Contigne veillé pareil couma Jésus

“Contigne veillé ek prié.”​—MAT. 26:41.

COUMA OU POU REPONN?

Couma nou bann la priere kapav montré ki nou pé contigne veillé?

Dan ki fason nou kapav montré ki nou pé contigne veillé dan nou ministere?

Kifer li important ki nou contigne veillé kan nou passe par bann l’epreuve, ek couma nou kapav faire sa?

1, 2. (a) Ki bann question nou kapav pose-nou concernant l’exemple ki Jésus inn laissé pou contigne veillé? (b) Eski l’exemple Jésus ki ti parfait kapav aide bann dimoune imparfait? Donne enn l’exemple.

KITFOIS ou finn deja demann ou-mem: ‘Eski li possible pou contigne veillé pareil couma Jésus? Apré tou, Jésus ti parfait! En plus, parfois Jésus ti kapav koné seki pou arrivé exactement dan l’avenir​—mem seki pou arrivé dan plusieurs millier l’année! Eski vrai-mem li ti bizin contigne veillé?’ (Mat. 24:37-39; Héb. 4:15) Pou commencé, anou reponn sa bann question-la pou ki nou kapav comprend kifer li bien important ek li bien urgent ki nou contigne veillé.

² Eski enn l’exemple parfait kapav aide bann dimoune imparfait? Oui, parski li possible ki nou aprann ar enn bon professeur ek ar so l’exemple. Maziné ki pou premier fois enn missié pé aprann tire coute fleche. Au commencement, li pa reussi envoye fleche-la dan so l’objectif, mais li prend plus leson ek li contigne essayé. Pou ameliore li-mem, li observe bien l’exemple so professeur, ki enn expert dan tire coute fleche. Sa zeleve-la guette bien couma so professeur debouté, dan ki position so la main été, ek couma li servi so bann lé-doigt lor la corde so l’arc. Tigit par tigit, sa nouveau zeleve-la aprann avek ki quantité pression li bizin riss la corde sa l’arc-la; li prend en consideration di-vent, ek li contigne faire bann zeffort. A mesure ki li imite seki so professeur pé faire, tigit par tigit li reussi vise so bann fleche pli pré ar centre so l’objectif. Nou aussi pareil, en tant ki chretien, nou contigne faire zeffort pou ameliore-nou kan nou suive bann instruction Jésus ek kan nou imite so l’exemple parfait.

3. (a) Couma Jésus ti montré ki li bizin contigne veillé? (b) Ki nou pou examiné dan sa lartik-la?

³ Mais ki nou kapav dire lor l’importance pou contigne veillé? Eski Jésus ti bizin faire sa? Oui. Par exemple, pendant so dernier la nuit lor la terre, Jésus ti dire so bann zapotre fidele: “Contigne veillé ensam avek moi.” Li ti dire aussi: “Contigne veillé ek prié touletan, pou ki zot pa tenté.” (Mat. 26:38, 41) Mem si toute longue so la vie lor la terre Jésus ti contigne veillé, c’est surtout pendant sa moment difficile-la ki li ti envie reste lor so garde ek reste pli proche ki li kapav avek so Papa ki dan le ciel. Li ti koné ki so bann disciple aussi ti bizin contigne veillé​—pa zis sa jour-la mais dan l’avenir aussi. Alors, anou guetté kifer Jésus envie ki nou contigne veillé. Apré, nou pou examine trois fason couma nou kapav contigne veillé pareil couma Jésus, dan nou la vie toulé-jour.

