Zeffort pou tire la misere
BANN dimoune riche finn fini faire la misere disparette—pou zot-mem. Mais bann zeffort ki finn faire pou ki la misere disparette pou tou dimoune lor la terre, jamais pa finn reussi. Kifer? Parski en general, bann dimoune riche pa’lé ki personne, ni nanyin empeche zot contigne profite zot richesse ek zot position. Le roi Salomon, ki ti vive en Israël dan le passé, ti ecrire: “Guetté! larme bann dimoune ar ki ti pé faire dominere, mais pa ti ena personne pou console zot; ek dan coté sa bann ki ti pé faire dominere ar zot-la ti ena pouvoir.”—Ecclésiaste 4:1.
Eski bann dimoune ki ena l’influence ek pouvoir kapav change la societé pou faire la misere disparette dan le monde? Salomon ti inspiré pou ecrire: “Guetté, tousala pa servi nanyin ek coumadir pé galope derriere di-vent. Pa kapav dresse seki’nn vinn travers.” (Ecclésiaste 1:14, 15) Nou trouve sa bien kan nou guette bann zeffort ki’nn faire dan nou lepok pou faire la misere disparette.
Bann theorie pou ki tou dimoune prosperé
Dan 19eme siecle, pendant ki enn tigit nation ti pé ramasse enn grand richesse a travers commerce ek l’industrie, certain dimoune ki ti ena enn grand l’influence ti pé reflechi couma pou reglé probleme la misere. Eski kapav partage bann ressource ki ena lor la terre dan enn fason egal?
Certain dimoune ti pensé ki bann socialiste ek bann communiste ti pou kapav produire enn societé mondial kot tou dimoune egal, ek kot ti pou partage bann richesse dan enn fason juste. Bien sur, bann dimoune riche pa ti content sa l’idée-la. Mais ti ena enn slogan: “Pou demann sakenn dapré so possibilité ek pou donne sakenn dapré seki li bizin.” Ek beaucoup dimoune ti d’accord avek sa slogan-la. Beaucoup ti ena l’espoir ki tou pays ti pou adopté sa bann l’idée socialiste-la pou ki le monde vinn enn societé parfait. Deux-trois pays bien riche ti adopté certain l’aspect dan bann l’idée socialiste ek ti etabli bann bon condition dan zot pays, ek zot ti promette pou prend soin tou bann citoyen “depuis zot né ziska zot mort.” Zot pretann ki zot finn reussi faire la misere ki menace la vie bann dimoune, disparette dan zot pays.
Mais bann socialiste jamais pa finn reussi realise l’objectif ki zot ti ena pou crée enn societé ki pa egoïste. L’objectif ki zot ti ena ki bann citoyen ti pou travail pou bien-etre zot communauté au lieu ki pou zot-mem, ti tombe dan de l’eau. Certain pa ti content pou donne bann dimoune misere seki zot ti bizin, zot ti remarké ki tou seki zot ti pé donné, ti faire certain parmi sa bann dimoune misere-la pa interessé pou travail. Seki la Bible dire li vrai: “Pena enn zom ki juste, ki faire touletan seki bien ek pa faire peché. . . . Vrai Bondié finn faire bann dimoune droite, mais zot, zot finn rod beaucoup plan.”—Ecclésiaste 7:20, 29.
Enn lot l’espoir ki bann dimoune ti ena, ti appel “rêve américain”—enn rêve kot tou dimoune ki disposé pou travail dur kapav vinn bien riche. A travers le monde, beaucoup pays ti adopté sa bann l’idée-la—enn systeme democratik ek liberté pou faire business ek commerce—sa ti parette inn faire l’Amérique vinn riche. Mais pa tou nation ki ti kapav applik sa rêve américain-la, parski bann richesse l’Amérique du Nord pa ti depann zis lor so systeme politik. So bann grand richesse naturel ek facilité ki li ti ena pou faire commerce international grace a bann la route commercial, ti bann kitsoz bien important ki ti permette li reussi. En plus, dan le monde, sa competition ki ena dan systeme economik-la pa finn faire zis bann gagnant ki prosperé, mais aussi bann perdant ki souffert. Eski kapav encourage bann nation ki bien riche pou aide bann ki encore misere?
Plan Marshall—Eski sa finn faire la misere disparette?
Apré Deuxieme Guerre mondial, l’Europe ti’nn devasté ek la famine ti menace beaucoup dimoune. Gouvernement américain ti tracassé parski systeme socialiste ti pé vinn bien populaire en Europe. Alors, pendant quatre an, li ti donne bann gros somme l’argent pou retabli l’industrie ek l’agriculture dan bann pays ki ti pou accepté politik américain. Sa programme pou reconstruire l’Europe-la ti appel plan Marshall, ek bann dimoune ti considere sa couma enn plan ki’nn bien reussi. Dan l’Europe de l’Ouest, l’influence Amérique ti pé augmenté, ek li ti rare ki la misere menace la vie enn dimoune. Eski c’est par sa moyen-la ki la misere ti pou disparette?
Plan Marshall ti reussi ek sa ti pousse gouvernement américain pou aide bann pays misere partout dan le monde. Li ti aide zot pou developpe zot l’agriculture, zot systeme la santé, l’education ek transport. L’Amérique ti reconette sans hesité ki, raison ki ti pousse-li pou aide bann lezot pays, c’est parski sa ti dan so l’avantage. Lezot pays aussi ti essaye ena plus l’influence kan zot ti offert pou aide bann pays etranger. Soixante an plitar, apré ki zot ti depense plusieurs fois sa somme l’argent ki zot ti depensé pou plan Marshall-la, zot pa ti gagne bann bon resultat. Li vrai ki certain pays ki ti bien misere ti reussi gagne enn grand richesse, surtout dan l’Est l’Asie. Selman, mem si grace a l’aide ki beaucoup pays ti gagné moins zenfant ti mort ek pli beaucoup zenfant ti gagne l’education, sa bann pays-la ti encore toujours bien misere.
