Bann mariage ki honorable devant Bondié ek devant bann zom
“Ti ena enn reception pou enn mariage dan Cana . . . Jésus ek so bann disciple aussi ti invité dan sa reception-la.”—JEAN 2:1, 2.
1. Ki nou kapav aprann kan nou lire seki Jésus ti faire dan Cana?
Jésus, so mama, ek certain parmi so bann disciple ti koné ki enn mariage honorable kapav amenn la joie parmi bann serviteur Bondié. Jésus Christ ti mem faire enn mariage vinn populaire ek pli joyeux kan li ti faire so premier mirak ki la Bible raconté, pendant sa mariage-la. (Jean 2:1-11) Surement bann chrétien ki envie servi Jéhovah ensam dan la joie, finn deja invite ou pou assisté zot mariage. Ou-soit, kitfois ou-mem ou pou marié ek ou souhaité ki ou mariage reussi. Ou-bien c’est ou camarade ki pou marié ek ou envie aide li pou reussi so mariage. Pou ki enn mariage reussi, ki ou kapav faire?
2. Ki renseignement ena dan la Bible lor bann mariage?
2 Bann chrétien finn trouvé ki bann conseil ki ena dan Parole Bondié, kapav aide bann dimoune ki envie marié. (2 Timothée 3:16, 17) La Bible pa donne bann detail lor fason ki enn mariage bizin deroulé. Kifer? Parski bann coutume ek bann la-loi pa pareil dan tou l’endroit ek dan tou lepok. Par exemple, dan Israël longtemps, pa ti ena okenn ceremonie legal kan deux dimoune ti marié. Jour mariage, garson-la ti prend tifi-la ek ti amenn li dan so prop lakaz ou-soit dan lakaz so papa. (Genèse 24:67; Isaïe 61:10; Matthieu 1:24) Kan li ti faire sa devant tou dimoune, sa ti montré ki finn ena enn mariage. Pa ti ena okenn ceremonie legal couma ena zordi kan deux dimoune marié.
3. Ki l’evenement dan Cana ti bien reussi grace a Jésus?
3 Bann Israélite ti reconette sa action-la couma enn mariage. Apré sa, zot ti ena l’habitude pou faire enn reception, couma nou trouvé dan Jean 2:1. Beaucoup traduction la Bible traduire sa verset-la coumsa: “Ti ena enn mariage dan Cana.” Mais li pli exact kan traduire mot ki’nn servi dan langue original couma “enn reception pou enn mariage” ou-soit enn “repas pou enn mariage.”a (Matthieu 22:2-10; 25:10; Luc 14:8) Seki nou lire dan Jean, faire nou comprend bien ki Jésus ti’nn al dan enn reception ki ti faire pou enn mariage juif, ek li ti faire kitsoz pou faire sa reception-la reussi. Mais nou remark enn kitsoz important: fason ki bann dimoune ti marié dan sa lepok-la, li bien different avek fason ki bann dimoune marié zordi.
4. Ki qualité mariage certain chrétien decidé pou faire, ek kifer?
4 Zordi, dan beaucoup pays, bann chrétien ki envie marié bizin rempli certain condition ki la loi demandé. Si zot rempli sa bann condition-la, zot kapav marié dan n’importe ki fason ki reconette par la-loi. Sa kapav enn ti ceremonie bien simple ki dirigé par enn juge, ou-soit par le maire, ou-bien mem par enn chrétien ki’nn gagne l’autorisation par gouvernement. Certain chrétien decidé pou marié dan sa fason-la ek zot demann bann membre zot famille ou-soit zot bann camarade dan la verité pou vinn assisté sa l’evenement-la, soit en tant ki zot temoin ou-soit zis pou partage zot la-joie. (Jérémie 33:11; Jean 3:29) Ena lezot chrétien ki decidé pou pa organise enn grand reception pou zot mariage ki pou demann zot beaucoup preparation ek ki coute cher. Zot prefere faire enn ti repas zis avek bann camarade proche. Mais n’importe ki nou decidé pou faire dan sa domaine-la, nou bizin reconette ki ena lezot chrétien mur ki kapav ena enn fason pensé ki different avek nou.—Romains 14:3, 4.
