Eski ou finn rente dan repos Bondié?

“Parole Bondié, li vivant ek li puissant.”​—HÉB. 4:12.

1. (a) Couma nou kapav rente dan repos Bondié zordi? (b) Kifer li kapav difficile pou obeir?

DAN lartik avant nou ti aprann ki nou kapav rente dan repos Bondié kan nou obeir Jéhovah ek kan nou travail ensam avek so l’organisation. Mais li pli facile pou dire ki pou faire. Par exemple, kan nou aprann ki Jéhovah pa d’accord avek enn kitsoz ki nou content faire, kitfois li difficile pou nou obeir desuite. Si sa arrivé, nou bizin aprann pou vinn enn dimoune ki “disposé pou obeir.” (Jacq. 3:17) Dan sa lartik-la nou pou examine certain situation ki donne nou l’occasion pou montré si vrai-mem nou disposé pou obeir touletan.

2, 3. Ki nou bizin contigne faire pou reste bann kitsoz desirable devant Jéhovah?

² Kan ou aprann dan la Bible ki ou bizin faire enn changement dan ou la vie, eski ou disposé pou obeir? La Bible dire ki bann dimoune ki Jéhovah envie amenn dan so l’organisation, zot “bann kitsoz desirable dan tou bann nation.” (Hag. 2:7) Bien sur, la plupart parmi nou, nou pa ti bann kitsoz desirable kan nou ti fek konn la verité. Selman, l’amour pou Bondié ek pou so Garson ti pousse nou pou faire bann grand changement dan nou l’attitude ek nou bann l’habitude pou nou kapav faire Bondié plaisir. Finalement, apré ki nou ti demann Jéhovah so l’aide dan la priere, ek apré beaucoup zeffort pou faire bann changement ki bizin, jour ti arrivé kot nou ti kapav prend bapteme ek gagne faveur Jéhovah.​—Lire Colossiens 1:9, 10.

³ Mais apré nou bapteme, nou encore toujours bizin lutte kont nou l’imperfection. Sa la lutte-la pou contigné tant ki nou imparfait. Mais nou sur ki, si nou contigné lutté, ek nou bien decidé pou vinn bann kitsoz encore pli desirable devant lizié Jéhovah, Li pou beni nou bann zeffort.

Kan nou bizin faire bann changement dan nou la vie

4. Ki trois fason Jéhovah servi pou montré nou ki nou bizin faire bann changement?

⁴ Avant ki nou kapav faire bann changement dan nou la vie, nou bizin koné seki nou bizin changé. En rapport avek sa, Jéhovah aide nou dan different fason. Enn discours dan la Salle du Royaume ki faire nou reflechi ou-soit enn lartik dan enn publication kapav attire nou l’attention lor enn defaut grave. Parfois nou pa trouvé ki nou bizin faire bann changement mem apré ki nou finn tann enn discours ou-soit apré ki nou finn lire enn publication. Alors, Jéhovah kapav servi enn frere ou-soit enn soeur dan congregation pou corrige nou avek bonté.​—Lire Galates 6:1.

5. (a) Cite bann fason couma parfois nou reagir kan enn kikenn corrige nou. (b) Kifer bann ancien bizin contigné faire zeffort pou aide nou?

⁵ Li pa facile pou accepté conseil enn dimoune imparfait, mem si li donne nou sa conseil-la avek tact ek amour. Pourtant, pareil couma Galates 6:1 montré, Jéhovah donne l’ordre bann ki qualifié lor plan spirituel pou “essaye” redresse nou, ek faire sa “avek douceur.” Si nou accepté zot l’aide, nou pou vinn bann dimoune encore pli desirable devant Jéhovah. Li etonnant ki, dan nou la priere, nou reconette sans hesité ki nou imparfait ek ki nou faire bann erreur. Selman, kan enn ancien attire nou l’attention lor enn erreur, nou ena tendance pou trouve bann excuse pou seki nou’nn faire. Nou kapav aussi dire ki seki nou’nn faire pa trop grave, ki sa dimoune ki’nn corrige nou-la pa content nou, ou-soit ki li pa’nn donne nou sa conseil-la dan enn bon fason. (2 Rois 5:11) Ou-soit nou kapav bien en colere si bann ancien dire nou enn kitsoz ki nou pa content pou tendé. Par exemple, zot kapav dire nou ki enn membre nou famille pé faire enn kitsoz ki pa bon ou-soit ki fason nou habillé pa bon. Kitfois zot dire nou ki nou bizin veille pli bien lor nou propté physik ou-soit ki Jéhovah ena la haine pou enn certain divertissement ki nou content. Li possible ki, parski nou en colere, sa faire nou dire bann kitsoz ki pa bizin. Sa kapav faire nou senti-nou triste ek faire sa frere ki pé essaye aide nou-la, triste li aussi. Mais en general, kan nou colere inn calmé, nou accepté ki seki li’nn dire nou, ti pou nou prop di-bien.

