Reponse Jéhovah pou enn la priere sincere

“Pou ki bann dimoune koné ki toi, ki appel Jéhovah, to tousel Pli Grand lor la terre entier.”—PS. 83:18.

1, 2. (a) Ki l’experience beaucoup dimoune inn faire? (b) Ki bann question nou kapav posé?

PA TROP longtemps, enn madame ti bien bouleversé par enn malheur ki ti arrivé dan so l’endroit. Li ti enn catholique, alors li ti al guette so pretre pou gagne l’aide, mais pretre-la pa ti mem interessé pou koz ar li. Alors, li ti prié Bondié ek li ti dire: “Mo pa konn toi . . . , mais mo koné ki to existé. S’il te plait, faire moi konn toi!” Enn tipé apré, bann Témoins de Jéhovah ti visite li, ti encourage li ek ti reponn so bann question. Zot ti enseigne li beaucoup kitsoz, parmi, zot ti montré li ki Bondié ena enn nom personnel: Jéhovah. Sa ti touche li beaucoup. Li ti dire: “Sa Bondié-la-mem ki mo ti envie koné depuis ki mo tipti!”

² Beaucoup dimoune ti ena mem sentiment kan zot ti aprann nom Bondié. Souvent, c’est kan zot inn lire Psaume 83:18 ki zot inn trouve nom Jéhovah pou premier fois. Traduction du monde nouveau traduire sa verset-la coumsa: “Pou ki bann dimoune koné ki toi, ki appel Jéhovah, to tousel Pli Grand lor la terre entier.” Mais eski ou finn deja demann ou-mem kifer inn ecrire Psaume 83? Ki bann l’evenement ti pou oblige chaque dimoune pou reconette ki Jéhovah Li sel vrai Bondié? Ki nou kapav aprann dan sa psaume-la zordi? Dan sa lartik-la nou pou reponn sa bann question-la.a

Enn complot kont peuple Jéhovah

3, 4. Kisannla ti compose Psaume 83, ek lor ki menace li ti kozé?

³ Dapré note ki ena la-haut, Psaume 83 c’est “enn cantik par Asaph.” Asaph ti enn Lévite ek enn grand musicien pendant regne le roi David. Kitfois c’est enn so descendant ki ti compose sa psaume-la. Ladan, psalmiste-la ti suppliye Jéhovah pou faire kitsoz pou soutenir So souveraineté ek pou faire bann dimoune konn So nom. Kitfois li ti compose sa psaume-la enn tipé apré la mort Salomon. Kifer nou dire sa? Parski pendant regne David ek Salomon, le roi Tyr pa ti l’ennemi peuple Israël. Mais dan lepok kot ti ecrire Psaume 83, bann habitant Tyr ti tourne zot ledo ar nation Israël ek ti faire enn l’alliance ar so bann l’ennemi.

⁴ Sa psalmiste-la cite dix nation ki ti comploté pou detruire peuple Bondié. Sa bann l’ennemi-la ti reste tout autour bann Israélite ek Psaume 83 donne nou enn la liste sa bann l’ennemi-la: “Bann la tente Édom ek bann Yishmaélite, Moab ek bann Hagrite, Guébal, Ammôn ek Amaleq, Philistie avek bann habitant Tyr. L’Assyrie aussi finn joinde ensam ar zot.” (Ps. 83:6-8) Lor ki l’evenement ki ti’nn arrivé dan l’histoire bann Israélite, sa psaume-la pé kozé? Certain dire ki sa concerne l’attak ki bann nation Ammôn, Moab ek bann habitant ki ti reste dan montagne Séïr ti faire kont Israël dan lepok Yehoshaphat. (2 Chron. 20:1-26) Ena lezot ki pensé ki sa psaume-la koz lor la haine ki bann nation tout autour ti ena en general kont nation Israël pendant ki li ti existé.

