Eski la terre pou detruire?

▪ Certain ti pensé ki la terre ti pou detruire le 21 octobre 2011. Nanyin pa finn arrivé. Alors, prophetie Harold Camping, enn animateur radio américain, pa finn realisé. Li ti predire ki Jour Jugement ti pou vini le 21 mai 2011​—ti pou ena enn grand tremblement de terre partout lor la terre, ek cinq mois plitar, le 21 octobre, la terre ti pou disparette.

Mais selman, la terre jamais pa pou detruire. Createur la terre pa pou permette sa. So Parole dire: “To finn bien fixé la terre, pou ki li tini.”​—Psaume 119:90.

Selman, certain ki lire la Bible kapav protesté ek dire ki sa planete-la pou detruire par difé. Zot montré 2 Pierre 3:7, 10 pou prouve zot l’idée: “Mais par sa mem parole-la, Bondié finn reserve le ciel ek la terre ki existé zordi, pou brulé par difé, ek pou jour jugement ek destruction bann dimoune ki pena okenn respé pou Bondié. . . .  Jour Jéhovah pou vini couma enn voleur, ek sa jour-la, le ciel pou disparette vite dan enn grand tapage, mais bann element ki’nn bien chauffé pou fonn, ek la terre ek bann travail ki ena ladan, pou decouvert.” Eski nou bizin prend bann parole l’apotre Pierre dan enn fason litteral?

Non. Kifer? Parski l’interpretation sa bann verset-la bizin en accord avek tou seki Pierre ti ecrire dan so lettre ek avek lezot partie dan la Bible. Si nou prend sa dan enn fason litteral, sa vedir ki le ciel ou-soit l’univers​—avek so bann milliard zetoile ek lezot matiere​—pou detruire par difé zis parski dan enn ti boute sa grand l’univers-la ena bann mauvais dimoune. Eski ou ti pou detruire enn la plage plusieurs kilometre zis parski ou pa content enn la grain di-sable ladan? Sa pa pou ena okenn sens! Alors, Jéhovah aussi pa pou detruire tou l’univers ki Li’nn crée parski finn ena rebellion zis dan enn so bann creation.

En plus, sa fason pensé-la pa en accord avek bann parole ki Jésus ti dire: “Heureux bann dimoune ki ena enn caractere doux, parski zot pou herite la terre.” (Matthieu 5:5; Psaume 37:29) Eski enn papa pou construire enn joli lakaz pou so famille zis pou mette difé ladan apré? (Psaume 115:16) Nou pa kapav pense enn zaffaire coumsa! Jéhovah pa zis nou Createur mais Li aussi enn Papa ki ena beaucoup l’amour.​—Psaume 103:13; 1 Jean 4:8.

Pierre servi l’expression “la terre” dan enn fason symbolik pou faire reference ar bann dimoune​—dan sa cas-la ar bann mauvais dimoune. Remarké ki Pierre faire enn comparaison entre deluge ki ti ena dan lepok Noé ek jour jugement Jéhovah. (2 Pierre 3:5, 6) Kan ti ena deluge, zis bann mauvais dimoune ki ti detruire; la terre, Noé, ki ti enn dimoune juste, ek so famille pa ti detruire. Pareil, kan Pierre servi l’expression “le ciel” c’est dan enn fason symbolik. Dan sa verset-la, “le ciel” represente bann gouvernement humain ki pé dirigé zordi. Alors, sa vedir ki tou bann mauvais dimoune ki pa’lé changé pou disparette ek aussi, tou bann gouvernement pou remplacé par Royaume Bondié.​—Daniel 2:44.

Alors, eski la terre pou detruire? Non. Seki pou detruire c’est la terre symbolik, setadir bann mauvais dimoune. La terre ek futur societé bann dimoune juste pou existé pou touletan.​—Proverbes 2:21, 22.