5. Kifer beaucoup chrétien demandé ki faire enn discours jour zot mariage, ek lor ki sa discours-la kozé?
5 La plupart chrétien ki decide pou marié, demann enn frere faire enn discours ki basé lor la Bible, jour zot mariage.b Zot reconette ki c’est Jéhovah ki’nn crée mariage ek ki Li donne bann bon conseil lor fason pou reussi enn mariage ek pou vive heureux. (Genèse 2:22-24; Marc 10:6-9; Éphésiens 5:22-33) Ek la plupart couple content ki zot bann camarade ki dan la verité ek zot famille partage zot la-joie pendant sa l’occasion-la. Mais, couma eski nou bizin considere tou sa bann different demarche legal ki nou bizin faire-la ek tou sa bann disposition ek bann coutume local ki ena-la? Dan sa lartik-la nou pou examine fason ki bann mariage deroulé dan different pays dan le monde. Li possible ki certain deroule dan enn fason bien different ar seki ou koné ou-soit ar seki habitué faire dan ou pays. Mais seulement, ou kapav note bann principe ou-soit bann kitsoz ki pareil ek ki important pou bann serviteur Bondié.
Enn mariage honorable, li enn mariage ki legal
6, 7. Kifer nou bizin prend compte seki la loi demandé lor mariage, ek couma eski nou montré sa?
6 Mem si Jéhovah finn crée mariage, bann gouvernement ena certain droit pou control fason ki bann couple marié. Sa li normal parski Jésus ti dire: “Rann César bann kitsoz ki pou César, mais rann Bondié bann kitsoz ki pou Bondié.” (Marc 12:17) L’apotre Paul aussi ti dire: “Tou dimoune bizin soumette ar bann l’autorité superieur, parski okenn l’autorité pa existé si Bondié pa permette; bann l’autorité ki existé occupe sakenn so position dan place kot Bondié finn mette li.”—Romains 13:1; Tite 3:1.
7 Dan la plupart pays, c’est ‘César’ setadir bann gouvernement, ki decidé kisannla gagne droit marié. Alors, kan deux chrétien ki libre dapré la Bible, decide pou marié, zot faire tou pou respecté bann la-loi ki ena dan zot pays. Kitfois pou faire sa, zot bizin gagne enn l’autorisation, presente-zot devant enn officié l’etat civil, ek enregistré zot mariage. Kan César Auguste ti donne l’ordre pou al faire enn ‘l’enregistrement,’ Marie ek Joseph ti obeir. Zot ti bizin al Bethléhem pou al “faire-zot enregistré.”—Luc 2:1-5.
8. Ki bann Témoins de Jéhovah pa faire, ek kifer?
8 Kan deux chrétien marié dan enn fason ki legal, zot prend enn l’engagement devant Bondié. A cause sa, bann Témoins de Jéhovah pa re-celebré zot mariage kan zot faire plusieurs ceremonie legal. Zot pa redire bann voeu kan zot faire zot 25 an ou-soit 50 an l’anniversaire mariage. (Matthieu 5:37) (Certain religion pa reconette enn mariage civil, mem si li legal. Zot dire ki sa mariage-la pa valide tant ki enn pretre pa faire enn ceremonie ou-soit declare couple-la mari ek femme.) Dan beaucoup pays, gouvernement donne permission enn representant Témoins de Jéhovah pou celebré bann mariage. Dan sa cas-la, si possible, li pou faire sa ceremonie legal-la dan la Salle du Royaume ek apré, li pou faire enn discours mariage. La Salle du Royaume c’est enn place kot nou pratik vrai l’adoration. Alors c’est enn bon place pou faire enn discours lor enn disposition ki Jéhovah finn crée.
9. (a) Si enn couple pou marié civil, kitfois ki li pou envie faire apré? (b) Couma bann ancien concerné par bann preparation enn mariage?
