Bann zom ki soumette ar l’autorité Christ
“Chef tou bann zom c’est Christ.”—1 COR. 11:3.
1. Ki montré ki Jéhovah Li enn Bondié ki content l’ordre?
RÉVÉLATION 4:11 dire: “To digne, Jéhovah, oui nou Bondié, pou gagne la gloire, l’honneur ek pouvoir, parski to finn crée tou kitsoz, ek a cause to volonté zot existé ek zot finn crée.” C’est Jéhovah ki finn crée tou kitsoz, alors Li pli grand Souverain l’univers ek Li ena l’autorité lor tou so creation. Nou kapav trouvé ki Jéhovah “Li pa enn Bondié desordre mais enn Bondié la paix,” par fason ki Li finn organise bann ange ki dan le ciel.—1 Cor. 14:33; Is. 6:1-3; Héb. 12:22, 23.
2, 3. (a) Kisannla ti premier creation Jéhovah? (b) Ki position Garson premier-né Bondié ena par rapport ar so Papa?
2 Avant creation tou kitsoz, Bondié ti existé depuis bien-bien longtemps. So premier creation ti enn creature spirituel ki la Bible appel “la Parole” parski li ti Porte-Parole Jéhovah. C’est par moyen la Parole ki tou lezot kitsoz inn existé. Plitar, li ti vinn lor la terre couma enn zom parfait ek li ti appel Jésus Christ.—Lire Jean 1:1-3, 14.
3 Ki la Bible dire lor position ki Bondié ena par rapport avek so Garson premier-né? L’apotre Paul ti inspiré par Bondié pou ecrire: “Mo envie ki zot koné ki chef tou bann zom c’est Christ; chef enn femme c’est zom; ek chef Christ c’est Bondié.” (1 Cor. 11:3) Christ enba l’autorité so Papa. Pou kapav ena la paix ek l’ordre parmi bann creature intelligent, li bien important ki ena l’autorité ek soumission. Mem sa kikenn ‘par ki tou bann lezot kitsoz inn crée-la’ bizin soumette ar l’autorité Bondié.—Col. 1:16.
4, 5. Couma Jésus ti considere so position par rapport avek Jéhovah?
4 Couma Jésus ti considere so soumission ar l’autorité Jéhovah ek couma li ti reagir kan so Papa ti demann li pou vinn lor la terre? La Bible dire: “Christ Jésus, . . . ki mem si li ti existé dan forme Bondié, li pa ti pense pou prend place Bondié, setadir pou vinn egal ar Bondié. Non, mais li ti laisse tou, li ti prend forme enn esclave ek li ti vinn pareil couma bann zom. En plus, kan li ti trouve li couma enn zom, li ti abaisse li-mem, ek li ti obeir ziska la mort, oui, la mort lor enn poteau souffrance.”—Phil. 2:5-8.
5 Touletan Jésus ti soumette avek humilité ar volonté so Papa. Li ti dire: “Mo pa kapav faire nanyin par mo-mem; . . . jugement ki mo rendé li juste, parski mo pa rod mo prop volonté, mais volonté sa Kikenn ki finn envoye moi-la.” (Jean 5:30) “Mo faire toujours seki faire [mo Papa] plaisir.” (Jean 8:29) Vers la fin so la vie lor la terre, Jésus ti dire so Papa dan enn la priere: “Mo’nn glorifié toi lor la terre, parski mo’nn fini travail ki to ti donne moi pou faire.” (Jean 17:4) Li clair ki Jésus pa ti ena probleme pou reconette ek pou accepté l’autorité Bondié.
