Bann karo zot blanc, paré pou recolte
1. Ki travail important pé deroulé?
1 Apré ki li ti rann temoignage ar enn madame samaritain, Jésus ti dire so bann disciple: “Leve zot lizié ek guette bann karo; zot blanc, zot inn paré pou recolte.” (Jean 4:35, 36) Enn recolte spirituel ti pé deroulé, ek Jésus ti kapav trouve a l’avance couma sa travail-la ti pou faire dan le monde entier. Mem kot li été dan le ciel, Jésus reste bien occupé dan travail recolte. (Mat. 28:19, 20) Ki kitsoz montré ki sa travail-la pé contigne augmenté a mesure ki li pé arrive lor so point ki pli important?
2. Ki bann kitsoz ki montré ki travail recolte ki pé faire dan le monde pé augmenté?
2 Enn recolte mondial: Pendant l’année service 2009, quantité proclamateur ki ti ena dan le monde entier finn augmenté par 3.2 pour cent. Dan bann territoire kot ena restriction lor nou predication, finn gagne 14 pour cent progré. Quantité l’etude la Bible ki faire chaque mois finn depasse 7,619,000. Sa chiffre-la, li plus ki maximum proclamateur ki finn enregistré ek ena preské cinq cent mille plus ki bann l’etude la Bible ki finn enregistré l’année avant. A mesure ki predication pé augmenté dan beaucoup region, l’organisation pé gagne plus demande pou bann missionnaire ki’nn gagne formation lekol Guiléad. Dan beaucoup pays, bann territoire kot ena bann etranger pé vinn couma enn karo ki pé produire bien. Li clair ki Jéhovah pé accelere travail predication pendant ki recolte pé al fini. (Is. 60:22) Eski ou ena enn bon l’attitude en rapport avek ou “bann karo”?
3. Ki certain kapav pensé concernant recolte ki ena dan zot territoire?
3 Recolte dan ou territoire: Ena kapav dire ki “zot territoire pa sa quantité productif-la.” Li vrai ki ena certain territoire ki pa parette sa quantité productif-la comparé ar lezot, ou-soit zot pa produire autant ki avant. Alors, certain Témoins kapav pensé ki, dan sa bann territoire-la, la plupart bann dimoune ki ti bizin interessé ar la verité inn fini faire li ek ki tou seki resté pou faire, c’est pou glane encore enn tigit parmi sa bann dimoune-la dan territoire. Eski li vrai sa?
4. Ki bon l’attitude nou bizin developpé lor nou ministere, ek kifer?
4 Depuis so commencement ziska so la fin, recolte li enn moment kot ena enn grand l’activité. Remarké couma sa bann parole ki Jésus ti dire-la montré ki sa travail-la li urgent: “Recolte-la grand, mais bann travailleur tigit. Alors, suppliyé Maitre recolte pou Li envoye bann travailleur dan so recolte.” (Mat. 9:37, 38) Jéhovah, Maitre recolte, ena controle lor kan ek kot-sa ena pou faire recolte. (Jean 6:44; 1 Cor. 3:6-8) Ki nou responsabilité? La Bible reponn: “Dan gramatin, seme to bann la grain ek ziska a soir pa laisse to la main reposé.” (Eccl. 11:4-6) Oui, c’est pa ler pou laisse nou la main reposé kan recolte pé arrive so point pli important!
5. Kifer nou bizin contigne preche avek zele dan bann territoire ki parette pa productif?
5 Contigne recolté: Mem si finn travail nou territoire souvent ek ki li parette ki bann dimoune pa interessé, ena enn bon raison pou ki nou travail avek zele ek faire li avek sentiment ki pa reste beaucoup le temps. (2 Tim. 4:2) Bann bouleversement ki arrivé dan le monde kapav faire bann dimoune change zot l’attitude ek faire zot reflechi pli bien lor l’avenir. A mesure ki bann jeune grandi, zot kapav ressenti ki zot bizin rod securité ek la paix l’esprit. Nou perseverance kapav touche lezot. Oui, bann dimoune ki pa’nn ecouté dan le passé kapav bien reagir asterla. Nou bizin mem averti bann dimoune ki rejette nou message volontairement.—Ézék. 2:4, 5; 3:19.
6. Ki pou aide nou preche avek zele si nou territoire difficile?
6 Si nou territoire difficile, ki kapav aide nou garde nou zele? En plus ki nou preché porte en porte, kitfois nou kapav essaye lezot methode predication, pareil couma preche dan bann quartier commercial ou-soit donne temoignage par telephone. Ou-soit nou kapav change nou bann presentation pou ki nou aborde bann dimoune dan enn nouveau fason. Nou kapav change nou programme ek preche dan la soirée ou-soit dan bann lezot moment kot nou pli sur bann dimoune pou kot zot. Kitfois nou kapav essaye aprann enn nouveau langue pou ki nou kapav rann temoignage ar pli beaucoup dimoune. Nou kapav faire plus dan nou ministere kan nou faire pionnier permanent. Ou-soit nou kapav al dan enn l’endroit kot ena pli tigit dimoune ki faire recolte. Si nou ena enn bon l’attitude lor recolte, nou pou envie faire tou zeffort possible pou participe a fond dan sa travail important-la.
7. Ziska kan nou bizin contigne sa travail pou rassemblé dimoune-la?
7 Bann planteur pena beaucoup le temps pou ramasse bann recolte, tant ki travail-la pa’nn fini, zot pa relax ou-soit ralenti. Recolte spirituel demann mem sentiment lor l’importance sa travail-la. Ziska kan nou bizin contigne sa travail pou rassemblé bann dimoune-la? Pendant “la fin sa systeme-la” ek ziska “la fin.” (Mat. 24:14; 28:20) Pareil couma Ministre principal Jéhovah, nou envie fini travail ki’nn donne nou pou faire. (Jean 4:34; 17:4) Alors, anou contigné accompli nou ministere avek zele, la joie, ek ena enn l’attitude positif ziska ki la fin vini. (Mat. 24:13) Recolte pankor fini!
[L’encadré page 2]
Depuis so commencement ziska so la fin, recolte li enn moment grand l’activité