Baptisé au nom du Père, du Fils ek l’esprit saint

“Alors, allé ek faire bann disciple . . . , baptise zot au nom du Père, du Fils ek l’esprit saint.”—MAT. 28:19.

1, 2. (a) Ki ti arrivé dan Jérusalem jour la Pentecôte l’an 33 nou lepok? (b) Kifer beaucoup dan sa la foule-la ti prend bapteme?

JÉRUSALEM ti rempli ar bann la foule ki ti sorti dan plusieurs l’endroit. Jour la Pentecôte l’an 33 nou lepok, ti ena enn grand fête ek beaucoup visiteur ti vinn dan sa fête-la. Mais enn kitsoz incroyable ti arrivé. Apré sa, l’apotre Pierre ti faire enn discours bien captivant ki ti ena enn grand l’effet lor bann dimoune. Apepré 3,000 Juif ek prosélyte ti touché par so bann parole, zot ti repenti ek ti prend bapteme dan de l’eau. C’est coumsa ki zot ti’nn forme partie dan congregation chretien ki ti fek formé. (Actes 2:41) Surement ti ena enn quantité tapaz ek enn grand excitation kan sa quantité dimoune-la ti prend bapteme dan bann piscine ek bann bassin ki ti tout autour Jérusalem!

² Ki ti pousse sa quantité dimoune-la pou prend bapteme? Inpé pli boner sa jour-la, ti ena “enn tapaz couma enn di-vent bien fort [ki] ti sorti dan le ciel.” Dan enn la chambre ki ti trouve la-haut dan enn lakaz, environ 120 disciple Jésus ti rempli ar l’esprit saint. Apré sa, bann zom ek bann femme ki ti servi Bondié, ti rassemblé ek ti etonné pou tann sa bann disciple-la “koz dan different langue.” Apré ki zot ti tann seki Pierre ti dire, ‘leker beaucoup ti dechiré,’ surtout apré ki zot ti tann bann kitsoz bien touchant ki li ti dire concernant la mort Jésus. Ki zot ti bizin faire? Pierre ti reponn: “Repenti, ek ki sakenn parmi zot prend bapteme au nom Jésus Christ . . . , ek zot pou gagne don gratuit l’esprit saint.”—Actes 2:1-4, 36-38.

3. Jour la Pentecôte, ki bann Juif ek bann prosélyte ki ti’nn repenti, ti bizin faire?

³ Mazinn condition spirituel sa bann Juif ek prosélyte ki ti tann Pierre-la. Zot ti considere deja Jéhovah couma zot Bondié. Grace a bann l’Écritures hébraïques, zot ti koné ki l’esprit saint ti la force actif Bondié, ki Li ti servi pendant creation ek apré. (Gen. 1:2; Juges 14:5, 6; 1 Sam. 10:6; Ps. 33:6) Mais zot ti bizin enn kitsoz en plus. Li ti bien important ki zot comprend ek ki zot accepté moyen ki Bondié ti servi pou sauve bann dimoune, setadir Jésus, le Messie. A cause sa, Pierre ti faire zot comprend l’importance pou prend “bapteme au nom Jésus Christ.” Avant sa, Jésus ki ti’nn ressuscité ti donne Pierre ek lezot disciple l’ordre pou baptise bann dimoune “au nom du Père, du Fils ek l’esprit saint.” (Mat. 28:19, 20) Sa ti ena enn grand signification dan premier siecle, ek zordi aussi pareil. Ki signification?

Au nom du Père

4. Ki changement ti’nn arrivé concernant bann dimoune ki ti pé servi Jéhovah?

⁴ Couma nou finn dire, bann ki ti ecoute Pierre, ti pé adore Jéhovah ek ti deja ena bann bon relation avek Li. Zot ti pé essaye suive so la Loi, ek c’est a cause sa ki bann ki ti reste dan lezot l’endroit, ti vinn Jérusalem. (Actes 2:5-11) Selman, Bondié ti’nn fek faire enn grand changement dan fason ki Li agir avek bann dimoune. Li ti rejette bann Juif ek ti nepli considere zot couma so peuple special; alors, li ti nepli necessaire ki zot contigne suive la Loi pou zot gagne So faveur. (Mat. 21:43; Col. 2:14) Si sa bann dimoune ki ti ecoute Pierre-la ti envie contigne ena bann bon relation avek Jéhovah, zot ti bizin faire enn lot kitsoz.

