Vive heureux dan la crainte pou Jéhovah
“Ena la crainte pou Jéhovah, zot so bann saint, parski bann dimoune ki ena la crainte pou Li, pa mank nanyin.”—Psaume 34:9.
1, 2. (a) Cite deux l’attitude completement different ki la chrétienté ena lor la crainte pou Bondié? (b) Ki question nou pou examiné asterla?
Bann enseignant la chrétienté ki enseigne bann dimoune la crainte pou Bondié souvent base-zot lor enn croyance ki pa sorti dan la Bible: zot faire croire ki Bondié puni bann mauvais dimoune pou touletan dan enn l’enfer difé. Sa l’enseignement-la li contraire ar seki la Bible enseigné lor Jéhovah. La Bible dire ki Li enn Bondié ki ena l’amour ek la justice. (Genèse 3:19; Deutéronome 32:4; Romains 6:23; 1 Jean 4:8) Lezot enseignant la chrétienté faire tou lé-contraire. Jamais zot koz lor la crainte pou Bondié. Zot dire plutot ki Bondié tolere tou kitsoz ek Li accepté tou dimoune n’importe ki qualité la vie zot amené. Sa aussi, la Bible pa enseigné.—Galates 5:19-21.
2 En realité, la Bible encourage nou pou ena la crainte pou Bondié. (Révélation 14:7) Sa l’enseignement-la pousse nou pou demann nou-mem: Kifer enn Bondié ki ena l’amour, envie ki nou ena la crainte pou Li? Ki qualité la crainte Li demann nou pou ena? Couma nou kapav gagne bann bienfait kan nou ena la crainte pou Bondié? Nou pou reponn sa bann question-la pendant ki nou pou contigne examine Psaume 34.
Kifer nou bizin ena la crainte pou Bondié?
3. (a) Ki ou pensé concernant l’ordre pou ena la crainte pou Bondié? (b) Kifer bann dimoune ki ena la crainte pou Jéhovah, zot heureux?
3 Jéhovah Li-mem Createur ek pli grand le Roi dan l’univers; a cause sa, Li merité ki nou ena la crainte pou Li. (1 Pierre 2:17) Mais, sa la-crainte-la, li pa enn grand la-peur ki nou ena parski nou pé adore enn bondié sans pitié. C’est enn la-crainte ek enn grand respé ki nou ena pou seki Jéhovah été. C’est aussi la crainte pou deplaire Li. Sa la-crainte-la li superieur ek li faire nou senti-nou pli bien. Li pa faire nou deprimé ou-soit peur. Jéhovah, Li enn “Bondié heureux,” Li envie ki so bann creature vive heureux. (1 Timothée 1:11) Mais, pou nou kapav vive heureux, nou bizin vive en accord avek bann principe Bondié. Pou beaucoup dimoune, sa vedir change zot fason vive. Tou dimoune ki faire bann changement necessaire, trouvé ki seki David ti dire, li vrai: “Gouté ek guetté ki Jéhovah Li bon; heureux sa zom fort ki rod so protection-la. Ena la crainte pou Jéhovah, zot so bann saint, parski bann dimoune ki ena la crainte pou Li, pa mank nanyin.” (Psaume 34:8, 9) Bann dimoune ki ena la crainte pou Jéhovah pa mank nanyin ki ena enn valeur durable, parski zot ena bann bon relation avek Li.
4. Ki l’assurance David ek Jésus toulé-deux ti donné?
4 Remarké ki David ti honore so bann zom kan li ti appel zot “saint,” enn kitsoz ki li ti possible pou faire dan so lepok. Sa bann zom-la ti faire partie dan nation Bondié, ki ti enn nation saint. En plus, zot ti pé riské zot la-vie kan zot ti pé suive David. Mem si zot ti pé sauvé a cause le roi Saül, David ti sur ki Jéhovah ti pou contigne donne zot seki zot ti bizin pou vive. Li ti ecrire: “Bann jeune lion inn mank mangé ek zot inn gagne faim; mais bann ki rod Jéhovah, zot pa pou mank nanyin ki bon.” (Psaume 34:10) Jésus ti donne so bann disciple mem l’assurance.—Matthieu 6:33.
