Ki l’avenir reservé?
KIFER LI IMPORTANT KI NOU ROD REPONSE POU SA QUESTION-LA? Fason ki nou trouve seki pou arrivé demain, sa ena enn l’influence lor bann action ki nou faire zordi. Par exemple, bann dimoune ki pena grand l’espoir pou l’avenir kapav adopté sa l’attitude-la: “Anou mangé-boire, parski demain nou pou mort.” (1 Corinthiens 15:32) Sa l’attitude-la amenn bann dimoune pou mangé ek boire a l’excès ek pou gagne bann tracas. En tou cas, sa pa faire zot gagne la paix l’esprit ditou.
Li vrai ki si nou l’avenir ti depann zis lor seki bann dimoune kapav faire, nou pa ti pou ena grand l’espoir. Jamais l’air, de l’eau ek la terre inn pollué couma zordi. Pli allé ena plus risk ki ena enn la-guerre nucleaire ek bann l’attak terroriste. Dan le monde entier bann milliard dimoune affecté par maladie ek la misere. Malgré sa, nou ena bann bon raison pou nou ena l’espoir.
Alors ki bann dimoune pa kapav predire l’avenir dan enn fason exact, Jéhovah presente Li-mem couma sa Kikenn “ki depuis commencement faire konn la fin, ek depuis bien longtemps avant bann kitsoz ki pankor faire.” (Isaïe 46:10) Ki Li dire concernant seki l’avenir reservé?
Seki la Bible dire
Jéhovah pa pou laisse la terre ni la vie lor la terre fini net. En realité, la Bible promette ki Bondié pou “detruire bann ki pé detruire la terre.” (Révélation 11:18) Par moyen so Royaume, ou-soit so gouvernement ki dan le ciel, Jéhovah pou nettoye la terre. Li pou tire tou mechanceté ki ena lor la terre ek Li pou amenn bann condition ki Li ti envie dan commencement. (Genèse 1:26-31; 2:8, 9; Matthieu 6:9, 10) Sa bann verset la Bible ki cité apré-la donne nou enn l’idée lor l’avenir. Zot annonce bann evenement ki bientot pou touche chaque dimoune lor la terre.
Psaume 46:8, 9. “Vini, vinn guette seki Jéhovah inn faire, couma Li’nn faire bann evenement etonnant arrivé lor la terre. Li faire bann la-guerre arreté ziska dan boute la terre. L’arc-la, Li casse li, lance-la aussi Li casse li boute-boute; Li brule bann char la guerre dan difé.”
Isaïe 35:5, 6. “Sa lepok-la lizié bann aveugle pou ouvert, ek zoreille bann sourde pou debouché. Dan sa lepok-la seki boiteux pou sauté couma enn cerf, ek la langue enn kikenn ki pa kapav kozé, pou criyé avek la joie. Parski de l’eau pou finn sorti dan desert, ek bann grand la-riviere pou finn coulé dan bann la-plaine kot nanyin pa poussé.”
Isaïe 65:21, 22. “Oui, zot pou range bann lakaz ek zot pou reste ladan; ek zot pou plante bann karo raisin ek zot pou mange zot bann fruit. Zot pa pou rangé pou ki enn lot resté; zot pa pou planté pou ki enn lot mangé.”
Daniel 2:44. “Bondié ki dan le ciel pou etabli enn royaume ki jamais pa pou detruire. Ek sa royaume-la pa pou vinn pou enn lot peuple. Li pou crase tou bann lezot royaume ek li pou fini zot, ek li pou regné pou touletan.”
Jean 5:28, 29. “L’heure pé vini kot tou seki dan bann tombe souvenir pou tann la-voix [Jésus] ek pou sorti.”
Révélation 21:3, 4. “Bondié Li-mem pou avek zot. Li pou souye tou larme dan zot lizié, ek la mort nepli pou existé. Dimoune nepli pou en deuil, zot nepli pou ploré ek nepli pou ena douleur. Bann kitsoz avant finn disparette.”
Couma eski reponse ki la Bible donné faire nou gagne vrai la-paix l’esprit
Bann condition ki decrire dan sa bann verset la Bible-la kapav parette difficile pou croire premier coute. Mais c’est Bondié ki faire sa bann promesse-la, pa bann zom. Ek Jéhovah “pa kapav koz menti.”—Tite 1:2.
Si ou aprann pou mette ou confiance dan bann promesse Bondié ek si ou vive dapré so bann la-loi, ou pou garde ou la-paix l’esprit mem dan bann situation pli difficile ki ou joinde. Nanyin parmi sa bann kitsoz-la, ki li la guerre, la misere, la maladie, ek mem bann probleme la vieillesse ou-soit l’idée ki ou la-mort pé kosté, pa pou faire ou perdi pou touletan sa la-paix ki ou ena dan ou-la. Kifer? Parski ou ena confiance ki Royaume Bondié pou cancel tou l’effet ki sa bann probleme-la kapav ena.
Couma ou kapav gagne sa qualité l’esperance-la pou l’avenir? Fodé ki ou ‘renouvelé ou fason pensé’ ek verifié pou ou-mem ki “volonté Bondié, li bon, li acceptable ek li parfait.” (Romains 12:2) Surement ou pou bizin lezot preuve ki ou kapav faire confiance bann promesse ki ena dan la Bible. Li vaut la peine ki ou examine sa bann preuve-la. Pena beaucoup kitsoz ki ou faire dan ou la-vie ki pou kapav faire ou gagne plus la-paix l’esprit.
[Zimage lor page 7, 8]
Ki Parole Bondié dire lor l’avenir?