L’aide avek “Bondié ki donne l’endurance ek consolation”

ENA 2,000 an, Paul, enn ecrivain la Bible, ti appel Jéhovah “Bondié ki donne l’endurance ek consolation.” (Romains 15:5) La Bible donne nou l’assurance ki Jéhovah pa changé avek le temps. Alors, nou kapav ena confiance ki Bondié encore donne consolation bann ki servi Li. (Jacques 1:17) Avredir, la Bible faire nou koné ki Jéhovah donne consolation dan plusieurs fason bann ki bizin sa. Ki certain sa bann fason-la? Bondié donne la force bann ki tourne vers Li dan la priere pou demann so l’aide. Li pousse aussi bann vrai chrétien pou offert consolation zot bann frere ek soeur. Ek dan so Parole, la Bible, Jéhovah inn faire ecrire bann recit ki fortifié surtout bann ki pé plore la mort enn zenfant. Anou guette sa trois forme consolation-la, enn par enn.

“Jéhovah Li-mem inn tendé”

Le roi David ti ecrire concernant nou Createur, Jéhovah: “Mette zot confiance touletan en Li, o peuple! Devant Li dire tou seki zot ena dan zot leker. Bondié Li enn refuge pou nou.” (Psaume 62:8) Kifer David ti ena enn confiance coumsa en Jéhovah? David ti koz lor li-mem kan li ti ecrire: “Sa kikenn ki dan enn grand chagrin-la inn criyé, ek Jéhovah Li-mem inn tendé ek Li’nn sap li dan tou so bann malheur.” (Psaume 34:6) Dan tou bann situation bien difficile ki li’nn koné, David inn toujours prié Bondié pou gagne So l’aide, ek Jéhovah inn touletan aide li. Par l’experience, David ti koné ki Bondié ti pou soutenir li ek aide li pou enduré.

Bann parent ki pé plore la mort enn zenfant bizin koné ki Jéhovah pou soutenir zot dan zot grand tristesse, pareil couma Li ti soutenir David. Zot kapav approche ar sa Kikenn ‘ki ecoute la-priere-la,’ ek ena confiance ki Li pou donne zot so l’aide. (Psaume 65:2) William, ki nou ti cité dan premier lartik, ti dire: “Plusieurs fois mo’nn senti ki mo pa ti pou kapav contigne vive sans mo garson, ek mo’nn demann Jéhovah pou donne moi enn soulagement. Li’nn touletan donne moi la force ek courage pou contigne vive.” Si ou aussi pareil ou prié Jéhovah, grand Bondié ki dan le ciel, avek la foi, Li pou soutenir ou. Apré tou, Jéhovah promette bann ki faire tou seki zot kapav pou servi Li: “Moi, Jéhovah to Bondié, mo pé attrape to la-main droite bien fort, Celui ki dire toi: ‘Pa peur. Moi, mo pou aide toi.’ ”—Isaïe 41:13.

Soutien ki nou gagné avek bann vrai camarade

Souvent bann parent ki’nn perdi zot zenfant bizin reste tousel pendant enn certain lé-temps pou plore la mort zot zenfant ek pou comprend seki zot pé ressenti. Mais li pa bon ki zot evite compagnie lezot pendant trop longtemps. Dapré Proverbes 18:1, “enn kikenn ki reste dan so coin li tousel” kapav faire li-mem di-tort. Alors, bann ki en deuil bizin faire attention ki zot pa reste tousel dan zot coin.

Bann camarade ki ena la crainte pou Bondié kapav donne enn grand l’aide bann ki pé passe par bann moment difficile. Proverbes 17:17 dire: “Enn vrai camarade montré so l’amour touletan; li couma enn frere ki’nn né pou bann moment difficile.” Apré la mort so garson, Lucy, ki nou ti mentionné dan premier lartik, ti faire l’experience sa consolation ki bann vrai camarade donné-la. Li ti dire concernant so bann camarade dan la congregation: “Zot bann visite ti enn grand l’aide, mem si parfois zot pa ti dire nou beaucoup kitsoz. Enn camarade ti vinn guette moi dan bann jour kot mo ti senti-moi tousel. Li ti koné ki mo ti pé ploré kot moi, ek souvent li ti passe lakaz ek li ti ploré ensam avek moi. Enn lot ti telephone moi toulé-jour pou encourage moi. Lezot encore ti invite nou kot zot pou enn repas, ek zot encore toujours faire sa.”

