Ki ou disposé pou sacrifié pou gagne la vie eternel?
“Ki enn dimoune pou donné en echange pou so nâme?”—MAT. 16:26.
1. Kifer Jésus pa ti accepté kan Pierre ti reprend li?
L’APOTRE Pierre pa ti’lé croire seki li ti tendé. Jésus Christ, so Guide ki li ti bien content, ti pé dire “bien franc” ki bientot Li pou souffert ek Li pou mort! Pierre ti reprend Jésus—surement avek bann bon l’intention—kan li ti dire li: “To bizin bon avek to-mem, Seigneur; non, to pa pou konn sa sort-la.” Jésus ti tourne so ledo ar Pierre ek ti guette lezot disciple. Kitfois zot aussi zot ti ena sa mauvais l’opinion-la pareil couma Pierre. Jésus ti dire Pierre: “Passe derriere moi, Satan! To enn l’obstacle ki kapav faire moi tombé, parski to pa pense bann pensée Bondié, mais bann pensée bann zom.”—Marc 8:32, 33; Mat. 16:21-23.
2. Dapré Jésus, ki enn vrai disciple bizin faire?
2 Kitfois, bann parole ki Jésus ti dire apré ti aide Pierre pou comprend kifer Jésus ti reagir dan enn fason severe coumsa. Jésus “ti appel la foule ek so bann disciple” ek li ti dire zot: “Si kikenn envie suive moi, li bizin renié li-mem ek prend so poteau souffrance ek contigne suive moi; parski enn kikenn ki envie sap so nâme pou perdi li; mais enn kikenn ki perdi so nâme a cause moi ek la bonne nouvelle pou sap li.” (Marc 8:34, 35) Mot “nâme” ki Jésus ti servi ici vedir “la vie.” Li clair ki Jésus ti pé al donne so la vie en sacrifice, mais li ti attann aussi ki so bann disciple ti pou disposé pou sacrifié zot la vie dan service Bondié. Si zot ti faire sa sacrifice-la, zot ti pou gagne bann grand benediction.—Lire Matthieu 16:27.
3. (a) Ki bann question Jésus ti pose bann dimoune? (b) Kitfois, ki bann dimoune ti rappel kan zot ti tann deuxieme question ki Jésus ti posé?
3 Dan sa mem l’occasion-la, Jésus ti pose deux question ki ti faire reflechi: “Ki profit enn dimoune ena pou gagne le monde entier ek perdi so nâme? En realité, ki enn dimoune pou donné en echange pou so nâme?” (Marc 8:36, 37) Reponse premier question-la li clair pou n’importe ki dimoune. Pena okenn profit si enn dimoune gagne le monde entier mais li perdi so nâme setadir so la vie. Nou kapav profite bann di-bien a condition ki nou vivant. Kan Jésus ti pose sa deuxieme question-la: “Ki enn dimoune pou donné en echange pou so nâme?,” kitfois bann ki ti pé ecoute li ti rappel seki Satan ti dire dan lepok Job: “Tou seki enn dimoune ena, li pou donne sa pou sap so nâme.” (Job 2:4) Li possible ki sa bann parole Satan-la applik ar certain dimoune ki pa adore Jéhovah. Beaucoup dimoune pou disposé pou faire n’importe ki kitsoz, pou al kont n’importe ki principe, zis pou zot reste en vie. Mais bann chretien zot, zot trouve bann kitsoz dan enn fason different.
4. Kifer bann question ki Jésus ti posé ena enn pli grand signification pou bann chretien?
4 Nou koné ki Jésus pa’nn vinn lor la terre pou donne nou enn bon la santé, richesse ek enn longue la vie dan sa le monde-la. Li’nn vini pou donne bann dimoune possibilité pou vive pou touletan dan le monde nouveau, ek pou nou sa l’esperance-la ena enn grand valeur. (Jean 3:16) Alors, enn chretien kapav comprend sa premier question Jésus-la coumsa: “Ki profit enn dimoune ena pou gagne le monde entier ek pou perdi l’esperance la vie eternel?” Reponse: okenn profit. (1 Jean 2:15-17) Pou aide nou reponn deuxieme question ki Jésus ti posé, li bon ki nou demann nou-mem: ‘Ki mo disposé pou sacrifié asterla pou ki mo l’esperance pou vive pou touletan dan le monde nouveau li sur?’ Nou reponse, li refleté dan fason ki nou amenn nou la vie, ek li montré si sa l’esperance-la li vrai-mem bien solide dan nou leker.—Compare avek Jean 12:25.
