Bann ange—Couma zot influence nou?

“Apré sa, mo’nn trouve enn lot ange ki ti sorti dan le ciel ti desann avek enn grand pouvoir . . . Li ti criyé avek enn la-voix bien fort, li ti dire: ‘Li’nn tombé! Babylone la Grande inn tombé!’ ”—Révélation 18:1, 2.

1, 2. Couma nou koné ki Jéhovah servi bann ange pou realise so volonté?

KAN l’apotre Jean ti prisonnier lor l’île Patmos, li ti gagne privilege pou trouve bann vision prophetik; sa lepok-la li ti bien agé. Li ti trouve bann l’evenement extraordinaire kan, “par moyen l’esprit saint,” li ti trouve-li dan “jour du Seigneur.” Sa jour-la ti commencé kan Jésus Christ ti vinn le Roi en 1914 ek li pou contigné ziska la fin so règne mille an.—Révélation 1:10.

² Jéhovah pa ti donne sa revelation-la direct ar Jean. Li ti servi enn moyen pou transmette sa. Révélation 1:1 dire: “Revelation par Jésus Christ, ki Bondié inn donne li, pou montré So bann esclave bann kitsoz ki pou bizin arrivé bientot. Ek li’nn envoye so ange ek li’nn presente sa par bann symbole ar so esclave Jean, par moyen sa ange-la.” Jéhovah, par moyen Jésus, ti servi enn ange pou faire Jean konn bann kitsoz extraordinaire concernant “jour du Seigneur.” Ti arrivé aussi ki enn fois Jean ti “trouve enn lot ange ki ti sorti dan le ciel ti desann avek enn grand pouvoir.” Ki responsabilité sa ange-la ti ena? “Li ti criyé avek enn la-voix bien fort, li ti dire: ‘Li’nn tombé! Babylone la Grand inn tombé!’ ” (Révélation 18:1, 2) Sa ange bien fort-la ti ena privilege pou annoncé ki Babylone la Grande, setadir tou bann fausse religion ki ena lor la terre, inn tombé. Alors, pena okenn doute ki Jéhovah confié bann ange enn role important pou realise so volonté. Avant ki nou examine plus en detail ki role bann ange joué dan projet Bondié ek ki l’influence zot ena lor nou, anou guette l’origine sa bann creature spirituel-la.

Couma bann ange inn existé?

3. Ki bann l’idée ki pa exact beaucoup dimoune ena lor bann ange?

³ Zordi ena plusieurs million dimoune ki croire ki bann ange existé. Mais beaucoup ena bann l’idée ki pa exact lor zot ek lor zot l’origine. Par exemple, certain dimoune ki croire dan Bondié, pensé ki, kan enn membre zot famille mort, li al kot Bondié ek li vinn enn ange. Eski c’est sa ki Parole Bondié enseigné lor l’origine bann ange ek lor raison pou kifer Bondié inn crée zot?

4. Ki la Bible dire lor l’origine bann ange?

⁴ Chef bann ange, setadir ange ki ena plus pouvoir ek enn pli grand l’autorité, appel Mikaël l’archange. (Jude 9) Sa ange-la c’est Jésus Christ. (1 Thessaloniciens 4:16) Bien-bien longtemps, kan Jéhovah ti decide pou crée, Li ti faire sa ange-la en premier, oui, avant tou lezot creation. (Révélation 3:14) C’est so Garson premier-né. Plitar, Jéhovah ti servi sa Garson-la pou crée tou bann lezot ange. (Colossiens 1:15-17) Kan Jéhovah ti koz avek Job, Li ti koz lor sa bann ange-la couma so bann garson ek Li ti demann Job: “Kot to ti été kan mo ti pose la terre lor so base? Dire moi si vrai-mem to ena l’intelligence. . . . Kisannla ki ti pose roche principal so fondation, letan bann zetoile gramatin ti criyé ensam dan la joie, ek tou bann garson Bondié ti commence loué Li bien fort?” (Job 38:4, 6, 7) Li clair ki bann ange finn crée par Bondié ek zot ti commence existé bien longtemps avant bann dimoune.

