Participe a fond dan grand recolte spirituel

“Ena . . . beaucoup pou faire dan travail nou Seigneur.”—1 COR. 15:58.

1. Ki l’invitation Jésus ti donne so bann disciple?

KAN Jésus ti pé traverse Samarie vers la fin l’an 30 nou lepok, li ti arreté pou repose-li kot enn puit pré ar la ville Sychar. La, li ti dire so bann disciple: “Leve zot lizié ek guette bann karo; zot blanc, zot inn paré pou recolte.” (Jean 4:35) Jésus pa ti pé koz lor enn recolte litteral, mais lor rassemblement bann dimoune droite ki ti pou vinn so bann disciple. Alors, seki li ti dire so bann disciple, en realité ti enn l’invitation pou zot participe dan sa recolte-la. Ti ena beaucoup travail pou faire mais zis enn tigit le temps-mem pou faire sa travail-la!

2, 3. (a) Ki montré ki nou pé vive dan lepok recolte? (b) Ki nou pou examiné dan sa lartik-la?

² Seki Jésus ti dire lor recolte ena enn signification special pou nou lepok. Nou pé vive enn lepok kot sa karo-la, setadir l’humanité, li “blanc, [li’nn] paré pou recolte.” Toulé l’année, plusieurs million dimoune gagne l’invitation pou aprann bann verité ki donne la vie, ek plusieurs millier nouveau disciple prend bapteme. Nou ena enn grand privilege pou participe dan pli grand recolte ki finn ena, enba direction Jéhovah, Maitre sa recolte-la. Eski ou ena “beaucoup pou faire” dan sa travail recolte-la?—1 Cor. 15:58.

³ Pendant trois an et demi ki Jésus ti accompli so ministere lor la terre, li ti prepare so bann disciple pou zot vinn bann travailleur dan sa recolte-la. Sa lartik-la pou examine trois parmi bann leson important ki Jésus ti enseigne so bann disciple. Chaque leson montré enn qualité ki pou aide nou beaucoup a mesure ki nou pé faire zeffort pou faire nou maximum pou rassemblé bann disciple dan nou lepok. Anou examine sa bann qualité-la enn par enn.

L’humilité bien important

4. Couma Jésus ti montré l’importance l’humilité?

⁴ Mazinn sa scene-la: bann disciple finn fek gagne enn discussion entre zot pou koné kisannla ki pli grand. Surement lor zot figure encore kapav trouvé ki zot ena mefiance ek bann mauvais sentiment. Alors, Jésus appel enn ti zenfant ek faire li deboute au milieu zot. Li attire l’attention lor sa zenfant-la ek li dire: “Seki pou ena l’humilité [ou-soit, “seki faire li-mem vinn tipti,” TOB] couma sa ti-zenfant-la, c’est li ki pli grand dan royaume ki dan le ciel.” (Lire Matthieu 18:1-4.) Le monde juge enn dimoune dapré quantité pouvoir, l’argent ou-soit position ki li ena. Mais, bann disciple Jésus pa ti bizin pense coumsa. Zot ti bizin comprend ki zot grandeur ti depann lor zot capacité pou ‘faire zot-mem vinn tipti’ devant lezot. Jéhovah ti pou beni ek servi zot, zis si zot ti montré vrai l’humilité.

5, 6. Kifer ou bizin humble pou ou kapav participe a fond dan travail recolte? Donne enn l’exemple.

⁵ Zordi beaucoup dimoune tellement occupé pou galope derriere pouvoir, la richesse ek enn grand position ki zot nepli ena le temps ou-soit zot ena enn tigit le temps-mem pou bann kitsoz spirituel. (Mat. 13:22) Mais bann serviteur Bondié zot different, zot content pou ‘faire zot-mem vinn tipti’ devant lezot pou zot kapav gagne benediction ek faveur Maitre recolte.—Mat. 6:24; 2 Cor. 11:7; Phil. 3:8.

⁶ Anou guette l’exemple Francisco ki enn ancien en Amérique du Sud. Kan li ti jeune, li ti quitte l’université pou faire pionnier. Li raconté: “Kan plitar mo ti decidé pou marié, mo ti kapav al rod enn travail ki ti pou donne mo madame ek moi enn pli grand securité lor plan financier. Mais selman, nou ti decidé pou simplifié nou la vie ek contigne nou service a plein temps ensam. Plitar, nou ti gagne bann zenfant, ek bann difficulté ti augmenté. Mais Jéhovah ti aide nou pou garde nou decision pou amenn enn la vie simple.” Pou fini, Francisco dire: “Sa faire plus ki 30 an ki mo ena privilege pou servi couma enn ancien, ek mo’nn gagne beaucoup lezot privilege special. Jamais, mem pa pou enn ti moment, nou finn regretté ki nou finn amenn enn la vie simple.”