5. Couma nou kapav gagne don la vie eternel?
5 Bien sur, Jésus pa ti dire ki nou kapav acheté la vie eternel. La vie—mem si li courte dan sa le monde-la—li enn don. Nou pa kapav acheté li ni faire nanyin pou merite li. Sel fason ki nou kapav gagne don la vie eternel c’est pou “mette nou la foi en Christ Jésus” ek en Jéhovah, “sa kikenn ki recompense bann ki rod Li vrai-mem.” (Gal. 2:16; Héb. 11:6) Selman, nou bizin prouvé ki nou ena la foi par bann action, parski “la foi . . . sans bann action, li mort.” (Jacq. 2:26) Alors, kan nou medite enn tipé plus lor question ki Jésus ti posé, li bon ki nou prend le temps pou reflechi ki kitsoz nou disposé pou sacrifié dan sa le monde-la ek ki nou disposé pou faire dan service Jéhovah pou montré ki nou la foi li bien vivant.
“Christ pa finn faire li-mem plaisir”
6. Ki priorité Jésus ti ena dan so la vie?
6 Au lieu ki li ti guette seki le monde dan so lepok ti kapav offert li, Jésus ti fixé so l’attention lor bann kitsoz important ek ti rejette tentation pou gagne bann kitsoz materiel ki ti pou faire li amenn enn la vie confortable. Li ti amenn enn la vie sacrifice ek li ti obeir Bondié toute longue so la vie. Au lieu ki li ti faire li-mem plaisir, li ti dire: “Mo faire toujours seki faire [Bondié] plaisir.” (Jean 8:29) Ziska ki point Jésus ti disposé pou allé pou ki li kapav faire Bondié plaisir?
7, 8. (a) Ki sacrifice Jésus ti faire, ek ki recompense li ti gagné? (b) Ki question nou bizin pose nou-mem?
7 Enn fois, Jésus ti dire so bann disciple: “Fils de l’homme inn vini, pa pou faire lezot servi li, mais pou li servi lezot ek pou donne so la vie couma enn ranson en echange pou beaucoup.” (Mat. 20:28) Enn tipé avant sa, kan Jésus ti commence averti so bann disciple ki bientot li ti pou ‘donne so nâme,’ Pierre ti suppliye li pou montré li bon avek li-mem. Mais Jésus ti reste ferme. Li ti donne so nâme volontairement, so la vie parfait pou bann dimoune. Parski Jésus ti guette l’interet lezot avant, so l’avenir ti assuré. Bondié ti ressuscite li ek ti “eleve li dan so coté droite.” (Actes 2:32, 33) Kan Jésus inn faire sa, li’nn vinn vrai-mem enn l’exemple extraordinaire pou nou!
8 L’apotre Paul ti conseil bann chretien dan Rome pou “pa faire [zot-mem] plaisir” ek ti rappel zot ki “mem Christ pa finn faire li-mem plaisir.” (Rom. 15:1-3) Alors, ziska ki point nou pou applik sa conseil ki l’apotre Paul ti donne-la ek faire sacrifice pou imite Christ?
Jéhovah envie ki nou donne Li seki nou ena pli bon
9. Ki enn chretien faire en realité kan li voué so la vie ar Bondié?
9 Dan le passé en Israël, dapré la Loi mosaïk, bann esclave hébreu ti bizin regagne zot liberté soit sept an apré ki zot ti’nn vinn esclave, ou-soit kan ti arrive l’année Jubilé. Mais, zot ti ena enn lot possibilité. Si enn esclave ti content so maitre, li ti kapav choisir pou reste enn esclave dan lakaz so maitre pou toute longue so la vie. (Lire Deutéronome 15:12, 16, 17.) Nou aussi nou faire mem choix kan nou voué-nou ar Bondié. Avek tou nou leker, nou accepté pou faire volonté Bondié, pa pou faire seki nou envie. Kan nou faire sa, nou montré nou grand l’amour pou Jéhovah ek nou desir pou servi Li pou touletan.
10. Dan ki fason Bondié nou Proprietaire, ek couma sa bizin influence nou pensée ek nou action?
10 Si ou pé etudié la Bible avek bann Témoins de Jéhovah, ou pé preche la bonne nouvelle, ek ou pé assisté bann reunion, ou merite felicitation. Nou souhaité ki ou pa pou tardé pou voué ou la vie ar Jéhovah ek demann mem question ki enn Éthiopien ti demann Philippe: “Ki empeche moi prend bapteme?” (Actes 8:35, 36) Lerla, bann relation ki ou pou ena avek Bondié pou pareil avek seki bann chretien Rome ti ena. Paul ti ecrire zot: “Zot pa pou zot-mem, parski finn acheté zot pou enn prix.” (1 Cor. 6:19, 20) Ki nou ena l’esperance pou al dan le ciel ou-soit pou vive lor la terre, si nou finn voué nou la vie ar Jéhovah, Li nou Proprietaire. Alors, li bien important ki nou rejette tou desir egoïste ek ki nou “arrete vinn esclave bann zom” (1 Cor. 7:23) C’est vrai-mem enn grand privilege pou nou ki nou bann serviteur fidele Jéhovah ki Li kapav servi couma Li envie!