Sa gros chagrin ki bann parent ressenti kan zot perdi enn zenfant-la, li pa facile pou disparette. Mais bann ki dan sa situation-la pou gagne enn vrai consolation kan zot prié Bondié ek zot frequente bann frere ek soeur dan la congregation. Enn quantité parent chrétien ki’nn perdi zot zenfant senti ki Jéhovah avek zot. Oui, Jéhovah “gueri bann dimoune ki ena enn grand chagrin dan zot leker, ek Li mette enn bandage kot zot ena douleur.”—Psaume 147:3.

Bann recit la Bible ki donne consolation

Apart la priere ek frequentation bann frere ki fortifié nou, Parole Bondié li enn source consolation pou bann ki en deuil. Bann recit biblik montré nou ki Jésus ena enn grand desir ek aussi pouvoir pou tire la peine ki bann parent ki’nn perdi zot zenfant ressenti, grace a resurrection bann dimoune ki’nn mort. Sa bann recit-la donne bann ki en deuil, enn vrai consolation. Anou guette deux ladan.

Luc chapitre 7 raconte seki ti arrivé kan Jésus ti trouve enn l’enterrement pé sorti dan la ville Naïn. Bann dimoune ti pé al enterre sel garson enn veuve. Verset 13 dire: “Kan le Maitre ti trouve [veuve-la], li ti ena pitié pou li, ek li ti dire li: ‘Arrete ploré.’ ”

Pena beaucoup dimoune ki pou osé dire enn mama arrete ploré alors ki li pé al enterre so garson. Kifer Jésus ti dire sa? Parski li ti koné ki chagrin sa mama-la ti pré pou disparette. Luc contigne raconté: “[Jésus] ti kosté pré ek ti touche sa l’hamac lor ki sa lekor-la ti été, ek bann ki ti pé sarié lekor-la ti arreté, ek li ti dire: ‘Jeune homme, mo dire toi: Levé!’ Ek jeune homme ki ti’nn mort-la ti levé, ti assizé ek ti commence kozé, ek Jésus ti donne li so mama.” (Luc 7:14, 15) Dan sa moment-la, sa mama-la ti surement ploré encore enn fois, mais sa fois-la li ti plore bann larme la joie.

Dan enn lot l’occasion, enn missié ki ti appel Jaïrus ti approche ar Jésus pou demann li l’aide parski so tifi ki ti ena 12 an ti bien malade. Zis enn tipé apré sa, Jaïrus ti aprann ki so tifi ti’nn fini mort. Letan li ti tann sa, li ti ressenti enn grand chagrin, mais Jésus ti dire li: “Pa bizin to peur, zis ena la foi.” Jésus ti al kot Jaïrus ek li ti rente dan la chambre kot lekor-la ti été. Li ti trappe so la-main, ek li ti dire: “Jeune fille, mo dire toi: Levé!” Ki ti arrivé? “Dé-suite tifi-la ti levé ek ti commence marché.” Ki ti reaction so bann parent? “Zot ti gagne choque ek zot ti dan enn la-joie extraordinaire.” Jaïrus ek so madame ti senti enn grand bonheur letan zot ti maye zot tifi. Sa ti couma enn rêve pou zot.—Marc 5:22-24, 35-43.

Bann recit coumsa ki raconte en detail resurrection bann zenfant, montré bann parent ki pé plore la mort zot zenfant zordi, seki zot kapav attann dan l’avenir. Jésus ti dire: “Pa etonné, parski l’heure pé vini kot tou seki dan bann tombe souvenir pou tann so la-voix ek pou sorti.” (Jean 5:28, 29) Li dan projet Jéhovah ki so Garson redonne la vie bann ki’nn mort. Bann million zenfant ki’nn mort, pou “tann so la-voix” kan li pou dire zot: “Mo dire toi: Levé!” Sa bann zenfant-la pou recommence marché ek kozé. Ek pareil couma Jaïrus ek so madame, bann parent sa bann zenfant-la pou ‘gagne choque ek zot pou dan enn la-joie extraordinaire.’

Si ou’nn perdi enn garson ou-soit enn tifi, li important ki ou koné ki Jéhovah kapav change ou chagrin en la joie grace a resurrection. Pou ou kapav profite sa possibilité extraordinaire-la, obeir conseil ki trouve dan sa Psaume-la: “Rod Jéhovah ek so la-force. Rod Li touletan. Rappel so bann action extraordinaire ki Li’nn faire, so bann mirak.” (Psaume 105:4, 5) Oui, servi vrai Bondié, Jéhovah, ek adore Li couma Li envie.

Si ou “rod Jéhovah,” ki resultat ou pou gagné dé-suite? Ou pou gagne la force grace a la priere, ou pou senti-ou consolé grace a l’interet sincere ki ou bann frere ek soeur chrétien manifesté, ek ou pou senti-ou fortifié par l’etude Parole Bondié. En plus, bientot, ou pou trouve ‘bann action extraordinaire ek bann mirak’ ki Jéhovah pou faire dan ou l’interet eternel ek dan l’interet ou zenfant ki ou’nn perdi.