5, 6. Ki beaucoup Juif ek prosélyte dan premier siecle ti faire pou zot kapav ena bann bon relation avek Bondié?

⁵ Zot ti pou bizin tourne-zot vers Jéhovah, zot Createur. (Actes 4:24) Oui, bann ki ti ecoute l’explication Pierre ti kapav trouvé, asterla plus ki avant, ki Jéhovah Li enn bon Papa. Li ti envoye le Messie pou sauve zot ek Li ti disposé pou pardonne zot, mem bann avek ki Pierre ti dire: “Ki zot tou en Israël koné dan enn fason sur ki Bondié inn faire li vinn Seigneur ek Christ, sa Jésus ki zot ti attache lor enn poteau-la.” En realité, tou bann ki ti applik seki Pierre ti dire, ti pou ena asterla encore plus raison pou ena reconnaissance pou seki Jéhovah ti’nn faire pou tou bann ki ti envie ena bann bon relation avek Li!—Lire Actes 2:30-36.

⁶ Oui, sa bann Juif ek prosélyte-la ti kapav trouvé ki, pou zot ena bann bon relation avek Jéhovah, zot ti bizin reconette ki c’est Li-mem ki sauve zot par moyen Jésus. Alors, nou kapav comprend kifer zot ti repenti ar zot peché, parmi sa bann peché, ti ena zot part responsabilité, soit directement ou-soit indirectement, dan la mort Jésus. Nou comprend aussi kifer pendant bann jour apré, “zot ti passe zot le temps pou ecoute l’enseignement bann zapotre.” (Actes 2:42) Zot ti pou kapav ek zot ti pou envie “approche ar sa trone kot . . . kapav gagne faveur ki personne pa merité-la, avek franchise.”—Héb. 4:16.

7. Couma beaucoup dimoune finn change zot l’opinion lor Bondié ek inn prend bapteme au nom du Père?

⁷ Zordi, plusieurs million dimoune ki dan different culture, finn aprann la verité lor Jéhovah dan la Bible. (Is. 2:2, 3) Certain avant ti bann athée ou-soit bann déiste,a mais apré, zot ti gagne conviction ki ena enn Createur avek ki zot ti pou kapav ena bann bon relation. Ti ena lezot ki avant ti adore enn bondié en trois personne ou-soit different qualité zidole. Zot inn aprann ki zis Jéhovah tousel ki pli grand Bondié, ek asterla zot appel Li par so nom personnel. Sa li en accord avek seki Jésus ti dire, setadir ki so bann disciple bizin baptisé au nom du Père.

8. Ki bann dimoune ki pa ti konn nanyin lor peché Adam, ti bizin reconette lor Bondié?

⁸ Zot finn aprann aussi ki zot finn herite peché Adam. (Rom. 5:12) Sa ti enn nouveau kitsoz ki zot ti’nn bizin accepté couma enn kitsoz ki vrai. Nou kapav compare sa bann dimoune-la ar enn missié ki malade mais selman li pa koné ki li malade. Kitfois li finn ena bann symptome, couma par exemple enn douleur de temps en temps. Selman, parski personne pa’nn examine li pou dire li si li ena enn maladie precis, kitfois li’nn kapav pensé ki li en bonne santé. Mais bann resultat montré le contraire. (Compare avek 1 Corinthiens 4:4.) Mais ki li pou faire si enn kikenn examine li ek dire li exactement ki maladie li gagné? Eski li pa pou montré ki li sage si li rod enn traitement ki tou dimoune koné, ki efficace ek ki’nn faire so preuve ek li accepté sa traitement-la? Li pareil aussi pou beaucoup dimoune, kan zot inn aprann la verité lor peché ki nou tou finn herité, zot finn accepté seki la Bible dire lor sa “maladie[-la]” ek zot inn arrivé comprend ki Bondié pé donne enn “traitement.” Oui, tou seki eloigné ar nou Papa, bizin tourne-zot vers sa Kikenn ki kapav “gueri” zot-la.—Éph. 4:17-19.