11. Ki sacrifice bann chretien encouragé pou faire, ek couma bann sacrifice ki ti pé faire enba la Loi mosaïk montré seki sa impliké?
11 Paul ti donne sa conseil-la so bann frere spirituel: “Presente zot lekor couma enn sacrifice ki vivant, saint, ki Bondié pou kapav accepté, enn service sacré avek zot capacité pou raisonné.” (Rom. 12:1) Surement kan bann chretien juif ti tann sa bann parole-la zot ti rappel bann sacrifice ki zot ti pé faire avant zot vinn chretien ek ki ti forme partie dan zot l’adoration. Zot ti koné ki enba la Loi mosaïk, bann zanimo ki zot ti offert en sacrifice ti bizin pli bon zanimo ki zot ti ena dan zot troupeau. Jéhovah pa ti pou accepté okenn sacrifice faye qualité. (Mal. 1:8, 13) Sa mem principe-la appliké kan nou presente nou lekor “couma enn sacrifice ki vivant.” Nou donne Jéhovah seki pli bon, pa zis seki resté apré ki nou finn satisfaire tou nou bann desir personnel. Kan nou voué nou la vie ar Bondié, nou donne Li tou nou “nâme,” setadir nou la vie—nou la force, nou bann di-bien materiel, nou l’argent ek nou bann capacité. (Col. 3:23) Dan la pratik, ki sa vedir?
Servi ou le temps avek sagesse
12, 13. Cite enn fason couma nou kapav donne Jéhovah seki pli bon.
12 Enn fason ki nou kapav donne Jéhovah seki pli bon c’est kan nou servi nou le temps avek sagesse. (Lire Éphésiens 5:15, 16.) Nou bizin ena maitrise pou nou kapav faire sa. Bann l’influence ki ena dan sa le monde-la ensam avek nou l’imperfection pousse nou pou servi nou le temps zis pou faire nou-mem plaisir ou-soit pou nou l’avantage personnel. Li vrai ki “pou tou kitsoz ena enn le temps fixé.” Sa vedir ki ena enn le temps pou amusé ek pou travail, parski si nou pa travail nou pa pou kapav rempli nou bann responsabilité en tant ki chretien. (Eccl. 3:1) Mais, enn chretien ki’nn voué so la vie ar Bondié bizin equilibré ek servi so le temps avek sagesse.
13 Kan Paul ti visite Athènes, li ti remarké ki “tou bann Athénien ek bann etranger ki ti reste la pou enn certaine temps, ti passe zot le temps libre zis pou dire ou-soit pou ecoute enn kitsoz ki nouveau.” (Actes 17:21) Zordi aussi beaucoup dimoune gaspille zot le temps. Dan nou lepok ena bann distraction couma par exemple television, bann video game, ek Internet ki prend beaucoup le temps. Pli allé, ena pli beaucoup distraction ki kapav faire nou perdi le temps. Si nou laisse zot prend nou le temps, nou kapav neglige nou bann besoin spirituel. Nou kapav mem pensé ki nou trop occupé pou faire “bann kitsoz ki pli important,” setadir bann kitsoz ki concerne nou service pou Jéhovah.—Phil. 1:9, 10.
14. Ki bann question nou kapav examiné avek serieux?
14 Alors, en tant ki enn serviteur ki finn voué so la vie ar Jéhovah, demann ou-mem: ‘Eski dan mo programme toulé-jour ena lecture la Bible, meditation ek la priere?’ (Ps. 77:12; 119:97; 1 Thess. 5:17) ‘Eski mo reserve le temps pou prepare mo bann reunion? Ek pendant sa bann reunion-la, eski mo encourage lezot kan mo donne bann commentaire?’ (Ps. 122:1; Héb. 2:12) Parole Bondié montré nou ki Paul ek Barnabas ti passe “beaucoup le temps pou koz avek courage par l’autorité Jéhovah.” (Actes 14:3) Eski ou kapav faire bann changement dan ou la vie pou ki ou passe plus le temps, mem “beaucoup le temps,” dan predication, kitfois pou servi couma enn pionnier?—Lire Hébreux 13:15.