9 Dan lezot pays, la loi demann enn couple pou al marié dan enn bureau l’etat civil, couma par exemple dan enn municipalité, ou-soit devant enn officié l’etat civil. Souvent bann chrétien decidé ki zis apré sa l’evenement legal-la, pou ena enn discours mariage dan la Salle du Royaume mem jour ou-soit le lendemain. (Zot pa pou laisse plusieurs jour passé entre zot mariage civil ek sa discours-la, parski apré zot mariage civil, zot inn marié devant Bondié ek devant bann zom, seki vedir devant la congregation aussi.) Si enn couple ki pou marié civil decidé ki pou ena enn discours mariage dan enn la-Salle du Royaume, zot pou bizin avant, demann permission bann ancien ki forme partie dan comité service sa congregation-la. Sa bann ancien-la pou faire sur ki sa couple-la ena enn bon reputation ek aussi ki l’heure zot mariage pa pou derange bann reunion ki habitué faire dan sa la-salle-la. (1 Corinthiens 14:33, 40) Zot pou guetté aussi ki bann preparation sa couple-la kapav demandé pou faire dan la Salle du Royaume. Ek zot pou decidé si pou faire enn communication pou dire ki pé servi la salle pou enn mariage.
10. Si obligé faire enn mariage civil, couma sa influence discours mariage?
10 Sa ancien ki faire discours mariage-la, pou essaye faire sa avek beaucoup sentiment ek dignité, ek pou fortifié spiritualité bann ki dan la salle. Si couple-la inn marié civil avant, ancien-la pou faire koné ki zot inn marié devant la loi César. Si couple-la pa’nn dire bann voeu kan zot ti marié civil, zot kapav faire sa pendant discours mariage.c Si couple-la inn bizin dire bann voeu pendant ceremonie civil, mais ki zot envie dire bann voeu devant Jéhovah ek devant la congregation, zot pou servi bann verbe dan forme passé pou montré ki zot inn fini ‘attaché ensam.’—Matthieu 19:6; 22:21.
11. Dan certain pays, couma bann mariage deroulé, ek eski sa change kitsoz concernant discours mariage?
11 Dan certain pays, dapré la loi, bann couple pa obligé faire enn ceremonie kan zot marié, pa mem devant enn officié l’etat civil. Mariage-la vinn officiel kan couple-la donne enn officié l’etat civil, enn forme enregistrement mariage ki zot inn signé. Lerla, l’etat civil enregistré zot certificat mariage. Dan sa fason-la, couple-la vinn mari ek femme, ek date ki ena lor zot certificat mariage, c’est date zot mariage. Pareil couma dan bann cas ki nou finn mentionné avant, kitfois sa couple-la pou souhaité ki enn frere mur faire enn discours dan la Salle du Royaume zis apré ki zot finn enregistré zot mariage. Frere-la pou faire zot tou koné ki couple-la inn marié parski zot inn fek enregistré zot mariage. Si zot dire bann voeu, zot pou faire sa dapré seki finn dire dan paragraphe 10 ek dan note ki ena enba. Bann ki vinn la Salle du Royaume pou partage la joie sa nouveau couple-la ek pou profite bann conseil ki sorti dan Parole Bondié.—Le chant de Salomon 3:11.
Mariage civil ek mariage ki faire dapré coutume local
12. Ki sa vedir enn mariage coutumier, ek ki li bon bann couple faire apré enn mariage coumsa?
12 Dan certain pays, ena bann dimoune ki marié dapré coutume ki ena dan zot l’endroit ou-soit dan zot tribu, appel sa enn mariage coutumier. Enn mariage coutumier pa vedir ki deux dimoune zis decidé pou vive ensam, mem si sa pratik-la li ena enn certain valeur dan certain l’endroit mais li pa completement legal.d Enn mariage coutumier vedir enn mariage ki faire en accord avek coutume ki pratiké dan enn tribu ou-soit dan enn l’endroit. Dapré sa coutume-la, parfois bizin paye enn dot, setadir enn somme l’argent, ek apré sa, couple-la consideré couma enn couple marié devant la loi ek devant Bondié. Devant la loi, sa mariage-la li valide ek legal. Couple-la kapav al faire enregistré zot mariage apré, ek lerla zot pou gagne enn certificat mariage. Kan zot enregistré zot mariage, sa kapav protege zot lor plan legal en tant ki enn couple, sa protege femme-la si so mari mort ek bann zenfant ki zot pou kapav gagné. La congregation pou encourage tou bann chrétien ki faire enn mariage coutumier, pou enregistré zot mariage pli vite possible. Nou remarké ki enba la Loi mosaïk ti enregistré bann mariage ek bann naissance dan enn fason officiel.—Matthieu 1:1-16.