9. Ki Jéhovah finn faire pou bann dimoune kapav ena bann bon relation avek Li?

⁹ Si ou finn deja voué ou la vie ar Jéhovah ek ou’nn vinn enn chretien baptisé, ou koné ki c’est enn kitsoz extraordinaire pou ena bann bon relation avek Jéhovah. Asterla ou kapav apprecié ki quantité ou Papa, Jéhovah, ena l’amour. (Lire Romains 5:8.) Mem si Adam ek Ève ti’nn faire peché kont Li, Bondié ti prend bann disposition pou ki zot descendant—nou aussi parmi—kapav ena bann bon relation avek Li. Kan Li’nn faire sa, Bondié inn bizin supporte enn grand douleur: trouve so Garson souffert ek mort. Kan nou konn sa, eski sa pa aide nou pou accepté l’autorité Bondié ek obeir so bann commandement par amour? Si ou pankor voué ou la vie ar Bondié ek prend bapteme, ou ena bann raison pou faire sa.

Au nom du Fils

10, 11. (a) Ki qualité reconnaissance ou ena pou Jésus? (b) Ki sentiment ou ena kan ou reflechi ki Jésus inn mort pou donne so la vie en ranson?

¹⁰ Mais reflechi encore enn fois lor seki Pierre ti dire ar la foule ki ti pé ecoute li. Li ti montré l’importance pou accepté Jésus, enn kitsoz ki ena enn rapport direct avek bapteme “au nom . . . du Fils.” Kifer sa ti important dan sa lepok-la, ek kifer li important zordi? Kan nou accepté Jésus ek nou prend bapteme lor so nom, sa montré ki nou accepté role ki li ena dan nou relation avek nou Createur. Jésus ti bizin pendi lor enn poteau souffrance pou li kapav tire malediction ki la Loi ti mette lor bann Juif; selman, so la mort amenn enn pli grand bienfait encore. (Gal. 3:13) Li ti donne so la vie en sacrifice, ek sa ti enn ranson ki tou dimoune ti bizin. (Éph. 2:15, 16; Col. 1:20; 1 Jean 2:1, 2) Pou li kapav faire sa, Jésus ti bizin endure l’injustice, bann insulte, bann mauvais traitement, ek finalement, la mort. Ki quantité ou apprecié so sacrifice? Faire coumadir ou ti enn jeune garson ki ti ena 12 an ek ki ti pé voyage lor Titanic, sa bateau ki ti tape avek enn iceberg ek ki ti coulé en 1912. Ou essaye saute dan enn bateau sauvetage, mais li rempli. Mais enn missié ki lor sa bateau sauvetage-la embrasse so madame, saute lor pont Titanic ek mette ou dan sa bateau sauvetage-la. Ki ou ressenti? Surement ou bien reconnaissant envers li! Ou kapav comprend seki enn garson ki’nn faire sa l’experience-la vrai-mem ti ressenti.b Pourtant, Jésus finn faire plus pou ou. Li finn mort pou ou kapav gagne la vie eternel.