Garson Bondié gagne bann bienfait parski li soumette ar so Papa
6. Ki bann bon qualité Jésus ti manifesté?
6 Kan Jésus ti lor la terre, li ti manifesté beaucoup qualité. Parmi, li ti manifesté enn grand l’amour pou so Papa. Li ti dire: “Mo content le Père.” (Jean 14:31) Li ti aussi manifesté enn grand l’amour pou bann dimoune. (Lire Matthieu 22:35-40.) Jésus ti bon ek li ti ena consideration pou lezot, li pa ti brite ni li ti dominere. Li ti dire: “Vinn vers moi, zot tou ki pé rinté ek ki ena fardeau lor zot, ek moi mo pou reconforte zot. Prend mo joug lor zot ek aprann ar moi, parski mo ena enn caractere doux ek enn leker humble, ek zot pou gagne reconfort pou zot nâme. Parski mo joug, li doux ek mo charge, li leger.” (Mat. 11:28-30) Grace a bon personnalité ki Jésus ti ena ek so message encourageant, bann dimoune tou l’age, surtout bann ki ti pé souffert ek ki pé passe misere, ti gagne enn grand reconfort.
7, 8. Dapré la Loi, ki sa madame ki ti ena enn l’hemorragie-la pa ti gagne droit faire, mais couma Jésus ti agir avek li?
7 Anou guetté couma Jésus ti traite bann femme. Toute longue l’Histoire, beaucoup zom finn traite bann femme dan enn mauvais fason, ek dan le passé en Israël, bann chef religieux aussi ti faire pareil. Mais Jésus li, li ti traite bann femme avek respé. Nou trouve sa bien dan so fason agir envers enn femme ki ti malade pendant 12 an a cause enn l’hemorragie. “Li ti’nn bien souffert” dan la main bann docteur ek li ti’nn depense tou seki li ti ena pou essaye trouve enn guerison. Malgré tousala, li “ti pli malade.” Dapré la Loi, li ti enn kikenn impur. Tou dimoune ki ti touche li, ti pou vinn impur zot aussi.—Lév. 15:19, 25.
8 Kan sa madame-la ti tann dire ki Jésus ti pé gueri bann dimoune malade, li ti al parmi la foule ki ti tout autour Jésus ek li ti dire: “Si mo touche zis so linge, mo pou gueri.” Li ti touche Jésus ek desuite li ti gueri. Jésus ti koné ki sa madame-la pa ti gagne droit touche so linge. Mais kan-mem, li pa ti criye ar li. Au contraire, li ti bon avek li. Li ti comprend ki quantité surement sa madame-la ti’nn souffert pendant tou sa le temps-la, ek li ti trouvé ki li ti vrai-mem envie gagne enn soulagement. Avek beaucoup compassion, Jésus ti dire li: “Mo tifi, to la foi finn gueri toi. Al en paix, mo’nn gueri toi.”—Marc 5:25-34.
9. Kan bann disciple Jésus ti essaye empeche bann zenfant pou vinn vers li, couma Jésus ti reagir?
9 Mem bann zenfant ti senti-zot a l’aise avek Jésus. Enn jour, so bann disciple ti criye ar bann dimoune ki ti amenn bann zenfant ar li. Surement zot ti pensé ki Jésus pa ti envie ki bann zenfant derange li. Mais Jésus pa ti pense coumsa. La Bible dire nou: “Kan Jésus ti trouve sa, li pa ti content ek li ti dire [so bann disciple]: ‘Laisse bann ti zenfant vinn vers moi; pa rod empeche zot, parski royaume Bondié li pou bann dimoune ki pareil couma zot.’ ” Apré, “li ti prend bann zenfant dan so lé-bras, li ti pose so la main lor zot, ek li ti commence beni zot.” Presence bann zenfant pa ti fatigue Jésus, au contraire li ti accueillir zot avek beaucoup l’amour.—Marc 10:13-16.
10. Couma Jésus inn arrivé gagne sa bann qualité ki li ti manifesté-la?
10 Couma Jésus ti gagne sa bann qualité ki li ti manifesté kan ki li ti lor la terre-la? Kan li ti dan le ciel, li ti observe so Papa pendant enn bien longue periode le temps ek li ti aprann So fason agir. (Lire Proverbes 8:22, 23, 30.) Dan le ciel, li ti trouvé couma Jéhovah ti servi so l’autorité lor So creation avek amour, ek li ti adopté mem l’attitude. Eski Jésus ti pou kapav faire sa si li pa ti disposé pou soumette ar l’autorité so Papa? Sa ti enn plaisir pou li pou soumette ar so Papa, ek Jéhovah ti content pou ena enn Garson coumsa. Kan li ti lor la terre, Jésus ti reflete dan enn fason parfait bann qualité extraordinaire ki so Papa ena. C’est vrai-mem enn grand privilege pou nou pou soumette ar Christ, Dirigeant ki Bondié inn etabli dan so Royaume dan le ciel!
