Romin 13:13. Si to desid pou fer enn resepsion, kouma to kapav montre ki to pa’nn les twa inflianse par lespri sa lemond-la? Mo Grek ki’nn servi pou tradir “bann fet kot pena okenn kontrol,” vedir bann fet kot bann dimounn bwar boukou lalkol ek kot ena lamizik ziska bien tar. Si to desid pou servi lalkol, to bizin fer sir ki personn pa bwar tro boukou.c Ek si ena lamizik, fer an-sort ki li pa tro for, pou ki to bann invite kapav koz ar zot kamarad san ki zot bizin kriye. Verifie bien bann parol ek stil lamizik ki to pou pase osi, pou ki sa pa ofans personn.

9. Konsernan bann ti diskour ouswa bann divertisman ki pou ena pandan resepsion, ki kitsoz bann nouvo marye bizin rapel?

⁹ Dan sertin pei, pandan resepsion maryaz, bann kamarad ek bann fami bann nouvo marye, abitie debout pou koz inpe lor zot. Ek parfwa, zot osi pas enn ti video ek bann foto, ouswa pou ena bann lezot divertisman. Tousala kapav fer sa zour spesial la vinn pli zoli. Selman, to bizin fer sir ki tou sa bann kitsoz-la zot ankourazan. (Fil. 4:8) Demann tomem: ‘Eski sa bann kitsoz-la pou ofans lezot? Eski sa pou montre ki nou ena respe pou maryaz?’ Me pli inportan, demann tomem: ‘Eski sa pou donn loner Zeova?’ Mem si li normal ki enn kikenn dir enn kitsoz ki komik kan li pe fer enn ti diskour, fode pa ki li dir enn kitsoz ki vilger, kouma par exanp fer bann badinaz ki ena enn lien ar sex. (Efe. 5:3) Ek si to bann fami ouswa to bann kamarad pou fer enn ti diskour, to bizin fer sir ki zot kone lor ki kitsoz fode pa zot koze.

10. Kifer enn koup bizin ena modesti kan zot pe organiz zot maryaz? (1 Zan 2:15-17)

¹⁰ Pa atir boukou latansion lor tomem. (Lir 1 Zan 2:15-17.) Zeova bien kontan kan so bann serviter fer zefor pou donn Li loner, olie ki zot atir boukou latansion lor zotmem. Alor, enn Kretien ki ena modesti, pou evit depans boukou kas pou “fer letalaz” seki li ena. Ki bienfe to pou gagne si to fer enn ti maryaz? Kitfwa to kapav gagn mem bienfe ki Mike, enn frer ki res Norvez, ti gagne. Li dir: “Nou pa’nn fer okenn det pou nou maryaz. Gras-a sa, nou’nn kapav kontign fer nou servis pionie. Nou ti fer enn ti maryaz, selman li ti bien zoli ek nou’nn gard bann bon souvenir.” Tabitha, enn ser ki res Lenn, dir: “Parski nou ti fer enn ti maryaz, ti ena mwins kitsoz pou organize, ek nou ti ena mwins dezakor. Akoz sa, nou pa ti strese sa kantite-la.”

11. Kouma bann nouvo marye kapav montre ki zot ena modesti konsernan zot linz ek zot laparans? (Get zimaz osi.)

¹¹ Eski to’nn fini deside ki linz to pou mete? Sirman to pou anvi bien zoli sa zour-la! Bann nouvo marye dan lepok Biblik osi ti abiy zot bien zoli zour zot maryaz. (Iza. 61:10) Li vre ki to linz maryaz pou diferan ar seki to abitie mete pou bann lezot lokazion, selman to bizin abiy “avek modesti.” (1 Tim. 2:9) Zour to maryaz, fode pa ki to linz ouswa to laparans vinn kitsoz ki pli inportan pou twa.—1 Pier 3:3, 4.