15. Couma bann ancien servi zot le temps avek sagesse?
15 Kan l’apotre Paul ek Barnabas ti visite congregation Antioche, “zot pa ti passe zis enn tigit le temps avek bann disciple” pou encourage zot. (Actes 14:28) Zordi aussi, bann ancien ki ena l’amour passe beaucoup le temps pou fortifié zot bann frere. A part ki zot passe le temps dan predication, bann ancien travail dur pou prend soin troupeau Bondié, pou rod bann brebis ki’nn perdi, pou aide bann ki malade ek pou occupe beaucoup lezot responsabilité dan congregation. Si ou enn frere baptisé, eski ou situation permette ou pou faire zeffort pou qualifié-ou pou gagne sa bann responsabilité-la?
16. Cite bann fason ki nou kapav “faire di-bien envers . . . nou bann frere dan la foi”?
16 Beaucoup finn trouve la joie pou al aide bann dimoune ki’nn affecté par bann catastrophe naturel ou-soit bann catastrophe ki bann zom inn provoké. Par exemple, enn soeur ki ena apepré 65 an ek ki travail Béthel, ti voyage enn longue distance pou porte-li volontaire pou al aide bann dimoune ki’nn victime bann catastrophe, ek li’nn faire sa plusieurs fois. Kifer li’nn servi so vacance dan sa fason-la? Li dire: “Li vrai ki mo pena okenn capacité special, mais mo ti considere sa couma enn privilege pou faire n’importe ki kitsoz ki ti necessaire. En plus, sa ti encourage moi beaucoup pou trouve la foi solide mo bann frere ek soeur malgré ki zot ti perdi preské tou lor plan materiel.” Ena encore plusieurs millier chretien ki aidé dan construction bann la Salle du Royaume ek bann la Salle l’assemblée. Kan nou participe dan sa bann activité-la, nou “faire di-bien envers . . . nou bann frere dan la foi” sans ki nou guette nou prop l’avantage.—Gal. 6:10.
“Mo avek zot toulé-jour”
17. Ki ou pou donné personnellement pou gagne la vie eternel?
17 Sa le monde ki eloigné ar Bondié-la pré pou disparette. Nou pa koné exactement kan sa pou arrivé. Mais nou koné ki “reste bien tigit le temps” ek ki “scene sa le monde-la pé changé.” (Lire 1 Corinthiens 7:29-31.) Sa donne plus l’importance question ki Jésus ti posé: “En realité, ki enn dimoune pou donné en echange pou so nâme?” Pena doute ki nou pou faire n’importe ki sacrifice ki Jéhovah demann nou pou nou gagne “vrai la vie.” (1 Tim. 6:19) Oui, li bien important ki nou prend compte conseil Jésus pou ‘contigne suive li’ ek pou ‘rod royaume Bondié avant tou.’—Mat. 6:31-33; 24:13.
18. Ki confiance nou kapav ena, ek kifer?
18 Li vrai ki li pa toujours facile pou suive Jésus ek couma li-mem li ti averti, sa inn faire certain chretien perdi zot la vie dan sa le monde-la. Pourtant, pareil couma Jésus, nou rejette tentation pou montré-nou ‘bon avek nou-mem.’ Nou ena la foi dan sa l’assurance ki li ti donne so bann disciple oint dan premier siecle: “Mo avek zot toulé-jour ziska la fin sa systeme-la.” (Mat. 28:20) Alors, anou servi nou le temps ek nou capacité dan service sacré tant ki nou kapav. Lerla, nou pou montré ki nou ena confiance ki Jéhovah pou protege nou pendant la grande tribulation ou-soit pou redonne nou la vie dan le monde nouveau. (Héb. 6:10) Coumsa, nou pou’nn montré ki quantité la vie, sa don ki Bondié inn donne nou-la, ena valeur pou nou.
Ki ou pou reponn?
• Couma Jésus ti manifesté enn desir extraordinaire pou servi Bondié ek bann zom?
• Kifer enn kikenn bizin renié li-mem, ek couma li kapav faire sa?
• En Israël dan le passé, ki sel qualité sacrifice Jéhovah ti accepté, ek ki leson nou kapav tiré zordi?
• Dan ki fason nou kapav servi nou le temps avek sagesse?
[Zimage page 26]
Jésus ti toujours faire bann kitsoz ki ti faire Bondié plaisir
[Zimage page 28]
Bann Israélite ki ti ena reconnaissance ti donne seki pli bon pou soutenir vrai l’adoration
[Zimage page 29]
Nou faire Bondié plaisir kan nou servi nou le temps avek sagesse