Kan nou rod faveur Bondié, nou gagne la vie eternel

“Toi, to pou beni enn dimoune juste, o Jéhovah! Pareil couma avek enn grand bouclier, to pou entoure zot avek faveur.”—PS. 5:12.

1, 2. Ki Éliya ti demann sa veuve ki ti reste Tsarphath-la, ek ki l’assurance li ti donne li?

SA MADAME-LA ek so garson ti faim ek prophete Bondié aussi ti faim. Alors ki sa veuve ki ti reste dan la ville Tsarphath-la ti pé al allume difé pou cuit enn kitsoz pou mangé, prophete Éliya ti demann li inpé de l’eau ek enn boute di-pain. Sa madame-la ti disposé pou donne li kitsoz pou boire, mais tou seki li ti ena pou mangé ti “enn poignée la farine dan enn grand pot ek enn tigit de l’huile dan enn ti pot.” Li ti ena sentiment ki li pa ti ena assez mangé pou partage avek sa prophete-la, ek c’est seki li ti dire li.—1 Rois 17:8-12.

² Éliya ti insisté: “Avek seki ena la, prepare enn ti gateau rond pou moi avant, ek to bizin amenn sa pou moi; apré sa, to kapav prepare enn kitsoz pou toi ek pou to garson. Parski ala seki Jéhovah, Bondié Israël inn dire: ‘La farine dan sa grand pot-la pa pou fini, ek de l’huile dan sa ti pot-la pa pou diminué.’ ”—1 Rois 17:13, 14.

3. Ki decision important nou bizin prend?

³ Sa veuve-la ti bizin prend enn decision bien pli important ki zis decidé si li ti pou partage sa tigit mangé ki li ti ena-la. Eski li ti pou ena confiance ki Jéhovah ti pou sauve li ek so garson, ou-soit eski li ti pou laisse seki li bizin lor plan materiel passe avant l’importance pou gagne faveur ek l’amitié Bondié? Zordi, nou aussi nou ena enn decision coumsa pou prend. Eski nou pou montré ki pou nou, gagne faveur Jéhovah pli important ki rod nou securité materiel? Nou ena bann bon raison pou ena confiance en Bondié ek pou servi Li. Ek ena bann kitsoz ki nou bizin faire pou rod ek pou gagne so faveur.

‘To digne pou gagne l’adoration’

4. Kifer Jéhovah merite nou l’adoration?

⁴ Jéhovah ena droit pou attann ki bann dimoune servi Li dan enn fason ki Li accepté. Enn groupe so bann serviteur dan le ciel ti confirme sa, kan zot tou ensam zot ti dire: “To digne, Jéhovah, oui nou Bondié, pou gagne la gloire, l’honneur ek pouvoir, parski to finn crée tou kitsoz, ek a cause to volonté zot existé ek zot finn crée.” (Rév. 4:11) Parski Jéhovah finn crée tou kitsoz, Li merite nou l’adoration.

5. Kifer l’amour Bondié bizin pousse-nou pou servi Li?

⁵ Enn lot raison ki nou ena pou servi Jéhovah c’est a cause so grand l’amour ki Li ena pou nou; personne pa content nou plus ki Jéhovah. La Bible dire: “Bondié ti commence crée zom dan so ressemblance, dan ressemblance Bondié Li ti crée zom; Li ti crée zot male ek femelle.” (Gen. 1:27) Bann dimoune ena liberté pou choisir ek zot ena capacité pou reflechi. Zot ena aussi privilege ek responsabilité pou decidé si zot pou servi Bondié ou-soit non. Kan Jéhovah inn donne nou la vie, Li’nn vinn Papa l’humanité. (Luc 3:38) Pareil couma tou bon Papa, Li faire tou pou donne seki so bann garson ek so bann tifi bizin pou zot kapav profite la vie. “Li faire so soleil levé” ek “Li faire la pluie tombé,” pou ki la Terre produire mangé en abondance pou nou, dan enn joli l’environnement.—Mat. 5:45.

