Jeune—Renforci ou desir pou servi Jéhovah
“Alors, rappel to Grand Createur pendant to l’adolescence.”—ECCL. 12:1.
1. Ki l’invitation bann zenfant ti gagné zot aussi en Israël?
ENA 3,500 an, Moïse, prophete Jéhovah, ti donne sa l’ordre-la bann pretre ek bann ancien en Israël: “Rassemblé le peuple, bann zom, bann femme ek bann ti zenfant . . . , pou zot ecouté ek pou zot aprann, parski zot bizin ena la crainte pou Jéhovah zot Bondié ek veille bien pou applik tou bann parole sa la loi-la.” (Deut. 31:12) Remarké kisannla ki ti gagne l’ordre pou rassemblé pou adore Jéhovah: bann zom, bann femme ek bann ti zenfant. Oui, mem bann jeune ti parmi bann ki ti gagne l’ordre pou ecouté, pou aprann ek pou suive direction Jéhovah.
2. Couma Jéhovah ti montré ki Li ti interessé ar bann jeune ki ti dan congregation premier siecle?
2 Dan premier siecle, Jéhovah ti contigne montré ki Li ti interessé ar bann jeune. Par exemple, Li ti inspire l’apotre Paul pou mette bann instruction zis pou bann jeune, dan certain lettre ki li ti envoye bann congregation. (Lire Éphésiens 6:1; Colossiens 3:20.) Bann jeune chretien ki ti suive sa bann conseil-la ti augmente zot reconnaissance pou zot Papa dan le ciel ki bien content zot ek zot ti gagne so benediction.
3. Couma zordi bann jeune montré zot desir pou servi Bondié?
3 Eski zordi bann jeune invité pou rassemblé pou adore Jéhovah? Oui! C’est a cause sa ki tou bann serviteur Bondié ena la joie pou trouve sa quantité jeune a travers le monde ki pé prend sa conseil Paul-la serieux: “Anou interesse-nou sakenn ar nou camarade, pou encourage sakenn parmi nou pou montré l’amour, ek faire bann bon action, sans ki nou neglige nou bann rassemblement, couma certain ena l’habitude, mais anou encourage sakenn parmi nou, ek encore plus kan zot trouve jour-la pé kosté.” (Héb. 10:24, 25) En plus, beaucoup zenfant preche la bonne nouvelle lor Royaume Bondié, ensam avek zot parent. (Mat. 24:14) Ek pou montré zot l’amour sincere pou Jéhovah, chaque l’année, plusieurs millier jeune prend bapteme ek profite bann benediction ki bann serviteur Jéhovah gagné kan zot vinn bann disciple Christ.—Mat. 16:24; Marc 10:29, 30.
Accepté sa l’invitation-la—asterla
4. Ki l’age eski bann jeune kapav accepté l’invitation Bondié pou servi Li?
4 Ecclésiaste 12:1 dire: “Alors rappel, to Grand Createur pendant to l’adolescence.” Ki l’age zot bann jeune, zot bizin ena pou accepté sa l’invitation pou adore ek pou servi Jéhovah-la? La Bible pa donne okenn l’age. Alors, pa hesité pou servi Jéhovah, pa pensé ki ou trop jeune pou ecoute Jéhovah ek pou servi Li. N’importe ki l’age ou ena, ou encouragé pou accepté sa l’invitation-la sans tardé.
5. Couma bann parent kapav aide zot bann zenfant pou progressé lor plan spirituel?
5 Beaucoup parmi zot, zot gagne l’aide ar enn parmi zot parent ou-soit ar toulé-deux, pou progressé dan la verité. Dan sa domaine-la, zot ressemblé Timothée, ki ti vive dan premier siecle. Kan li ti encore tipti, so mama, Eunice, ek so grand-mere, Loïs, ti enseigne li bann l’Ecriture sacré. (2 Tim. 3:14, 15) Surement ou bann parent pé forme ou dan mem fason kan zot etudié la Bible ek faire la priere avek ou, kan zot amenn ou reunion ek l’assemblée, ek kan zot sorti dan predication avek ou. Oui, c’est enn responsabilité bien important ki ou bann parent inn gagné ar Jéhovah Li-mem pou enseigne ou So bann principe. Eski ou apprecié l’amour ek l’interet ki zot ena pou ou?—Prov. 23:22.
6. (a) Dapré Psaume 110:3, ki qualité l’adoration Jéhovah accepté? (b) Ki nou pou examiné asterla?
