“L’esprit examine . . . bann kitsoz profond ki concerne Bondié”
“L’esprit examine tou kitsoz en detail, mem bann kitsoz profond ki concerne Bondié.”—1 COR. 2:10.
1. Lor ki role ki l’esprit saint joué, Paul ti mette l’accent dan 1 Corinthiens 2:10, ek ki bann question nou kapav posé?
NOU kapav vrai-mem bien reconnaissant ki l’esprit saint Jéhovah agir dan nou faveur! La Bible koz lor l’esprit couma enn assistant, enn don, enn kikenn ki rann temoignage, ek enn kikenn ki plaide pou nou. (Jean 14:16; Actes 2:38; Rom. 8:16, 26, 27) L’apotre Paul ti mette l’accent lor enn lot role important ki l’esprit saint joué: “L’esprit examine tou kitsoz en detail, mem bann kitsoz profond ki concerne Bondié.” (1 Cor. 2:10) Oui, Jéhovah servi so l’esprit saint pou revele bann verité spirituel ki profond. Sans l’aide l’esprit saint, nou pa ti pou’nn comprend nanyin lor bann projet Jéhovah. (Lire 1 Corinthiens 2:9-12.) Selman, ena plusieurs question ki nou kapav posé: couma l’esprit examine “bann kitsoz profond ki concerne Bondié”? Par kisannla Jéhovah ti faire konn sa bann kitsoz-la dan premier siecle nou lepok? Couma ek par kisannla l’esprit examine sa bann kitsoz profond-la dan nou lepok?
2. Dan ki deux fason l’esprit saint ti pou agir?
2 Jésus ti montré ki l’esprit saint ti pou agir dan deux fason. Enn tipé avant so la mort, li ti dire so bann zapotre: “L’assistant, l’esprit saint, ki mo Papa pou envoye lor mo nom, li, li pou enseigne zot tou kitsoz ek li pou faire zot rappel tou bann kitsoz ki mo finn dire zot.” (Jean 14:26) Sa vedir ki l’esprit saint ti pou agir couma enn enseignant ek li pou aide bann chretien pou rappel bann kitsoz ki zot ti’nn aprann. Pareil couma enn enseignant, li ti pou aide bann chretien pou comprend bann kitsoz ki zot pa ti comprend avant. Ek aussi li ti pou aide zot pou rappel ek pou applik couma bizin, seki ti’nn deja explik zot.
Dan premier siecle
3. Ki Jésus ti dire pou montré ki “bann kitsoz profond ki concerne Bondié” ti pou revelé tigit par tigit?
3 Jésus li-mem ti enseigne so bann disciple beaucoup verité ki ti nouveau pou zot. Mais kan-mem zot ti ena encore beaucoup kitsoz pou aprann. Jésus ti dire so bann zapotre: “Mo ena beaucoup kitsoz pou dire zot, mais zot pa kapav supporte sa asterla. Mais, kan li pou vini, l’esprit la verité, li pou guide zot dan la verité.” (Jean 16:12, 13) Alors, Jésus ti montré ki grace a l’esprit saint, tigit par tigit Bondié ti pou revele bann kitsoz spirituel ki profond.
4. Jour la Pentecôte l’an 33 nou lepok, couma l’esprit saint ti agir couma enn enseignant ek ti rappel Pierre seki li ti aprann?
