Montré ki ou ena la sagesse: Ena la crainte pou Bondié!
“La crainte pou Jéhovah, c’est commencement la sagesse.”—PROVERBES 9:10.
1. Kifer beaucoup dimoune trouve sa difficile pou comprend ki vedir ena la crainte pou Bondié?
LONGTEMPS, kan ou ti dire enn dimoune ki li ena la crainte pou Bondié, ou ti pé faire li enn compliment. Zordi, beaucoup pensé ki li nepli la-mode pou ena la crainte pou Bondié, ek zot trouve sa difficile pou comprend. Zot dire: ‘Si Bondié Li l’amour, kifer nou bizin ena la crainte pou Li?’ Pou zot, la crainte, li enn sentiment negatif, ki empeche dimoune agir. Mais couma nou pou trouvé, vrai la crainte pou Bondié li different avek peur Bondié, c’est pas zis enn sentiment.
2, 3. Ki vrai la-crainte pou Bondié impliké?
2 Dan la Bible, la crainte pou Bondié, li enn kitsoz positif. (Isaïe 11:3) Ena la crainte pou Bondié vedir ena enn profond respé pou Li, ek pa faire nanyin ki pa faire li plaisir. (Psaume 115:11) C’est aussi accepté so bann principe moral ek suive zot de-pré, ek ena enn grand desir pou obeir so bann principe lor seki bon ek seki mauvais. Enn livre reference dire ki sa qualité la-crainte-la, c’est enn “l’attitude fondamental envers Bondié ki pousse [enn dimoune] pou ena enn bon conduite ek pou rejette tou sorte qualité mauvais kitsoz.” C’est a cause sa ki la Bible dire nou: “La crainte pou Jéhovah, c’est commencement la sagesse.”—Proverbes 9:10.
3 Oui, la crainte pou Bondié ena enn l’influence lor beaucoup domaine dan la vie enn dimoune. Li pa zis faire nou gagne la sagesse mais li ena aussi enn lien avek la joie, la paix, prosperité, enn longue la-vie, l’espoir, ek confiance. (Psaume 2:11; Proverbes 1:7; 10:27; 14:26; 22:4; 23:17, 18; Actes 9:31) Li ena enn grand rapport avek la foi ek l’amour. En realité, li touche tou seki concerne nou relation avek Bondié ek nou prochain. (Deutéronome 10:12; Job 6:14; Hébreux 11:7) Enfin, la crainte pou Bondié c’est aussi ena enn conviction solid ki Bondié prend nou soin personnellement ek Li disposé pou pardonne nou bann peché. (Psaume 130:4) Zis bann dimoune ki faire peché ek ki pa’lé repenti ki bizin peur Bondié.a—Hébreux 10:26-31.
Aprann pou ena la crainte pou Jéhovah
4. Ki kapav aide nou pou aprann ena la crainte pou Jéhovah?
4 Li vrai-mem important ki nou ena la crainte pou Bondié pou nou kapav prend bann bon decision ek pou nou gagne so benediction. Alors, couma eski nou kapav “aprann pou ena la crainte pou Jéhovah” couma bizin? (Deutéronome 17:19) Ena beaucoup l’exemple bann zom ek bann femme ki ti ena la crainte pou Bondié, ki la Bible mentionné “pou nou l’instruction.” (Romains 15:4) Pou aide nou comprend ki vedir vrai-mem ena la crainte pou Bondié, anou examine la vie enn parmi sa bann dimoune-la: le roi David.
5. Couma travail ki David ti faire en tant ki berger, ti aide li pou ena la crainte pou Jéhovah?
5 Jéhovah ti rejette Saül, premier lé-roi en Israël, parski li ti ena la crainte pou bann dimoune plutot ki pou Bondié. (1 Samuel 15:24-26) Lot coté, fason ki David ti vive ek so l’attachement ar Jéhovah, ti montré ki li ti vrai-mem ena la crainte pou Bondié. Kan li ti jeune, souvent David ti habitué passe la-nuit dehors pou veille troupeau so papa. (1 Samuel 16:11) A-soir kan li ti guette le ciel ki ti rempli ar zetoile, sa ti surement aide li pou comprend ki été la crainte Jéhovah. Mem si David ti trouve zis enn ti partie l’univers, sa ti faire li comprend enn kitsoz fondamental: Bondié merite nou respé ek nou l’adoration. Plitar li ti ecrire: “Kan mo guette le ciel ek bann kitsoz ki to finn faire avek to la-main, la lune ek bann zetoile ki to finn preparé, ki été enn dimoune mortel, pou ki to pense li, ek ki été enn dimoune ki’nn faire avek la poussiere pou ki to prend li compte?”—Psaume 8:3, 4.