¹¹ Ki ou ti ressenti kan ou ti aprann seki Garson Bondié inn faire pou ou? (Lire 2 Corinthiens 5:14, 15.) Surement ou ti ena enn grand reconnaissance pou li. Sa ti pousse ou pou voué ou la vie ar Bondié ek pou ‘nepli vive pou ou-mem, mais pou celui ki’nn mort pou ou.’ Prend bapteme au nom du Fils, vedir reconette seki Jésus inn faire pou ou ek accepté so l’autorité couma “Agent principal ki faire gagne la vie.” (Actes 3:15; 5:31) Avant sa, ou pa ti ena okenn relation avek ou Createur, ek ou pa ti ena enn vrai l’espoir. Mais parski ou finn ena la foi dan sacrifice Jésus Christ ek ou finn prend bapteme, asterla ou ena bann bon relation avek ou Papa. (Éph. 2:12, 13) L’apotre Paul ti ecrire: “Zot ki avant ti eloigné ek ki ti bann l’ennemi parski zot bann pensée ti tourné vers bann mauvais action, asterla [Bondié] finn reconcilié zot encore enn fois par moyen . . . lekor physik [Jésus] grace a so la mort, pou zot kapav presente devant li, couma bann dimoune ki saint ek ki sans tache.”—Col. 1:21, 22.

12, 13. (a) Couma kan ou baptisé au nom du Fils, sa ena enn l’effet lor ou reaction si enn kikenn offense ou? (b) En tant ki enn chretien ki’nn baptisé au nom Jésus, ki l’obligation ou ena?

¹² Mais mem si ou finn baptisé au nom du Fils, ou bien conscient ki ou ena bann tendance pou faire peché. Kan ou rappel sa, sa kapav aide ou toulé-jour. Par exemple, si enn kikenn offense ou, eski ou rappel ki zot toulé-deux zot imparfait? Toulé-deux bizin gagne pardon Bondié, ek toulé-deux bizin pardonne zot camarade. (Marc 11:25) Pou montré sa, Jésus ti donne enn l’exemple: enn maitre ti cancel dette so esclave ki ti doit li dix mille talent (60 million denier). Plitar, sa esclave-la pa ti’lé largue so camarade esclave ki ti doit li 100 denier. Apré sa, Jésus ti faire comprend sa point-la: Jéhovah pa pou pardonne enn kikenn ki pa pardonne so frere. (Mat. 18:23-35) Oui, baptisé au nom du Fils vedir reconette l’autorité Jésus ek faire zeffort pou suive so l’exemple ek so bann l’enseignement, parmi ena so l’exemple ek so l’enseignement ki montré nou ki nou bizin disposé pou pardonne lezot.—1 Pierre 2:21; 1 Jean 2:6.

¹³ Parski ou imparfait, ou pa kapav imite Jésus dan enn fason parfait. Pourtant, en accord avek voeu ki ou finn faire avek tou ou leker pou servi Bondié, ou envie imite Jésus pli bien ki ou kapav. Sa implik ki ou contigne travail pou rejette ou vié personnalité ek mette nouveau personnalité lor ou. (Lire Éphésiens 4:20-24.) Kan ou ena respé pou enn camarade, surement ou essaye aprann ar l’exemple ki li donné ek ar so bann bon qualité. Li pareil aussi pou Christ, surement ou envie aprann ar so l’exemple ek imite li.

14. Couma ou kapav montré ki ou reconette l’autorité ki Jésus ena en tant ki le Roi dan le ciel?

¹⁴ Ena enn lot fason ki ou kapav montré ki ou comprend seki ou bapteme au nom du Fils, impliké. Bondié inn “soumette tou kitsoz enba . . . lipié [Jésus] ek Li ti faire li vinn chef lor tou kitsoz pou la congregation.” (Éph. 1:22) Sa vedir ki ou bizin respecté fason ki Jésus dirige bann dimoune ki’nn voué ar Jéhovah. Christ pé servi bann dimoune imparfait dan ou congregation, surtout bann zom ki ena l’experience lor plan spirituel, setadir bann ancien. Sa bann zom-la inn etabli dan congregation “pou redresse bann saint, . . . pou construire lekor Christ.” (Éph. 4:11, 12) Mem si enn dimoune imparfait faire enn erreur, Jésus en tant ki le Roi Royaume Bondié ki dan le ciel, kapav traite sa situation-la dan ler ek dan fason ki li decidé. Eski ou croire sa?

