Seki Jésus ti enseigné lor li-mem

“Jésus pa ti ena okenn doute lor seki li ti été, kot li ti sorti, kifer li ti vinn dan nou le monde, ek ki ti pou arrive li dan l’avenir.”—HERBERT LOCKYER.

POU nou kapav accepté ek ena la foi dan bann kitsoz ki Jésus ti enseigné, li important ki nou konn certain kitsoz lor li. Kisannla Jésus ti été vrai-mem? Kot li ti sorti? Ki ti so but dan la vie? Dan bann l’Evangile—Matthieu, Marc, Luc ek Jean—nou kapav tann, dan enn certaine sens, reponse sa bann question-la a travers seki Jésus li-mem ti dire.

Li ti existé avant ki li ti né lor la terre Enn jour Jésus ti dire: “Avant ki Abraham ti existé, mo ti la.” (Jean 8:58) Abraham ti vive apepré 2,000 an avant naissance Jésus. Pourtant, Jésus ti existé bien avant ki fidele Abraham ti vive lor la terre. Mais, kot-sa Jésus finn vive? Li ti dire: “Mo finn sorti dan le ciel mo finn vinn lor la terre.”—Jean 6:38.

Garson Bondié Jéhovah ena beaucoup ange. Mais selman, Jésus li pa pareil couma bann lezot ange. Li-mem li ti dire ki li “sel Garson ki Bondié inn crée direct.” (Jean 3:18) Sa l’expression-la vedir ki c’est zis Jésus ki finn crée direct par Bondié. C’est a travers sa sel Garson ki Li’nn crée direct-la ki Bondié ti crée tou lezot kitsoz.—Colossiens 1:16.

“Fils de l’homme” Jésus ti servi sa l’expression-la plus ki n’importe ki lezot l’expression kan li ti koz lor li-mem. (Matthieu 8:20) Par la li ti montré ki li pa ti enn ange ki ti’nn prend forme enn dimoune ni enn l’esprit ki ti’nn rente dan enn lekor materiel. Au contraire, li ti enn dimoune pareil couma tou lezot dimoune. Par so l’esprit saint, Bondié ti prend la vie so Garson depuis dan le ciel ek ti transfere li lor la terre pou ki li formé dan ventre Marie ki ti enn vierge. A cause sa, Jésus ti né couma enn dimoune parfait, sans peché.—Matthieu 1:18; Luc 1:35; Jean 8:46.

Messie ki ti promette Enn femme Samaritaine ti dire Jésus: “Mo koné ki Messie pé vini.” Li ti reponn: “Moi ki pé koz avek toi, mo-mem sa kikenn-la.” (Jean 4:25, 26) Sa mot “Messie[-la],” pareil couma mot “Christ,” li vedir “Oint.” Jésus ti oint, ou-soit Bondié ti choisir li, pou rempli enn role special dan realisation bann promesse Bondié.

So mission principal Enn fois Jésus ti dire: “Mo bizin annonce la bonne nouvelle lor royaume Bondié, . . . parski c’est a cause sa ki finn envoye moi.” (Luc 4:43) Mem si li ti faire beaucoup bann bon action pou bann dimoune ki ti bizin l’aide, preche Royaume Bondié ti l’activité principal dan so la vie. Nou pou guette seki li’nn enseigné lor Royaume Bondié plitar.

Li clair ki Jésus pa ti enn zom ordinaire.a Couma nou pou trouvé, la vie ki li ti ena dan le ciel ti donne plus poids bann parole ki li ti dire lor la terre. Eski sa etonne nou ki so message ti pou encore ena enn l’effet lor la vie bann million dimoune a travers le monde?

[Note]