5. (a) Dan ki condition beaucoup dimoune ki ti suive Jésus ti été? (b) Ki conseil Jésus ti donné concernant la crainte?
5 Parmi bann dimoune ki ti ecoute Jésus, beaucoup ti bann Juif ki ti misere, bann ti dimoune. A cause sa, Jésus “ti ena pitié pou zot, parski zot ti gagne maltraité ek zot ti senti-zot perdi pareil couma bann mouton ki pena berger.” (Matthieu 9:36) Eski sa bann dimoune ki ena l’humilité-la ti pou ena courage pou suive Jésus? Pou zot kapav faire sa, zot ti pou bizin ena la crainte pou Jéhovah, pa pou bann zom. Jésus ti dire: “Fodé pa zot ena la crainte pou bann ki touye lekor ek ki apré pa kapav faire nanyin plus ki sa. Mais mo pou montré zot pou kisannla zot bizin ena la crainte: Ena la crainte pou sa kikenn ki, apré ki li’nn touyé, ena pouvoir pou jette dan la géhenne. Mo dire zot vrai-mem, sa Kikenn-la, zot bizin ena la crainte pou Li. Dimoune vann cinq moineau pou deux piece la monnaie ki ena enn tigit valeur, pa vrai? Pourtant, Bondié pa blié enn sel parmi zot. Mais, Li finn mem compte tou bann cheveux lor zot la-tête. Pa peur, zot vaut plus ki beaucoup moineau.”—Luc 12:4-7.
6. (a) Ki parole Jésus finn fortifié bann chrétien? (b) Kifer Jésus inn donne nou pli bon l’exemple ki ena lor fason ki nou bizin manifesté la crainte pou Bondié?
6 Kan bann l’ennemi faire pression lor bann dimoune ki ena la crainte pou Jéhovah pou faire zot arrete servi Li, sa bann serviteur-la kapav rappel conseil Jésus: “Tou dimoune ki reconette ki li en union avek moi devant bann zom, Fils de l’homme aussi pou reconette ki li en union avek sa dimoune-la devant bann ange Bondié. Mais enn kikenn ki renié moi devant bann dimoune, mo pou renié li devant bann ange Bondié.” (Luc 12:8, 9) Sa bann parole-la finn fortifié bann chrétien, surtout dan bann pays kot vrai l’adoration interdit. Sa bann chrétien-la contigne loué Jéhovah dan bann reunion ek kan zot preché mais zot montré-zot prudent. (Actes 5:29) Jésus inn donne nou pli bon l’exemple ki ena lor fason ki nou bizin manifesté “la crainte pou [Bondié].” (Hébreux 5:7) Enn prophetie ti dire lor li: “Oui, l’esprit Jéhovah pou repose lor li, l’esprit . . . la crainte pou Jéhovah; ek li pou trouve plaisir dan la crainte pou Jéhovah.” (Isaïe 11:2, 3) Sa vedir ki Jésus li bien qualifié pou faire nou koné ki bann bienfait nou kapav gagné kan nou ena la crainte pou Bondié.
7. (a) Couma bann chrétien inn obeir enn l’invitation pareil couma David ti faire? (b) Couma bann parent kapav imite bon l’exemple David?
7 Tou bann ki suive l’exemple Jésus ek ki obeir so l’enseignement, en realité zot pé obeir enn l’invitation pareil couma David ti faire: “Vini, mo bann garson, ecoute moi; mo pou enseigne zot la crainte pou Jéhovah.” (Psaume 34:11) Li ti normal ki David appel so bann zom “mo bann garson” parski zot ti considere li couma zot chef. Ek David en retour, ti aide zot lor plan spirituel pou ki zot ena l’unité entre zot ek zot gagne faveur Bondié. C’est vrai-mem enn bon l’exemple pou bann parent chrétien! Jéhovah finn donne zot responsabilité pou enseigne zot garson ek zot tifi. Bann parent bizin “contigne elevé zot dan discipline ek dan bann l’avertissement Jéhovah.” (Éphésiens 6:4) Kan bann parent koz bann kitsoz spirituel toulé-jour avek zot zenfant ek etudié la Bible avek zot regulierement, zot aide zot zenfant pou vive heureux dan la crainte pou Jéhovah.—Deutéronome 6:6, 7.