5. Couma Psaume 83 kapav aide bann chretien zordi?

⁵ Mais n’importe lor ki li kozé, li clair ki Jéhovah ti faire ecrire sa psaume-la dan enn lepok kot so peuple ti en danger. Sa psaume-la encourage aussi bann serviteur Jéhovah dan nou lepok, parski toute longue zot l’histoire, bann l’ennemi pa’nn arrete attak zot parski bannla bien decidé pou detruire peuple Bondié. Ek pena doute ki li pou fortifié nou bientot, kan Gog de Magog pou rassemblé so l’armée pou essaye detruire enn dernier fois tou bann ki adore Bondié avek l’esprit ek la verité.—Lire Ézékiel 38:2, 8, 9, 16.

Seki ti pli important

6, 7. (a) Pou ki kitsoz sa psalmiste-la ti prié au commencement Psaume 83? (b) Ki ti pli important pou sa psalmiste-la?

⁶ Ecoute sa psalmiste-la dire so bann sentiment dan enn la priere: “Ah Bondié, pa reste dan silence; ah Bondié pa reste sans dire nanyin, pa reste trankil. Parski guetté, to bann l’ennemi pé revolté; ek bann ki ena enn grand la haine pou toi, inn leve zot la tête. Zot pé koz en secret enba-enba kont to peuple . . . Parski avek zot leker, ensam sakenn inn partage so conseil; zot inn mem faire enn l’alliance kont toi.”—Ps. 83:1-3, 5.

⁷ Ki ti pli important pou sa psalmiste-la? Bien sur, surement li ti bien tracassé pou so prop securité ek securité so famille. Pourtant, dan so la priere, li ti koz zis lor deshonneur ki ti’nn jetté lor nom Jéhovah ek lor bann menace ki ti faire kont nation ki ti porte sa nom-la. Nou aussi, anou garde mem l’attitude equilibré pendant ki nou pé endure bann difficulté dan lepok dernier jour sa vié le monde-la!—Lire Matthieu 6:9, 10.

8. Ki ti pousse bann nation pou comploté kont Israël?

⁸ Psalmiste-la reprend bann parole ki bann l’ennemi Israël ti dire: “Vini ek anou efface zot pou ki zot nepli enn nation, pou ki personne nepli rappel nom Israël.” (Ps. 83:4) Nou trouvé ki sa bann nation-la ti ena vrai-mem enn grand la haine pou peuple ki Bondié ti’nn choisir! Mais ti ena enn lot mobile ki ti pousse zot pou faire sa complot-la. Zot ti envie gagne pays Israël ek zot ti dire dan enn fason vantard: “Anou prend pou nou bann l’endroit ki pou Bondié.” (Ps. 83:12) Eski zordi aussi finn arrive enn kitsoz coumsa? Oui!

“L’endroit sacré ki pou toi”

9, 10. (a) Dan le passé, ki l’endroit sacré Bondié ti été? (b) Dan nou lepok, ki benediction bann chretien oint ek bann membre “lezot brebis” pé gagné?

⁹ Dan le passé, certain ti koz lor la Terre promise couma l’endroit sacré ki ti pou Bondié. Rappel sa chanté la victoire ki bann Israélite ti chanté apré ki zot ti delivré dan l’Égypte: “Toi, dan to l’amour fidele, to finn guide sa peuple ki to’nn reamené-la; oui, grace a to la force to pou conduire zot dan l’endroit sacré ki pou toi.” (Ex. 15:13) Plitar, dan sa ‘l’endroit sacré-la’ ti ena enn temple avek so bann pretre ek enn capital, la ville Jérusalem avek bann le roi, bann descendant le roi David ki ti assize lor trone Jéhovah. (1 Chron. 29:23) C’est a cause sa ki Jésus ti appel Jérusalem “la ville grand le Roi.”—Mat. 5:35.