5. Couma Bondié inn organise bann ange?

⁵ Dan 1 Corinthiens 14:33 nou lire: “Bondié, Li pa enn Bondié desordre mais enn Bondié la paix.” Dapré sa principe-la, Bondié finn organise so bann garson spirituel dan trois categorie: (1) bann séraphin, ki servi pré kot trone Bondié, ki dire ki Bondié saint ek ki veillé ki so peuple reste pur lor plan spirituel; (2) bann chérubin, ki soutenir so droit pou règne lor l’univers; ek (3) bann lezot ange ki faire seki Jéhovah donne zot l’ordre pou faire. (Psaume 103:20; Isaïe 6:1-3; Ézékiel 10:3-5; Daniel 7:10) Ki l’influence sa bann creature spirituel-la ena lor bann dimoune?—Révélation 5:11.

Ki role bann ange ena?

6. Couma Jéhovah ti servi bann chérubin en rapport avek jardin Éden?

⁶ Premier fois ki la Bible koz directement lor bann creature spirituel c’est dan Genèse 3:24. Sa verset-la dire: “[Jéhovah] ti pousse [Adam ek Ève] ek, dan l’est jardin Éden, Li ti place bann chérubin ek enn l’epée ki ti ena enn lame difé ki ti tourné touletan pou veille chemin pié la vie.” Sa bann chérubin-la ti empeche Adam ek Ève pou ré-rente dan jardin kot zot ti pé resté avant. Sa ti passé dan commencement l’histoire l’humanité. Ki role bann ange inn joué depuis sa?

7. Dapré signification mot “ange” dan langue original, cite enn parmi bann role ki bann ange ena.

⁷ La Bible mentionne bann ange apepré 400 fois. En hébreu ek en grec, mot “ange” kapav vedir “messager.” Sa montré ki Bondié finn servi bann ange pou communik avek bann dimoune. Couma nou ti trouvé dan deux premier paragraphe sa lartik-la, Jéhovah ti servi enn ange pou transmette so message ar l’apotre Jean.

8, 9. (a) Ki l’effet, bann visite enn ange ti ena lor Manoah ek so femme? (b) Ki leson bann parent kapav tiré ar conversation ki Manoah ti gagné ar enn ange?

⁸ Bondié servi aussi bann ange pou soutenir ek encourage so bann serviteur lor la terre. Par exemple, dan lepok bann juge en Israël, Manoah ek so femme ti bien envie gagne enn zenfant. Jéhovah ti envoye enn ange pou faire femme Manoah koné ki li pou gagne enn garson, mem si li ti steril. Li ti dire li: “To pou tombe enceinte ek vrai-mem to pou gagne enn garson; fodé pa ki enn rasoir passe lor so la-tête, parski couma li né-mem, sa zenfant-la pou vinn enn naziréen pou Bondié; ek c’est li ki pou sauve Israël dan la main bann Philistin.”—Juges 13:1-5.

⁹ Inpé lé-temps apré, femme Manoah ti gagne enn garson ki ti appel Samson. Li enn kikenn bien populaire dan bann zistoire ki ena dan la Bible. (Juges 13:24) Avant naissance zot garson, Manoah ti suppliye Jéhovah pou ki sa ange-la retourné pou explik zot couma zot bizin elevé li. Manoah ti demandé: “Ki maniere sa zenfant-la pou bizin vive ek ki li pou faire?” Ange Jéhovah ti repete li bann instruction ki li ti donne so femme avant. (Juges 13:6-14) Manoah ti surement bien encouragé par sa bann parole-la! Zordi, bann ange nepli vinn visite bann dimoune coumsa, mais pareil couma Manoah, bann parent kapav rod direction Jéhovah kan zot elevé zot bann zenfant.—Éphésiens 6:4.

10, 11. (a) Couma Élisha ek so serviteur ti reagir kan l’armée la Syrie ti entoure la ville? (b) Ki leson nou kapav tiré kan nou examine sa l’evenement-la?

¹⁰ Dan lepok prophete Élisha, nou ena enn bon l’exemple couma presence bann ange ti encourage bann serviteur Jéhovah. Élisha ti pé reste Dothân, enn la-ville en Israël. Enn jour, boner gramatin, kan so serviteur ti levé, li ti remarké ki la ville ti entouré avek bann cheval ek bann char la guerre. Le roi Syrie ti’nn envoye enn grand l’armée pou vinn arrete Élisha. Couma serviteur Élisha ti reagir? Li ti peur, kitfois-mem li ti paniké ek li ti criyé: “Ayo, mo maitre! Ki nou pou faire?” Pou li, pa ti ena okenn l’espoir. Mais Élisha ti reponn li: “Pa peur, parski bann ki avek nou, zot pli beaucoup ki bann ki avek zot.” Ki li ti pé rod dire?—2 Rois 6:11-16.