4 Jour la Pentecôte l’an 33 nou lepok, “l’esprit la verité” ti vini, ek apepré 120 disciple ki ti rassemblé ensam dan Jérusalem ti gagne sa l’esprit-la. Ti ena bann preuve ki ti kapav trouvé ek ki ti kapav tendé lor sa l’evenement-la. (Actes 1:4, 5, 15; 2:1-4) Bann disciple ti koz dan plusieurs langue “lor bann kitsoz extraordinaire lor Bondié.” (Actes 2:5-11) Ti’nn arrive ler pou revele enn nouveau kitsoz. Prophete Yoël ti’nn annoncé ki bann serviteur Bondié ti pou gagne l’esprit saint. (Yoël 2:28-32) Bann ki ti pé observe sa l’evenement-la ti temoin realisation sa prophetie-la dan enn fason ki personne parmi zot pa ti attann. L’apotre Pierre ti prend la tête pou explik seki ti pé arrivé. (Lire Actes 2:14-18.) Alors, l’esprit saint ti agir couma enn enseignant kan li ti aide Pierre pou comprend ki, seki ti’nn arrive bann disciple, ti pé realise sa ancien prophetie-la. L’esprit saint ti aussi rappel Pierre seki li ti’nn aprann, parski Pierre pa ti zis cite prophetie Yoël, mais li ti cite aussi deux psaume ki David ti ecrire. (Ps. 16:8-11; 110:1; Actes 2:25-28, 34, 35) Seki tou bann disciple ki ti rassemblé dan Jérusalem ti trouvé ek ti tendé sa jour-la, ti vrai-mem bann kitsoz profond ki concerne Bondié.
5, 6. (a) Apré Pentecôte l’an 33 nou lepok, ki bann question important concernant nouveau l’alliance ti bizin gagne bann reponse? (b) Kisannla ti presente sa bann question-la, ek couma finn prend bann decision?
5 Bann chretien dan premier siecle ti pou bizin gagne plus l’explication lor encore beaucoup kitsoz. Par exemple, ti ena bann question concernant nouveau l’alliance ki ti’nn rente en vigueur jour la Pentecôte. Eski sa nouveau l’alliance-la ti concerne zis bann Juif ek bann ki ti’nn converti dan religion juif ? Eski ti pou accepté bann non-Juif aussi dan sa l’alliance-la ek eski zot ti pou oint par l’esprit saint? (Actes 10:45) Eski bann zom non-Juif ti bizin d’abord faire circoncision ek soumette ar la Loi mosaïk? (Actes 15:1, 5) Sa bann question-la ti bien important. Ti bizin l’esprit Jéhovah pou kapav examine sa bann kitsoz profond-la. Mais par kisannla li ti pou agir?
6 C’est bann frere responsable ki ti presente chaque question ki ti bizin gagne enn reponse ar College central. Pierre, Paul ek Barnabas ti la dan sa reunion ki College central ti faire-la, ek zot ti raconté couma Jéhovah ti tourne so l’attention vers bann non-Juif ki pa ti circonci. (Actes 15:7-12) Apré ki zot ti examine sa fait-la ensam avek seki bann l’Écriture hébraïques ti dire, ek avek l’aide l’esprit saint, College central ti prend enn decision. Apré sa, zot ti ecrire tou bann congregation pou faire konn zot decision.—Lire Actes 15:25-30; 16:4, 5; Éph. 3:5, 6.
7. Par ki moyen ti revele bann verité profond?
7 Beaucoup lezot kitsoz ti vinn pli clair grace a bann lettre inspiré ki Jean, Pierre, Jacques ek Paul ti ecrire. Mais enn certain moment apré ki bann l’Écriture grecques chretienne ti fini completé, bann don pou prophetisé ek pou revele la connaissance par mirak, ti pou arreté. (1 Cor. 13:8) Eski l’esprit saint ti pou contigne agir couma enn enseignant ek ti pou contigne rappel bann chretien seki zot ti’nn aprann? Eski li ti pou contigne aide bann chretien pou examine bann kitsoz profond ki concerne Bondié? Bann prophetie ti montré ki li ti pou contigne faire sa.
Pendant lepok la fin
8, 9. Kisannla ti pou “brillé” avek l’intelligence spirituel pendant lepok la fin?
8 Concernant lepok la fin, enn ange ti annoncé: “Bann ki ena l’intelligence pou brillé pareil couma le ciel ki bien eclairé; ek bann ki amenn enn quantité dimoune vers la justice, couma bann zetoile, pou touletan, oui pou toujours. . . . Ek vrai connaissance pou en abondance.” (Dan. 12:3, 4) Kisannla sa bann ki ti pou gagne l’intelligence ek ki ti pou brillé-la? Jésus ti aide nou pou trouve reponse sa question-la dan so l’exemple lor di-blé ek mauvais l’herbe. Kan li ti koz lor “conclusion enn systeme,” li ti dire: “Dan sa lepok-la, bann juste pou brillé bien fort pareil couma soleil dan royaume zot Papa.” (Mat. 13:39, 43) Dan so l’explication, Jésus ti montré ki ‘sa bann juste-la’ c’est “bann garson royaume,” setadir bann chretien oint.—Mat. 13:38.
