Chef sa le monde-la inn demaské

ENN fois, Jésus ti dire bann dimoune: “Pou jette chef sa le monde-la dehors.” Plitar, li ti dire ki ’chef sa le monde-la pena okenn pouvoir lor li’ ek ki “finn juge chef sa le monde-la.” (Jean 12:31; 14:30; 16:11) Lor kisannla Jésus ti pé kozé?

Kan nou guette seki Jésus ti pé dire lor “chef sa le monde-la,” li clair ki li pa ti pé koz lor so Papa, Jéhovah. Alors, kisannla ki “chef sa le monde-la”? Couma eski pou ’jette li dehors,’ ek couma “finn juge” li?

“Chef sa le monde-la” faire koné ki li été

Pareil couma enn criminel ki souvent faire vantard concernant so pouvoir, Satan le Diable aussi ti faire pareil kan li ti tente Jésus, Garson Bondié. Apré ki li ti montré Jésus “tou bann royaume” ki lor la terre, Satan ti faire li sa proposition-la: “Mo pou donne toi tou sa pouvoir-la ek la gloire sa bann royaume-la, parski’nn donne moi sa, ek mo donne sa kisannla mo envie. Alors, si to adore moi, tousala pou vinn pou toi.”​—Luc 4:6, 7.

Si Satan le Diable ti zis represente seki mauvais, pareil couma certain dimoune dire, couma nou ti pou kapav explik sa tentation-la? Eski Jésus ti pé tenté par enn mauvais pensée ou-soit eski au fond li-mem ti ena certain kitsoz ki ti pé bouleverse li zis apré so bapteme? Si oui, couma la Bible kapav dire ki “pena okenn peché dan li”? (1 Jean 3:5) Si Satan pa ti ena pouvoir lor le monde, Jésus ti pou dementi li. Mais au contraire, Jésus ti confirmé ki Satan le Diable ena sa pouvoir-la kan li ti appel li “chef le monde,” “enn criminel” ek enn “menteur.”​—Jean 14:30; 8:44; The New Jerusalem Bible.

Apepré 60 an apré ki ti arrive sa l’evenement-la entre Jésus ek Satan, l’apotre Jean ti rappel bann chretien grand pouvoir ki Satan le Diable ena, kan li ti dire ki “le monde entier li dan pouvoir sa kikenn ki mauvais-la.” L’apotre Jean ti dire aussi ki li pé “mette tou bann dimoune lor la terre entier dan l’erreur.” (1 Jean 5:19; Révélation 12:9) Li clair ki la Bible appel sa l’esprit invisible-la “chef le monde.” Mais ziska ki point li ena pouvoir lor bann dimoune?

Chef sa le monde-la partage so pouvoir avek lezot

Kan l’apotre Paul ti ecrire lor la guerre ki bann chretien faire a cause zot la foi, li ti montré dan enn fason clair kisannla ki zot bann pli grand l’ennemi. Li ti dire franc: “Nou bizin lutté, pa kont di-sang ek la chair, mais kont bann gouvernement, kont bann l’autorité, kont bann dirigeant le monde ki dan sa noirté-la, kont bann mauvais l’esprit ki trouve dan le ciel.” (Éphésiens 6:12) Alors, nou pa pé la guerre kont bann dimoune, parski sa la guerre ki nou pé faire-la, li pa “kont di-sang ek la chair,” mais kont “bann mauvais l’esprit.”

Dapré bann dernier traduction la Bible, “bann mauvais l’esprit” ki mentionné dan sa verset-la pa pé faire reference ar enn kitsoz ki represente seki mauvais, mais ar bann mauvais creature spirituel ki bien puissant. Enn traduction la Bible traduire sa l’expression-la par ’puissance spirituel le mal la-haut dan le ciel.’ (Nouvo Testaman an Kreol Morisien) Alors, Satan le Diable servi so pouvoir a travers bann lezot ange ki ti rebellé, ek ki ti quitte “sa place kot zot ti’nn crée pou resté-la,” setadir le ciel.​—Jude 6.

Livre Daniel ki enn livre prophetik, montré couma sa bann “dirigeant le monde[-la],” finn ena controle lor la terre depuis bien longtemps. En 537 avant nou lepok, bann Juif ti nepli en captivité dan Babylone, alors zot ti retourne Jérusalem. Prophete Daniel ki ti bien tracassé pou so bann compagnon juif, ti prié pou zot pendant trois semaine. Enn ange ki Bondié ti envoyé pou encourage Daniel, ti dire li kifer li ti tardé pou arrivé. Li ti dire: “Prince royaume Perse ti oppose-li ar moi pendant vingt et enn jour.”​—Daniel 10:2, 13.

Kisannla ki ti sa ’prince Perse-la’? Li clair ki sa ange-la pa ti pé faire reference ar Cyrus, le roi Perse, parski sa lepok-la sa le roi-la ti montré so faveur envers Daniel ek so peuple. En plus, couma eski enn simple le roi ti pou kapav lutte kont enn creature spirituel pendant trois semaine alors ki enn sel ange ti touye 185,000 soldat bien puissant dan enn sel la nuit? (Isaïe 37:36) Pena doute ki sa mauvais ’prince Perse-la’ ti bizin enn agent Satan le Diable, setadir enn demon ki ti gagne pouvoir lor l’Empire perse. Plitar dan sa recit-la, ange Bondié ti dire ki li ti pou bizin ré-al la guerre avek sa ’prince Perse-la’ ek enn lot demon, “prince la Grèce.”​—Daniel 10:20.