¹⁰ Ki nou kapav dire zordi? En l’an 33 nou lepok, enn nouveau nation ti né, “Israël Bondié.” (Gal. 6:16) Dan sa nation-la ti ena bann frere oint Jésus Christ, ek zot ti accompli seki nation Israël pa ti reussi faire, setadir vinn bann temoin nom Bondié. (Is. 43:10; 1 Pierre 2:9) Jéhovah ti faire mem promesse ar zot ki seki Li ti faire ar nation Israël: “Mo pou vinn zot Bondié, ek zot pou vinn mo peuple.” (2 Cor. 6:16; Lév. 26:12) En 1919, Jéhovah ti eleve bann ki resté parmi “Israël Bondié” pou zot kapav ena bann relation special avek Li. C’est lerla ki peuple Bondié ti gagne enn “pays,” enn place symbolik kot zot kapav faire zot l’activité ek kot zot kapav profite enn paradis spirituel. (Is. 66:8) Depuis 1930, plusieurs million “lezot brebis” finn vinn joinde zot. (Jean 10:16) La joie ek prosperité spirituel ki bann chretien dan nou lepok koné, montré bien ki Jéhovah ena droit legal pou dirige l’univers. (Lire Psaume 91:1, 2.) Sa faire Satan en colere terrible!

11. Ki l’objectif principal bann l’ennemi Bondié encore toujours ena?

¹¹ Pendant lepok la fin, Satan inn pousse so bann representant lor la terre pou persecute le reste bann chretien oint ek zot bann compagnon, lezot brebis. C’est seki ti arrivé en Europe de l’Ouest kan bann nazi ti pé dirigé ek en Europe de l’Est, enba gouvernement communiste l’Union soviétique. Sa finn arrivé aussi dan beaucoup lezot pays, ek sa pou arrivé encore, surtout pendant l’attak final Gog de Magog. Kan pou ena sa l’attak-la, li possible ki nou bann opposant pou confiské la terre ek di-bien peuple Jéhovah avek enn desir exageré pou gagne plus kitsoz, pareil couma nou bann l’ennemi ti faire dan le passé. Mais, l’objectif Satan li toujours pareil: faire nou, peuple Bondié, arrete existé en tant ki enn nation pou ki personne pa rappel nom ki Bondié inn donne nou. Couma Jéhovah reagir kan certain prend position kont so souveraineté coumsa? Anou reguette seki sa psalmiste-la ti dire.

Bann victoire ki servi couma bann modele

12-14. Lor ki deux grand victoire ki ti arrivé pré kot la ville Meguiddo, sa psalmiste-la ti pé kozé?

¹² Remarké couma sa psalmiste-la ti ena enn grand la foi ki Jéhovah ena capacité pou faire plan bann nation l’ennemi tombe dan de l’eau. Li ti koz en mem temps lor deux victoire ki bann Israélite ti gagné lor zot bann l’ennemi pré kot ancien la ville Meguiddo, ki ti faire face ar enn vallée ki ti ena mem nom. En été, la riviere Qishôn sec, ek nou kapav trouve chemin ki li faire a travers sa vallée-la. Kan ena bann gros la pluie l’hiver, la riviere-la rempli sa vallée-la. C’est surement pou sa raison-la ki appel la riviere Qishôn “bann de l’eau Meguiddo.”—Juges 4:13; 5:19.

¹³ Apepré quinze kilometre lot coté vallée Meguiddo, ena colline Moré. Dan lepok juge Guidéôn, c’est la ki bann l’armée madianite, amaléqite ek bann ki sorti dan l’Orient ki ti faire enn l’alliance, ti rassemblé pou laguerre kont bann Israélite. (Juges 7:1, 12) Guidéôn finalement ti retrouve-li avek enn ti l’armée zis 300 soldat, mais avek l’aide Jéhovah zot ti gagne la victoire lor sa bann grand l’armée-la. Couma? Zot ti suive bann l’instruction ki Jéhovah ti donne zot. Zot ti prend bann jarre ek ladan zot ti cachiette bann flambeau difé, ek a soir, zot ti encerclé camp zot bann l’ennemi. Kan zot ti tann signal Guidéôn, zot ti casse zot bann jarre, ek desuite bann flambeau difé-la ti parette. En mem temps, zot ti soufflé zot cor ek zot ti criyé: “L’epée Jéhovah ek l’epée Guidéôn!” Zot l’ennemi ti paniké ek ti commence touye sakenn zot camarade; bann ki ti reussi sapé, ti traverse la riviere Jourdain ek ti sauvé. Entre-temps, bann lezot Israélite ti vinn joinde l’armée Guidéôn ek zot ti poursuive zot l’ennemi. En tou, 120,000 soldat dan camp bann l’ennemi ti mort.—Juges 7:19-25; 8:10.