6. Ki sentiment David devant grandeur Jéhovah?
6 Li normal ki David ti impressionné kan li ti trouvé ki quantité li ti tipti comparé avek grandeur enn lé-ciel rempli ar zetoile. Mais sa connaissance-la pa ti faire li peur, au contraire sa ti pousse li pou loué Jéhovah. Li ti dire: “Le ciel pé annonce la gloire Bondié ek li pé raconte bann kitsoz ki Li finn faire avek so la-main.” (Psaume 19:1) Sa grand respé ki David ti ena pou Bondié-la ti faire li vinn pli proche avek Li. Sa ti faire li envie aprann bann la-loi parfait Jéhovah ek suive zot. Essaye maziné ki sentiment David ti ena kan li ti chanté: “To grand ek to faire bann kitsoz extraordinaire; to tousel, to Bondié. Ah Jéhovah, enseigne moi to bann la-loi. Mo pou marche dan to la-verité. Faire mo leker vinn entier pou toi, pou mo ena la crainte pou to nom.”—Psaume 86:10, 11.
7. Couma la crainte ki David ti ena pou Jéhovah ti aide li pou laguerre avek Goliath?
7 Kan bann Philistin ti vinn attak pays Israël, Goliath, zot champion ki ti mesure environ trois metre ti provok bann Israélite. Coumadir li ti pé dire zot: ‘Envoye enn zom pou ki nou laguerre nou deux tousel! Si li gagné, nou pou servi zot.’ (1 Samuel 17:4-10) Saül ek tou so l’armée ti bien peur, mais pa David. David ti koné ki li bizin ena la crainte pou Jéhovah, pa pou enn zom, mem ki quantité fort sa zom-la ti kapav fort. Li ti dire Goliath: “Mo pé vinn vers toi avek nom Jéhovah, chef bann l’armée . . ek tou sa bann dimoune-la pou koné ki, ni avek enn l’epée ni avek enn lance ki Jéhovah sauve [bann dimoune], parski la guerre-la, li pou Jéhovah.” Grace a l’aide Jéhovah, avek so fronde ek enn sel roche, David ti jette sa geant-la enba.—1 Samuel 17:45-47.
8. Ki nou aprann dan bann l’exemple biblik lor bann dimoune ki ti ena la crainte pou Bondié?
8 Nou aussi, pareil couma David, nou kapav pé gagne bann problem ou-soit nou ena bann l’ennemi ki fort. Ki nou kapav faire lerla? Nou kapav affronte zot avek la crainte ki nou ena pou Bondié, pareil couma David ek lezot fidel serviteur Jéhovah dan le passé, ti faire. La crainte pou Bondié kapav vaink la crainte pou bann zom. Nehémia, enn fidel serviteur Jéhovah, ti encourage so bann frere israélite ki ti pé gagne l’opposition. Li ti dire zot: “Pa peur a cause zot. Pense Jéhovah, sa Bondié ki grand ek ki nou bizin peur-la.” (Nehémia 4:14) Grace a soutien Jéhovah, David, Nehémia ek lezot fidel serviteur Bondié ti reussi faire tou seki Jéhovah ti demann zot. Li pou pareil pou nou aussi, si nou ena la crainte pou Bondié.