Couma dan la pratik, nou kapav manifesté la crainte pou Bondié
8, 9. (a) Kifer nou attiré pou amenn enn la-vie kot nou manifesté la crainte pou Bondié? (b) Ki sa vedir veille lor nou la-langue?
8 Couma nou finn dire, la crainte pou Bondié pa empeche nou trouve la joie. David ti pose sa question-la: “Kisannla ki content la vie, ki content pou vive pli longtemps pou trouve seki bon?” (Psaume 34:12) Li clair ki, pou ki enn dimoune vive longtemps ek heureux, li bien important ki li ena la crainte pou Jéhovah. Li facile pou dire: “Mo ena la crainte pou Bondié.” Mais li pli difficile pou prouve sa par nou conduite. A cause sa, David ti expliké couma nou kapav manifesté la crainte pou Bondié.
9 “Veille to la-langue pou to pa dire seki mauvais, ek to la-levre pou to pa dire bann parole ki trompe lezot.” (Psaume 34:13) L’apotre Pierre, ki ti inspiré par l’esprit saint, ti cite sa partie dan Psaume 34-la apré ki li ti conseil bann chrétien pou montré l’affection fraternel sakenn pou so camarade. (1 Pierre 3:8-12) Nou pou veillé ki nou la-langue pa dire seki mauvais kan nou pa faire palab pou gate reputation lezot dimoune. Au contraire, nou pou faire tou pou ena bann conversation encourageant avek lezot. En plus, nou pou faire zeffort pou montré nou courage ek pou dire la verité.—Éphésiens 4:25, 29, 31; Jacques 5:16.
10. (a) Expliké seki sa vedir detourne-nou ar seki mauvais. (b) Ki sa impliké pou faire seki bon?
10 “Detourne-toi ar seki mauvais, ek faire seki bon; rod la paix, ek contigne suive li.” (Psaume 34:14) Nou pou rejette bann kitsoz ki Bondié condamné, couma par exemple l’immoralité sexuel, pornographie, kokin, spiritisme, violence, boire ziska sou, ek prend la drogue. Nou pou rejette aussi bann divertissement kot montré sa bann kitsoz degoutant-la. (Éphésiens 5:10-12) Nou pou plutot servi nou lé-temps pou faire seki bon. Pli grand di-bien ki nou kapav faire c’est participe regulierement dan predication ek faire bann disciple. Sa pou aide nou prochain pou gagne la vie sauve. (Matthieu 24:14; 28:19, 20) Nou faire seki bon aussi kan nou prepare nou bann reunion ek nou assisté zot, kan nou faire bann contribution pou travail predication, kan nou participe dan nettoyage la Salle du Royaume, ek kan nou prend compte seki nou bann frere ek soeur ki misere, bizin.
11. (a) Couma David ti mette en pratik seki li ti enseigné lor la paix? (b) Ki nou kapav faire pou ‘contigne rod la paix’ dan congregation?
11 David inn donne nou enn bon l’exemple kan li ti rod la paix. Deux fois li ti gagne l’occasion pou touye Saül. Mais toulé-deux fois, li ti rejette la violence ek li ti mem koz avek le roi Saül avek respé parski li ti esperé ki li pou kapav retabli la paix. (1 Samuel 24:8-11; 26:17-20) Ki nou kapav faire zordi si enn situation menace la paix ki ena dan congregation? Nou bizin “rod la paix, ek contigne suive li.” Alors, si nou senti ki relation ki nou ena avek enn lot chrétien pé commence gaté, ki nou bizin faire? Anou suive conseil ki Jésus ti donné: “D’abord al faire la paix avek to frere.” Apré sa, nou kapav reprend bann activité ki concerne vrai l’adoration.—Matthieu 5:23, 24; Éphésiens 4:26.