Kifer l’aide bann pays etranger pa finn donne bann bon resultat?
Li ti pli difficile pou aide bann pays misere pou sorti dan la misere, ki aide bann pays riche pou retabli apré la guerre. L’Europe ti deja ena l’industrie, commerce ek transport. Ti bizin zis repare so l’economie. Dan bann pays misere, mem si l’aide bann pays etranger ti permette zot pou faire bann la route, bann lekol, ek bann dispensaire, bann dimoune ti encore bien misere parski sa bann pays-la pa ti kapav faire business, pa ti ena ressource naturel, ek pa ti ena bann la route commercial.
Bann probleme ki responsable la misere ek bann probleme ki la misere faire dimoune gagné, zot bien compliké ek pa facile pou tiré. Par exemple, maladie faire bann dimoune vinn misere, ek la misere faire dimoune malade. Bann zenfant ki pena assez mangé, kitfois zot tellement faible lor plan physik ek mental ki kan zot grandi, zot pa kapav prend soin zot prop zenfant. Ek aussi, kan bann pays riche debarrasse zot bann mangé ki zot ena en plus dan bann pays misere, couma enn “l’aide,” bann planteur ek bann commercant dan sa bann pays misere-la, nepli kapav faire business ek sa amenn plus misere. Kan envoye l’argent gouvernement bann pays misere, sa kapav crée enn lot probleme: li facile pou kokin sa l’aide-la, alors kapav ena corruption, ek corruption de lot coté, kapav faire bann dimoune vinn plus misere. Alors, l’aide bann pays riche pa finn donne bann bon resultat parski li pa finn attak raison principal kifer ena la misere.
Kifer ena la misere?
Kan bann pays, bann gouvernement ek bann dimoune agir zis pou favorise ek pou protege zot prop l’interet, lerla ena enn grand la misere. Par exemple, gouvernement bann pays riche pa donne beaucoup priorité pou faire la misere disparette dan le monde. Kifer? Parski dirigeant sa bann pays-la gagne pouvoir grace a bann dimoune ki vote pou zot dan enn fason democratik ek alors, sa bann dirigeant-la bizin faire plaisir sa bann dimoune-la. A cause sa, zot empeche bann planteur dan bann pays misere pou vann zot produit dan bann pays riche, pou ki bann planteur ki dan sa bann pays riche-la pa perdi zot business. Ek aussi, bann dirigeant dan bann pays riche aide beaucoup zot planteur dan domaine finance pou ki zot reussi vann zot produit avant bann planteur dan bann pays misere.
Li clair ki la raison kifer ena la misere—tendance ki bann dimoune ek bann gouvernement ena pou protege zot prop l’interet—c’est a cause bann dimoune-mem. Ecrivain la Bible, le roi Salomon ti dire sa coumsa: “Dimoune finn domine dimoune pou zot prop malheur.”—Ecclésiaste 8:9.
Alors, ki l’espoir ena pou ki enn jour la misere disparette? Eski ena enn gouvernement ki kapav change nature bann dimoune?
[L’encadré page 6]
Enn la loi pou faire face ar la misere
Jéhovah ti donne nation Israël dan le passé bann la loi. Si zot ti obeir sa bann la loi-la, sa ti pou evite zot konn la misere. Dapré la loi, chaque famille, ti gagne enn la terre en heritage, a part bann famille dan tribu Lévi. Sa l’heritage-la ti en securité parski pa ti kapav vann enn la terre pou touletan. Chaque 50 an, ti bizin retourne enn la terre ki’nn vendé ar so premier proprietaire ou-soit ar sa famille pou ki sa la terre-la ti été. (Lévitique 25:10, 23) Si enn dimoune ti bizin vann so la terre, a cause maladie, catastrophe ou-soit parski li paresse, li ti pou bizin ré-gagne so la terre sans ki li payé, dan l’année Jubilé. Okenn famille, ni zot descendance pa ti pou tombe dan la misere.
Jéhovah ti montré so misericorde par enn lot disposition dan la loi. Li ti permette enn dimoune ki ti dan enn situation bien difficile pou vann li-mem couma enn esclave. Li ti pou kapav gagne l’argent en avance pou paye so bann dette. Si apré sept an, li pa ti kapav rembourse so dette pou regagne so liberté, so proprietaire ti pou bizin libere li ek donne li bann la grain ek zanimo pou li kapav recommence planté ek nourri zanimo. En plus, si enn dimoune misere ti bizin prend l’argent preté, la loi ti interdit enn Israélite prete li l’argent avek l’interet. La loi ti dire aussi bann Israélite, ki fodé pa zot recolté bann produit dan bord zot karo ek coumsa bann dimoune misere ti pou kapav ramasse sa bann produit-la. Lerla okenn Israélite pa ti pou bizin demann charité.—Deutéronome 15:1-14; Lévitique 23:22.
Selman, l’Histoire montré ki certain Israélite ti tombe dan la misere. Kifer sa finn arrivé? Parski nation Israël pa ti obeir la Loi Jéhovah. A cause sa, couma dan beaucoup pays, ena dimoune ki’nn vinn bann proprietaire la terre bien riche, ek lezot finn vinn bann dimoune misere ki pena la terre. La misere ti existé parmi bann Israélite parski certain ti pa ti prend compte la Loi Bondié ek ti faire zot l’interet passe avant l’interet lezot.—Matthieu 22:37-40.