6 Mais kan-mem, a mesure ki ou grandi, Jéhovah envie ki ou “verifié par [ou]-mem ki volonté Bondié, li bon, li acceptable ek li parfait,” pareil couma Timothée ti faire. (Rom. 12:2) Si ou faire sa, ou pou participe dan bann l’activité congregation, pa parski ou bann parent envie ki ou faire sa, mais parski ou-mem ou envie faire volonté Bondié. Si ou servi Jéhovah avek enn leker bien disposé, sa pou faire Li plaisir. (Ps. 110:3) Alors, couma ou kapav montré ki ou envie renforci ou desir pou ecoute Jéhovah ek pou suive so direction? Nou pou considere trois fason important couma ou kapav faire sa. Sa trois fason-la c’est l’etude, la priere ek enn bon conduite. Anou examine enn par enn.
Konn Jéhovah couma enn personne réel
7. Ki l’exemple Jésus inn donne nou en tant ki enn etudiant bann l’Ecriture, ek ki ti aide li pou faire sa?
7 Premier fason ki ou kapav montré ki ou envie ena enn pli grand desir pou servi Jéhovah c’est kan ou lire la Bible toulé-jour. Ou kapav satisfaire ou besoin spirituel ek gagne enn connaissance biblik ki ena valeur kan ou lire Parole Bondié regulierement. (Mat. 5:3) Jésus inn donne nou l’exemple. Enn fois, kan li ti ena 12 an, so bann parent ti trouve li dan temple, “li ti pé assizé au milieu bann enseignant, li ti pé ecoute zot ek li ti pé pose zot question.” (Luc 2:44-46) Depuis tipti deja, Jésus ti’nn developpe enn grand desir pou bann l’Ecriture sacré ek li ti comprend seki ti ena ladan. Ki ti aide li pou faire sa? Pena doute ki so mama, Marie, ek Joseph, so papa adoptif, ti joué enn grand role. Zot ti bann serviteur Bondié ki ti enseigne Jésus lor Bondié depuis li bien tipti.—Mat. 1:18-20; Luc 2:41, 51.
8. (a) Kan bann parent bizin commence mette dan leker zot zenfant l’amour pou Parole Bondié? (b) Raconte enn l’experience ki confirme l’importance pou forme bann zenfant depuis tipti.
8 Li pareil aussi zordi pou bann parent ki ena la crainte pou Bondié. Zot reconette l’importance pou mette dan leker zot zenfant enn grand desir pou la verité ki trouve dan la Bible, depuis ki zot encore tipti. (Deut. 6:6-9) C’est seki Rubi, enn soeur, ti faire zis apré ki li ti gagne so premier garson, Joseph. Chaque jour, li ti lire livre Recueil d’histoires bibliques avek li. A mesure ki so garson ti grandi, li ti aide li pou rappel different verset la Bible. Eski Joseph ti profite sa l’enseignement-la? Kan li ti commence konn kozé, li ti kapav raconte beaucoup zistoire biblik dan so prop mot. Ek kan li ti ena cinq an, li ti faire so premier devoir dan Lekol ministere theocratik!
9. Kifer li important ki ou lire la Bible ek ou medite lor seki ou lire?
9 Jeune, pou ou kapav avancé dan ou bann progré spirituel, ou bizin lire ou la Bible toulé-jour ek faire sa vinn enn l’habitude ki ou gardé toute longue ou l’adolescence ek dan ou la vie adulte. (Ps. 71:17) Kifer lecture la Bible pou aide ou pou faire progré? Guette seki Jésus ti dire dan enn la priere ki li ti faire ar so Papa: “Sa-mem ki vedir la vie eternel: zot bizin aprann konn toi, sel vrai Bondié.” (Jean 17:3) Oui, a mesure ki ou pou aprann plus lor Jéhovah, de plus en plus ou pou considere Li couma enn personne réel ek ou pou ena plus l’amour pou Li. (Héb. 11:27) Alors, chaque fois ki ou lire enn portion la Bible, profite sa l’occasion-la pou aprann plus lor Jéhovah. Demann ou-mem: ‘Ki sa recit-la enseigne moi lor personnalité Jéhovah? Couma sa texte la Bible-la montré l’amour ek l’interet ki Bondié ena pou moi?’ Si ou prend le temps pou medite lor sa qualité question-la, sa pou aide ou pou aprann seki Jéhovah pensé ek ressenti, ek seki Li demann ou pou faire. (Lire Proverbes 2:1-5.) Pareil couma jeune Timothée, ou aussi, ou pou ‘croire avek conviction’ seki ou aprann dan la Bible, ek sa pou pousse ou pou servi Jéhovah par ou-mem.—2 Tim. 3:14.
