Nou content pou invite ou

KITFOIS ou finn passe devant enn la Salle du Royaume bann Témoins de Jéhovah dan ou l’endroit ek ou finn demann-ou ki bann dimoune faire ladan. Eski ou ti koné ki n’importe kisannla ki envie, kapav assisté bann reunion ki zot faire toulé-semaine? Bann visiteur zot la bienvenue.

Selman, ou kapav ena bann question. Kifer bann Témoins de Jéhovah joinde ensam? Ki passé dan sa bann reunion-la? Ek ki bann visiteur ki pa Témoins de Jéhovah dire concernant zot bann reunion?

“Rassemblé le peuple”

Depuis bien-bien longtemps, bann dimoune finn rassemblé ensam pou adore ek aprann konn Bondié. Ena environ 3,500 an, bann Israélite ti gagne sa l’ordre-la: “Rassemblé le peuple, bann zom, bann femme ek bann ti zenfant ek aussi sa etrangé ki reste parmi toi-la, pou zot ecouté ek pou zot aprann, parski zot bizin ena la crainte pou Jéhovah zot Bondié ek veille bien pou applik tou bann parole sa la loi-la.” (Deutéronome 31:12) Alors, dan Israël, bann dimoune agé ek bann zenfant toulé-deux ti gagne l’instruction pou adore ek obeir Jéhovah.

Environ 1,500 an apré, kan congregation chretien ti formé, bann reunion ti contigné ena enn place bien important dan vrai l’adoration. L’apotre Paul ti ecrire: “Anou veille lor nou camarade, pou encourage sakenn parmi nou pou montré l’amour, ek faire seki bon. Pa prend l’habitude, couma certain, pou neglige nou bann rassemblement. Au contraire anou encourage sakenn parmi nou.” (Hébreux 10:24, 25, Bible du Semeur) Pareil couma bann relation dan enn famille vinn pli fort a mesure ki zot passe le temps ensam, pareil aussi l’amour ki ena parmi bann ki envie servi Bondié vinn solide kan bann chretien joinde ensam pou adore Bondié.

En accord avek sa bann modele biblik dan le passé-la, bann Témoins de Jéhovah joinde ensam dan zot la Salle du Royaume deux fois par semaine. Bann reunion aide bann ki vini pou apprecié, pou comprend, ek pou applik bann principe la Bible. Kot li possible, sa programme-la li pareil dan le monde entier, ek chaque reunion ena so l’objectif spirituel. Avant ek apré bann reunion, bann assistant ena enn “l’echange l’encouragement” grace a bann conversation encourageant. (Romains 1:12) Ki ena dan sa bann reunion-la?

Discours publik

Premier discours ki la plupart dimoune vinn assisté c’est enn discours basé lor la Bible ki’nn faire pou publik, ek ki faire normalement pendant week-end. Souvent Jésus Christ ti donne bann discours publik, ek parmi ti ena so Sermon bien celebre ki li ti faire lor montagne. (Matthieu 5:1; 7:28, 29) L’apotre Paul ti koz avek bann zom dan Athènes. (Actes 17:22-34) En accord avek seki Jésus ek Paul ti faire, bann Témoins de Jéhovah faire bann reunion kot ena enn discours ki’nn preparé specialement pou publik en general ek pou bann ki kitfois pé assisté enn reunion pou premier fois.

Reunion-la commence par enn cantik ki trouve dan livre Louons Jéhovah par nos chants.a Tou bann ki envie, zot kapav deboute ek chante cantik ensam. Apré enn la priere courte, enn orateur qualifié faire enn discours 30 minute. (Guette l’encadré “Bann discours pratik pou publik.”) So discours basé dan enn fason solide lor la Bible. Orateur-la souvent invite l’assistance pou guette bann verset approprié dan la Bible, ek pou suive bann verset ki pou lire. Alors, ou kapav amenn ou prop la Bible, ou-soit ou kapav demann enn Témoin de Jéhovah enn la Bible avant reunion.

L’etude La Tour de Garde

Dan la plupart congregation bann Témoins de Jéhovah, apré discours publik ena l’etude La Tour de Garde; enn discussion lor enn sujet biblik ki dure enn heure temps. Sa reunion-la encourage l’assistance pou suive l’exemple bann Béréen dan lepok l’apotre Paul ki “ti extra content pou gagne Parole Bondié, ek zot ti examine bann l’Ecriture en profondeur.”—Actes 17:11.