Imite bann qualité ki Christ ena
11. (a) Nou bizin travail dur pou imite kisannla? (b) Kifer bann frere dan congregation bizin faire zeffort pou imite Jésus?
11 Nou tou dan congregation, surtout bann zom, bizin contigne travail dur pou imite bann qualité ki Christ ena. Couma nou finn trouvé, la Bible dire: “Chef tou bann zom c’est Christ.” Pareil couma Christ ti imite so Chef, vrai Bondié, bann zom bizin faire zeffort pou imite zot chef, setadir Christ. C’est seki l’apotre Paul ti faire kan li ti vinn enn chretien. Li ti donne sa l’encouragement-la bann chretien dan so lepok: “Imite moi, pareil couma moi mo imite Christ.” (1 Cor. 11:1) L’apotre Pierre li, li ti dire: “Pou sa-mem ki finn appel zot, parski Christ aussi finn souffert pou zot, ek li finn laisse enn modele pou zot, pou ki zot suive bien so trace.” (1 Pierre 2:21) Ena enn lot raison kifer bann zom bizin imite Christ: c’est zot ki vinn bann ancien ek bann assistant ministeriel. Pareil couma Jésus ti content pou imite Jéhovah, bann frere bizin content pou imite Christ ek so bann qualité.
12, 13. Couma bann ancien bizin traite bann brebis ki finn confié zot?
12 Bann ancien dan congregation bizin aprann pou imite Jésus Christ. Pierre ti donne bann ancien sa conseil-la: “Prend soin troupeau Bondié ki lor zot charge, pa par obligation, mais volontairement, ni parski zot content enn profit malhonnete, mais parski zot ena sa desir-la, ni couma bann ki domine lor l’heritage Bondié, mais vinn bann l’exemple pou troupeau.” (1 Pierre 5:1-3) Bann ancien pena droit faire couma bann dictateur dan congregation. Fodé pa aussi ki zot dominere, faire preference ou-soit zot dur. Zot bizin imite l’exemple Christ ek faire zeffort pou manifesté l’amour, consideration, l’humilité ek la bonté dan fason ki zot traite bann brebis ki Bondié inn confié zot.
13 Bann ki dirige congregation zot bann zom imparfait, ek fodé ki zot touletan rappel sa. (Rom. 3:23) Alors, fodé ki zot envie aprann lor Jésus ek imite so l’amour. Zot bizin medite lor fason ki Bondié ek Christ agir avek bann dimoune ek faire zeffort pou imite zot. Pierre donne sa conseil-la: “Zot tou, entoure zot lé-rein ar l’humilité sakenn envers so camarade, parski Bondié kont bann ki ena l’orgueil, mais Li donne So faveur ki personne pa merité, bann ki ena l’humilité.”—1 Pierre 5:5.
14. Ziska ki point bann ancien bizin honore lezot?
14 Dan zot rapport avek troupeau Bondié, bann ancien dan congregation bizin manifesté bann bon qualité. Romains 12:10 dire: “Dan l’amour fraternel, ena enn grand l’affection sakenn pou so camarade. Zot bizin toujours premier pou honore sakenn so camarade.” Bann ancien ek bann assistant ministeriel honore zot bann frere ek soeur. Pareil couma bann lezot chretien, sa bann frere-la ‘pa faire nanyin avek l’idée pou leve la guerre ni pou mette zot-mem en avant, mais avek enn l’esprit l’humilité, zot considere lezot membre couma pli superieur ki zot.’ (Phil. 2:3) Bann ki dirige congregation bizin considere lezot membre couma pli superieur ki zot. Kan zot agir coumsa, zot pou suive conseil ki Paul ti donné: “Mais nou bann ki fort, nou bizin sarié faiblesse bann ki faible, ek pa faire nou-mem plaisir. Fodé ki sakenn parmi nou faire so prochain plaisir dan seki bon pou fortifié li. Parski mem Christ pa finn faire li-mem plaisir.”—Rom. 15:1-3.