9 Eski tou bann chretien oint ti pou “brillé”? Dan enn sens, oui, parski zot tou ti pou participe dan predication, dan l’activité pou faire bann disciple ek ti pou encourage sakenn so camarade dan bann reunion. Coumsa bann chretien oint ti pou donne l’exemple tou bann lezot chretien. (Zek. 8:23) Mais, en plus, Bondié ti pou revele bann kitsoz profond dan lepok la fin. Prophetie ki Daniel ti’nn ecrire, ti “scellé” ziska lepok la fin. (Dan. 12:9) Couma ek par kisannla l’esprit saint ti pou examine sa bann kitsoz profond-la?
10. (a) Par kisannla l’esprit saint revele bann verité profond dan dernier jour? (b) Expliké couma bann verité concernant grand temple spirituel Jéhovah ti vinn clair.
10 Kan arrive ler pou donne enn l’explication pli clair lor enn l’enseignement spirituel, l’esprit saint aide bann representant l’esclave fidele et avisé. L’esprit saint aide sa bann frere responsable ki dan bureau mondial bann Témoins de Jéhovah-la, pou comprend bann verité profond, ki avant zot pa ti comprend. (Mat. 24:45; 1 Cor. 2:13) Tou bann membre College central examine certain l’explication ki kitfois bizin changé. (Actes 15:6) Apré sa, zot prend zot decision ek si necessaire, zot imprime sa bann changement-la pou ki tou lezot kapav profité. (Mat. 10:27) Avek le temps, li possible ki bizin gagne encore plus l’explication lor certain sujet ek sa aussi, zot expliké dan enn fason franc.—Guette l’encadré “Couma l’esprit inn revele signification temple spirituel.”
Gagne bann bienfait ar role ki l’esprit saint joué zordi
11. Couma tou bann chretien zordi gagne bann bienfait ar role ki l’esprit saint joué pou revele bann kitsoz profond ki concerne Bondié?
11 Tou bann chretien fidele gagne bann bienfait ar role ki l’esprit saint joué pou revele bann kitsoz profond ki concerne Bondié. Pareil couma sa ti passé avek bann chretien premier siecle, zordi nou etudié ek plitar nou rappel ek nou mette en pratik bann renseignement ki l’esprit saint aide nou pou comprend. (Luc 12:11, 12) Li pa necessaire ki nou finn faire bann grand-grand classe pou nou kapav comprend bann verité spirituel profond ki l’esclave fidele finn publié. (Actes 4:13) Couma nou kapav ameliore nou capacité pou comprend pli bien bann kitsoz profond ki concerne Bondié? Anou examine deux-trois suggestion.
12. Kan eski nou bizin prié pou gagne l’esprit saint?
12 Prié pou gagne l’esprit saint. Zis avant nou commence etudié bann kitsoz ki basé lor la Bible, nou bizin prié pou gagne l’esprit saint pou guide nou. Nou bizin faire sa, mem si nou tousel ou-soit si le temps ki nou pou passé pou etudié li bien courte. Pena doute ki sa qualité la priere humble-la pou faire nou Papa ki dan le ciel, content. Pareil couma Jésus ti montré, Jéhovah pou donne so l’esprit saint avek generosité kan nou prié Li avek sincerité.—Luc 11:13.
13, 14. Kan nou prepare bann reunion, couma sa aide nou pou comprend bann kitsoz profond ki concerne Bondié?