13. Apré enn mariage coutumier, ki li bon faire concernant enn discours mariage?
13 Enn couple ki marié dan enn fason legal par enn mariage coutumier, vinn mari ek femme. Pareil couma nou finn trouvé la-haut, kitfois bann chrétien ki faire enn mariage coutumier, pou envie ki enn frere faire enn discours dan la Salle du Royaume kot zot kapav dire bann voeu. Dan sa cas-la, frere ki faire discours-la pou faire koné ki couple-la inn fini marié en accord avek bann la-loi César. Pou ena zis enn sel discours mariage. Ena enn sel mariage: mariage coutumier ki legal, ek enn sel discours ki basé lor la Bible. Si pa laisse beaucoup le temps passé entre sa deux l’evenement-la, si possible faire sa mem jour, nou pou honore sa mariage-la devant tou bann dimoune dan l’endroit.
14. Ki enn chrétien pou faire si dan so pays kapav faire mariage coutumier ek mariage civil toulé-deux?
14 Dan bann pays kot mariage coutumier li legal, li possible aussi ki bann couple marié civil. En general, enn mariage civil faire devant enn officié l’etat civil ki kapav demann couple-la signe enn registre ek dire bann voeu. Certain couple chrétien prefere mariage civil plutot ki mariage coutumier. Toulé-deux mariage zot legal, alors li pa necessaire ki enn couple faire toulé-deux mariage. Seki nou finn dire dan paragraphe 9 ek 10 concernant enn discours mariage ek bann voeu, li applik ici aussi. Seki pli important, c’est ki couple-la marié dan enn fason ki honorable devant Bondié ek devant bann dimoune.—Luc 20:25; 1 Pierre 2:13, 14.
Garde ou mariage honorable
15, 16. Couma l’honneur kapav ena enn place important dan enn mariage?
15 Kan enn lé-roi perse ti gagne problem dan so mariage, so chef-conseiller ki ti appel Memoukân ti donne li enn conseil ki ti kapav donne bann bon resultat. Li ti dire ‘ki tou bann femme donne l’honneur zot mari.’ (Esther 1:20) Sa conseil-la ti pou kapav ena enn bon l’effet. Dan bann mariage chrétien, bann femme pa bizin l’ordre enn lé-roi pou donne l’honneur zot mari, zot content pou faire sa. Li pareil aussi pou bann mari chrétien: zot dire ki quantité zot apprecié zot femme ek zot donne zot l’honneur. (Proverbes 31:11, 30; 1 Pierre 3:7) Fodé pa ki nou attann plusieurs l’année passé pou nou donne l’honneur nou mariage, mais nou bizin faire sa depuis commencement-mem, oui, depuis jour nou mariage.
16 Jour mariage, c’est pa zis enn mari ek so femme ki bizin montré l’honneur. Si enn ancien faire enn discours mariage, sa discours-la aussi bizin digne. Li pou adresse so discours ar couple-la. Pou li honore zot, li pa pou rempli so discours avek bann joke, ni avek bann proverbe. Li pa pou faire aussi bann remark trop personnel ki kapav embarasse couple-la ek bann dimoune ki pé ecouté. Au contraire, li pou faire zeffort pou faire discours-la avek sentiment ek dan enn fason positif. Li pou attire l’attention lor Bondié ki finn crée mariage ek lor so bann bon conseil. Oui, enn discours mariage ki digne pou contribué pou ki enn mariage donne l’honneur Jéhovah.
