Si nou ena la crainte pou Jéhovah, nou pou heureux!

“Heureux sa dimoune ki ena la crainte pou Jéhovah-la.”—PSAUME 112:​1.

1, 2. Kan nou ena la crainte pou Jéhovah, ki nou kapav gagné?

C’EST pa enn coute coumsa ki nou trouve bonheur. Pou nou kapav heureux, nou bizin prend bann bon decision, nou bizin faire seki bon, ek rejette seki mauvais. Nou Createur, Jéhovah, finn donne nou so Parole la Bible, pou montré nou ki pli bon fason pou amenn nou la-vie. Kan nou rod direction Jéhovah ek nou suive seki Li dire, nou montré ki nou ena la crainte pou Li. Lerla, nou pou gagne satisfaction ek nou pou heureux.​​—⁠Psaume 23:⁠1; Proverbes 14:​26.

² Dan sa lartik-la, nou pou examine plusieurs l’exemple biblik ek bann l’exemple modern aussi. Zot pou montré nou couma la crainte pou Bondié kapav donne enn dimoune la force pou pa faire seki mauvais ek gagne courage pou faire seki bon. Nou pou trouvé ki la crainte pou Bondié kapav pousse nou pou corrige enn mauvais conduite, pareil couma le roi David, ek coumsa nou pou heureux. Nou pou trouvé aussi ki la crainte pou Jéhovah, li enn l’heritage ki ena beaucoup valeur, ki bann parent kapav transmette zot bann zenfant. Parole Bondié dire nou: “Heureux sa dimoune ki ena la crainte pou Jéhovah-la.”​​—⁠Psaume 112:⁠1.

Regagne bonheur ki nou’nn perdi

3. Ki ti aide David pou regagne faveur Jéhovah apré ki li ti faire enn peché grave?

³ Couma nou finn guetté dan lartik avant, dan trois l’occasion David pa ti montré so la-crainte pou Bondié, ek li ti faire peché. Mais malgré sa, li ti enn kikenn ki ti ena la crainte pou Jéhovah. Nou trouve sa par fason ki li ti reagir kan Jéhovah ti discipline li. Parski li ti ena enn grand respé pou Bondié, sa ti pousse li pou reconette so faute, pou corrige so conduite, ek pou retabli bann bon relation avek Jéhovah. Mem si li-mem ek lezot aussi ti souffert a cause bann faute ki li ti faire, so repentance sincere ti faire li contigne gagne l’aide ek faveur Jéhovah. Oui, l’exemple David kapav encourage tou bann chrétien zordi ki arrivé faire enn peché grave.

4. Couma la crainte pou Bondié kapav aide enn kikenn pou regagne la joie?

⁴ Anou prend l’exemple Sonia enn proclamatrice a plein temps.a Li ti commence frequente bann dimoune ki ti ena enn mauvais conduite, seki ti amenn li pou faire bann kitsoz ki pa en accord avek bann principe biblik, ek li ti exclu. Mais plitar, kan Sonia ti realisé seki li ti’nn faire, li ti faire tou pou regagne faveur Jéhovah, ek apré inpé lé-temps li ti reintegré. Malgré tou seki finn passé, jamais Sonia finn pense pou arrete servi Jéhovah. Avek le temps, li’nn reprend so service a plein temps, ek zordi li marié avek enn ancien, ek li bien content pou servi Jéhovah ensam avek li dan congregation. Mem si Sonia regretté ki enn lé-temps li ti’nn eloigné ar Jéhovah, li bien content ki so la-crainte pou Bondié inn aide li pou retourne vers Li.

Vaut mieux souffert ki faire peché

5, 6. Expliké couma dan deux l’occasion David pa ti touye Saül.