13 Prepare bann reunion. L’esclave fidele et avisé donne nou “nourriture [spirituel] dan ler ki bizin.” Sa ‘esclave-la’ rempli so responsabilité kan li donne nou bann publication ki basé lor la Bible, kan li organise bann reunion pou etudié sa bann publication-la, ek kan li donne nou aussi enn programme pou koné ki nou pou etudié. Ena bann bon raison pou demann “toute la famille nou bann frere” pou etudié certain sujet. (1 Pierre 2:17; Col. 4:16; Jude 3) Nou montré ki nou coopere avek l’esprit saint kan nou faire tou seki nou kapav pou suive bann instruction ki nou gagné.—Rév. 2:29.
14 Kan nou prepare nou bann reunion, li bon ki nou guette bann verset ki’nn cité ek essaye comprend couma chaque verset applik ar sujet ki nou pé etudié. Si nou prend l’habitude pou faire sa, nou pou comprend la Bible plus en profondeur. (Actes 17:11, 12) Kan nou guette sa bann verset-la dan nou la Bible, sa pou reste gravé dan nou memoire ek l’esprit saint kapav aide nou pou rappel zot plitar. En plus, nou pou rappel lor ki page bann verset-la été kan nou bizin rod zot apré.
15. Kifer nou bizin reste a-jour avek bann publication, ek couma ou kapav faire sa?
15 Reste a-jour. Ena certain publication ki l’esclave fidele et avisé imprimé ki nou pa etudié dan nou bann reunion, mais zot inn prepare sa pou nou profit. L’esclave fidele pense nou, mem kan zot prepare bann periodik ki nou offert dan predication. Nou pé vive dan enn le monde kot tou dimoune bien occupé. Alors, souvent nou bizin attann enn kikenn ou-soit enn kitsoz. Si nou prend avek nou enn publication ki nou pankor lire ou-soit ki nou pa’nn fini lire net, nou kapav profite sa l’occasion-la pou lire enn partie ladan. Certain reste a-jour kan zot ecoute bann enregistrement audio nou bann publication pendant ki zot pé marché ou-soit zot pé voyagé. Finn faire beaucoup recherche avant ecrire sa bann publication-la, mais en mem temps finn ecrire zot dan enn fason ki faire plaisir pou lire. Tou sa bann publication-la augmente nou l’intelligence ek nou reconnaissance pou bann kitsoz spirituel.—Hab. 2:2.
16. Ki bann bienfait nou gagné si nou note bann question ki nou pose-nou-mem pendant nou lecture ek nou faire bann recherche lor la?
16 Medité. Kan ou lire la Bible ek bann publication ki basé lor la, prend le temps pou reflechi. A mesure ki ou suive couma enn l’idée inn developpé, kitfois ena bann question ki ou pou pose ou-mem. Ou kapav note bann question-la ek faire bann recherche lor la plitar. C’est souvent kan nou faire bann recherche lor bann kitsoz ki nou envie comprend, ki sa amenn nou pou etudié en profondeur. Bann kitsoz ki nou pou comprend, pou forme partie dan nou tresor personnel kot nou pou kapav al fouillé plitar kan nou pou bizin.—Mat. 13:52.
17. Ki ou faire dan ou l’etude familial ou-soit personnel?
17 Reserve enn le temps pou nou l’etude familial. College central finn encourage nou tou pou reserve enn soirée ou-soit enn lot moment chaque semaine pou nou l’etude personnel ou-soit familial. Bann changement ki finn ena en rapport avek nou bann reunion donne nou l’occasion pou applik sa conseil-la. Ki kitsoz ou etudié pendant ou l’etude familial? Certain lire la Bible, faire bann recherche lor bann verset ki zot pa trop comprend ek ecrire bann ti note dan zot la Bible. Beaucoup famille prend le temps pou guetté couma seki zot pé etudié applik ar zot famille. Certain chef famille choisir pou etudié bann sujet ki zot pensé zot famille bizin, ou-soit ki koz lor bann sujet ou-soit bann question ki zot famille inn demandé pou etudié. A mesure ki le temps passé, surement ou pou pense bann lezot kitsoz ki ou kapav etudié.a