6. Couma parole Bondié “kapav decouvert bann pensée ek bann l’intention ki ena dan leker”?

⁶ Verset principal sa lartik-la rappel nou ki parole Bondié “li puissant.” Oui, parole Bondié, la Bible, li ena pouvoir pou change la vie bann dimoune. La Bible ti aide nou pou faire bann changement ki bizin avant nou bapteme. Ek li aide nou pou faire bann changement apré nou bapteme. Dan so lettre ki li’nn ecrire bann Hébreu, Paul ti dire aussi ki parole Bondié “percé ziska li separe nâme ek l’esprit, bann joint ek zot la moelle, ek li kapav decouvert bann pensée ek bann l’intention ki ena dan leker.” (Héb. 4:12) Ici “nâme” vedir seki nou parette en dehors, seki bann dimoune kapav trouvé kan zot guette nou. “L’esprit” ici vedir seki nou été vrai-mem endan, seki bann dimoune pa kapav trouvé kan zot guette nou. Alors, Paul ti pé dire ki, kan nou bien comprend dapré la Bible seki Bondié envie nou faire, fason ki nou reagir ar seki nou’nn aprann pou montré seki nou été endan. Eski parfois ena enn difference entre seki lezot dimoune trouvé ek seki vrai-mem nou été endan? (Lire Matthieu 23:27, 28.) Reflechi couma ou ti pou reagir dan bann situation ki nou pou examiné asterla.

Contigne progressé ensam avek l’organisation Jéhovah

7, 8. (a) Ki ti’nn kapav pousse certain chretien juif pou contigné suive certain partie dan la Loi Moïse? (b) Couma zot bann zeffort ti kont projet Jéhovah?

⁷ Beaucoup parmi nou konn bien seki Proverbes 4:18 dire: “Chemin bann dimoune droite li pareil couma la lumiere ki eclairé ek ki brille pli fort, ziska ki’nn faire grand li-jour.” Sa vedir ki avek le temps nou pou ena enn pli bon conduite ek nou pou comprend pli bien seki Jéhovah demann nou faire.

⁸ Pareil couma nou ti examiné dan lartik avant, apré la mort Jésus, li ti difficile pou beaucoup chretien juif arrete suive la Loi Moïse. (Actes 21:20) Mem si Paul ti expliké dan enn fason bien clair ki bann chretien ti nepli bizin suive la Loi, certain ti rejette so raisonnement ki ti inspiré par Bondié. (Col. 2:13-15) Kitfois zot ti pensé ki, si zot ti contigne suive certain partie dan la Loi, zot ti pou evite gagne persecution. Mais Paul ti ecrire bann chretien hébreu ek ti faire zot bien comprend ki zot pa ti pou kapav rente dan repos Bondié si zot ti contigne agir kont So projet.a (Héb. 4:1, 2, 6; lire Hébreux 4:11.) Pou zot gagne faveur Jéhovah, zot ti pou bizin accepté ki Jéhovah ti pé dirige so peuple dan enn lot fason.

9. Couma nou bizin reagir kan ena bann l’eclaircissement dan fason ki nou comprend enn l’enseignement dan la Bible?

⁹ Dan nou lepok, parfois finn ena bann l’eclaircissement dan fason ki nou ti comprend bann l’enseignement la Bible. Fodé pa ki sa tracasse nou; sa bizin faire nou ena plus confiance dan l’esclave fidele et avisé. Parfois College central, ki represente sa “l’esclave[-la],” ré-examine fason ki nou comprend certain l’enseignement. Si sa bann frere-la decidé ki bizin faire bann changement, zot pa peur pou corrige fason ki zot ti explik certain l’enseignement dan le passé ek donne bann l’explication pli clair. Zot koné ki certain pou dire bann mauvais kitsoz lor l’esclave fidele et avisé a cause sa bann changement-la, mais c’est pa sa ki pli important pou zot. Seki pli important pou zot, c’est coopere avek projet Bondié. Couma ou reagir kan ena bann l’eclaircissement dan fason ki nou comprend enn l’enseignement dan la Bible?​—Lire Luc 5:39.

10, 11. Ki certain etudiant la Bible ti faire kan zot ti aprann ki zot ti bizin essaye bann nouveau methode pou preché? Ki nou aprann ar sa l’exemple-la?