¹⁴ Toujours lot coté vallée Meguiddo, apepré six kilometre apré colline Moré, ena montagne Tabor. Dan sa l’endroit-la, juge Baraq ti rassemblé 10,000 soldat israélite pou laguerre avek l’armée Yabîn ki ti le roi Hatsor, dan pays Canaan. Chef l’armée Yabîn ti appel Sisera. Dan sa l’armée-la ti ena 900 char la guerre avek bann longue lame ferraille bien dangereux ki ti tourné dan zot la roue. Pendant ki l’armée bann Israélite, ki ti mal equipé, ti rassemblé lor montagne Tabor, Sisera li, li ti rente dan enn piege kan li’nn amenn so l’armée dan vallée Meguiddo. Lerla, “Jéhovah ti faire Sisera ek tou so bann char la guerre ek tou so camp, tombe dan enn confusion.” Li possible ki lerla enn gros la pluie ti commence tombé ek la riviere Qishôn ti debordé ek a cause sa, bann char la guerre ti tasse dan la boue. Bann Israélite ti touye tou bann soldat dan sa l’armée-la.—Juges 4:13-16; 5:19-21.

15. (a) Ki sa psalmiste-la ti demann Jéhovah pou faire? (b) Kan nou guette nom la guerre final ki Bondié pou faire, ki sa faire nou pensé?

¹⁵ Sa psalmiste-la ti suppliye Jéhovah pou agir pareil avek bann nation ki ti menace pou detruire nation Israël dan so lepok. Li ti faire sa la priere-la: “Faire pareil ar zot couma to’nn faire ar Madiân, ar Sisera, ar Yabîn dan vallée la riviere Qishôn. Zot ti detruire dan En-Dor; zot ti vinn fumier pou la terre.” (Ps. 83:9, 10) Li interessant pou remarké ki la guerre final ki Bondié pou faire kont le monde Satan appel Har-Maguédôn (ki vedir “Montagne Meguiddo”). Sa nom-la faire nou pense bann la guerre important ki ti arrivé pré kot Meguiddo. Bann victoire ki Jéhovah ti gagné dan le passé-la, donne nou garantie ki Li pou gagne la victoire kan pou ena la guerre Har-Maguédôn.—Rév. 16:13-16.

Prié pou ki Jéhovah justifié so souveraineté

16. Couma figure nou bann opposant inn ‘rempli ar deshonneur’ zordi?

¹⁶ Pendant lepok “dernier jour,” Jéhovah inn blok tou zeffort ki nou bann opposant inn faire pou detruire so peuple. (2 Tim. 3:1) Sa inn faire sa bann opposant-la honté. C’est seki Psaume 83:16 ti annoncé: “Rempli zot figure ar deshonneur, pou ki bann dimoune rod to nom, o Jéhovah!” Dan enn pays apré enn lot kot nou bann opposant inn essaye detruire bann Témoins de Jéhovah, zot pa’nn reussi. Dan sa bann pays-la, fermeté ek l’endurance bann adorateur sel vrai Bondié inn servi couma enn temoignage pou bann dimoune sincere, ek beaucoup inn ‘rod nom Jéhovah.’ Dan certain pays kot pendant enn lepok bann Témoins de Jéhovah ti gagne bann grand persecution, asterla ena plusieurs dizaine millier dimoune, kitfois mem plusieurs centaine millier dimoune, ki pé adore Jéhovah dan la joie. C’est vrai-mem enn grand victoire pou Jéhovah, mais enn grand la honte pou so bann l’ennemi!—Lire Jérémie 1:19.