L’etude La Tour de Garde commence par enn cantik. Lartik ki examiné ek bann question ki conducteur-la posé trouve dan edition l’etude sa magazine-la. Ou kapav gagne enn copie sa edition l’etude-la avek enn Témoins de Jéhovah. Bann sujet ki’nn fek etudié ena theme: “Parent—enseigne zot zenfant avek amour,” “Pa rann personne le mal pou le mal,” ek “Kifer tou bann souffrance pou disparette bientot.” Mem si reunion-la li deroulé par question-reponse, bann dimoune dan l’assistance kapav participé volontairement. Bann ki rann reponse souvent finn fini lire lartik-la ek bann texte la Bible ki donné en reference ek finn fini reflechi lor la. Reunion fini par enn cantik ek la priere.—Matthieu 26:30; Éphésiens 5:19.

L’Etude biblik la congregation

Chaque semaine pendant enn soirée, bann Témoins de Jéhovah joinde encore dan la Salle du Royaume pou enn programme en trois partie. En tou, reunion-la dure 1 heure temps 45 minute. Premier partie c’est l’Etude biblik la congregation, ki prend 25 minute. Li aide bann assistant pou konn la Bible pli bien, ek pou corrige zot fason pensé, zot l’attitude, ek pou vinn bann pli bon disciple Christ. (2 Timothée 3:16, 17) Sa reunion-la faire par question ek reponse lor enn sujet biblik pareil couma faire dan l’etude La Tour de Garde. Chaque dimoune kapav reponn si li envie. Souvent servi enn livre ou-soit enn brochure ki publié par bann Témoins de Jéhovah pou faire sa l’etude-la.

Kifer servi bann livre ki basé lor la Bible dan reunion? Dan lepok biblik, zis lire Parole Bondié pa ti assez. “Ti explik sa, ek ti faire comprend so sens; ek zot ti contigne faire comprend seki ti pé lire.” (Nehémia 8:8) Dan bann dernier l’année ki’nn passé, bann ki’nn assisté sa reunion-la finn pli comprend livre Isaïe, Daniel, ek Révélation grace a bann publication ki ti analyse sa bann livre la Bible-la.

Lekol ministere theocratik

Apré l’Etude biblik la congregation ena Lekol ministere theocratik. Sa reunion-la dure 30 minute ek li’nn faire pou aide bann chretien pou developpe “l’art pou enseigné.” (2 Timothée 4:2) Par exemple, eski ou zenfant ou-soit enn camarade inn deja pose ou enn question lor Bondié ou-soit lor la Bible ek ou’nn trouve sa difficile pou donne zot enn bon reponse? Lekol ministere theocratik kapav montré ou couma servi la Bible pou donne bann reponse encourageant pou reponn bann question difficile. Coumsa nou kapav dire mem parole ki prophete Isaïe: “Souverain Seigneur Jéhovah Li-mem finn donne moi enn la langue pou koz couma bann ki’nn gagne l’enseignement, pou ki mo kapav koné couma pou reponn enn kikenn ki fatigué par enn parole.”—Isaïe 50:4.

Lekol ministere theocratik commencé par enn discours basé lor enn partie la Bible ki bann assistant finn encouragé pou lire pendant sa semaine-la. Apré so discours, orateur invite l’assistance pou faire bann ti commentaire lor bann point ki zot finn pensé zot kapav tire profit. Apré sa discussion-la, bann ki ena zot nom dan sa lekol-la, presente sujet ki zot inn gagné pou faire.

Bann zeleve ena pou lire enn partie dan la Bible lor l’estrade ou-soit zot ena pou faire enn demonstration ki montré couma pou enseigne enn lot dimoune enn sujet basé lor la Bible. Apré chaque sujet, enn conseillé ki ena l’experience pou felicite zeleve-la pou seki li’nn bien faire; so bann commentaire pou basé lor livre Tirez profit de l’École du ministère théocratique. Plitar, en privé, li kapav donne zeleve-la bann suggestion pou aide li ameliore-li dan certain domaine.