La crainte pou Bondié faire nou gagne bann grand bienfait
12, 13. (a) Ki bann bienfait bann ki ena la crainte pou Bondié pé gagné depuis asterla-mem? (b) Ki grand recompense bann fidel adorateur pou gagné bientot?
12 “Lizié Jéhovah lor bann dimoune ki juste, ek so zoreille tann zot suppliye Li pou gagne l’aide.” (Psaume 34:15) Fason ki Jéhovah inn traite David, montré ki sa bann parole-la vrai. Zordi, nou senti enn grand la-joie ek enn la-paix dan nou leker, parski nou koné ki Jéhovah veille lor nou. Nou sur ki Li pou donne nou toujours seki nou bizin mem si nou passe par bann grand l’epreuve. Nou koné ki bientot, tou bann vrai adorateur pou bizin faire face ar l’attak Gog de Magog ek ar “grand jour Jéhovah.” (Yoël 2:11, 31; Ézékiel 38:14-18, 21-23) N’importe ki arrive nou lerla, nou pou trouve realisation sa bann parole David-la dan nou cas: “Zot inn suppliyé, ek Jéhovah Li-mem inn tendé, ek Li’nn delivré zot dan tou zot malheur.”—Psaume 34:17.
13 Kan sa pou arrivé, li pou extraordinaire pou trouve Jéhovah glorifié so grand nom! Nou leker pou rempli ar enn pli grand l’admiration ek respé ki jamais nou pa finn ena avant, ek tou nou bann l’ennemi pou konn enn destruction ki pou faire zot honté. “Figure Jéhovah kont bann ki faire seki mauvais, pou ki personne nepli koz zot lor la terre.” (Psaume 34:16) Nou pou vrai-mem gagne enn grand recompense kan Jéhovah pou delivré nou ek pou faire nou rente dan le monde nouveau, enn lé-monde kot pou ena la justice!
Bann promesse ki aide nou pou enduré
14. Ki pou aide nou pou supporte nou bann malheur?
14 Alors ki nou pé attann sa jour-la, nou pou bizin ena l’endurance pou nou kapav contigne obeir Jéhovah dan sa mauvais lé-monde-la. La crainte pou Bondié pou aide nou beaucoup pou aprann l’obeissance. Parski nou pé vive dan enn lepok difficile, certain serviteur Bondié gagne bann problem bien grave ki faire zot gagne beaucoup la peine ek ki demoralise zot. Mais seulement, sa bann chrétien-la kapav sur ki, si zot tourne-zot vers Jéhovah, Li pou aide zot pou enduré. Bann parole David donne sa l’assurance-la: “Jéhovah pré ar bann dimoune ki ena enn grand chagrin dan zot leker; ek Li sauve bann ki demoralisé.” (Psaume 34:18) David ti ajoute sa bann parole bien encourageant-la: “Enn dimoune droite gagne beaucoup malheur, mais Jéhovah delivré li ar tousala.” (Psaume 34:19) N’importe ki quantité malheur nou gagné, Jéhovah assez fort pou delivré nou.
15, 16. (a) Ki malheur David ti tendé apré ki li ti ecrire Psaume 34? (b) Ki pou aide nou pou supporte nou bann l’epreuve?
15 Enn tipé apré ki David ti ecrire Psaume 34, li ti tendé ki malheur ti’nn arrive bann habitant la ville Nob, kan Saül ti faire touye zot ek la plupart bann pretre aussi. Surement li ti bien bouleversé kan li ti pensé ki c’est parski li ti passe dan sa la-ville-la ki sa ti faire Saül bien en colere! (1 Samuel 22:13, 18-21) Nou sur ki David ti rod l’aide Jéhovah dan sa moment-la, ek pena doute ki li ti gagne reconfort kan li ti pensé ki enn jour bann “dimoune ki juste” pou ressuscité.—Actes 24:15.