6, 7. (a) Ki di-tort Adam finn faire tou so bann descendant? (b) Ki bienfait bann ki rod faveur Bondié pou gagné grace a sacrifice Christ?

⁶ Jéhovah finn aussi sauve nou ar bann consequence terrible ki nou gagné a cause peché. Kan Adam ti faire peché, li ti vinn couma enn zougader ki’nn kokin so famille ek ki’nn gaspille sa dan joué. Kan li ti rebellé kont Jéhovah, Adam ti kokin l’avenir so bann zenfant—zot bonheur eternel. A cause so l’egoïsme, bann dimoune inn vinn esclave l’imperfection. Alors, tou dimoune inn condamné pou malade, pou konn tristesse ek finalement pou mort. Pou libere enn esclave, bizin paye enn prix, ek Jéhovah finn paye enn prix ki kapav sauve nou ar sa bann consequence terrible-la. (Lire Romains 5:21.) Jésus Christ ti agir en accord avek volonté so Papa: li ti donne “so nâme couma enn ranson en echange pou beaucoup.” (Mat. 20:28) Bientot, bann ki ena faveur Bondié pou gagne tou bann bienfait grace a sa ranson ki Bondié inn payé-la.

⁷ Jéhovah, nou Createur, finn faire plus ki n’importe kisannla pou ki nou kapav ena enn la vie heureux ek ki ena enn sens. Parski nou ena so faveur, nou pou kapav trouvé couma Li faire pou tire tou bann malheur ki bann dimoune inn bizin supporté. Jéhovah pou contigne montré sakenn parmi nou couma Li pou vinn “sa kikenn ki recompense bann ki faire grand zeffort pou rod Li.”—Héb. 11:6.

“To peuple pou porte-li volontaire”

8. Ki nou aprann lor nou service pou Bondié kan nou guette seki’nn arrive Isaïe?

⁸ Pou nou gagne faveur Bondié, nou bizin servi bien liberté ki nou ena pou choisir. Kifer? Parski Jéhovah pa force personne pou servi Li. Dan lepok Isaïe, Bondié ti demandé: “Kisannla ki mo pou envoyé, ek kisannla ki pou al pou nou?” Jéhovah ti montré ki Li ti respecté so prophete kan Li ti reconette ki li ti ena droit pou decidé. Mazinn la joie ki Isaïe ti ena kan li ti reponn: “Ala mo la. Envoye moi.”—Is. 6:8.

9, 10. (a) Avek ki l’attitude nou bizin servi Bondié? (b) Kifer li bon ki nou servi Jéhovah avek tou nou nâme?

⁹ Bann dimoune libre pou servi ou-soit pou pa servi Bondié. Jéhovah envie ki nou servi Li volontairement. (Lire Josué 24:15.) Si enn dimoune adore Bondié a cause ki a faire alors ki li pa envie, li pa pou faire Bondié plaisir; Bondié pa accepté aussi l’adoration bann dimoune ki en realité, envie zis faire plaisir lezot dimoune. (Col. 3:22) Si nou “hesité” pou donne Bondié enn service sacré parski nou pé laisse bann kitsoz ki ena dan sa le monde-la prend place nou l’adoration, nou pa pou gagne so faveur. (Ex. 22:29) Jéhovah koné ki si nou servi Li avek tou nou nâme, nou pou gagne bann bienfait. Moïse ti encourage bann Israélite pou choisir la vie ‘kan zot content Jéhovah zot Bondié, kan zot ecoute so la voix ek kan zot reste attaché ar Li.’—Deut. 30:19, 20.