KIFER JÉSUS ENVIE KI NOU CONTIGNE VEILLÉ

4. Kifer nou bizin contigne veillé?

⁴ En deux-trois mot, Jésus envie ki nou contigne veillé a cause bann kitsoz ki nou pa koné ek bann kitsoz ki nou koné. Kan Jésus ti lor la terre, eski li ti konn tou seki ti pou arrivé dan l’avenir? Non, parski avek humilité, li ti reconette: “Concernant sa jour-la ek sa l’heure-la, personne pa koné, ni bann ange ki dan le ciel ni mem le Fils, mais selman le Père.” (Mat. 24:36) Sa lepok-la, Jésus, Garson Bondié, pa ti koné kan exactement la fin sa mauvais le monde-la ti pou vini. Ki nou kapav dire lor nou zordi? Eski nou aussi nou ena enn connaissance limité lor l’avenir? Oui! Nou pa koné kan Jéhovah pou envoye so Garson pou detruire sa mauvais systeme-la. Si nou ti konn sa, eski nou ti pou bizin contigne veillé? Pareil couma Jésus ti expliké, la fin pou vini enn sel coute, sans ki nou attann; alors nou bizin touletan contigne veillé.​—Lire Matthieu 24:43.

5, 6. (a) Couma nou connaissance lor l’avenir ek lor projet Bondié aide nou pou contigne veillé? (b) Kifer seki nou koné lor Satan pousse nou encore plus pou reste lor nou garde?

⁵ Mais selman, Jésus ti konn beaucoup kitsoz extraordinaire concernant l’avenir​—bann verité ki la plupart dimoune ki ti vive autour li pa ti koné. Nou pena mem quantité connaissance ki Jésus ti ena, mais grace a li, nou konn beaucoup kitsoz concernant Royaume Bondié ek seki li pou faire bientot dan l’avenir. Kan nou guette autour nou, ki li dan lekol, dan travail, ou-soit dan territoire kot nou preché, eski nou pa trouvé ki la plupart dimoune pa konn sa bann verité extraordinaire-la? Alors, sa c’est enn lot raison kifer nou bizin contigne veillé. Pareil couma Jésus, touletan nou bizin reste lor nou garde, rod bann l’occasion pou partage seki nou koné lor Royaume Bondié. Chaque l’occasion coumsa ena enn grand valeur, ek nou pa’lé gaspille zot. La vie bann dimoune en danger!​—1 Tim. 4:16.

⁶ Jésus ti konn enn lot kitsoz ki ti aide li pou contigne veillé. Li ti koné ki Satan ti bien decidé pou tente li, persecute li, ek faire li perdi so l’integrité. Sa mauvais l’ennemi-la ti pé touletan veille “enn lot bon l’occasion” pou tente Jésus. (Luc 4:13) Jamais Jésus ti baisse so garde. Li ti envie pré pou n’importe ki l’epreuve ki kapav arrivé, couma enn tentation, l’opposition ou-soit persecution. Nou aussi nou dan mem situation ki Jésus. Nou koné ki Satan encore toujours “couma enn lion ki pé criyé ek ki pé rod kikenn pou devoré.” C’est a cause sa ki Parole Bondié encourage tou bann chretien pou “garde zot bon sens, ek reste lor zot garde.” (1 Pierre 5:8) Mais couma nou kapav faire sa?

CONTIGNE VEILLÉ AVEK L’AIDE LA PRIERE

7, 8. Ki conseil Jésus ti donné concernant la priere, ek ki l’exemple li’nn laissé?

⁷ La Bible montré ki ena enn grand rapport entre la priere ek reste lor nou garde lor plan spirituel, setadir contigne veillé. (Col. 4:2; 1 Pierre 4:7) Pa trop longtemps apré ki li ti demann so bann disciple pou contigne veillé ensam avek li, Jésus ti dire zot: “Contigne veillé ek prié touletan, pou ki zot pa tenté.” (Mat. 26:41) Eski li ti pé rod dire ki zot ti bizin faire sa zis dan sa situation difficile-la? Non, so conseil c’est enn principe ki nou bizin suive toulé-jour.