Faire face ar bann problem avek la crainte pou Bondié
9. Dan ki situation David ti montré ki li ti ena la crainte pou Bondié?
9 Apré ki David ti touye Goliath, Jéhovah ti donne li encore lezot victoire. Mais Saül ti jaloux ek li ti rod touye David. Au commencement, li ti faire sa kan li ti en colere, apré, li finn servi bann lezot tactik, ek finalement li ti prend enn l’armée pou rod David partout. Mem si Jéhovah ti donne David l’assurance ki li pou vinn le roi lor Israël, pendant plusieurs l’année, David ti bizin sauvé, laguerre ek attann kan Jéhovah ti pou faire li vinn le roi. Malgré tou sa bann problem-la, David ti toujours montré ki li ti ena la crainte pou vrai Bondié.—1 Samuel 18:9, 11, 17; 24:2.
10. Couma David ti montré ki li ti ena la crainte pou Jéhovah kan li ti en danger?
10 Dan enn certaine l’occasion, David ti al rod protection kot Akish, le roi Gath, enn la-ville philistin, kot Goliath ti sorti. (1 Samuel 21:10-15) Bann serviteur Akish ti denonce David ek ti dire ki li enn l’ennemi. Couma David ti reagir dan sa situation dangereux-la? Li ti prié Jéhovah avek tou so leker. (Psaume 56:1-4, 11-13) Mem si li ti bizin faire semblant li fou pou li kapav sap dan sa situation-la, David ti koné ki c’est en realité Jéhovah ki ti delivré li ek ti beni so bann zeffort. David ti montré ki li ti vrai-mem ena la crainte pou Jéhovah kan li ti mette tou so confiance en Li.—Psaume 34:4-6, 9-11.
11. Couma nou kapav suive l’exemple David ek montré ki nou ena la crainte pou Bondié kan nou gagne problem?
11 Pareil couma David, nou aussi nou kapav montré ki nou ena la crainte pou Bondié. Couma? Kan nou ena confiance so promesse pou aide nou faire face ar nou bann problem. David ti dire: “Mette tou dan la main Jéhovah, compte lor Li, ek Li-mem ki pou agir.” (Psaume 37:5) Sa pa vedir ki nou bizin zis mette tou nou bann problem dan la main Jéhovah sans ki nou faire nanyin pou reglé zot, ek attann ki Li agir dan nou faveur. David pa ti zis prié Jéhovah pou aide li ek apré li pa ti faire nanyin. Li ti servi so capacité physik ek so l’esprit, bann kitsoz ki Jéhovah ti donne li, pou reglé so problem. Seulement, David ti koné ki so bann zeffort tousel, en tant ki enn humain, pa ti pou assez pou li reussi. Nou aussi nou bizin pense pareil. Apré ki nou finn faire tou seki nou kapav, nou bizin laisse le reste dan la main Jéhovah. En realité, souvent nou pa pou kapav faire nanyin encore, apart compte lor Jéhovah. C’est dan sa moment-la ki nou pou montré ki personnellement nou ena la crainte pou Jéhovah. Nou gagne enn l’encouragement dan seki David ti dire avek tou so leker: “C’est bann ki ena la crainte pou Jéhovah ki vinn so bann camarade intime.”—Psaume 25:14.
12. Kifer nou bizin considere nou la-priere couma enn kitsoz serieux, ek ki l’attitude fodé jamais nou ena?
12 Sa vedir ki nou bizin considere nou la-priere ek nou relation avek Jéhovah couma bann kitsoz bien serieux. Kan nou prié Jéhovah, nou bizin “croire ki Li existé, ek ki Li vinn celui ki recompense bann ki rod Li vrai-mem.” (Hébreux 11:6; Jacques 1:5-8) Ek kan Li aide nou, nou bizin montré ki ‘nou reconnaissant’ envers Li, couma l’apotre Paul ti conseil nou. (Colossiens 3:15, 17) Guette seki enn chrétien oint ti dire lor certain: “Coumadir zot prend Bondié pou enn serveur. Kan zot bizin kitsoz, zot envie ki Li donne zot sa dé-suite couma zot claque zot lé-doigt. Ek kan zot inn gagne seki zot oulé, zot envie ki Bondié allé.” Fodé jamais nou ressemblé sa bann dimoune-la, parski sa l’attitude-la montré ki zot pena vrai-mem la crainte pou Bondié.