[L’encadré, page 5]

“Amenn sa madame ki’nn perdi deux zenfant-la”

Kehinde ek Bintu, enn couple Témoin de Jéhovah ki reste Nigeria, ti perdi deux zenfant dan enn accident la route. Depuis ki’nn arrive sa malheur-la, zot ressenti enn grand chagrin. Malgré sa, zot confiance en Jéhovah soutenir zot, ek zot contigne partage message l’espoir ki ena dan la Bible avek zot bann voisin.

Lezot dimoune ti remarké ki Kehinde ek Bintu ti fort ek ki zot ti ena enn certain la-paix dan zot leker. Enn jour enn madame ki appel M^me Ukoli ti dire enn bann camarade Bintu: “Amenn sa madame ki’nn perdi so deux zenfant en mem temps-la ek ki encore pé preche message la Bible. Mo envie koné ki kitsoz ki donne li la force pou enduré.” Kan Bintu ti arrive kot M^me Ukoli, madame-la ti demann li: “Mo envie koné kifer ou encore pé preche concernant enn Bondié ki’nn touye ou bann zenfant. Bondié inn prend mo sel tifi. Depuis sa, mo pa envie tann koz Bondié ditou.” Bintu ti servi la Bible pou expliké kifer bann dimoune mort ek kifer nou kapav sur ki bann ki nou content mais ki’nn mort pou ressuscité.—Actes 24:15; Romains 5:12.

Apré sa, M^me Ukoli ti dire: “Mo ti habitué pensé ki Bondié-mem ki faire dimoune mort. Asterla mo konn la verité.” Li ti decide pou etudié la Bible avek bann Témoins de Jéhovah pou ki li kapav konn plus lor bann promesse Bondié.

[L’encadré, page 6]

‘Mo envie aidé, mais mo pa koné couma pou faire’

Kan enn zenfant inn mort, so bann parent ek so bann frere ek soeur ressenti enn grand chagrin. Mais li arrivé ki zot bann camarade pa trop koné ki pou faire. Zot envie soutenir sa famille-la, mais zot peur pangar zot dire ou-soit zot faire enn kitsoz ki pa bizin ek ki pou faire sa famille-la pli chagrin encore. Ala certain suggestion pou bann ki kapav pensé: ‘Mo envie aidé, mais mo pa koné couma pou faire.’

❖ Pa evite bann dimoune ki en deuil parski ou pa trop koné ki pou dire ou-soit ki pou faire. Zis ou presence assez pou donne zot courage. Eski ou pa koné ki pou dire zot? Alors serre zot dan ou lé-bras ek dire zot sincerement ki ou partage zot chagrin. Sa pou montré zot ki ou content zot ek ki ou interessé ar zot. Eski ou peur pangar si ou ploré, sa pou faire zot pli chagrin? La Bible dire: “Ploré avek bann ki ploré.” (Romains 12:15) Ou bann larme montré ki ou partage zot chagrin, ek sa pou reconforte zot.

❖ Pa peur pou faire kitsoz. Eski ou kapav prepare enn ti mangé simple pou la famille? Eski ou kapav lave bann l’assiette sale ki’nn empilé dan l’evier? Eski ou kapav al la boutik pou zot? Pa zis dire zot: “Faire moi koné si zot bizin kitsoz.” Mem si ou dire sa bann parole-la dan enn fason sincere, kitfois beaucoup parent ki’nn fek perdi zot zenfant pou croire ki ou trop occupé pou aide zot. Demann zot plutot: “Ki mo kapav faire pou aide zot asterla?” ek apré faire seki zot demann ou. Mais evite al dan bann l’endroit kot ou pa supposé allé dan zot lakaz, ek pa rente dan zot la-vie privé.

❖ Evite dire: “Mo koné ki to ressenti.” Chaque dimoune reagir dan enn fason different kan li perdi enn dimoune ki li content. Mem si ou aussi, ou’nn perdi enn zenfant, ou pa koné vrai-mem seki zot, zot ressenti.

❖ Beaucoup lé-temps pou passé avant ki sa famille-la retrouve enn la-vie ki parette normal. Contigne aide zot autant ki ou kapav. Souvent kan enn kikenn mort, tou dimoune bien attentionné pou so famille au commencement, mais sa famille-la bizin l’aide pli longtemps ki sa. Prend zot compte pendant bann semaine ek bann mois ki vini.a

[Note]

[Zimage, page 7]

Bann recit biblik montré ki Jésus ena pouvoir ek desir pou ressuscite bann zenfant