⁸ Jésus inn laisse enn l’exemple extraordinaire concernant la priere. Kitfois ou rappel ki enn fois, li ti passe enn la nuit pou prié so Papa. Anou essaye mazinn seki ti passé. (Lire Luc 6:12, 13.) Nou en printemps, ek nou pré ar la ville Capernaüm, enn la ville kot bann pecheur resté ek kot Jésus aussi resté. Dan l’apré-midi, Jésus al lor enn parmi bann montagne ki faire face ar la mer Galilée. Inn commence faire noir ek Jésus pé guette sa paysage ki ena devant li-la. Kitfois depuis la-haut, li trouve bann la lampe de l’huile ki pé brillé dan Capernaüm ek dan bann village tout autour. Mais kan Jésus commence koz ar Jéhovah, li concentré zis lor so la priere. Bann minute ek bann l’heure passé. Li pa mem remarké ki bann la lumiere dan la ville pé commence teigne enn par enn, ou-soit ki la lune pé change position ek ki bann zanimo ki sorti a-soir pou al rod mangé. Surement dan so la priere, li pé koz surtout lor enn grand decision ki li pou bizin prend​—choisir so 12 zapotre. Nou kapav faire vision Jésus ki pé dire so Papa tou seki li pensé ek seki tracasse-li lor chaque disciple ek li pé suppliye Li pou gagne direction ek sagesse.

9. Ki nou kapav aprann ar l’exemple Jésus ki ti prié toute la nuit?

⁹ Ki nou kapav aprann ar l’exemple Jésus? Eski sa vedir ki nou bizin prié pendant plusieurs l’heure temps? Non, parski Jésus ti reconette avek bonté concernant so bann disciple: “Oui, l’esprit li fort, mais la chair li faible.” (Mat. 26:41) Selman, nou kapav imite Jésus. Par exemple, eski nou prié nou Papa ki dan le ciel avant nou prend n’importe ki decision ki kapav affecté nou, nou famille ou-soit nou bann frere ek soeur, lor plan spirituel? Eski nou prié pou nou bann frere ek soeur spirituel? Eski nou prié avek tou nou leker au lieu ki nou repete touletan mem-mem parole? Remarké aussi ki Jésus ti accorde enn grand l’importance ar bann conversation bien intime ek privé ki li ti gagné avek so Papa. Zordi nou pé vive dan enn le monde kot nou bien occupé. Alors, li bien facile ki, avek tou seki nou ena pou faire, nou blié seki pli important dan la vie. Si nou prend assez le temps pou nou faire bann la priere profond ek personnel, nou pou plus kapav reste lor nou garde lor plan spirituel. (Mat. 6:6, 7) Nou pou vinn pli proche ar Jéhovah, nou pou faire tou seki nou kapav pou fortifié nou bann relation avek Li ek nou pou rejette tou seki kapav affaibli sa bann relation-la.​—Ps. 25:14.

CONTIGNE VEILLÉ DAN NOU MINISTERE

10. Ki l’exemple montré nou ki Jésus ti veille bann l’occasion pou rann temoignage?

¹⁰ Jésus ti contigne veillé dan travail ki Bondié ti donne li pou faire. Kitfois ena travail ki permette enn travailleur pou pense lezot kitsoz sans ki sa amenn bann consequence grave. Mais, dan beaucoup travail, bann travailleur bizin reste concentré ek pa laisse nanyin detourne zot l’attention. Nou ministere chretien li coumsa. Jésus ti reste touletan concentré dan so travail, li ti veille bann l’occasion pou partage la bonne nouvelle. Par exemple, kan li ek so bann disciple ti arrive dan la ville Sychar apré ki zot t’inn marché depuis gramatin, so bann disciple ti al acheté kitsoz pou mangé. Jésus ti reste pré kot puits de l’eau sa la ville-la pou reposé, mais li ti contigne rod enn l’occasion pou rann temoignage. Enn femme samaritaine ti vinn tire de l’eau. Jésus ti kapav choisir pou faire enn ti sommeil. Li ti kapav trouve bann raison pou evite gagne enn conversation. Pourtant, li ti gagne enn conversation avek sa madame-la ek li ti donne li enn bon temoignage ki ti ena enn l’effet lor beaucoup dimoune dan sa la ville-la. (Jean 4:4-26, 39-42) Eski nou kapav imite pli bien l’exemple Jésus ek rod tou l’occasion pou preche avek bann dimoune ki nou joinde dan nou bann l’activité toulé-jour?

