Vinn proche ar Bondié

’JÉHOVAH jamais pou kapav content moi.’ C’est seki enn soeur ki finn bien lutté ar enn depression dan so la vie ti dire. Li ti convaink li-mem ki Jéhovah ti bien loin ar li. Eski vrai-mem Jéhovah bien loin ar so bann serviteur ki deprimé? Reponse bien reconfortant pou sa question-la trouve dan bann parole inspiré ki psalmiste David ti ecrire dan Psaume 34:18.

David ti koné ki l’effet enn grand detresse kapav ena lor enn serviteur Jéhovah. Kan David ti jeune, li ti vive couma enn kikenn ki bizin sauvé touletan, parski le roi Saül ki ti jaloux, pa ti arrete poursuive li ek ti bien decidé pou touye li. David ti al cachiette dan enn l’endroit ki li ti pensé pou dernier place kot Saül ti pou rod li. Li ti al cachiette dan la ville Gath, dan Philistie, enn territoire l’ennemi. Mais apré ki bann habitant ti’nn reconette li, David ti bizin faire semblant li fou, pou li reussi sapé. David dire ki c’est grace a Bondié ki li finn reussi delivré ek li finn base-li lor sa l’experience-la pou li ecrire Psaume 34.

Eski David ti pensé ki Bondié loin ar bann ki faire face ar detresse ek ki senti zot rejeté ou-soit pa digne pou gagne l’attention Bondié? David ecrire: “Jéhovah pré ar bann dimoune ki ena enn grand chagrin dan zot leker; ek Li sauve bann ki demoralisé.” (Verset 18) Anou guetté couma sa bann parole-la donne nou reconfort ek l’espoir.

“Jéhovah pré ar bann dimoune.” Enn livre reference dire ki sa phrase-la, c’est “enn expression pou dire ki le Seigneur bien attentionné ek li veille seki pé passé. Li touletan disposé pou aidé ek pou sauve so bann serviteur.” Sa rassure nou pou koné ki Jéhovah veille lor so bann serviteur. Li trouvé par ki difficulté zot pé passé dan sa bann “lepok critik[-la],” ek Li konn zot bann sentiment profond.​—2 Timothée 3:1; Actes 17:27.

“Bann ki ena enn grand chagrin dan zot leker.” Dan certain culture, “enn grand chagrin dan leker,” ou-soit enn leker ki’nn cassé, ena enn rapport avek enn zistoire d’amour entre deux dimoune, ki pa’nn marché. Mais enn specialiste lor la Bible dire ki bann parole sa psalmiste-la applik “en general plus [ar] bann la peine ek bann chagrin.” Oui, parfois mem bann serviteur Bondié ki fidele, kapav passe par bann situation bien dure ki faire zot ena enn grand chagrin dan zot leker.

“Bann ki demoralisé.” Li kapav arrivé ki bann ki decouragé, trop sous-estime zot-mem, lerla sa faire zot perdi tou l’espoir pou inpé le temps. Enn livre pou bann traducteur la Bible dire ki kapav traduire sa l’expression-la par “bann ki pa trouve nanyin de bon dan l’avenir.”

Couma Jéhovah reagir devant bann ki ena “enn grand chagrin dan zot leker” ek “bann ki demoralisé”? Eski Li reste loin ar zot? Eski Li pensé ki zot pa digne pou gagne so l’amour ek so l’attention? Non, au contraire! Pareil couma enn parent ki ena l’amour, attrape la main so zenfant ki pé ploré ek reconforte li, Jéhovah bien pré ar so bann serviteur ki suppliyé Li pou gagne so l’aide. Li ena enn grand desir pou reconforte ek pou soulage bann ki ena enn grand chagrin dan zot leker ek bann ki demoralisé. Li kapav donne zot sagesse ek la force ki zot bizin pou faire face ar n’importe ki difficulté ki zot kapav gagné.​—2 Corinthiens 4:7; Jacques 1:5.

Kifer ou pa aprann couma ou kapav vinn proche ar Jéhovah? Sa Bondié ki ena compassion-la promette: “Mo reste . . . avek sa kikenn ki demoralisé-la ek ki ena l’esprit humble, pou faire revive l’esprit bann ki ena l’humilité, ek pou faire revive leker bann ki dan la peine.”​—Isaïe 57:15.