18. Kifer fodé pa nou hesité pou etudié bann verité profond lor Parole Bondié?
18 Jésus ti dire ki l’esprit saint ti pou agir couma enn assistant. Alors, fodé pa ki nou hesité pou etudié bann verité profond ki ena dan Parole Bondié. Sa bann verité-la forme partie dan “connaissance Bondié” ki ena beaucoup valeur, ek nou encouragé pou examine zot. (Lire Proverbes 2:1-5.) Zot revele beaucoup lor “bann kitsoz ki Bondié inn preparé pou bann ki content Li.” A mesure ki nou faire zeffort pou aprann plus lor Parole Jéhovah, l’esprit saint pou aide nou, parski “l’esprit examine tou kitsoz en detail, mem bann kitsoz profond ki concerne Bondié.”—1 Cor. 2:9, 10.
[Note]
a Guette aussi Ministère du Royaume octobre 2008, page 8.
Couma ou pou reponn?
• Cite deux fason couma l’esprit saint aide nou pou examine bann “kitsoz profond ki concerne Bondié.”
• Par kisannla l’esprit saint ti revele bann kitsoz profond dan premier siecle?
• Dan nou lepok, couma l’esprit saint agir pou donne nou plus l’explication lor bann kitsoz spirituel?
• Ki ou kapav faire pou gagne bann bienfait ar role ki l’esprit saint joué?
[L’encadré page 30]
Couma l’esprit inn revele signification temple spirituel
Parmi bann “kitsoz profond ki concerne Bondié” ki ti revelé dan premier siecle, ti ena tabernacle ek plitar bann temple ki ti represente enn kitsoz beaucoup pli grand. L’apotre Paul ti appel sa: “Vrai la tente ki Jéhovah finn dressé, pa bann zom.” (Héb. 8:2) Sa ti enn grand temple spirituel, enn disposition pou approche Bondié ki ti vinn possible grace a sacrifice Jésus Christ ek so service en tant ki nou Grand Pretre.
Sa “vrai la tente[-la]” ti commence existé en l’an 29 nou lepok kan Jésus ti prend bapteme ek kan Jéhovah ti accepté li couma sa kikenn ki ti pou vinn enn sacrifice parfait. (Héb. 10:5-10) Apré so la mort ek so resurrection, Jésus ti rente dan le Très-Saint sa temple spirituel-la ek li ti presente valeur so sacrifice “devant Bondié en personne.”—Héb. 9:11, 12, 24.
Dan enn lot livre, l’apotre Paul ti compare bann chretien oint ar enn construction ki pé “grandi pou vinn enn temple ki saint pou Jéhovah.” (Éph. 2:20-22) Eski sa temple-la ti pou ena mem signification ar “vrai la tente” ki plitar Paul ti mentionné dan livre Hébreux? Pendant plusieurs dizaine l’année, bann serviteur Jéhovah ti croire sa. Li ti parette ki ti pé prepare bann chretien oint lor la terre pou zot vinn “bann roche” dan temple Jéhovah dan le ciel.—1 Pierre 2:5.
Selman, vers l’année 1971, bann membre responsable parmi l’esclave fidele ti commence comprend ki temple ki Paul mentionné dan Éphésiens pa ti kapav grand temple spirituel Jéhovah. Si sa “vrai la tente[-la]” ti bann chretien oint ki ti’nn ressuscité, alors li ti pou commence existé apré ki zot resurrection ti’nn commencé pendant “presence nou Seigneur.” (1 Thess. 4:15-17) Mais kan Paul ti koz lor tabernacle, li ti ecrire: “Sa la tente-la li enn l’exemple pou le temps fixé ki la, asterla.”—Héb. 9:9.
Kan nou compare sa bann verset-la ek lezot verset, li clair ki pena construction enn temple spirituel asterla. Nou comprend aussi ki bann chretien oint zot pa “bann roche” ki pé preparé lor la terre pou forme partie dan sa temple spirituel-la. Au contraire, bann chretien oint zot pé servi dan la cour ek dan le Saint sa temple spirituel-la kot toulé-jour zot pé offert Bondié “enn sacrifice louange.”—Héb. 13:15.
[Zimage page 31]
Couma nou kapav ameliore nou l’intelligence lor “bann kitsoz profond ki concerne Bondié”?