Enn grand chagrin ki pa fini

PENA trop longtemps, enn dimoune ti envie koné couma le temps ki passé influence sentiment bann ki pé plore la mort enn kikenn ki zot content. Li ti envoye bann questionnaire certain parent ki zot zenfant ti’nn mort sa faire plusieurs l’année. Pa tou bann parent ki ti reponn sa questionnaire-la. Vladimir, enn papa ki ti’nn perdi so garson depuis cinq an, ti expliké ki li encore trouve sa difficile pou koz lor so garson.a

Souvent bann parent ki’nn perdi zot zenfant ressenti chagrin pendant longtemps. Ena dix an, garson William ki ti ena 18 an ti mort noyé. William ecrire: “Mo encore vive avek sa chagrin-la, ek sa pou resté tant ki mo vive.” Garson Lucy ti tombe malade enn sel coup ek li ti mort. Cinq an apré, Lucy ecrire: “Pendant bann premier jour, mo ti contigne pensé, ‘Sa pa kapav vrai.’ Mo ti senti coumadir mo ti pé faire enn cauchemar ek bientot mo sommeil ti pou cassé. Apré enn certain lé-temps, mo’nn commence realisé ki li ti’nn mort vrai-mem ek ki li pa ti pou retourne lakaz. Sa faire cinq an ki mo garson finn mort, mais parfois kan mo tousel, mo encore ploré.”

Kifer bann parent, pareil couma Vladimir, William ek Lucy, ki’nn perdi enn zenfant, ressenti enn grand chagrin ki pa fini? Anou guette certain raison.

Kifer zot chagrin sa quantité-la?

Kan enn zenfant né dan enn famille, bann parent ressenti bann l’emotion ki pa pareil ditou ar bann l’emotion ki zot ressenti dan n’importe ki relation ki zot ena avek lezot dimoune. Zis kan zot attrape zot ti-baba dan zot lebra, zot guette li dormi, ou-soit zot trouve so joli sourire, sa donne zot enn grand bonheur ek satisfaction. Bann parent ki content zot zenfant, prend zot soin avek beaucoup l’amour. Zot forme zot zenfant pou ki zot comporte-zot bien ek ki zot ena bon maniere. (1 Thessaloniciens 2:7, 11) A mesure ki bann zenfant-la grandi ek bann parent trouve zot bann zeffort produire resultat, zot commence ena bann grand l’espoir pou zot zenfant.

Bann parent ki prend soin zot zenfant, travail dur pou donne zot seki zot bizin. Kitfois regulierement zot ramasse l’argent ou-soit bann di-bien pou ki zot kapav aide zot bann zenfant pou commence zot prop famille dan l’avenir. (2 Corinthiens 12:14) Tou sa quantité ki bann parent donné-la—zot l’amour, zot lé-temps, zot zeffort ek zot l’argent—montré enn sel kitsoz: bann parent elevé zot bann zenfant pou ki bannla vive, pa pou zot mort. Kan enn zenfant mort, bann parent pa reussi fini elevé li ek tou l’espoir ki zot ti ena lor li tombe dan de l’eau. Sa grand l’amour ek l’affection ki ena entre bann parent ek zot zenfant-la, coupé ek bloqué par la mort ki couma enn barriere ki pa kapav tiré. Place ki zot garson ou-soit zot tifi ti occupé dan zot leker, li vide asterla ek bann parent ressenti enn grand chagrin ki pa facile pou disparette.

La Bible confirmé ki bann parent ki’nn perdi zot zenfant ressenti enn grand chagrin ki persisté. Li decrire seki ti arrive Jacob, chef enn grand famille, kan li ti tendé ki so garson ti’nn mort. La Bible dire: “Jacob ti dechire so linge ek li ti attache enn la-toile sac autour so lé-rein ek li ti garde deuil pou so garson pendant beaucoup jour. Ek tou so bann garson ek tou so bann tifi ti vinn console li, mais li pa ti oulé consolé ek li ti dire: ‘Parski mo pou desann en deuil kot mo garson dan shéol [ou-soit tombe]!’ ” Beaucoup l’année apré, Jacob ti encore plore la mort so garson, ki li ti croire ti’nn mort. (Genèse 37:34, 35; 42:36-38) Dan la Bible ena aussi l’exemple Naomi, enn madame ki ti fidel ek ki ti perdi so deux garson. Li ti tellement chagrin ki li ti envie change so nom Naomi ki vedir “Agreable,” pou appel Mara, ki vedir “Amer.”—Ruth 1:3-5, 20, 21, note.

Mais la Bible pa zis koz lor sa chagrin ki bann parent ena-la. Li aussi montré couma Jéhovah donne la force bann ki pé plore la mort zot zenfant. Dan prochain lartik, nou pou examine certain moyen ki Jéhovah servi pou donne reconfort bann ki dan chagrin.

[Note]