15. Si ou pankor prend bapteme, ki bann benediction ou kapav attann pou gagné apré ou bapteme?

¹⁵ Certain pankor voué zot la vie ar Jéhovah ek zot pankor prend bapteme. Si ou pankor faire sa, eski ou kapav trouvé, dapré seki nou finn examiné la-haut, ki accepté le Fils, c’est enn kitsoz raisonnable ek ki montré ou reconnaissance. Kan ou pou prend bapteme au nom du Fils, sa pou faire ou gagne bann grand benediction.—Lire Jean 10:9-11.

Au nom l’esprit saint

16, 17. Ki sa representé pou ou pou baptisé au nom l’esprit saint?

¹⁶ Ki sa vedir prend bapteme au nom l’esprit saint? Couma nou finn trouvé au commencement sa lartik-la, bann ki ti pé ecoute Pierre jour la Pentecôte, ti koné ki été l’esprit saint. En realité, zot ti ena bann preuve devant zot lizié ki Bondié ti contigne servi l’esprit saint. Pierre ti enn parmi bann ki ti’nn “rempli avek l’esprit saint ek [ki ti’nn] commence koz dan different langue.” (Actes 2:4, 8) L’expression “au nom de” pa necessairement implik nom enn dimoune. Zordi, ena beaucoup kitsoz ki faire “au nom gouvernement,” ek gouvernement li pa enn dimoune. C’est par l’autorité ki gouvernement ena ki pé faire sa bann kitsoz-la. Li pareil pou enn dimoune ki prend bapteme au nom l’esprit saint. Li reconette ki l’esprit saint c’est pa enn dimoune, mais c’est la force actif Jéhovah. Enn dimoune ki baptisé au nom l’esprit saint reconette role ki sa l’esprit-la joué dan projet Bondié.

¹⁷ Eski ou l’etude la Bible pa’nn faire ou gagne enn connaissance lor l’esprit saint? Par exemple, ou finn arrivé comprend ki la Bible finn ecrire grace a l’inspiration l’esprit saint. (2 Tim. 3:16) A mesure ki ou finn progressé lor plan spirituel, surement ou finn comprend pli bien ki ‘nou Papa ki dan le ciel donne so l’esprit saint bann ki demann Li,’ parmi ena ou aussi. (Luc 11:13) Kitfois, ou finn trouve l’esprit saint agir dan ou la vie. Jésus ti donne l’assurance ki so Papa donne l’esprit saint, alors si ou pankor prend bapteme au nom l’esprit saint, seki Jésus ti dire donne ou l’assurance ki ou pou kapav gagne bann grand benediction kan ou pou gagne sa l’esprit-la.

18. Ki benediction bann ki’nn baptisé au nom l’esprit saint, gagné?

¹⁸ Zordi aussi, pena okenn doute ki Jéhovah pé guide ek pé dirige congregation chretien par l’esprit saint. Sa l’esprit-la aide nou aussi lor plan personnel dan nou bann l’activité ki nou faire toulé-jour. Kan nou prend bapteme au nom l’esprit saint, sa vedir ki nou accepté role ki li ena dan nou la vie ek avek reconnaissance, nou coopere avek sa l’esprit-la. Mais certain kitfois kapav demandé couma nou kapav vive en accord avek voeu ki nou’nn faire ar Jéhovah ek couma l’esprit saint impliké. C’est seki nou pou examiné dan prochain lartik.

[Notes]

Eski ou rappel?

• Pou ou, ki sa representé pou baptisé au nom du Père?

• Ki sa vedir baptisé au nom du Fils?

• Couma ou kapav montré ki ou comprend seki sa vedir prend bapteme au nom du Père et du Fils?

• Ki sa vedir baptisé au nom l’esprit saint?

[Zimage page 12]

Apré Pentecôte l’an 33 nou lepok, ki qualité relation bann nouveau disciple ti kapav ena avek Bondié?

[Remerciement photo page 12]

Avek permission Musée Israël, Jérusalem