¹⁰ Anou prend enn lot l’exemple. Vers la fin 19^eme siecle ek commencement 20^eme siecle, certain Étudiants de la Bible ki ti pé faire bann bon discours publik, ti pensé ki, faire bann discours bien preparé, ti pli bon fason pou zot preché. Zot ti bien content pou koz en publik, ek certain parmi zot ti extra content kan bann dimoune ti flatte zot pou zot bann discours. Mais plitar, bann serviteur Jéhovah ti comprend pli bien ki Jéhovah ti envie zot faire plus ki zis bann discours publik. Li ti envie ki zot preché de porte en porte, ek aussi dan lezot fason. Certain parmi sa bann bon orateur-la ti refusé pou faire sa. Zot discours ti faire lezot pensé ki zot ti content Jéhovah ek ki zot ti obeir Li, mais zot action dan sa situation-la ti montré le contraire. Ki Jéhovah ti pensé lor zot? Li pa ti beni zot. Zot ti quitte l’organisation.​—Mat. 10:1-6; Actes 5:42; 20:20.

¹¹ Li ti difficile pou beaucoup lezot etudiant la Bible pou preche de porte en porte, surtout au commencement. Mais zot ti obeir Jéhovah ek zot ti reste fidele envers so l’organisation. Apré inpé le temps, li ti vinn pli facile pou zot pou preche de porte en porte. Jéhovah ti bien beni zot. Couma eski ou reagir kan l’esclave fidele et avisé dire ou essaye enn fason preché ki jamais ou finn essayé avant? Eski ou obeir mem si sa fason preché-la parette difficile pou ou?

Kan enn kikenn ki nou content quitte Jéhovah

12, 13. (a) Kifer Jéhovah demann bann chretien pou exclu bann dimoune ki faire peché mais ki pa’lé repenti? (b) Ki situation difficile bann parent chretien kapav gagné?

¹² Pena doute ki nou tou d’accord ki nou bizin pur lor plan physik, moral ek spirituel pou nou faire Bondié plaisir. (Lire Tite 2:14.) Selman, ena bann situation ki kapav testé nou fidelité envers Bondié dan sa domaine-la. Supposé, par exemple, ki enn couple chretien ki fidele ena enn sel garson ek li quitte la verité. Li prefere “plaisir temporaire ki gagné dan peché,” dan place bann bon relation avek Jéhovah ek avek so parent chretien. A cause so bann action, li nepli ena so place dan congregation ek li exclu.​—Héb. 11:25.

¹³ Bann parent-la bien souffert! En rapport avek enn dimoune ki’nn exclu, zot bien koné ki la Bible dire bizin “arrete frequente enn kikenn ki dire ki li enn frere, mais ki enn fornicateur, enn dimoune ki toujours envie gagne plus, ou-soit enn kikenn ki pratik l’idolatrie, ou-soit enn kikenn ki insulté lezot, ou-soit enn soulard, ou-soit enn kikenn ki trompe dimoune pou prend zot l’argent. Fodé pa mem mange avek enn dimoune coumsa.” (1 Cor. 5:11, 13) Zot comprend ki sa mot “enn kikenn[-la]” implik aussi bann membre la famille ki pa vive dan mem lakaz. Mais zot tellement content zot garson! Bann sentiment bien fort kapav faire zot raisonne coumsa: ‘Couma nou kapav aide nou garson pou retourne vers Jéhovah si nou coupe preské tou contact avek li? Eski nou pa pou kapav aide li plus si nou contigne koz ar li?’b

14, 15. Ki bann parent chretien bizin rappel kan zot decidé pou koz avek zot zenfant ki’nn exclu?

¹⁴ Nou bien chagrin pou trouve sa bann parent-la souffert. Apré tou, zot garson finn faire enn choix. Li finn choisir pou faire seki mauvais au lieu ki li contigne garde bann bon relation avek so bann parent et avek bann lezot chretien. Bann parent-la envie aide zot garson mais zot pa kapav controle seki li decide pou faire. Nou kapav comprend kifer zot souffert coumsa!

¹⁵ Mais ki sa bann parent-la pou faire? Eski zot pou obeir direction clair ki Jéhovah inn donné? Ou-soit eski zot pou rod bann pretexte pou frequente regulierement zot garson ki’nn exclu ek zot dire ki c’est bann “reunion familial ki necessaire”? Mais kan zot prend sa decision-la, zot bizin prend en consideration ki Jéhovah pensé lor seki zot pé faire. Zot bizin rappel ki Jéhovah envie ki so l’organisation reste pur ek, si possible, pou incite bann ki’nn faire peché pou changé ek pou retourne dan congregation. Couma bann parent chretien kapav montré ki zot ena mem desir?

16, 17. Ki nou kapav aprann kan nou medite lor l’exemple Aaron?