12. Kifer bann nouvo marye bizin res lwin ar bann kitsoz ki inpir?

¹² Rezet bann koutim ki pa an-akor ar Labib. (Rev. 18:4) Dan bann maryaz azordi, souvan ena bann koutim ki ena enn lien ar fos relizion, ar bann demon, ouswa ar siperstision. Zeova averti nou ki nou bizin res bien lwin ar bann “kitsoz ki inpir.” (2 Kor. 6:14-17) Alor, si to ena bann dout lor bann koutim ouswa bann tradision ki ena dan to pei, fer bann resers pou kone kotsa zot sorti ek rod bann prinsip Labib ki pou ed twa pou pran enn bon desizion.

13. Kouma bann nouvo marye kapav imit Zeova kan zot gagn bann kado?

¹³ Eski li normal dan to pei ki bann invite donn enn kado bann nouvo marye? Si wi, alor kitfwa kado-la pou depann lor ki kantite kas to bann invite ena. Labib ankouraz bann Kretien pou done, parski sa rann zot ere. (Prov. 11:25; Zist. 20:35) Selman, fode pa nou fer nou bann invite santi ki zot oblize donn enn kado, ouswa fer zot santi zot malalez si zot pa’nn donn enn kado ki kout ser. Nou imit nou Papa Zeova kan nou rekonesan pou ninport ki kado ki lezot donn nou ar tou zot leker.—2 Kor. 9:7.

KOUMA POU EVIT OUSWA SIRMONT BANN DIFIKILTE?

14. Ki difikilte sertin nouvo marye inn gagne?

¹⁴ Kan to pe organiz enn maryaz ki pou donn loner Zeova, kitfwa to kapav gagn bann difikilte. Par exanp, kitfwa to pou gagn difikilte pou organiz enn ti maryaz. Charlie, ki res lor bann Zil Salomon, dir: “Li ti bien difisil pou deside kisann-la nou pou invite pou resepsion. Nou ena boukou kamarad, ek dan nou kiltir, nou sipoze invit zot tou.” Tabitha, ki nou ti mansione avan, dir: “Dan mo landrwa, li normal ki bann dimounn fer bann gran-gran resepsion. Pou nou bann paran, sa ti bien difisil pou aksepte ki nou ti pou invit zis 100 dimounn apepre.” Sarah, ki res Lenn, dir: “Pou sertin dimounn, zot kas ek seki bann dimounn panse lor zot, bien inportan. Mo bann kouzin ek kouzinn ti fer bann gran maryaz, alor mo ti santi boukou presion lor mwa pou fer enn pli gran maryaz ki zot.” Ki kitsoz kapav ed twa pou sirmont bann difikilte koumsa?

15. Kan to pe organiz to maryaz, kifer li inportan ki to priye Zeova?

¹⁵ Pandan ki to pe organiz to maryaz, priye Zeova souvan. Kan to ena enn desizion pou pran ouswa kan to pe gagn bann difikilte, priye Zeova lor la. (Fil. 4:6, 7) To kapav demann Li pou ed twa pou pran bann bon desizion, pou res kalm kan to strese, ek osi pou ed twa pou ena kouraz kan bizin. (1 Pier 5:7) Kan to pou trouve kouma Zeova pe reponn to bann lapriyer, to konfians dan Li pou ogmante. Tabitha, ki nou ti mansione avan, dir: “Mo fianse ek mwa nou ti trakase tansion nou gagn bann dezakor ant nou ouswa ar nou fami. Alor, sak fwa ki nou ti zwenn pou organiz nou maryaz, nou ti fer enn lapriyer avan. Lerla, nou ti santi kouma Zeova ti ed nou, ek nou tou nou ti reisi gard nou kalm.”

16-17. Kifer li inportan ki zot explik bien seki zot pe pans pou fer pou zot maryaz?