17. Ki situation critik pé attann bann dimoune lor la terre, ek ki parole bientot nou pou rappel?

¹⁷ Bien sur, nou koné ki nou bann opposant pou contigne persecute nou ek ki nou pou contigne preche la bonne nouvelle, mem ar nou bann l’ennemi. (Mat. 24:14, 21) Mais, bientot nou bann opposant nepli pou ena sa possibilité pou zot repenti ek pou gagne la vie sauve, possibilité ki zot ena asterla. Sanctification nom Jéhovah beaucoup pli important ki delivrance bann dimoune. (Lire Ézékiel 38:23.) Kan tou bann nation lor la terre pou rassemblé pou essaye detruire peuple Bondié, nou pou rappel bann parole ki sa psalmiste-la ti dire dan so la priere: “Laisse zot honté ek bouleversé pou touletan, laisse zot deconcerté ek laisse zot mort.”—Ps. 83:17.

18, 19. (a) Ki kitsoz pé attann bann ki bien decidé pou oppose-zot ar souveraineté Jéhovah? (b) Alors ki ou koné ki bientot Jéhovah pou justifié so souveraineté, ki sa pousse ou pou faire?

¹⁸ Bann ki bien decidé pou oppose-zot ar souveraineté Jéhovah, pou konn enn la fin ki pou bien humilié zot. Parole Bondié faire nou koné ki bann ki “pa obeir la bonne nouvelle”—ek ki a cause sa pou perdi la vie kan Har-Maguédôn pou vini—pou konn enn “destruction eternel.” (2 Thess. 1:7-9) Kan zot pou detruire ek kan bann ki adore Jéhovah pou gagne la vie sauve, sa pou enn preuve extraordinaire ki Jéhovah Li sel vrai Bondié. Dan le monde nouveau, jamais nou pa pou blié sa grand victoire-la. Bann dimoune ki pou ressuscité pendant “resurrection bann dimoune ki juste ek bann dimoune ki pa juste” pou aprann sa action extraordinaire ki Jéhovah inn faire-la. (Actes 24:15) Zot pou trouvé par zot-mem ki li sage ki nou soumette ar souveraineté Jéhovah. Ek bien vite, bann ki ena l’humilité parmi zot pou gagne conviction ki Jéhovah Li sel vrai Bondié.

¹⁹ C’est vrai-mem enn l’avenir extraordinaire ki nou Papa ki dan le ciel inn preparé pou so bann fidele adorateur! Eski sa pa pousse-ou pou prié ki bien vite Jéhovah donne enn reponse final pou sa la priere ki sa psalmiste-la ti faire: “Laisse [to bann l’ennemi] deconcerté ek laisse zot mort; pou ki bann dimoune koné ki toi, ki appel Jéhovah, to tousel Pli Grand lor la terre entier”?—Ps. 83:17, 18.

[Note]

Eski ou kapav expliké?

• Dan ki situation Israël ti été kan ti ecrire Psaume 83?

• Ki ti pli important pou ecrivain Psaume 83?

• Pou kisannla Satan ena la haine zordi?

• Couma finalement Jéhovah pou reponn la priere ki trouve dan Psaume 83:18?

[Zimage page 19]

(guette publication)

Ki rapport ena entre bann la guerre ki ti arrivé pré kot Meguiddo ek nou l’avenir?

La riviere Qishôn

Harosheth

Mt Carmel

Vallée Yizréel

Meguiddo

Taanak

Mt Guilboa

La source Harod

Moré

En-Dor

Mt Tabor

La mer Galilée

La riviere Jourdain