¹⁶ Aaron, frere Moïse, ti faire face avek enn situation difficile en rapport avek so deux garson. Essaye maziné ki li ti ressenti kan so deux garson Nadab ek Abihou ti allume enn difé ki Jéhovah pa ti approuvé ek Li ti touye zot. Bien sur, sa ti coupe tou contact ki zot ti pou kapav ena avek zot parent parski zot ti’nn mort. Mais ti ena enn lot kitsoz ki ti faire sa situation vinn encore pli difficile pou Aaron ek so famille. Jéhovah ti donne sa l’ordre-la Aaron ek so bann lezot garson ki ti fidele: “Pa laisse zot cheveux vinn en desordre lor zot la tête, ek zot bizin pa dechire zot linge [enn signe ki zot en deuil], pou ki zot pa mort ek pou ki [Jéhovah] pa en colere kont l’assemblée en entier.” (Lév. 10:6) Leson-la li clair. Nou l’amour pou Jéhovah bizin pli fort ki nou l’amour pou bann membre nou famille ki pa fidele envers Jéhovah.

¹⁷ Zordi, Jéhovah pa detruire desuite bann ki desobeir so bann la loi. Avek amour, li donne zot l’occasion pou repenti ek pou arrete faire peché. Ki Jéhovah pou ressenti si bann parent desobeir so commandement ek zot ena bann contact ki pa necessaire avek zot zenfant ki’nn exclu?

18, 19. Ki benediction bann famille kapav gagné si zot contigne reste fidele ar bann instruction Jéhovah concernant bann ki’nn exclu?

¹⁸ Beaucoup ki ti exclu avant, reconette asterla ki position ferme ki zot bann camarade ek zot famille finn prend ti aide zot pou retourne dan congregation. Par exemple, enn jeune femme ki’nn reintegré ti dire bann ancien ki enn kitsoz ki finn faire li change so la vie c’est fason ki so frere ti agir. So frere ti fidele envers Jéhovah ek ti obeir So commandement, pendant ki so soeur ti exclu. Sa ti pousse sa jeune femme-la pou retourne dan congregation.

¹⁹ Alors ki nou bizin faire? Nou bizin lutte kont tendance ki nou leker imparfait ena pou rebelle kont bann conseil biblik. Nou bizin ena enn grand l’assurance ki fason ki Jéhovah agir par rapport ar nou bann probleme, li toujours pli bon fason.

“Parole Bondié, li vivant ek li puissant”

20. Cite deux fason ki nou kapav applik Hébreux 4:12? (Guette note.)

²⁰ Kan Paul ti ecrire ki “parole Bondié, li vivant,” li pa ti pé faire reference ar Parole ki Bondié inn faire ecrire, setadir la Bible.c Bann lezot verset montré ki li ti pé faire reference ar bann promesse Bondié. Paul ti pé rod dire ki, kan Bondié faire enn promesse, Li pa pou blié sa promesse-la. Jéhovah ti montré sa par prophete Isaïe: “Mo parole . . . pa pou retourne vers moi sans resultat, mais . . . li pou faire seki’nn faire moi plaisir, ek li pou reussi accompli seki mo’nn envoye li faire.” (Is. 55:11) Alors, li pa necessaire ki nou mank patience kan bann promesse Jéhovah pa realisé vitesse ki nou ti envie ki zot realisé. Nou kapav sur ki Jéhovah pé “contigne travail” pou realise so projet dan enn fason complet.​—Jean 5:17.

21. Couma Hébreux 4:12, kapav enn l’encouragement pou bann membre agé ki fidele parmi ’la grande foule’?

²¹ Bann membre ’la grande foule’ ki fidele, finn servi Jéhovah pendant plusieurs dizaine l’année. (Rév. 7:9) Beaucoup jamais pa ti attann ki zot pou vinn vié dan sa mauvais le monde-la. Mais kan-mem, zot pa finn decouragé. (Ps. 92:14) Zot koné ki “parole Bondié, li vivant,” ek ki Jéhovah pé travail pou realise so bann promesse. Projet Bondié bien important pou Li, alors nou faire Li plaisir kan nou aussi nou montré ki so projet bien important pou nou. Pendant sa septieme jour-la, Jéhovah pé reposé, Li koné ki so projet pou realisé ek ki so bann serviteur, en tant ki groupe, pou contigne coopere avek sa projet-la. Ki ou kapav dire lor ou? Eski personnellement ou finn rente dan repos Bondié?

[Notes]

Eski ou rappel?

• Ki nou bizin faire pou nou rente dan repos Bondié zordi?

• Kan nou comprend dapré la Bible seki Bondié envie nou faire, couma nou montré ki nou envie faire Li plaisir?

• Dan ki bann situation li kapav difficile pou obeir bann conseil ki sorti dan la Bible, mais kifer li important ki nou obeir?

• Cite deux fason ki nou kapav applik Hébreux 4:12.

[Zimage page 31]

Bann parent bien souffert!