11, 12. (a) Couma Jésus ti reagir kan certain ti essaye empeche li pou faire so travail? (b) Ki l’equilibre Jésus ti ena concernant so ministere?

¹¹ Parfois, bann dimoune ki ti ena bann bon l’intention ti essaye empeche Jésus faire so travail couma bizin. Dan Capernaüm, bann la foule ti tellement touché par bann guerison ki Jésus ti faire, ki zot ti envie garde li avek zot. Nou kapav comprend zot. Selman, Jésus ti gagne mission pou preche ar tou “bann brebis ki’nn perdi dan lakaz Israël,” pa zis ar bann dimoune dan enn sel la ville. (Mat. 15:24) Alors, li ti dire sa bann dimoune-la: “Mo bizin annonce la bonne nouvelle lor royaume Bondié dan bann lezot la ville aussi, parski c’est a cause sa ki finn envoye moi.” (Luc 4:40-44) Li clair ki Jésus ti donne priorité so ministere. Li pa ti laisse nanyin detourne-li.

¹² Eski Jésus ti tellement concentré lor so travail ki li ti vinn enn fanatik ek li pa ti profite bann plaisir ki ena dan la vie? Eski li ti tellement occupé ar so ministere ki li pa ti prend compte seki bann dimoune ti bizin lor plan materiel? Non, Jésus ti garde so l’equilibre. Li ti profite la vie, li ti content passe bann bon moment avek so bann camarade. Li ti comprend bann famille ek li ti konn bien seki zot ti bizin ek bann probleme ki zot ti gagné. Li pa ti hesité pou montré so l’affection pou bann zenfant.​—Lire Marc 10:13-16.

13. Dan nou ministere, couma nou kapav imite l’exemple Jésus ki ti contigne veillé ek ki ti equilibré?

¹³ A mesure ki nou imite l’exemple Jésus ki ti contigne veillé, ki bann zeffort nou bizin faire pou garde mem l’equilibre? Nou pa laisse sa le monde-la empeche nou pou faire nou travail. Mem bann camarade ek bann famille ki ena bann bon l’intention kapav encourage nou pou ralenti dan nou ministere ou-soit pou rod seki zot considere couma enn la vie normal. Mais, si nou imite Jésus, nou pou considere nou ministere coumadir enn mangé. (Jean 4:34) Nou ministere donne nou la force lor plan spirituel ek faire nou gagne la joie aussi. Selman, nou pou faire tou pou garde nou l’equilibre, nou pa pou vinn trop juste ek pensé ki nou pli bon ki lezot ou-soit nou vinn bann dimoune ki prive nou-mem. Pareil couma Jésus, nou envie vinn bann serviteur Jéhovah ki joyeux ek equilibré, parski nou servi enn “Bondié heureux.”​—1 Tim. 1:11.

CONTIGNE VEILLÉ DAN BANN L’EPREUVE

14. Dan bann l’epreuve, ki tendance nou bizin rejeté, ek kifer?

¹⁴ Couma nou finn trouvé, Jésus ti donne la plupart conseil pou contigne veillé kan li ti pé passe par bann l’epreuve. (Lire Marc 14:37.) C’est kan nou dan bann l’epreuve ki nou pli bizin suive l’exemple Jésus. Kan zot pé passe par bann probleme, beaucoup ena tendance pou blié enn verité bien important, tellement important ki livre Proverbes mentionne li deux fois: “Ena enn chemin ki droite devant enn dimoune, mais apré, dan so boute ena chemin la mort.” (Prov. 14:12; 16:25) Si nou compte lor nou prop fason pensé, surtout si nou pé faire face ar bann probleme grave, nou kapav mette nou-mem ek bann ki nou content en danger.