Kan nou mette la crainte pou Bondié enn coté
13. Kan eski David ti mank respé envers la Loi Bondié?
13 Kan Jéhovah ti aide David dan bann moment difficile, sa ti augmente la crainte ek confiance ki li ti ena envers Bondié. (Psaume 31:22-24) Mais dan trois l’occasion, li ti mette so la-crainte pou Bondié enn coté, ek sa ti ena bann consequence bien grave. Premier fois, c’est kan li ti faire bann l’arrangement pou amenn l’Arche de l’alliance ziska Jérusalem lor enn charrette au lieu lor zepaule bann Lévite, couma Bondié ti donne l’ordre dan la Loi. Ouzza ti pé dirige sa charrette-la ek kan li ti rod tini l’Arche pou empeche li tombé, Bondié ti touye li dé-suite, parski par so action, li ti montré ki li pa ti ena respé pou Bondié. C’est vrai ki Ouzza ti faire enn peché grave. Mais c’est David ki ti responsable sa malheur-la parski li pa ti respecté la Loi Bondié. La crainte pou Bondié vedir faire kitsoz dapré bann disposition ki Li prend.—2 Samuel 6:2-9; Nombres 4:15; 7:9.
14. Ki ti arrivé apré ki David ti faire enn recensement?
14 Enn lot fois, Satan ti pousse David pou faire enn recensement pou koné comié soldat ti ena en Israël. (1 Chroniques 21:1) Kan li ti faire sa, li ti montré ki li ti mette so la-crainte pou Bondié enn coté, ek lerla 70,000 Israélite ti perdi la vie. Mem si David ti repenti devant Jéhovah, li ek le peuple ti bien souffert.—2 Samuel 24:1-16.
15. Ki ti amenn David pou commette l’adultere?
15 Enn troisieme fois kot David ti mette so la-crainte pou Bondié enn coté, c’est kan li ti gagne bann relation immoral avek Bath-Shéba, femme Ouriya. David ti koné ki l’adultere, ou-soit mem envié femme so camarade, li enn peché grave. (Exode 20:14, 17) Problem-la ti commencé kan David ti trouve Bath-Shéba pé baigné. La crainte pou Bondié ti’nn bizin pousse li dé-suite pou arrete guette Bath-Shéba ek pou control so bann pensée. Mais David li, li ti ‘contigne guetté’ ziska ki so passion pou sa femme-la ti’nn vinn pli fort ki so la-crainte pou Bondié. (Matthieu 5:28; 2 Samuel 11:1-4) David ti blié ki Jéhovah ti bizin present dan tou domaine so la-vie.—Psaume 139:1-7.
16. Ki consequence David ti payé pou so peché?
16 Apré ki Bath-Shéba ti gagne relation avek David, li ti tombe enceinte ek li ti gagne enn garson. Enn tipé apré, Jéhovah ti envoye prophete Nathân pou denonce peché David. Lerla, David inn rann-li compte seki li ti faire, li ti recommence ena la crainte pou Bondié ek li ti repenti. Li ti supplie Jéhovah pou pa rejette li, ni pou tire So l’esprit saint lor li. (Psaume 51:7, 11) Jéhovah ti pardonne David ek Li ti diminué so punition, mais Li pa ti empeche David gagne bann mauvais consequence so bann action. Garson David ti mort ek depuis sa, ti commence ena enn serie malheur dan so famille. Oui, parski li ti mette so la-crainte pou Bondié enn coté, li finn paye sa bien cher!—2 Samuel 12:10-14; 13:10-14; 15:14.
17. Donne enn l’exemple pou montré couma bann peché kapav faire dimoune souffert.
17 Zordi aussi si nou pena la crainte pou Bondié lor la moralité, sa kapav ena bann consequence bien grave ek affecté nou la-vie pou touletan. Prend l’exemple enn jeune madame ki’nn aprann ki so mari, enn chrétien, finn trompe li kan li ti’nn al travail dan enn lot pays. Mazinn so souffrance kan li ti aprann sa: li ti choqué, li ti abatte, ek li ti bien ploré. Comié lé-temps sa pou prend pou ki sa mari-la regagne confiance ek respé so madame? Si bann dimoune ena la crainte pou Bondié, zot kapav evite bann situation difficile coumsa!—1 Corinthiens 6:18.
