Partisip Net dan Rekolt
1 Bann profet Zeova lontan, ek Zezi li mem, ti koz lor enn travay rasanbleman. (Izai 56:8; Ezekyel 34:11; Zan 10:16) Zordi, sa travay la pe fer atraver predikasyon bon nuvel dan lemond antye. (Matye 24:14) Nu pe kapav fer byin diferans ant bann ki servi Bondye ek bann ki pa servi Li. (Malaki 3:18) Ki sa vedir pu nu?
2 Enn Responsabilite Personel: Nu kapav aprann par legzanp Pol, ki ti angaz li net pu pran latet dan minister Kretyin. Li ti konsider predikasyon kuma enn det anver bann dimunn, pu ki tu dimunn kapav gayn lasans pu tann bon nuvel ek sape. Akoz sa, li finn kontiyn travay dan zot faver. (Romin 1: 14-17) Pwiski zordi bann dimunn dan enn sityasyon byin-byin grav, eski u pa panse ki nu ena enn pli gran responsabilite pu pres ar zot dan nu teritwar?—1 Korintyin 9: 16.
3 Ler pu Azir Vit: Nu kapav konpar travay predikasyon ar enn lekip sekur ki pe al sap bann dimunn ki an danze. Bizin rode kot sa bann dimunn la ete ek ed zot avan ki li tro tar. Pa res buku letan. Bann lavi an danze! Pa etonan ki Zezi finn ankuraz so bann disip pu “sipliy Met rekolt pu Li avoy travayer dan so rekolt.”—Matye 9:38.
4 Buku proklamater finn ogmant zot partisipasyon dan sa aktivite ki sap lavi la, parski zot rekonet ki pa res buku letan. Enn adolesan ki apel Hirohisa ti viv zis avek so mama ek kat frer ek ser ki pli zenn ki li. Pu kapav ed so fami lor plan finans li ti bizin lev trwazer dimatin pu al livre lagazet. Malgre sa, Hirohisa ti anvi fer plis dan minister, donk li finn kumans fer pyonye ordiner. Eski ena bann fason kot u’si, u kapav partisip plis dan sa travay ki zame pa pu repete la?
5 “Letan ki reste byin kurt.” (1 Korintyin 7: 29) Donk, anu fer tu nu posib dan travay pli inportan ki pe fer zordi lor later—predikasyon bon nuvel Rwayom ek fer bann disip. Zezi finn konpar sa minister la ar enn rekolt. (Mat. 9: 35-38) Ed enn kikenn pu fer parti dan gran laful bann adorater ki mansyone dan Revelasyon 7: 9, 10, sa li enn parmi bann frwi ki nu pu rekolte si nu partisip net dan sa rekolt la.