⁵ Bien sur, li pou beaucoup pli bon si la crainte pou Bondié empeche enn kikenn pou faire peché avant mem ki sa arrivé. C’est seki ti arrive David. Enn jour, alors ki Saül avek 3000 zom ti pé rod David pou touyé, Saül ti rente dan mem la-cave kot David ek so bann zom ti pé cachiette. Bannla ti commence monte la tete David pou li touye Saül. Zot ti mem dire li ki c’est Jéhovah ki ti mette so l’ennemi dan so la-main. Doucement-doucement, David ti vinn pré kot Saül ek ti coupe enn boute dan so linge. David ti ena tellement la crainte pou Bondié, ki enn simple ti action coumsa ti fatigue so conscience. Alors li ti coupe l’élan so bann zom ek li ti dire zot: “Jamais sa pa pou vinn dan mo l’esprit, devant Jéhovah, pou faire enn kitsoz coumsa mo seigneur, li, ki Jéhovah finn choisir.”b​​—⁠1 Samuel 24:​1-7.

⁶ Enn lot fois, apré ki Saül ek so bann zom ti monte zot la-tente pou zot passe la nuit, Jéhovah ti faire zot tombe “dan enn grand sommeil.” Sans faire tapage, David ek Abishaï, so neveu ki pa ti peur nanyin, ti reussi rente au milieu camp ek ti arrive pré kot Saül ti pé dormi. Abishaï ti envie touye li, mais David ti arrete li ek ti dire li: “Kisannla inn avance so la-main kont kikenn ki Jéhovah inn choisir ek finn reste innocent?”​​—⁠1 Samuel 26:​9, 12.

7. Ki ti empeche David faire peché?

⁷ Kifer David pa ti touye Saül, alors ki li ti gagne deux l’occasion pou faire sa? Parski la crainte ki li ti ena pou Jéhovah ti pli fort ki la crainte ki li ti ena pou Saül. A cause sa, li ti prefere souffert si bizin, plutot ki faire enn peché. (Hébreux 11:​25) David ti sur ki Jéhovah prend compte so bann serviteur ek ki Li prend li compte personnellement. Li ti koné ki si li obeir Bondié ek li mette so confiance en Li, li pou heureux ek li pou gagne beaucoup benediction. Mais si li pa prend compte seki Bondié dire, li pou perdi So faveur. (Psaume 65:⁠4) Li ti koné aussi ki Bondié pou tini so promesse pou faire li vinn le roi, ek pou tire Saül dan fason ki Li envie, kan l’heure pou vini.​​—⁠1 Samuel 26:​10.

La crainte pou Bondié faire nou gagne bonheur

8. Couma eski fason ki David ti reagir dan bann l’epreuve, li enn l’exemple pou nou?

⁸ En tant ki chrétien, nou koné ki bann dimoune pou sikann nou, pou persecute nou, ek ki nou pou gagne lezot l’epreuve encore. (Matthieu 24:⁠9; 2 Pierre 3:⁠3) Parfois, nou kapav mem gagne bann problem avek bann frere ek soeur dan congregation. Mais, nou koné ki Jéhovah trouve tou, Li tann nou bann la priere, ek kan pou arrive l’heure, Li pou redresse bann kitsoz dapré so volonté. (Romains 12:​17-​21; Hébreux 4:​16) Alors, au lieu ki nou peur nou bann l’adversaire, anou ena la crainte pou Bondié ek compte lor Li pou delivré nou. Pareil couma David, nou pa tire vengeance nou-mem, ni nou al kont bann principe Bondié zis pou nou pa souffert. Kan nou faire sa, nou pou heureux. Couma?

9. Donne enn l’exemple pou montré couma la crainte pou Bondié kapav faire nou gagne la joie mem kan nou gagne persecution.