7. Couma ou finn essaye applik conseil ki trouve dan Romains 12:16?

⁷ Si ou dire non “ar bann grand kitsoz” ki ena dan sa le monde-la ek “laisse ou attiré par bann kitsoz ki humble,” ou aussi ou kapav attann pou gagne beaucoup lezot benediction ek privilege dan travail recolte.—Rom. 12:16; Mat. 4:19, 20; Luc 18:28-30.

Kan nou zelé, nou gagne bann bon resultat

8, 9. (a) Faire enn resumé lor seki Jésus ti dire dan parabole bann talent. (b) Pou kisannla surtout sa parabole-la kapav encourageant?

⁸ Enn lot qualité ki nou bizin pou ki nou kapav participe a fond dan travail recolte c’est ki nou bizin zelé. C’est seki Jésus ti montré dan parabole bann talent.a Sa l’exemple-la concerne enn missié ki, avant ki li ti al faire enn voyage pou l’etranger, ti confié so di-bien trois esclave. Premier esclave ti gagne cinq talent, deuxieme-la ti gagne deux ek troisieme-la enn. Kan zot maitre ti allé, deux premier esclave-la ti travail dur ek desuite zot “ti faire business” avek zot bann talent. Mais troisieme esclave-la li, li ti “paresse.” Li ti enterre so talent dan la terre. Kan maitre-la ti retourné, li ti recompense so deux premier esclave ek li ti etabli zot “lor beaucoup kitsoz.” Li ti reprend talent ki li ti donne troisieme esclave-la ek ti mette li dehors.—Mat. 25:14-30.

⁹ Pena doute ki ou envie imite sa deux esclave ki ti travail bien dur-la, ki Jésus ti mentionné dan so parabole, ek ou envie faire ou maximum dan ou ministere. Mais couma ou pou reagir si certain situation pé empeche ou faire seki ou kapav faire? Kitfois a cause situation economik ki bien difficile, ou obligé travail beaucoup pou donne ou famille seki li bizin. Ou-soit kitfois a cause ou la santé ou-soit l’age ou nepli kapav faire couma avant. Si ou dan sa bann situation-la, dan parabole bann talent ena enn message encourageant pou ou.

10. Couma maitre dan parabole bann talent ti montré ki li ti raisonnable, ek kifer ou trouve sa encourageant?

¹⁰ Remarké ki maitre dan sa parabole-la ti reconette ki sakenn parmi so bann esclave pa ti ena mem capacité. Li ti montré sa kan li ti donne bann talent “sakenn dapré so capacité.” (Mat. 25:15) Li logik ki premier esclave-la ti gagne bann pli bon resultat ki deuxieme-la. Selman, maitre-la ti montré ki li ti apprecié bann grand zeffort ki toulé-deux esclave ti faire kan li ti appel zot “bon ek fidele” ek li ti recompense zot pareil. (Mat. 25:21, 23) Li pareil aussi avek Maitre recolte, Jéhovah. Li koné ki ou situation ena enn l’effet lor seki ou kapav faire dan so service. Li pa pou manké pou trouve bann zeffort ki ou pé faire avek tou ou nâme pou servi Li ek Li pou recompense ou dapré sa bann zeffort-la.—Marc 14:3-9; lire Luc 21:1-4.

11. Donne enn l’exemple pou montré ki si nou zelé malgré bann situation difficile, sa kapav faire nou gagne bann grand benediction.

¹¹ L’exemple Selmira, enn soeur ki reste Brésil, montré ki nou kapav zelé dan service Bondié malgré bann situation difficile. Ena vingt an, mari Selmira ti gagne enn coute balle ar bann voleur ek li ti mort. Selmira ti retrouve-li tousel avek trois jeune zenfant. Selmira ti enn servante ek li ti bizin travail bann longue journée ek faire bann longue voyage bien fatigant dan bann bus rempli. Malgré sa bann difficulté-la, li ti organise-li pou li kapav faire pionnier permanent. Plitar, deux parmi so trois zenfant ti faire pionnier zot aussi. Li raconté: “Pendant bann l’année ki’nn passé, mo finn etudié la Bible avek plus ki 20 dimoune, ek zot inn vinn bann membre mo ‘famille.’ Zordi, mo ena zot l’amour ek zot l’amitié. C’est enn tresor ki l’argent pa kapav acheté.” Pena doute ki Maitre recolte finn recompense Selmira pou so bann grand zeffort!

