Question bann lecteur . . .

▪ La Bible reponn ki Bondié pa finn ena enn commencement. Li finn toujours existé. Mem si li difficile pou comprend l’idée ki Bondié Li eternel, nou pa kapav rejette sa l’idée-la, zis parski nou pa vrai-mem comprend li.

Eski li raisonnable ki nou attann pou comprend tou bann fason agir Bondié? L’apotre Paul ti dire: “Ah, sa quantité bon kitsoz ki Bondié donné-la, so sagesse, ek so connaissance, zot pa fini jamais! Kisannla ki kapav explik so bann jugement ek comprend so bann chemin?” (Romains 11:33) Nou l’esprit pa kapav vrai-mem comprend profondeur sagesse ek connaissance Bondié, pareil couma enn tibaba pa kapav comprend tou concernant so parent. Mem si d’abord sa bann parole ki Paul ti inspiré pou ecrire-la, montré ki personne pena enn sagesse ek enn misericorde couma Bondié, sa faire nou comprend aussi ki ena certain l’aspect ek fason agir Bondié, Jéhovah, ki trop profond pou ki nou l’esprit kapav comprend sa. L’idée ki Bondié pena enn commencement forme parti ladan. Mais kan-mem sa, nou kapav ena full confiance dan seki la Bible enseigne nou lor Bondié. Jésus Christ ti dire concernant bann l’Ecriture sacré: “To parole li la verité.”—Jean 17:17.

Dan enn la priere ki li ti faire ar Jéhovah, Moïse ti dire: “Depuis touletan ek pou touletan to-mem Bondié!” (Psaume 90:2, Bible d’Osty) Ici, Moïse decrire l’existence Bondié ki al dan deux direction. Premier-la concerne l’avenir. Jéhovah Li “Sa Kikenn ki vive pou toujours-la.” (Révélation 4:10) Sa vedir ki Bondié pou contigne existé pou touletan dan l’avenir. Deuxieme-la concerne le passé. Setadir, pena personne ki’nn crée Bondié, ni Li’nn ena enn commencement. Au contraire, depuis bien longtemps dan le passé Bondié existé.

Pou la plupart parmi nou li difficile pou comprend bann l’idée ki vague. Pourtant, parfois nou bizin accepté bann l’idée difficile, couma bann chiffre positif ek negatif. Nou kapav compté allé-mem ek jamais pa fini, soit la-haut zero, soit enba zero. Eski nou pa kapav applik sa l’exemple-la avek bann l’année dan la vie nou Createur?

Alors li approprié ki Bondié tousel ena titre “le Roi l’eternité.” (1 Timothée 1:17) Mazinn enn coute: Jésus Christ, bann million ange ki dan le ciel, ek bann dimoune ki lor la terre, zot tou inn gagne enn commencement parski inn crée zot. (Colossiens 1:15, 16) Li pa pareil pou Bondié. Insisté lor l’idée ki finn bizin crée Bondié, amenn bann lezot question inutile ek ki jamais pa fini, pou koné kisannla ki’nn crée Createur. Non, zis Jéhovah tousel ki existé “depuis l’eternité ziska l’eternité.” (Psaume 90:2, Bible à la Colombe) Sa vedir, ki Jéhovah ti existé “avant tou kitsoz.”—Jude 25, note.

Nou bizin rappel ki l’idée ki Bondié Li eternel, pa enn kitsoz banal. Kan nou examine bien la priere ki Moïse ti faire, sa montré ki parski Bondié eternel, nou ena enn garantie concernant enn promesse rempli ar l’amour, pou gagne la vie eternel. Comparé ar la vie bien courte ki nou ena asterla, la Bible decrire Bondié couma ‘enn vrai refuge pou nou, generation apré generation.’ Couma enn bon Papa, Jéhovah ti avek so peuple, Li avek so peuple, ek Li pou toujours avek so peuple. Laisse sa verité extraordinaire-la reconforte ou!—Psaume 90:1.