¹⁰ Le roi David ki ti vive en Israël dan le passé, ti chante sa cantik-la pou Jéhovah: “To peuple pou porte-li volontaire, jour ki to rassemblé to l’armée. To ena to groupe jeune gens ki joli ek saint, zot couma bann goutte la rosée ki sorti kot soleil levé.” (Ps. 110:3) Zordi, beaucoup dimoune mette zot securité financier ek bann plaisir en premier dan zot la vie. Mais, pou bann ki content Jéhovah, zot service sacré passe avant tou. Zot zele dan predication la bonne nouvelle montré ki kitsoz ki pli important pou zot. Zot ena full confiance ki Jéhovah ena capacité pou donne zot seki zot bizin toulé-jour.—Mat. 6:33, 34.

Bann sacrifice ki faire nou gagne faveur Bondié

11. Ki bienfait bann Israélite ti esperé pou gagné kan zot ti offert Jéhovah bann sacrifice?

¹¹ Enba la Loi mosaïk, peuple Bondié ti offert Li bann sacrifice ki acceptable, pou gagne So faveur. Lévitique 19:5 dire: “Si zot faire enn sacrifice communion pou Jéhovah, zot bizin faire sa sacrifice-la pou gagne faveur pou zot-mem.” Dan mem livre la Bible, nou lire: “Si zot faire enn sacrifice pou remercié Jéhovah, zot bizin faire sa sacrifice-la pou zot gagne so faveur.” (Lév. 22:29) Kan bann Israélite ti offert bann sacrifice zanimo ki ti acceptable lor l’autel Jéhovah, sa la fumée ki ti monté-la ti couma ‘enn l’odeur ki ti faire plaisir’ vrai Bondié. (Lév. 1:9, 13) Sa ti faire Jéhovah plaisir ki so peuple ti montré sa qualité l’amour-la pou Li, ek Li ti accepté sa. (Gen. 8:21) Dan sa bann disposition ki ti ena enba la Loi-la, nou trouve enn principe ki appliké dan nou lepok. Bann ki offert Jéhovah bann sacrifice acceptable, gagne so faveur. Ki bann sacrifice Jéhovah accepté? Anou examine deux domaine dan nou la vie: nou conduite ek nou parole.

12. Ki bann pratik ki kapav faire ‘sacrifice nou lekor pou Bondié’ vinn enn kitsoz ki offense Li?

¹² Dan lettre ki l’apotre Paul ti ecrire bann chretien dan Rome, li ti dire: “Presente zot lekor couma enn sacrifice ki vivant, saint, ki Bondié pou kapav accepté, enn service sacré avek zot capacité pou raisonné.” (Rom. 12:1) Pou enn dimoune gagne faveur Bondié li bizin garde so lekor pur devant Bondié. Si li faire li-mem vinn impur avek cigarette, feuille betel, la drogue, ou-soit li boire trop beaucoup lalkol, sa sacrifice ki li offert-la pa pou ena okenn valeur. (2 Cor. 7:1) En plus, enn kikenn ki “pratik fornication pé faire peché kont so prop lekor,” alors n’importe ki conduite immoral ki li ena, faire so sacrifice vinn enn kitsoz ki offense Jéhovah. (1 Cor. 6:18) Pou faire Bondié plaisir, enn dimoune bizin ‘vinn saint dan tou so conduite.’—1 Pierre 1:14-16.

13. Kifer li bon ki nou loué Jéhovah?

¹³ Enn lot sacrifice ki faire Jéhovah plaisir concerne nou parole. Bann ki content Jéhovah koz touletan en bien lor Li en publik ek kan zot dan zot lakaz. (Lire Psaume 34:1-3.) Lire Psaumes 148-150 ek guetté ki quantité fois sa trois psaume-la encourage nou pou loué Jéhovah. Oui, “louange bann dimoune droite, li acceptable.” (Ps. 33:1) Jésus Christ, nou l’Exemple, ti montré l’importance pou loué Bondié kan li ti preche la bonne nouvelle.—Luc 4:18, 43, 44.

14, 15. Ki qualité sacrifice Hoshéa ti encourage bann Israélite pou offert, ek couma Jéhovah ti reagir?