12. Couma nou kapav montré ki nou zelé dan predication?

¹² Si bann situation ki ou gagné dan ou la vie toulé-jour empeche ou faire quantité ki ou ti habitué faire dan ou ministere, ou kapav kan-mem essaye augmente ou participation dan travail recolte kan ou faire ou ministere vinn plus productif. Kan ou applik avek serieux bann suggestion pratik ki presenté chaque semaine dan reunion service, ou pou ameliore ou capacité pou preché ek ou pou gagne l’occasion pou essaye bann nouveau fason pou donne temoignage. (2 Tim. 2:15) Ek aussi, si li possible, ou kapav reorganise ou, ou-soit mem arrete faire bann activité ki pa vrai-mem important, pou ki ou kapav soutenir regulierement bann rendez vous predication ki ou congregation organisé.—Col. 4:5.

13. Pou ou kapav developpe ek garde ou zele, ki kitsoz ki bien important?

¹³ Rappel ki c’est ou l’amour ek ou reconnaissance pou Bondié ki faire ou ena zele. (Ps. 40:8) Troisieme esclave ki Jésus ti mentionné dan so parabole ti peur so maitre, li ti considere li couma enn dimoune ki ti trop exigeant ek ki pa ti raisonnable. A cause sa, sa esclave-la ti enterre so talent au lieu ki li ti servi sa pou augmente di-bien so maitre. Pou ki nou pena enn l’attitude negligent coumsa, nou bizin developpe ek garde bann bon relation avek Maitre recolte, Jéhovah. Reserve le temps pou etudié ek pou medite lor so bann qualité ki bien attirant—so l’amour, so patience, ek so misericorde. Dan sa fason-la, ou leker pou pousse ou pou faire tou seki ou kapav dan so service.—Luc 6:45; Phil. 1:9-11.

“Zot bizin saint”

14. Ki condition important bann ki envie travail dan recolte spirituel bizin rempli?

¹⁴ L’apotre Pierre ti cite bann l’Ecriture hébraïques kan li ti koz lor volonté Bondié pou So bann serviteur lor la terre. Li ti dire: “En accord avek sa Kikenn ki Saint ek ki finn appel zot-la, vinn saint zot aussi dan tou zot conduite parski finn ecrire: ‘Zot bizin saint, parski moi mo saint.’ ” (1 Pierre 1:15, 16; Lév. 19:2; Deut. 18:13) Sa declaration-la mette l’accent lor enn kitsoz: bann ki travail dan recolte bizin pur lor plan moral ek spirituel. Nou kapav rempli sa condition-la kan nou prend bann disposition pou nou purifié-nou. Couma nou kapav faire sa? Avek l’aide bann l’enseignement ki sorti dan la Bible.

15. Ki pouvoir l’enseignement ki sorti dan la Bible kapav ena lor nou?

¹⁵ L’enseignement ki sorti dan la Bible, li pareil avek de l’eau ki kapav nettoye bann kitsoz. Par exemple, l’apotre Paul ti ecrire ki congregation bann chretien oint li pur devant Bondié, pareil couma enn la marié ki pur pou Christ. Li’nn purifié li “avek enn bain de l’eau par moyen la parole . . . , pou ki li saint ek sans defaut.” (Éph. 5:25-27) Avant, Jésus aussi ti koz lor pouvoir pou purifié ki parole Bondié ena, parole ki li ti annoncé. Kan li ti koz ar so bann disciple, Jésus ti dire: “Zot deja pur a cause parole ki mo finn dire zot.” (Jean 15:3) Sa vedir ki la verité ki sorti dan parole Bondié ena pouvoir pou purifié nou lor plan moral ek spirituel. C’est selman kan nou laisse l’enseignement biblik purifié nou dan sa fason-la ki Bondié pou accepté nou l’adoration.