15. Ki enn chef famille kapav tenté pou faire pendant bann grand probleme economik?

¹⁵ Par exemple, kitfois enn chef famille gagne beaucoup difficulté pou donne “so famille” seki li bizin lor plan materiel. (1 Tim. 5:8) Li kapav tenté pou accepté enn travail ki pou faire li souvent mank bann reunion, so l’adoration en famille ou-soit so predication. Si li base-li lor fason pensé bann dimoune, sa decision-la kapav parette acceptable, sa kapav mem parette enn bon decision. Selman, a la fin sa kapav faire li malade ou-soit mort lor plan spirituel. Li pli bon ki li suive conseil ki ena dan Proverbes 3:5, 6! Salomon ti dire: “Faire Jéhovah confiance avek tou to leker ek pa fié lor to prop l’intelligence. Dan tou seki to faire, prend Li compte, ek Li, Li pou faire to bann chemin vinn droite.”

16. (a) Couma Jésus ti montré ki li ti faire confiance sagesse Jéhovah au lieu ki so prop sagesse? (b) Couma beaucoup chef famille imite fason ki Jésus inn faire confiance Jéhovah dan bann moment difficile?

¹⁶ Kan Jésus ti faire face ar bann l’epreuve, li pa ti compte lor so prop l’intelligence. Essaye reflechi lor la! Dimoune ki pli sage ki finn vive lor la terre pa ti compte lor so prop sagesse. Par exemple, kan Satan ti tente li, plusieurs fois dan so bann reponse Jésus ti dire: “Finn ecrire.” (Mat. 4:4, 7, 10) Li ti compte lor sagesse so Papa pou resisté kont bann tentation. Kan li ti faire sa, Jésus ti montré ki li ena l’humilité, enn qualité ki Satan detesté ek ki li pena ditou. Eski nou aussi nou faire pareil couma Jésus? Enn chef famille ki imite fason ki Jésus ti contigne veillé, laisse Parole Bondié guide li, surtout kan li pé passe par bann moment difficile. Partout lor la terre, plusieurs millier chef famille pé faire sa. Zot pé faire tou zot zeffort pou mette Royaume Bondié ek vrai l’adoration en premier dan zot la vie, avant mem bann kitsoz ki zot bizin lor plan materiel. Kan zot faire sa, zot pé prend soin zot famille dan enn pli bon fason. Jéhovah beni bann zeffort ki zot faire pou donne zot famille seki zot bizin lor plan materiel, pareil couma so Parole la Bible promette.​—Mat. 6:33.

17. Ki pousse ou pou imite fason ki Jésus ti contigne veillé?

¹⁷ Pena doute, Jésus inn laisse pli bon l’exemple lor fason ki nou bizin contigne veillé. Li’nn laisse nou enn l’exemple ki bien pratik, ki faire nou gagne bann bienfait ek mem kapav faire nou gagne la vie sauve. Pa blié ki Satan envie faire ou dormi lor plan spirituel​—faire ou la foi vinn faible, faire ou perdi ou zele dan ou l’adoration ek perdi ou l’integrité. (1 Thess. 5:6) Pa laisse li gagné! Contigne veillé couma Jésus ti faire​—contigne veillé avek l’aide la priere, dan ou ministere, ek kan ou pé faire face avek bann l’epreuve. Kan ou faire sa, ou pou heureux, ou pou ena enn la vie rempli ar satisfaction mem asterla, alors ki la fin bien pré. Si ou contigne veillé, kan ou Maitre pou vinn detruire sa mauvais le monde-la, li pou trouve ou lor ou garde ek actif pou faire volonté so Papa. Li pou enn plaisir pou Jéhovah recompense ou pou ou fidelité!​—Rév. 16:15.

[Zimage page 16]

Jésus ti preche ar enn madame pré ar enn puits. Couma ou crée bann l’occasion pou preché toulé-jour?

[Zimage page 17]

Kan ou prend soin ou famille lor plan spirituel sa montré ki ou pé contigne veillé