¹⁴ Kan nou preche avek zele sa montré nou l’amour pou Jéhovah ek nou desir pou gagne so faveur. Par exemple, anou guetté couma prophete Hoshéa ti encourage bann Israélite ki ti tombe dan fausse l’adoration ek ti perdi faveur Bondié. (Hosh. 13:1-3) Hoshéa ti dire zot faire sa supplication-la: “[Jéhovah] pardonne nou peché; ek accepté seki bon, ek en retour nou pou offert bann jeune taureau nou la levre.”—Hosh. 14:1, 2.

¹⁵ Enn taureau ti zanimo pli cher ki enn Israélite ti kapav offert Jéhovah. Alors, “bann jeune taureau nou la levre” represente bann parole sincere ek bien reflechi, ki nou servi pou loué vrai Bondié. Couma Jéhovah ti reagir kan bann dimoune ti offert Li sa qualité sacrifice-la? Li ti dire: “Mo pou content zot, pa par obligation, mais parski mo envie.” (Hosh. 14:4) Jéhovah ti donne so faveur, so l’amitié ek so pardon bann ki ti offert Li sa qualité sacrifice-la pou loué Li.

16, 17. Kan la foi pousse enn dimoune pou preche la bonne nouvelle, couma Jéhovah considere sa louange-la?

¹⁶ Loué Jéhovah en publik inn touletan enn kitsoz bien important dan vrai l’adoration. Donne vrai Bondié la gloire ti tellement important pou sa psalmiste-la, ki li ti suppliye Bondié: “S’il te plait, prend plaisir ar bann offrande volontaire ki mo la bouche faire, o Jéhovah.” (Ps. 119:108) Ki nou kapav dire pou nou lepok? Concernant enn grand la foule dimoune ki ti pou vive dan nou lepok, Isaïe ti annoncé: “Zot pou annonce bann louange Jéhovah. . . . Avek faveur, [zot don] pou monte lor [so] l’autel.” (Is. 60:6, 7) En accord avek realisation sa prophetie-la, plusieurs million dimoune pé offert Bondié “enn sacrifice louange, setadir fruit [zot] la levre ki faire declaration publik pou so nom.”—Héb. 13:15.

¹⁷ Ki kapav dire lor ou? Eski ou pé offert Bondié bann sacrifice acceptable? Si ou pa pé faire sa, eski ou pou faire bann changement ki bizin ek eski ou pou commence loué Jéhovah en publik? Kan la foi pou pousse-ou pou preche la bonne nouvelle, ou bann offrande pou “faire Jéhovah plaisir plus ki si [ou] offert Li enn taureau.” (Lire Psaume 69:30, 31.) Ou kapav sur ki Jéhovah pou accepté ou bann sacrifice louange ki couma enn “bon l’odeur ki faire [Li] plaisir,” ek Li pou donne ou so faveur. (Ézék. 20:41) Pa pou ena enn lot la joie pareil couma sa la joie ki ou pou ressenti-la.

‘Jéhovah pou beni enn dimoune juste’

18, 19. (a) Couma bann dimoune considere l’idée pou servi Bondié zordi? (b) Kan nou perdi faveur Bondié, ki consequence nou gagné?

¹⁸ Zordi, beaucoup dimoune tire mem conclusion ki bann dimoune dan lepok Malaki: “Sa pa vaut la peine servi Bondié, ek ki nou finn gagné kan nou finn obeir Li?” (Mal. 3:14, Bible du Semeur) Parski sa bann dimoune-la laisse-zot influencé par bann desir materiel, zot pa sur ki Jéhovah pou kapav realise so projet ek zot pensé ki li pa possible pou mette en pratik so bann la loi dan nou lepok. Pou sa bann dimoune-la, nou pé perdi nou le temps kan nou preche la bonne nouvelle ek nou pé agace zot.