16. Couma nou kapav reste pur lor plan spirituel ek moral?

¹⁶ Sa vedir ki, pou Bondié accepté nou couma bann travailleur dan so recolte, nou bizin avant rejette bann pratik ki impur lor plan moral ek spirituel. Oui, pou ki nou kapav contigne rempli condition pou garde privilege pou travail dan recolte spirituel, nou bizin donne enn bon l’exemple kan nou soutenir bann principe moral ek spirituel ki Jéhovah inn etabli. (Lire 1 Pierre 1:14-16.) Pareil couma touletan nou faire bien attention pou reste prop lor plan physik, nou bizin aussi soumette-nou regulierement ar l’influence l’enseignement ki sorti dan la Bible ki kapav purifié nou. Sa implik lire la Bible ek assisté reunion. Sa vedir aussi faire bann zeffort sincere pou mette en pratik dan nou la vie bann rappel ki Bondié donne nou. Kan nou faire sa, nou pou reussi combatte nou bann tendance pou faire peché ek resisté ar l’influence le monde ki kapav contamine nou lor plan spirituel. (Ps. 119:9; Jacq. 1:21-25) Oui, li vrai-mem encourageant pou koné ki mem si nou finn faire enn peché grave, l’enseignement ki sorti dan la Bible kapav “purifié” nou!—1 Cor. 6:9-11.

17. Pou nou kapav reste pur, ki conseil biblik nou bizin suive?

¹⁷ Eski ou accepté ki l’enseignement ki sorti dan la Bible purifié ou la vie? Par exemple, couma ou reagir kan attire ou l’attention lor bann danger ki ena dan bann divertissement malprop ki ena dan le monde? (Ps. 101:3) Eski ou evite frequente trop ou bann camarade lekol ek ou bann collegue travail ki pa partage ou bann croyance? (1 Cor. 15:33) Eski ou pé faire bann zeffort sincere pou travail lor ou bann faiblesse personnel ki kapav faire ou vinn impur devant Jéhovah? (Col. 3:5) Eski ou reste separé ar bann debat lor politik ek ar l’attitude nationaliste ki ena dan beaucoup sport zordi?—Jacq. 4:4.

18. Couma, kan nou pur lor plan moral ek spirituel, sa pou aide nou pou vinn bann travailleur ki rapporte bann fruit?

¹⁸ Ou l’obeissance dan sa bann domaine-la pou faire ou gagne bann bon resultat. Jésus ti compare so bann disciple oint ar bann branche enn pié raisin, li ti dire: “Tou branche ki en moi ki pa rapporte fruit, [mo Papa] tire li, ek tou branche ki rapporte fruit, Li nettoye li, pou ki li kapav rapporte plus fruit.” (Jean 15:2) A mesure ki ou soumette ar bann verité biblik ki kapav purifié ou, ou pou rapporte encore plus fruit.

Bann benediction asterla ek dan l’avenir

19. Couma bann disciple Jésus ti gagne bann benediction en tant ki bann travailleur dan recolte?

¹⁹ Jour Pentecôte l’an 33 nou lepok, bann disciple fidele ki ti mette en pratik formation ki Jésus ti donne zot, ti gagne l’esprit saint. Sa ti donne zot la force pou vinn bann temoin “ziska dan region pli loin lor la terre.” (Actes 1:8) Certain ti servi couma bann membre College central, couma missionnaire, couma surveillant itinerant, ek zot ti joué enn role important pou preche la bonne nouvelle “dan tou creation ki trouve enba le ciel.” (Col. 1:23) Zot ti gagne bann benediction ek zot ti faire lezot gagne enn grand la joie!

20. (a) Ki bann benediction ki ou finn gagné parski ou participe a fond dan recolte spirituel? (b) Ki ou bien decidé pou faire?

²⁰ Oui, kan nou manifesté l’humilité, kan nou zelé, ek kan nou soutenir bann principe elevé ki trouve dan Parole Bondié, nou pou ena enn grand satisfaction pou contigne participe a fond dan grand recolte spirituel ki pé deroulé zordi. Dan nou lepok, beaucoup dimoune pé souffert ek zot pa satisfait avek la vie materialiste ek tendance pou rod plaisir, ki le monde encouragé. Mais nou, nou konn vrai la joie ek satisfaction. (Ps. 126:6) Seki pli important, nou “la peine pa dan vide devant nou Seigneur.” (1 Cor. 15:58) Maitre recolte, Jéhovah, pou recompense nou pou touletan pou ‘nou travail ek l’amour ki nou montré pou so nom.’—Héb. 6:10-12.

[Note]

Eski ou rappel?

A mesure ki ou faire zeffort pou participe a fond dan recolte . . .

• kifer li important ki ou manifesté l’humilité?

• couma ou kapav developpe ek garde ou zele?

• kifer li important ki ou reste pur lor plan moral ek spirituel?

[Zimage page 25]

Humilité kapav aide nou pou amenn enn la vie simple ki permette nou pou donne priorité bann l’interet Royaume Bondié