16 Zordi, l’esperance resurrection fortifié nou aussi. Nou koné ki nou bann l’ennemi pa pou kapav faire nou okenn di-tort ki pa pou kapav reparé. (Matthieu 10:28) David aussi ti ena sa l’assurance-la, li ti dire: “Li protege tou so lezo [enn dimoune droite]; pa enn sel lezo inn cassé.” (Psaume 34:20) Sa verset-la inn realisé dan enn sens litteral lor Jésus. Mem si li ti konn enn la-mort bien cruel, okenn so bann lezo pa ti “crasé.” (Jean 19:36) Mais sa verset-la applik aussi lor lezot serviteur Jéhovah. Psaume 34:20 assure nou ki, n’importe ki l’epreuve ki kapav arrive bann chrétien oint ek bann membre “lezot brebis,” pa pou arrive zot okenn di-tort ki pa pou kapav reparé. Dan enn sens symbolik, jamais zot lezo pou crasé.—Jean 10:16.
17. Ki malheur pé atann bann dimoune ki contigne ena la haine pou bann serviteur Jéhovah?
17 Situation bann mauvais dimoune pou bien different. Bientot zot pou recolté seki zot inn semé. “Malheur pou touye bann mauvais dimoune; ek bann ki ena la haine pou enn dimoune ki juste, pou coupable devant Bondié.” (Psaume 34:21) Tou bann ki pé contigne oppose-zot ar bann serviteur Bondié, pou konn pli pire malheur ki kapav ena. Kan Jésus Christ pou manifesté ek ki tou dimoune pou reconette ki li été, li pou “juge zot ek [li] pou puni zot par enn destruction eternel.”—2 Thessaloniciens 1:9.
18. Dan ki sens bann membre ‘la grande foule’ finn deja delivré, ek ki pou arrive zot dan l’avenir?
18 David ti termine sa psaume-la par bann parole bien encourageant. Li ti dire: “Jéhovah delivré nâme so bann serviteur; ek personne parmi bann ki rod so protection, pa pou coupable devant Li.” (Psaume 34:22) David inn regné pendant 40 an. Vers la fin so règne li ti dire: “[Bondié inn] delivré mo nâme dan tou bann malheur.” (1 Rois 1:29) Pareil couma David, bientot bann dimoune ki ena la crainte pou Jéhovah pou kapav mazinn la vie ki zot ti ena avant ek zot pou content. Kifer? Parski zot pou trouvé ki Jéhovah pa finn condamne zot pou bann kitsoz ki zot finn faire a cause peché ki zot finn herité, ek finn delivré zot dan tou zot l’epreuve. La plupart chrétien oint finn deja gagne zot recompense dan le ciel. Azordi, “enn grand la-foule” ki sorti dan tou nation pé joinde bann lé-reste frere oint Jésus, pou zot servi Bondié ensam ek sa faire zot pur devant Jéhovah. Kifer? Parski zot ena la foi ki di-sang ki Jésus inn versé ena pouvoir pou delivré zot ar peché. Pendant Règne mille an Jésus Christ, ki pré pou commencé, Jésus pou applik tou bann bienfait so sacrifice, ek grace a sa, zot pou vinn parfait.—Révélation 7:9, 14, 17; 21:3-5.
19. Ki bann membre ‘la grande foule’ bien decidé pou faire?
19 Kifer bann adorateur Bondié ki forme partie dan ‘la grande foule’ pou gagne tou sa bann benediction-la? Parski zot bien decidé pou contigne ena la crainte pou Jéhovah, pou servi Li ek pou obeir Li avek enn grand respé ek l’admiration. Pena doute ki la crainte pou Jéhovah faire nou la-vie vinn agreable asterla-mem ek sa aide nou pou “saisi vrai la-vie,” setadir la vie eternel dan le monde nouveau ki Bondié pou etabli.—1 Timothée 6:12, 18, 19; Révélation 15:3, 4.
Eski ou rappel?
• Kifer nou bizin ena la crainte pou Bondié ek ki sa vedir?
• Ki l’effet la crainte pou Bondié bizin ena lor nou conduite?
• Ki bienfait nou gagné kan nou ena la crainte pou Bondié?
• Ki promesse ki aide nou pou enduré?
[Zimage, page 29]
Bann ki ena la crainte pou Jéhovah, prudent kan zot l’activité interdit
[Zimage, page 31]
Pli grand di-bien ki nou kapav faire pou nou prochain c’est annonce zot la bonne nouvelle lor Royaume Bondié