¹¹ Élisha ti koné ki ti ena enn grand quantité ange ki ti là pou soutenir li. Mais so serviteur pa ti trouve nanyin. Alors, “Élisha ti prié ek ti dire: ‘Ah Jéhovah, s’il te plait, ouvert so lizié pou li trouvé.’ Dé-suite Jéhovah ti ouvert lizié serviteur Élisha pou ki li trouvé; ek, guetté, l’endroit kot ti ena montagne, ti rempli ar bann cheval ek bann char difé tout autour Élisha.” (2 Rois 6:17) Lerla, serviteur Élisha ti kapav trouve sa quantité ange ki ti ena tout autour-la. Nou aussi pareil, avek la foi, nou kapav comprend ki bann ange ki enba direction Jéhovah ek Jésus Christ, zot pé soutenir ek protege peuple Jéhovah.

Couma bann ange ti encourage bann dimoune dan lepok Christ?

12. Ki l’encouragement Marie ti gagné ar l’ange Gabriel?

¹² Anou guetté ki l’encouragement Marie, enn vierge juif, ti gagné kan li ti tann sa nouvelle-la: “To pou tombe enceinte ek to pou gagne enn garson, ek fodé ki to appel li Jésus.” Bondié ti envoye ange Gabriel pou koz ar Marie. Zis avant ki li ti donne Marie enn message ki ti etonne li, ange-la ti dire: “Marie, pa peur, parski to’nn trouve faveur devant Bondié.” (Luc 1:26, 27, 30, 31) Surement Marie ti bien encouragé ek ti fortifié kan ange Gabriel ti dire li ki li ena faveur Bondié!

13. Couma bann ange ti encourage Jésus?

¹³ Ti ena enn lot fois encore kot bann ange ti encourage enn serviteur Bondié. Sa ti arrivé apré ki Jésus ti tini ferme kont trois tentation ki Satan ti mette devant li dan desert. La Bible dire nou ki a la fin sa trois tentation-la, “le Diable ti laisse li, ek lerla, bann ange ti vini ek ti commence servi li.” (Matthieu 4:1-11) Ti arrive preské mem zaffaire dan la nuit avant la mort Jésus. Li ti bouleversé, li ti tombe a genou ek li ti faire sa la-priere-la: “ ‘Papa, si to’lé, tire sa coupe-la devant moi. Mais, pa couma moi mo envie, mais couma toi to envie.’ Alors enn ange ki sorti dan le ciel ti apparette ar li ek ti fortifié li.” (Luc 22:42, 43) Mais zordi, couma bann ange soutenir nou?

Couma bann ange soutenir bann dimoune dan lepok modern?

14. Ki persecution bann Témoins de Jéhovah inn enduré dan lepok modern, ek ki resultat zot inn gagné?

¹⁴ Kan nou examine l’activité predication bann Témoins de Jéhovah dan lepok modern, eski li pa clair ki bann ange pé aide zot? Par exemple, avant ek pendant Deuxieme Guerre mondial (1939-45), bann serviteur Jéhovah inn reussi resisté kont l’attak bann nazi en Allemagne ek dan l’Europe de l’Ouest. Kan bann gouvernement fasciste catholique ti pé dominé en Italie, en Espagne ek en Portugal, zot ti bizin supporte persecution pendant pli longtemps encore. Pendant plusieurs dizaine l’année, zot inn endure persecution dan ancien l’Union soviétique ek dan bann pays ki ti depann lor l’Union soviétique. Fodé pa nou blié aussi persecution ki bann Témoin inn enduré dan certain pays l’Afrique.a Pa trop longtemps, bann serviteur Jéhovah inn faire face ar enn persecution bien cruel en Géorgie. Satan inn faire tou seki li kapav pou arrete l’activité bann Témoin. Pourtant, l’organisation bann Témoins de Jéhovah inn reussi sapé dan sa l’opposition-la ek li’nn prosperé. Sa inn arrivé en partie grace a protection bann ange.—Psaume 34:7; Daniel 3:28; 6:22.

15, 16. Couma bann ange aide bann Témoins de Jéhovah dan ministere ki zot faire lor la terre entier?

