Honore bann chretien agé—Kifer?

LOR la cote Californie, en Amérique, enn parmi bann pié ki bann dimoune tire plus photo dan le monde, appel Lone Cypress, setadir “cyprès solitaire” en français. Dapré certain, sa pié-la ena plus ki 250 an. Sa joli pié-la bien populaire a cause so resistance ek a cause sa, bann dimoune finn donne li bann soin dan plusieurs fason. Par exemple, zot finn tini li avek bann cable, ek zot finn coule enn beton lor so base pou faire li pli solide.

Pié Lone Cypress rappel nou kitfois bann chretien agé ki parmi nou, ki manifesté enn grand l’endurance. Enn fason ki zot montré zot l’endurance c’est kan zot preche la bonne nouvelle. Prophete Yoël ti annoncé ki “bann zom agé” pou declare message ki sorti dan la Bible. (Yoël 2:28-32; Actes 2:16-21) Mazinn inpé ki quantité le temps zot passé pou aide bann dimoune pou konn “sa bon nouvelle lor royaume-la” ek zot faire sa avek tou zot leker. (Mat. 24:14) Certain parmi sa bann proclamateur agé-la finn endure persecution ek bann lezot difficulté pendant plusieurs l’année. Si enn simple cyprès li renommé pou so resistance ek dimoune inn faire li vinn pli solide avek bann roche ek bann cable, comié plus nou bann compagnon agé merité ki nou estime zot ek ki nou traite zot avek dignité ek l’honneur!

Dan le passé, Jéhovah ti donne sa l’ordre-la so peuple: “Devant bann cheveux blanc to bizin levé, ek to bizin montré consideration pou enn vié dimoune.” (Lév. 19:32) Parmi bann serviteur Jéhovah zordi, nou trouve bann bon l’exemple bann serviteur fidele ki finn ‘marche avek Bondié’ pendant plusieurs dizaine l’année. (Mika 6:8) Alors ki zot pé contigne applik bann principe la Bible, zot cheveux blanc vrai-mem “enn couronne beauté.”—Prov. 16:31.

L’apotre Paul ti donne sa l’instruction-la Timothée, ki ti jeune: “Pa critik severement enn zom ki dan l’age.” Au contraire, Timothée ti bizin “suppliye li couma enn papa” ek “bann femme agé couma bann mama.” (1 Tim. 5:1, 2) Oui, Timothée ti bizin “levé” devant bann dimoune ki ena cheveux blanc. Alors, li clair ki Jéhovah attann ki par nou fason kozé, nou donne bann dimoune agé, l’honneur.

Romains 12:10 dire: “Zot bizin toujours premier pou honore sakenn so camarade.” Pena doute ki bann ancien dan bann congregation honore bann chretien agé. Mais nou tou nou bizin premier pou honore sakenn nou camarade.

Bien sur, c’est bann membre enn famille ki ena surtout responsabilité envers zot parent ek zot grand-parent. En seki concerne sa pié ki appel Lone Cypres-la, bann dimoune finn rod bann moyen pou preserve li, ek zot pé contigne faire sa. Alors, nou bizin nou aussi rod bann moyen ki kapav aide nou bann parent ek grand-parent pou garde zot dignité. Par exemple, si nou ecoute zot bien, sa pou empeche nou insisté pou faire kitsoz dan nou fason sans prend compte zot bann sentiment.—Prov. 23:22; 1 Tim. 5:4.

Bann chretien agé ki parmi nou, ena beaucoup valeur devant Jéhovah. Li pa abandonne zot. (Ps. 71:18) Vrai Bondié donne zot la force pou zot contigne servi Li avek fidelité. Nou aussi, anou contigne soutenir ek honore bann chretien agé.

[Zimage page 13]

Pareil couma Lone Cypress bizin soin, nou bizin traite bann chretien agé avek dignité ek donne zot l’honneur

[Remerciement photo]

American Spirit Images/age fotostock