‘Donne l’honneur zot femme’
15. Couma bann mari bizin agir avek zot femme?
15 Asterla, anou guette enn conseil ki Pierre ti donne bann zom marié. Li ti ecrire: “Zot aussi pareil, bann mari, contigne reste ar [zot femme] dapré la connaissance, donne zot l’honneur pareil couma enn recipient pli fragile, enn vase feminin.” (1 Pierre 3:7) Honore enn kikenn vedir ena enn grand l’estime pou li. Nou prend compte so l’opinion, seki li bizin, seki li envie ek nou cedé kan pena okenn raison important ki empeche nou faire sa. C’est coumsa ki enn mari bizin agir avek so femme.
16. Ki l’avertissement Parole Bondié donne bann mari en rapport avek l’honneur ki zot bizin donne zot femme?
16 Kan Pierre ti dire bann mari honore zot femme, li ti ajoute sa l’avertissement-la: “Pou ki pena nanyin ki blok zot la priere.” (1 Pierre 3:7) Sa montré ki fason ki enn mari traite so femme li bien important devant Jéhovah. Si zot pa honore zot femme sa kapav blok zot la priere. En general, eski bann femme pa reagir bien kan zot mari traite zot dan enn fason honorable?
17. Ziska ki point enn mari bizin content so femme?
17 Parole Bondié donne enn lot conseil bann mari concernant l’amour ki zot bizin ena pou zot femme: “Bann mari bizin content zot femme pareil couma zot prop lekor. . . . Parski jamais personne pa finn ena la haine pou so prop la chair; au contraire li nourri li ek li prend li bien soin, pareil couma Christ aussi faire pou la congregation . . . Ki sakenn parmi zot content so madame pareil couma li content li-mem.” (Éph. 5:28, 29, 33) Ziska ki point enn mari bizin content so femme? Paul ti ecrire: “Mari, contigne content zot femme, pareil couma Christ aussi finn content la congregation ek finn donne so la vie pou sauve li.” (Éph. 5:25) Oui, enn mari bizin mem disposé pou mort pou so femme, pareil couma Christ ti disposé pou mort pou lezot. Kan enn mari chretien traite so femme avek tendresse, consideration, avek beaucoup l’attention, ek li pa egoïste, li pli facile pou so femme soumette ar so l’autorité.
18. Ki l’aide bann zom gagné pou prend zot responsabilité dan zot mariage?
18 Kan Bondié demann bann mari pou honore zot femme dan sa fason-la, eski Li pé demann zot trop beaucoup? Non, parski jamais Jéhovah pou demann zot faire enn kitsoz ki zot pa pou kapav faire. En plus, bann serviteur Jéhovah kapav gagne la force ki pli puissant dan l’univers, setadir l’esprit saint Bondié. Jésus ti dire: “Mem si zot, mauvais couma zot été, zot konn donne zot zenfant seki bon, kifer nou Papa ki dan le ciel pa pou donne encore plus l’esprit saint bann ki demann Li?” (Luc 11:13) Dan zot la priere, bann mari kapav demann Jéhovah pou aide zot grace a so l’esprit saint pou traite bien lezot, zot femme aussi parmi.—Lire Actes 5:32.
19. Ki nou pou examiné dan prochain lartik?
19 Oui, bann zom ena enn grand responsabilité, zot bizin aprann pou soumette ar Christ ek pou imite fason ki li servi so l’autorité. Mais ki nou kapav dire lor bann femme, surtout bann ki marié? Dan prochain lartik, nou pou trouvé couma zot bizin considere role ki Jéhovah inn donne zot.
Eski ou rappel?
• Ki bann qualité Jésus, nou bizin imité?
• Couma bann ancien bizin agir envers bann brebis?
• Couma enn mari bizin traite so femme?
[Zimage page 16]
Imite Jésus kan nou honore nou prochain