La priere renforci ou l’amour pou Jéhovah
10, 11. Couma la priere aide ou pou renforci ou desir pou servi Bondié?
10 Deuxieme fason ki ou kapav renforci ou desir pou servi Jéhovah avek tou ou leker c’est par la priere. Dan Psaume 65:2, nou lire: “Toi ki ecoute la priere, oui tou dimoune pou vinn vers toi.” Mem pendant lepok ki Israël ti sa peuple avek ki Bondié ti faire enn l’alliance-la, bann etranger ki ti vinn dan temple Jéhovah ti kapav prié Li. (1 Rois 8:41, 42) Bondié pa faire preference. Bann ki suive so bann commandement ena l’assurance ki Li pou ecoute zot. (Prov. 15:8) Oui pena okenn doute ki ou aussi jeune ou forme partie parmi ‘tou sa bann dimoune-la.’
11 Ou koné ki vrai l’amitié basé lor enn bon communication. Surement ou content pou partage ou bann pensée, ou bann tracas, ek ou bann sentiment avek enn bon camarade. Li pareil aussi avek Jéhovah, kan ou prié Li avek tou ou leker, ou communik avek ou grand Createur. (Phil. 4:6, 7) Koz ar Jéhovah coumadir ou pé devide ou leker ar enn parent ki bien content ou, ou-soit ar enn bon camarade. En realité, ena enn grand lien entre fason ki ou prié ek seki ou ressenti pou Jéhovah. Ou pou remarké ki plus ou l’amitié avek Jéhovah vinn solide, plus ou bann la priere pou profond.
12. (a) Kifer enn la priere sincere implik plus ki zis bann parole? (b) Ki pou aide ou pou realisé ki Jéhovah pré ar ou?
12 Mais rappel bien ki enn la priere sincere implik plus ki bann parole. Sa implik ou bann sentiment bien profond. Dan ou la priere, exprime ou grand l’amour pou Jéhovah, ou profond respé ek confiance total ki ou ena envers Li. A mesure ki ou trouvé couma Jéhovah reponn ou bann la priere, ou pou realisé par ou-mem, couma jamais ou finn realisé avant, ki “Jéhovah pré avek tou bann ki invok Li.” (Ps. 145:18) Oui, Jéhovah pou vinn proche ar ou, Li pou fortifié ou pou ou kapav oppose-ou ar Satan ek pou faire bann bon choix dan ou la vie.—Lire Jacques 4:7, 8.
13. (a) Couma l’amitié avek Bondié ti aide enn soeur? (b) Couma l’amitié avek Bondié aide ou pou faire face ar bann pression ki ou gagné ar ou bann camarade?
13 Prend l’exemple Cherie, ek guetté couma li’nn gagne la force grace a bann relation bien proche ki li ti ena avek Jéhovah. Kan li ti college, li ti gagne bann prix parski li ti travail bien dan classe ek li ti faire bien dan sport. Kan li ti termine lekol, li ti gagne enn la bourse ki ti pou permette li al faire bann grand l’etude. Cherie raconté: “Mo ti bien tenté pou accepté sa la bourse-la, bann professeur sport ek bann zeleve ti mette beaucoup pression lor moi pou mo accepté sa.” Mais li ti realisé ki si li ti al faire bann grand l’etude, li ti pou bizin consacré la plupart so le temps pou etudié ek pou prepare-li pou bann l’evenement sportif—ek li pa ti pou ena beaucoup le temps pou servi Jéhovah. Ki Cherie inn faire? Li dire: “Apré ki mo ti’nn prié Jéhovah, mo ti refuse la bourse-la ek mo ti commence service pionnier permanent.” Cinq an inn passé depuis ki li pionnier. Li dire: “Mo pena okenn regret. Mo koné ki mo’nn prend enn decision ki faire Jéhovah plaisir ek sa faire moi content. Oui, si ou mette Royaume Bondié en premier, ou pou gagne tou bann lezot kitsoz.”—Mat. 6:33.
Enn bon conduite montré ki ou “leker pur”
14. Kifer ou bon conduite ena l’importance pou Jéhovah?
14 Troisieme fason ki ou kapav montré ki ou servi Jéhovah avek enn leker bien disposé c’est par ou conduite. Jéhovah beni bann jeune ki reste pur lor plan moral. (Lire Psaume 24:3-5.) Kan Samuel ti jeune, li ti refuse pou imite conduite immoral bann garson grand pretre Éli. Zot tou ti kapav trouve bon conduite ki Samuel ti ena. La Bible dire: “Pendant sa le temps-la, Samuel ti pé grandi ek li ti pé vinn de plus en plus meilleur devant Jéhovah ek devant bann zom.”—1 Sam. 2:26.