¹⁵ Jéhovah inn donne so bann Témoin l’ordre pou preche so Royaume lor la terre entier ek pou faire bann disciple. Bann Témoins de Jéhovah inn prend sa travail-la serieux. Zot enseigne la verité ki ena dan la Bible ar bann dimoune ki interessé ar nou message. (Matthieu 28:19, 20) Mais seulement, zot bien conscient ki zot pa kapav faire sa travail-la sans l’aide bann ange. A cause sa ki bann parole ki trouve dan Révélation 14:6, 7 inn touletan encourage zot. Sa text-la dire: “Mo’nn (setadir l’apotre Jean) trouve enn lot ange ki ti pé envolé au milieu le ciel, ek li ti ena enn bon nouvel eternel pou annoncé couma enn l’evangile ar bann ki reste lor la terre, ek ar tou bann nation, tribu, langue, ek peuple, li ti pé dire avek enn la-voix fort: ‘Ena la crainte pou Bondié ek donne Li la gloire, parski l’heure so jugement inn arrivé; ek adore sa Kikenn ki’nn crée le ciel ek la terre ek la mer ek bann la-source de l’eau.’ ”

¹⁶ Sa bann parole-la montré nou ki l’activité ki bann Témoins de Jéhovah pé faire lor la terre entier ena soutien ek direction bann ange. Jéhovah pé servi bann ange pou dirige bann dimoune sincere vers so bann Témoin. Bann ange finn aussi dirige bann Témoin vers bann dimoune ki ena enn bon leker. Sa faire nou comprend kifer dan beaucoup situation—sa arrive trop souvent pou dire ki c’est zis bann coincidence—enn Témoin de Jéhovah joinde enn dimoune ki justement pé passe par enn period difficile ek bizin enn l’aide spirituel.

Enn role bien important bientot

17. Ki ti arrive bann Assyrien kan enn sel ange ti attak zot?

¹⁷ Bann ange zot bann messager Bondié ek zot fortifié bann adorateur Jéhovah; mais zot faire enn lot kitsoz encore. Dan le passé, zot ti applik bann jugement Bondié. Par exemple dan huitieme siecle avant nou lepok, enn grand l’armé soldat assyrien ti entoure Jérusalem pou attak li. Ki Jéhovah ti faire? Li ti dire: “Oui, mo pou defann sa la-ville-la pou sauve li a cause mo reputation ek a cause mo serviteur David.” La Bible dire nou seki ti passé: “Ti arrivé ki pendant sa la-nuit-la, ange Jéhovah ti sorti ek ti touye cent-quatre-vingt-cinq mille zom dan camp bann Assyrien. Kan bann dimoune ti levé boner gramatin, guetté, ti ena zis bann cadavre.” (2 Rois 19:34, 35) Kan nou compare la force enn sel ange avek enn grand l’armée coumsa, nou trouvé ki puissance l’armée bann zom li vrai-mem enn nanyin ditou!

18, 19. Ki grand travail bann ange pou faire bientot, ek ki consequence sa pou ena lor l’humanité?

¹⁸ Bientot, Bondié pou servi bann ange pou applik so jugement. Dan encore enn tigit lé-temps Jésus pou vinn “avek so bann ange puissant dan enn grand difé.” Zot mission c’est pou tire “vengeance lor bann ki pa konn Bondié ek lor bann ki pa obeir la bonne nouvelle concernant nou Seigneur Jésus.” (2 Thessaloniciens 1:7, 8) Sa pou vrai-mem enn grand bouleversement pou l’humanité! Bann ki pa’lé accepté la bonne nouvelle lor Royaume Bondié ki pé preché partout lor la terre zordi, pou detruire. Zis bann ki rod Jéhovah, ki rod la justice ek l’humilité, ki pou “sapé kan jour colere Jéhovah vini” ek pa pou arrive zot nanyin ki faire zot di-tort.—Tsephania 2:3.

¹⁹ Nou kapav reconnaissant envers Jéhovah ki Li servi bann ange bien puissant pou encourage ek pou fortifié so bann adorateur lor la terre. Kan nou comprend ki role bann ange joué dan projet Jéhovah, sa bien rassure-nou, parski ena bann ange ki finn rebelle kont Jéhovah ek ki’nn al dan coté Satan ek zot laisse li dirige zot. Dan prochain lartik, nou pou guetté ki bann chrétien kapav faire pou protege-zot kont sa grand l’influence ki Satan ek so bann demon ena-la.

[Note]

Ki ou finn aprann?

• Couma bann ange finn existé?

• Couma Jéhovah ti servi bann ange dan lepok biblik?

• Ki Révélation 14:6, 7 montré nou lor l’activité bann ange zordi?

• Ki grand travail bann ange pou faire bientot?

[Zimage, page 13]

Enn ange ti encourage Manoah ek so femme

[Zimage, page 15]

“Bann ki avek nou, zot pli beaucoup ki bann ki avek zot”