La crainte pou Bondié empeche nou faire peché
18. Ki l’objectif Satan, ek ki method li servi?
18 Satan pé detruire bann valeur moral sa lé-monde-la bien vite, ek li envie surtout gate l’esprit bann vrai chrétien. Pou faire sa, li servi nou bann sens, surtout nou lizié ek nou zoreille ki touche direct nou leker ek nou l’esprit. (Éphésiens 4:17-19) Ki ou pou faire si, sans ki ou attann, ou trouve bann zimage immoral, ou-soit ou tann bann parole immoral ou-soit ou trouve-ou parmi bann dimoune immoral?
19. Couma la crainte pou Bondié ti aide enn chrétien pou pa tombe dan tentation?
19 Prend l’exemple Andréb ki reste en Europe. Li enn ancien, li ena zenfant, ek li enn docteur. Kan André ti de-garde a-soir dan l’hopital, souvent so bann collegue, bann femme, ti mette bann ti-note—decoré ar bann ti-leker, lor so loryé pou invite li gagne relation sexuel avek zot. Mais André ti bien ferme ek li ti refuse pou arrete so l’esprit lor sa bann proposition-la. En plus, li ti al rod travail dan enn lot place, pou li arrete retrouve-li dan sa situation immoral-la. C’est la crainte pou Bondié ki ti pousse André pou prend sa bon decision-la. Sa ti faire li gagne aussi bann benediction, parski zordi, André pé travail a mi-temps dan Béthel so pays.
20, 21. (a) Couma la crainte pou Bondié aide nou pou pa faire peché? (b) Ki nou pou examiné dan prochain lartik?
20 Si nou arrete nou l’esprit lor bann mauvais pensée, sa kapav faire nou abandonne bann bon relation ki nou ena avek Jéhovah pou enn kitsoz lor ki nou pena okenn droit. (Jacques 1:14, 15) Mais, si nou ena la crainte pou Jéhovah, nou pou reste loin, nou pou mem evite bann dimoune, bann place, bann activité ek bann divertissement ki pou kapav faire nou baisse nou garde. (Proverbes 22:3) Mem si nou senti-nou gené, ou-soit mem si nou bizin faire bann sacrifice, nou pré pou accepté sa, parski faveur Jéhovah, li beaucoup pli important ki sa bann kitsoz-la. (Matthieu 5:29, 30) Si nou ena la crainte pou Bondié, jamais nou pou expose-nou par expré ar enn kitsoz immoral, couma par exemple pornographie, dan n’importe ki forme li été. Au contraire, nou pa pou laisse nou lizié “arrete lor bann kitsoz ki pa vaut nanyin.” Si nou faire sa, nou pou kapav ena confiance ki Jéhovah pou ‘garde nou vivant’ ek pou donne nou seki nou vrai-mem bizin.—Psaume 84:11; 119:37.
21 Oui, nou pou montré ki nou ena la sagesse si nou laisse la crainte pou Bondié dirige nou bann action. Sa pou aussi faire nou trouve vrai bonheur. (Psaume 34:9) Nou pou examine sa dan prochain lartik.
[Note]
a Guette lartik “ D’après la Bible... Craindre un Dieu d’amour : en quel sens ? ” dan Réveillez-vous ! 8 janvier 1998, publié par bann Témoins de Jéhovah.
b Nou finn change sa nom-la.
Eski ou kapav expliké?
• Ki bann qualité spirituel ki associé ar la crainte pou Bondié?
• Couma la crainte pou Bondié kapav vaink la crainte pou bann zom?
• Couma nou kapav montré ki nou ena enn bon l’attitude lor la-priere?
• Couma la crainte pou Bondié empeche nou faire peché?
[Zimage, page 25]
David ti aprann pou ena la crainte pou Bondié kan li ti observe la creation
[Bann zimage, page 26]
Ki ou pou faire si enn tentation presente devant ou sans ki ou attann?