¹⁶ Explik bien seki zot pe pans pou fer ek fer sa avek respe. (Prov. 15:22) Pandan ki zot pe organiz zot maryaz, zot pou ena bann desizion inportan pou pran. Par exanp, zot pou bizin fixe dat maryaz, koz lor zot bidze, lor kisann-la zot pou invite, ek lor lezot kitsoz ankor. Avan ki zot pran enn desizion, reflesi lor la ansam, ek koz lor bann prinsip Labib ki kapav ed zot ek osi lor bann konsey ki bann frer ek ser ki ena matirite inn donn zot. Kan zot pe koze ant zot, ouswa kan zot pe explik zot fami seki zot pe pans pou fer, zot bizin zanti, rezonab, ek dispoze pou adapte zot. Si enn manb zot fami pros, kouma zot bann paran, demann zot pou fer enn kitsoz zour zot maryaz, ek ki sa li rezonab, esey fer zot plezir. Pa bliye ki se enn zour spesial pou bann-la osi. Selman, si zot pa pou reisi fer seki bann-la pe demande, explik zot kifer, ek fer sa avek respe. (Kol. 4:6) Explik zot fami bien ki zot priorite se ki zot maryaz bizin enn moman zwaye ek ki sa donn Zeova loner.

¹⁷ To kapav trouv sa difisil pou explik to bann paran seki zot inn desid pou fer pou zot maryaz, sirtou si to bann paran pa dan laverite. Selman, avek respe, to kapav ed zot pou konpran kifer zot pe fer zot maryaz koumsa. Santhosh, enn frer ki res Lenn, dir: “Nou fami ti anvi ki nou swiv plizir koutim Indien dan nou maryaz. Alor, mo fianse ek mwa plizir fwa nou’nn bizin explik zot bann desizion ki nou’nn pran. Me kanmem sa, kan nou’nn kapav ek kan sa pa ti kont bann prinsip Labib, nou’nn fer sertin sanzman pou fer zot plezir. Par exanp, pou resepsion, nou ti sanz nou menu ek nou ti fer enn manze ki zot ti kontan. Nou ti osi kennsel bann sante ek bann danse ki nou ti prevwar pou fer, parski zot pa abitie ar sa.”

18. Zour to maryaz, kouma to kapav fer sir ki tou pas bien? (1 Korintien 14:40) (Get zimaz osi.)

¹⁸ Organiz twa bien. Zour to maryaz, si to’nn organiz twa bien, to pou mwins strese. (Lir 1 Korintien 14:40.) Wayne, ki res Taywann, dir: “De-trwa zour avan nou maryaz, nou ti fer enn ti renion avek tou bann ki ti port zot volonter pou ede. Nou ti koz lor kouma bann kitsoz bizin deroule sa zour-la, ek nou ti fer bann repetision osi pou fer sir ki tou pas bien.” Kan tou kitsoz pas dan ler ki to’nn prevwar, sa montre ki to ena respe pou to bann invite.

19. Kouma to kapav fer sir ki to resepsion donn loner Zeova?

¹⁹ Li pou bien itil osi ki to reflesi alavans lor bann problem ki kapav arive ek osi lor kouma to kapav sirmont zot. (Prov. 22:3) Par exanp, si to res dan enn landrwa kot ena bann froder maryaz, reflesi lor seki to kapav fer pou ki sa pa arive. Fer to bann fami ki pa dan laverite kone kouma to maryaz pou deroule, ek si zot panse ki to pou swiv sertin koutim pou to maryaz, explik zot seki to panse lor la. To kapav montre zot lartik « Comment se passe un mariage chez les Témoins de Jéhovah ? » ki lor jw.org. To kapav osi demann enn frer ki ena matirite pou fer “direkter festin,” koumsa li kapav veye ki tou pas bien pandan resepsion. (Zan 2:8) Si to explik li bien kouma to maryaz bizin deroule, li kapav ed twa pou ki tou pas kouma to’nn prevwar ek ki to maryaz donn loner Zeova.

20. Ki kitsoz bann koup bizin rapel konsernan zot maryaz?

²⁰ Kan to reflesi lor tou seki to pou ena pou fer pou organiz to maryaz, kitfwa sa pou stres twa. Selman, fode pa to bliye ki zour to maryaz, se zis enn zour. Se premie zour enn zoli lavi dan servis Zeova ansam avek to konzwin. Alor, fer to maximum pou ki to maryaz li sinp ek ki li donn loner Zeova. Fer Zeova konfians. Avek so led, to pou reisi organiz enn zoli maryaz. Lerla, kan plitar to pou mazinn sa zour-la, to pou rapel bann zoli souvenir, sa pou rann twa ere, ek to pa pou ena okenn regre.—Ps. 37:3, 4.