⁹ Enn missionnaire en Afrique raconté: “Mo rappel enn soeur ek so tifi, enn adolescent, ki ti refuse acheté carte enn partie politik a cause zot neutralité. Enn group zom ti batte zot ek ti dire zot retourne kot zot. Alors ki zot ti pé marché lor chemin, mama-la ti essaye console so tifi ki ti pé ploré, parski li ti kapav comprend kifer sa ti arrivé. Dan sa moment-la, zot pa ti heureux, mais zot conscience ti clair. Plitar, zot ti content ki zot ti obeir Bondié. Si zot ti’nn acheté sa bann carte-la, la foule ti pou bien content, zot ti pou gagne bann bouteille boisson gazeuse, ek bann dimoune ti pou danse autour zot ziska ki zot arrive kot zot. Mais, si zot ti’nn faire sa, zot ti pou al kont bann principe Bondié, sa ti pou rann zot bien-bien malheureux.” La crainte pou Bondié finn aide zot pou pena conscience troublé.

10, 11. Ki bon resultat enn madame finn gagné parski li finn ena la crainte pou Bondié?

¹⁰ La crainte pou Bondié kapav aussi faire nou heureux kan nou dan bann situation kot nou bizin respecté valeur sacré la vie. Kan Marie ti enceinte so troisieme zenfant, docteur ti mette pression lor li pou li avorté. Li ti dire Marie: “Ou l’etat trop critik, n’importe kan ou kapav gagne enn crise ek mort dan 24 heure. Lerla, ou ti-baba aussi pou mort. De toute fason, pena okenn garantie ki li pou enn ti-baba normal.” Marie ti pé etudié la Bible avek bann Témoins de Jéhovah, mais li pa ti encore baptisé. Marie raconté: “Mem sa, mo ti fini decidé pou servi Jéhovah, ek mo ti determiné pou obeir Li, arrive seki arrive.”​​—⁠Exode 21:​22, 23.

¹¹ Pendant so grossesse, Marie ti contigne etudié la Bible ek ti contigne prend soin so famille. Finalement li finn gagne so ti-baba. Li dire: “Sa l’accouchement-la ti enn tipé pli difficile ki deux avant, mais pa ti ena bann grand complication.” La crainte pou Bondié ti aide Marie pou garde enn bon conscience. Enn tipé lé-temps apré, li ti baptisé. So zenfant inn grandi, ek li aussi li’nn aprann ena la crainte pou Jéhovah; zordi li enn Béthélite.

‘Fortifié-ou par Jéhovah’

12. Couma la crainte pou Bondié ti fortifié David?

¹² La crainte pou Jéhovah pa ti zis empeche David pou faire seki mauvais. Li ti donne li aussi courage pou prend bann decision ek agir avek sagesse dan bann situation difficile. Pendant enn an quatre mois, David ek so bann zom ti cachiette dan la ville Tsiqlag, territoire bann Philistin, pou ki Saül pa trouve zot. (1 Samuel 27:​5-7) Enn jour, alors ki zot pa ti là, bann Amaléqite ti vini. Zot ti brule la ville ek zot ti amenn tou bann femme, bann zenfant ek bann zanimo. Kan David ek so bann zom ti retourné ek zot ti trouve seki finn passé, zot ti commence ploré. Zot ti bien chagrin. Mais bien vite, bann zom David finn commence en colere, ek zot finn mem dire ki zot pou touye li coute roche. Mem si David ti bien bouleversé, li pa ti perdi l’espoir. (Proverbes 24:​10) La crainte pou Bondié finn pousse li pou tourne vers Jéhovah, ek “fortifié li-mem par Jéhovah.” Avek l’aide Bondié, David ek so bann zom finn rattrape bann Amaléqite ek zot finn reprend tou seki zot ti perdi.​​—⁠1 Samuel 30:​1-​20.

13, 14. Couma la crainte pou Bondié finn aide enn chrétienne pou prend bann bon decision?