15. Cite certain raison kifer ou garde enn bon conduite.
15 Nou pé vive dan enn le monde ki rempli ar bann dimoune ki content zot-mem, ki ena l’orgueil, ki desobeir zot parent, ki ingrat, ki pa fidele, ki pena okenn pitié, ki rempli ar l’orgueil, ki content plaisir plutot ki Bondié—zis pou cite certain defaut ki Paul ti mentionné. (2 Tim. 3:1-5) Alors sa kapav vrai-mem bien difficile pou ou pou garde enn conduite exemplaire kan ou parmi sa qualité mauvais dimoune-la. Selman, chaque fois ki ou faire seki bon ek refuse pou ena enn conduite immoral, ou montré ki ou dan coté Jéhovah concernant question lor so souveraineté universel. (Job 2:3, 4) Ou ressenti enn satisfaction aussi pou koné ki ou pé reponn sa l’invitation ki Jéhovah pé donne ou avek amour-la: “Montré ki to sage mo garson, ek faire mo leker content, pou ki mo kapav reponn celui ki pé provok moi.” (Prov. 27:11) En plus, kan ou koné ki ou ena faveur Jéhovah, sa pou renforci ou desir pou servi Li.
16. Couma enn soeur ti faire leker Jéhovah content?
16 Pendant so l’adolescence, kan li ti al lekol, enn soeur ki appel Carol ti reste attaché ar bann principe biblik, ek zot tou ti kapav trouve so bon conduite. Ki ti arrivé? So bann camarade ti bouffonne li parski so conscience ki formé par la Bible, pa ti permette li pou participe dan bann fête ek bann ceremonie patriotik. Dan sa bann l’occasion-la, parfois li ti gagne possibilité pou explik so bann croyance ar lezot dimoune. Plusieurs l’année apré, enn zeleve ki ti dan classe Carol ti envoye li enn carte. Li ti ecrire: “Mo’nn toujours envie prend contact avek toi ek remercié toi. Zot tou ti bien remark to conduite par l’exemple ki to ti donné en tant ki enn jeune chretien, ek courage ki to ti ena pou pa participe dan bann fête. To ti premier Témoin de Jéhovah ki mo ti joinde.” L’exemple Carol ti ena tellement enn grand l’effet lor sa camarade-la ki plitar li ti commence etudié la Bible. Dan carte ki li ti ecrire Carol, li ti dire ki sa faire plus ki 40 an ki li enn Témoin de Jéhovah baptisé! Pareil couma Carol, zot bann jeune zordi ki reste attaché avek courage ar bann principe biblik, zot kapav pousse bann dimoune sincere pou aprann konn Jéhovah.
Bann jeune ki loué Jéhovah
17, 18. (a) Ki sentiment ou ena pou bann jeune ki dan ou congregation? (b) Ki l’avenir reservé pou bann jeune ki ena la crainte pou Bondié?
17 Nou tou ki dan l’organisation Jéhovah, nou bien content pou trouve sa quantité millier jeune ki zelé ek ki pé adore Jéhovah-la! Sa bann jeune-la renforci zot desir pou adore Jéhovah kan zot lire la Bible toulé-jour, kan zot prié, ek kan zot ena enn conduite ki en accord avek volonté Jéhovah. Sa bann jeune ki exemplaire-la zot enn grand reconfort pou zot bann parent ek pou tou bann serviteur Jéhovah.—Prov. 23:24, 25.
18 Dan l’avenir, pou ena bann jeune fidele ki pou forme partie parmi bann ki pou rente vivant dan le monde nouveau ki Bondié inn promette. (Rév. 7:9, 14) Lerla, zot pou gagne bann grand benediction a mesure ki zot contigne augmente zot reconnaissance pou Jéhovah, ek zot pou kapav loué Li pou touletan.—Ps. 148:12, 13.
Eski ou kapav expliké?
• Couma bann jeune kapav adore Jéhovah zordi?
• Pou ou gagne bann bienfait ar ou lecture la Bible, kifer li important ki ou medité?
• Couma la priere aide ou pou vinn proche ar Jéhovah?
• Kan ou ena enn bon conduite, ki l’effet sa ena?
[Zimage page 17]
Eski ou ena l’habitude pou lire la Bible toulé-jour?