¹⁹ Sa qualité l’attitude-la ti commencé dan jardin Éden. C’est Satan ki ti convaink Ève pou pa prend compte vrai valeur sa la vie extraordinaire ki Jéhovah ti donne li-la ek pou meprise So faveur. Zordi, Satan contigne convaink bann dimoune pou croire ki zot pa pou gagne nanyin kan zot faire volonté Bondié. Selman, Ève ek so mari ti rann-zot compte ki perdi faveur Bondié sa ti vedir perdi zot la vie. Zordi, bann ki suive zot mauvais l’exemple pa pou tardé pou rann-zot compte zot aussi, ki perdi faveur Bondié pou faire zot perdi la vie.—Gen. 3:1-7, 17-19.

20, 21. (a) Ki veuve la ville Tsarphath ti faire, ek ki’nn arrivé apré? (b) Couma ek kifer nou bizin imite veuve la ville Tsarphath?

²⁰ Anou faire difference entre consequence bien triste ki Adam ek Ève ti gagné ek seki finalement ti arrive Éliya ek sa veuve ki ti reste Tsarphath-la. Apré ki li ti tann bann parole encourageant Éliya, sa madame-la ti commence prepare mangé pou prophete Bondié ek ti servi li en premier, mem si li ti ena enn tigit mangé. Apré sa Jéhovah ti realise promesse ki Li ti faire par Éliya. La Bible dire: “Pendant plusieurs jour, li ti mangé, li, Éliya, ek seki ti reste kot li. La farine dan sa grand pot-la pa ti fini, ek de l’huile dan sa ti pot-la pa ti diminué, pareil couma Jéhovah ti dire a travers Éliya.”—1 Rois 17:15, 16.

²¹ Zordi, parmi plusieurs million dimoune ki vive lor la terre, pa beaucoup ki disposé pou faire seki sa veuve dan Tsarphath-la ti faire. Sa veuve-la ti mette tou so confiance dan sa Bondié ki sauve so bann serviteur-la. Ek Jéhovah pa ti abandonne li. Sa recit-la ek lezot recit ki ena dan la Bible montré nou ki Jéhovah merite nou confiance. (Lire Josué 21:43-45; 23:14.) La vie bann Témoins de Jéhovah dan lepok moderne donne encore lezot preuve ki Jéhovah jamais pa pou abandonne bann ki ena so faveur.—Ps. 34:6, 7, 17-19.a

22. Kifer nou bizin rod faveur Bondié sans tardé?

²² Jour jugement Bondié pré pou vinn “lor tou bann habitant partout lor la terre.” (Luc 21:34, 35) Nou tou concerné par sa jour-la. Okenn richesse ni okenn confort materiel jamais pou ena mem valeur ki bann parole ki nou pou tann Juge ki Jéhovah inn etabli, dire: “Vini, zot ki finn beni par mo Papa, herite royaume ki finn preparé pou zot.” (Mat. 25:34) Oui, ‘Jéhovah Li-mem pou beni enn dimoune juste; pareil couma avek enn grand bouclier, Li pou entoure zot avek faveur.’ (Ps. 5:12) Eski sa pa bizin faire nou rod faveur Bondié?

[Note]

Eski ou rappel?

• Kifer Jéhovah merité ki nou adore Li avek tou nou nâme?

• Ki bann sacrifice ki Jéhovah accepté zordi?

• Ki l’expression “bann jeune taureau nou la levre” representé, ek kifer nou bizin offert zot Jéhovah?

• Kifer nou bizin rod faveur Bondié?

[Zimage page 19]

Ki decision prophete Bondié ti demann enn mama ki ti misere ek ki ti faim, pou prend?

[Zimage page 21]

Ki bienfait nou gagné kan nou offert Jéhovah enn sacrifice louange?

[Zimage page 23]

Jamais ou pa pou regretté ki ou finn mette tou ou confiance en Jéhovah