¹³ Zordi aussi, bann serviteur Bondié faire face ar bann situation kot zot bizin ena enn grand confiance en Jéhovah, ek zot bizin courage pou prend bann bon decision. Anou guette l’exemple Kristina, enn jeune tifi ki ti pé etudié avek bann Témoins de Jéhovah. Li ti envie vinn enn grand pianiste ki donne bann concert, ek li ti faire bann bon progré dan sa domaine-la. En plus, parski li ti senti li mal-a-l’aise dan predication, li ti peur pou accepté bann responsabilité ki li ti pou ena si li ti prend bapteme. Mais a mesure ki li ti etudié, li ti commence ressenti pouvoir Parole Bondié. Li ti pé commence comprend ki été la crainte pou Jéhovah, ek li ti aprann ki Jéhovah attann ki so bann serviteur content Li avek tou zot leker, tou zot l’esprit, tout zot nâme, ek tou zot la-force. (Marc 12:​30) Sa ti pousse li pou voué so la-vie ar Jéhovah ek pou prend bapteme.

¹⁴ Kristina ti demann Jéhovah l’aide pou faire bann progré lor plan spirituel. Li dire: “Mo ti koné ki la vie enn pianiste ki faire bann concert, li pa facile. Mo ti pou bizin voyagé touletan ek faire preské 400 concert par an. A cause sa mo ti’nn decidé pou donne leson pou gagne mo la-vie ek pou faire service a plein temps.” Mais, so premier concert ti deja fini programmé dan pli grand la-salle ki ena dan so pays. Li raconté: “Mo finn faire mo premier ek mo dernier concert.” Zordi Kristina marié avek enn ancien, ek zot toulé-deux zot bann Béthélite. Li bien content ki Jéhovah inn donne li courage pou prend bann bon decision ek ki li kapav servi so lé-temps ek so l’energie dan So service.

Enn l’heritage ki ena beaucoup valeur

15. Ki David ti envie transmette so bann zenfant, ek couma li ti faire sa?

¹⁵ David ti ecrire: “Vini, mo bann garson, ecoute moi. Mo pou enseigne zot la crainte pou Jéhovah.” (Psaume 34:11) David ti envie transmette so bann zenfant enn l’heritage ki ena beaucoup valeur, setadir la crainte pou Jéhovah, enn la-crainte ki raisonnable ek ki faire zot gagne beaucoup bienfait. Par so bann parole ek so conduite, David ti montré ki Jéhovah, Li pa enn Bondié ki exigeant, ki faire peur ek ki pré pou puni zot si zot pa obeir so bann la-loi, au contraire Li couma enn Papa ki content so bann zenfant lor la terre, ki prend zot compte ek ki pardonne zot. David ti demandé: “Kisannla ki konn [nou] bann erreur?” Apré pou montré ki li ti koné ki Jéhovah pa veillé kan nou faire bann faute, li ti ajouté: “Si mo’nn faire bann peché en cachiette, declare moi innocent.” David ti sur ki si li faire bann grand zeffort, so bann parole ek so bann pensée pou acceptable devant Jéhovah.​​—⁠Psaume 19:​12, 14.

16, 17. Couma bann parent kapav enseigne zot bann zenfant la crainte pou Jéhovah?

¹⁶ L’exemple David li enn bon l’exemple pou bann parent zordi. Ralph ek so frere, zot bann Béthélite. Guette seki Ralph dire: “Fason ki nou parent ti elevé nou, ti faire nou content ki nou dan la verité. Kan nou ti jeune, zot ti faire nou participe dan bann conversation ki zot ti gagné lor bann l’activité dan congregation, ek c’est coumsa ki nou aussi nou finn developpe enn grand l’enthousiasme pou la verité. Zot finn toujours enseigne nou ki nou kapav faire bann bon kitsoz dan service Jéhovah. Avredir, pendant plusieurs l’année nou famille finn vive dan enn pays kot ti bizin plus proclamateur, ek nou finn aidé pou forme bann nouveau congregation.”