17. Kifer enn mariage chrétien bizin respecté bann la-loi ki ena dan pays?
17 Surement ou finn remarké ki dan sa lartik-la ena beaucoup point ki ena enn rapport avek bann kitsoz legal lor mariage. Kitfois certain point pa appliké dan ou pays. Mais nou tou, nou bizin bien comprend ki quantité li important ki, kan bann Témoins de Jéhovah marié zot respecté bann la-loi César, setadir bann la-loi dan pays kot zot resté. (Luc 20:25) Paul ti donne sa conseil-la: “Donne tou dimoune seki bizin donne zot, seki demann taxe, donne li taxe; seki demann enn paiement donne li paiement; . . . seki demann l’honneur, donne li l’honneur.” (Romains 13:7) Oui, li important ki bann chrétien, depuis jour zot mariage-mem, donne l’honneur sa disposition ki Bondié inn prend dan nou lepok-la.
18. Ki lot point en rapport avek mariage li bon ki nou prend compte, ek kot-sa nou pou gagne bann conseil lor la?
18 Beaucoup chrétien faire enn reception apré zot mariage, sa kapav enn repas, ou-soit enn reception. Rappel ki Jésus pa ti refuse pou al dan enn reception coumsa. Si ena enn reception apré enn mariage, couma bann conseil biblik kapav aide nou pou faire sur ki sa aussi pou donne l’honneur Bondié ek ki sa pa pou gate reputation bann nouveau marié ek la congregation? Nou pou examine sa sujet-la dan prochain lartik.e
[Note]
a Ti servi mem l’expression pou koz lor enn reception ki pa ti ena okenn rapport avek enn mariage.—Esther 9:22, Septante.
b Bann Témoins de Jéhovah servi plan discours: “ Un mariage honorable aux yeux de Dieu. ” Sa discours-la attire l’attention lor bann bon conseil biblik ki trouve dan livre Le secret du bonheur familial ek dan lezot publication bann Témoins de Jéhovah. Bann point ki discuté pendant sa discours-la, kapav bien aide sa couple ki pé marié-la, ek tou bann ki assisté zot mariage.
c Si la loi pa demann pou dire lezot kitsoz, bann chrétien pou servi sa bann voeu-la pou honore Bondié jour zot mariage. Pou le-marié: “Moi [nom le marié], mo prend toi [nom la marié] pou vinn mo femme, ek mo promette pou content toi ek pou prend toi soin en accord avek la loi Bondié ki’nn ecrire dan la Bible pou bann mari chrétien, tant ki nou vive ensam lor la terre, couma mari ek femme en accord avek l’arrangement ki Bondié finn etabli.” Pou la marié: “Moi [nom la marié], mo prend toi [nom le marié] pou vinn mo mari, ek mo promette pou content toi, pou prend toi soin ek pou ena enn profond respé pou toi, en accord la loi Bondié ki’nn ecrire dan la Bible pou bann femme chrétienne, tant ki nou vive ensam lor la terre, couma mari ek femme en accord avek l’arrangement ki Bondié finn etabli.”
d Guette La Tour de Garde 15 septembre 1963, page 575, kot ena bann renseignement lor la.
e Guette aussi lartik “ Faites de vos noces un événement joyeux et digne, ” ki trouve dan La Tour de Garde 15 octobre 2006, en français, page 28.
Eski ou rappel?
• Kifer eski nou bizin prend compte coté legal ek spirituel enn mariage?
• Ki deux chrétien kitfois pou decidé pou faire zis apré zot mariage civil?
• Kifer bann chrétien faire bann discours mariage dan enn la-Salle du Royaume?
[Zimage, page 12]
Dan Israël longtemps, enn missié ti montré ki li pé marié kan li ti amenn la-marié dan so lakaz ou-soit dan lakaz so papa
[Zimage, page 15]
Apré ki zot inn faire enn mariage coutumier, kitfois bann chrétien pou envie ki enn frere faire enn discours dan la Salle du Royaume