Sa reunion-la, kot ena bann sujet enn derriere lot, li pa’nn faire pou aide zis bann zeleve, mais aussi tou bann ki dan l’assistance ki envie progressé dan fason ki zot lire, ki zot kozé, ek ki zot enseigné. Kan Lekol ministere theocratik fini, l’assistance chante enn cantik ki basé lor enn passage la Bible ek sa introduire reunion service.

Reunion service

Dernier partie dan programme c’est reunion service. Par bann discours, bann demonstration, bann interview, ek par participation bann assistant, tou dimoune aprann pou enseigne la verité dan enn fason ki efficace. Avant ki li ti envoye so bann disciple preché, Jésus ti rassemblé zot ek ti donne zot bann instruction detaillé. (Luc 10:1-16) Apré ki zot inn bien preparé pou predication, zot ti gagne beaucoup fait interessant. Plitar, bann disciple Jésus ti raconte li tousala. (Luc 10:17) Bann disciple souvent ti partage bann l’experience avek sakenn so camarade.—Actes 4:23; 15:4.

Programme reunion service, ki dure 35 minute, trouve dan Ministere du Royaume ki parette toulé-mois. Bann dernier sujet ki ti examiné ena theme: “Adore Jéhovah en famille,” “Kifer nou contigne retourne kot bann dimoune,”ek “Imite Christ dan ou ministere.” Sa programme-la fini par enn cantik, ek enn membre la congregation fini par enn la priere.

Ki bann visiteur finn dire

Bann congregation essaye mette tou dimoune a l’aise. Anou prend l’exemple, Andrew. Li ti tann beaucoup mauvais kitsoz lor bann Témoins de Jéhovah. Mais kan li’nn vinn so premier reunion, li ti etonné par l’accueil ki li ti gagné. Li dire: “C’est enn l’endroit bien agreable. Seki’nn plus etonne moi, c’est pou trouvé ki zot bann dimoune bien amical, ek ki zot ti bien interessé ar moi.” Ashel, enn adolescente ki reste Canada dire mem zaffaire: “Reunion-la ti bien interessant. Li facile pou suive reunion-la net.”

Dan so l’endroit dan Brésil, José ti ena reputation enn dimoune violent. Malgré sa, finn invite li pou assisté enn reunion dan la Salle du Royaume dan so l’endroit. Li dire: “Bann ki ti dan la Salle du Royaume finn bien accueillir moi, malgré ki zot ti konn mo reputation.” Atsushi ki reste Japon raconté: “Mo bizin admette ki, kan premier fois mo ti vinn enn reunion bann Témoins de Jéhovah, mo ti senti-moi inpé mal a l’aise. Mais malgré sa, mo finn rann moi compte ki sa bann dimoune-la, c’est bann dimoune normal. Zot finn faire tou pou ki mo senti-moi a l’aise.”

Ou la bienvenue

Couma sa bann commentaire-la montré, assisté bann reunion dan la Salle du Royaume, c’est enn l’experience ki bien profitable. Ou pou aprann concernant Bondié, ek par l’instruction ki basé lor la Bible ki ou pou gagné la-bas, Jéhovah pou enseigne ou couma ‘pou tire profit’ ar sa.—Isaïe 48:17.

Bann reunion bann Témoins de Jéhovah gratuit, ek pa passe okenn la quete. Eski ou ti pou content assisté enn reunion dan la Salle du Royaume dan ou l’endroit? Nou invite ou pou faire li.

[Note]

[L’encadré lor page 30]

Bann discours pratik pou publik

Finn choisir bann discours publik parmi 170 different sujet biblik. Parmi ena:

◼ L’origine de l’homme : pourquoi vous y intéresser

◼ La pensée de Dieu sur le mariage et la morale sexuelle

◼ Ceux qui ruinent la terre subiront le châtiment de Dieu

◼ Comment faire face aux inquiétudes de la vie ?

◼ Tout finit-il avec cette vie ?

[Zimage lor page 30]

Discours publik

[Zimage lor page 30]

L’etude “La Tour de Garde”

[Zimage lor page 31]

L’etude biblik la congregation

[Zimage lor page 31]

Lekol ministere theocratik

[Zimage lor page 32]

Reunion service