¹⁷ “Si nou finn reste dan bon chemin, c’est pa a cause enn quantité la-loi bien strict, mais plutot parski pou nou bann parent, Jéhovah ti enn Bondié réel ki bien-bien bon. Zot ti faire zeffort pou aprann konn Jéhovah encore plus ek faire Li plaisir, ek nou finn aprann beaucoup grace a zot la-crainte ek zot l’amour pou Li. Mem si nou ti faire kitsoz ki pa bon, nou bann parent pa ti faire nou senti ki aster Jéhovah nepli content nou. Zot pa ti puni nou avek colere, ek mette bann restriction lor nou. Pli souvent, zot ti faire nou assizé ek zot ti koz avek nou, dé-fois, nou mama ti mem ploré tellement li ti envie touche nou leker. Ek sa finn marché. Par zot parole ek zot conduite, zot finn enseigne nou ki la crainte pou Jéhovah li enn bon kitsoz, ek ki li pa enn fardeau mais plutot li enn grand plaisir pou vinn enn so bann Témoin.”​​—⁠1 Jean 5:⁠3.

18. Ki nou pou gagné kan nou ena la crainte pou vrai Bondié?

¹⁸ Parmi “bann dernier parole David,” ena sa bann parole-la: “Kan enn kikenn ki domine lor bann dimoune, li juste ek li domine avek la crainte pou Bondié, alors, c’est coumadir la lumiere dan gramatin, kan soleil commence levé.” (2 Samuel 23:​1, 3, 4) Apparemment Salomon, garson David, ki ti pou vinn le roi apré li, ti bien comprend sa bann parole-la. Kifer? Parski li ti demann Jéhovah “enn leker obeissant” ek capacité “pou discerné entre seki bon ek seki mauvais.” (1 Rois 3:⁠9) Salomon ti reconette ki la crainte pou Jéhovah kapav faire li gagne sagesse ek bonheur. Plitar, pou faire enn resumé lor livre Ecclésiaste, li ti ecrire: “Conclusion, apré ki’nn fini tann tou kitsoz: Nou bizin ena la crainte pou vrai Bondié ek garde so bann commandement. Sa-mem tou l’obligation ki enn dimoune ena. Parski vrai Bondié Li-mem pou amenn jugement lor tou sorte qualité kitsoz ki dimoune faire, concernant tou kitsoz ki cachiette, [pou koné si li bon ou-soit mauvais.” (Ecclésiaste 12:​13, 14) Si nou ecoute sa conseil-la, nou pou trouvé ki “resultat l’humilité ek la crainte pou Jéhovah” li pa zis sagesse ek bonheur, mais aussi “richesse ek la gloire ek la vie.”​​—⁠Proverbes 22:⁠4.

19. Ki pou aide nou comprend “la crainte pou Jéhovah”?

¹⁹ Dan sa bann l’exemple biblik ek modern-la, nou trouvé ki vrai la crainte pou Bondié joué enn role bien important dan la vie bann serviteur Jéhovah. Sa la-crainte-la kapav empeche nou faire seki nou Papa ki dan le ciel, pa content. Li donne nou aussi la force pou faire face ar nou bann l’adversaire ek courage pou surmonte bann l’epreuve ek bann difficulté ki nou gagné. Alors, ki nou jeune ou-soit agé, anou faire zeffort pou etudié Parole Bondié bien, medite lor seki nou aprann, ek vinn pli proche ar Jéhovah par bann la-priere sincere. Kan nou faire sa, nou pa pou zis trouve “connaissance Bondié” mais surtout nou pou comprend “la crainte pou Jéhovah.”​​—⁠Proverbes 2:​1-5.

[Note]

Eski ou kapav expliké?

Couma la crainte pou Bondié kapav

• aide enn kikenn pou regagne faveur Jéhovah?

• faire nou gagne la joie mem si nou gagne bann difficulté ek bann persecution?

• fortifié-nou pou faire volonté Bondié?

• vinn enn heritage ki ena beaucoup valeur, ki nou kapav transmette nou bann zenfant?

[Zimage, page 28]

La crainte pou Jéhovah ti empeche David pou touye Saül

[Bann zimage, page 31]

La crainte pou Bondié li enn heritage ki ena beaucoup valeur, ki bann parent kapav transmette zot zenfant