Ki conclusion nou kapav tiré ar sa recit-la? Ki vrai-mem ena bann ’dirigeant invisible ki pé controle sa le monde-la.’ C’est bann demon ki aussi bann prince ek ki pé controle le monde enba l’autorité zot chef, Satan le Diable. Mais ki l’objectif zot ena?

Chef sa le monde-la montré ki li été vrai-mem

Dan Révélation, dernier livre la Bible, l’apotre Jean dire couma Jésus, en tant ki Mikaël l’archange, ti la guerre avek Satan le Diable ek so bann demon, ek li ti gagne la victoire. Li dire nou ki bann consequence terrible finn ena kan Mikaël ti tire Satan ek so bann demon dan le ciel. Nou lire: “Malheur pou la terre . . . parski Satan le Diable finn desann vers zot; li ena enn grand colere parski li koné ki li ena zis enn tigit le temps-mem.”​—Révélation 12:9, 12.

Couma Satan le Diable finn montré ki li ena enn grand colere? Souvent kan bann chef criminel zot desesperé, zot applik sa principe-la: ’regné ou-soit detruire.’ Satan ek so bann demon zot aussi zot suive mem principe, zot bien decidé pou detruire la terre ek so bann habitant. Parski Satan koné ki li reste bien tigit le temps, li servi enn parmi bann kitsoz important ki ena dan le monde ki li controlé, setadir systeme commercial, pou pousse bann dimoune pou acheté sans okenn controle. Sa fason agir-la pé rase bann ressource naturel ek pé detruire l’environnement partout, ek a cause sa, l’existence bann dimoune en danger.​—Révélation 11:18; 18:11-17.

Depuis commencement l’histoire l’humanité, Satan ena enn grand desir pou gagne pouvoir. Nou trouvé ki la politik ek la religion reflete mem l’attitude ki Satan. Livre Révélation decrire bann puissance politik couma enn bete sauvage ki Satan inn donne enn “grand pouvoir.” Livre Révélation montré aussi ki c’est enn la honte ki la religion implik-li dan politik ek li decrire sa relation-la couma enn l’adultere spirituel degoutant. (Révélation 13:2; 17:1, 2) Pendant bann siecle ki’nn passé, bann dimoune inn faire dominere ar zot camarade, zot inn faire lezot vinn esclave, zot inn faire bann grand la guerre ek bann la guerre racial. A cause tousala, maziné ki quantité million dimoune inn perdi la vie. Eski kikenn kapav dire dan enn fason honnete ki c’est zis bann dimoune ki ti responsable sa bann kitsoz terrible ek cruel ki finn ena a travers l’histoire-la? Ou-soit eski c’est bann mauvais l’esprit invisible ki ti derriere sa?

Dan enn fason clair, la Bible faire nou koné kisannla ki sa kikenn ki’nn manipule bann chef ek bann dirigeant ki ena dan sa le monde-la ek inn demaské li. Ki zot pé faire sa par expré ou-soit non, bann dimoune dan le monde pé reflete personnalité zot chef ek zot pé suive so principe, setadir ’regné ou-soit detruire.’ Mais pou comié le temps eski bann dimoune pou souffert enba domination Satan le Diable?

Bientot Satan pa pou ena okenn pouvoir

L’activité ki Jésus ti faire lor la terre dan premier siecle ti montré ki bientot Satan le Diable ek so bann demon pou detruire. Kan bann disciple Jésus ti raconte li couma zot ti tire bann demon lor bann dimoune, li ti dire zot: “Mo trouve Satan ki’nn fini tombé depuis le ciel couma enn zeclair.” (Luc 10:18) Kan Jésus ti dire sa bann parole-la, li ti pé pense victoire ki li ti pou gagné lor chef sa le monde-la, kan li ti pou retourne dan le ciel en tant ki Mikaël l’archange. Sa ti faire li bien content. (Révélation 12:7-9) Kan nou etudié en profondeur bann prophetie biblik, nou aprann ki li’nn gagne sa victoire-la dan le ciel en 1914 ou-soit enn tipé apré.a

Depuis sa date-la, Satan le Diable koné ki reste enn tigit le temps avant so destruction. Mem si ’le monde entier li dan so pouvoir,’ plusieurs million dimoune zordi pa finn laisse-zot embeté par tou seki li’nn rod faire pou controle zot. La Bible finn ouvert zot lizié pou zot trouvé kisannla li été vrai-mem ek ki so bann l’intention. (2 Corinthiens 2:11) Seki Paul ti ecrire so bann compagnon chretien, bien encourage zot: “Bondié ki donne la paix pou crase Satan enba zot lipié dan enn tigit lé-temps encore.”b​—Romains 16:20.

Bientot, Satan pa pou ena okenn pouvoir! Christ pou dirigé avek amour; enba so regne bann bon dimoune pou transforme la terre ek pou faire li vinn enn paradis. Nepli pou ena violence, la haine ek bann dimoune ki envie gagne toujours plus. La Bible dire: “Personne pa pou rappel bann kitsoz avant.” (Isaïe 65:17) Sa pou vrai-mem enn grand soulagement pou tou bann dimoune ki nepli enba l’influence ek l’autorité chef sa le monde-la!

[Notes]

[L’encadré page 9]

Kan Christ pou dirigé avek amour, bann bon dimoune pou faire la terre vinn enn paradis