Aide bann dimoune pou “levé ek arrete dormi”
“Zot koné dan ki lepok nou pé vive, ki’nn fini arrive ler pou zot levé ek arrete dormi.” —ROM. 13:11.
ESKI OU KAPAV EXPLIKÉ?
Kifer li bien important ki bann chretien pa dormi lor plan spirituel?
Kifer bann proclamateur bizin konn ecouté ek observé?
Kifer nou bizin manifesté bonté ek douceur dan nou ministere?
1, 2. Lor plan spirituel, ki beaucoup dimoune pé faire zordi?
TOULÉ-L’ANNÉE, plusieurs millier dimoune trouve la mort parski zot commence gagne sommeil ou-soit zot dormi lor zot volant. Lezot perdi zot travail parski zot pa leve assez boner pou al travail ou-soit parski zot dormi dan travail. Mais kan enn dimoune dormi lor plan spirituel, sa kapav ena bann consequence pli grave. C’est dan sa domaine important-la ki la Bible dire: “Heureux enn kikenn ki contigne veillé.”—Rév. 16:14-16.
2 Alors ki grand jour Jéhovah pé kosté, bann dimoune en general pé dormi lor plan spirituel. Mem certain chef religieux dan la chretienté finn appel bann membre zot religion ‘bann geant ki pé dormi.’ Ki sa vedir dormi lor plan spirituel? Kifer li bien important ki bann vrai chretien pa dormi lor plan spirituel? Couma nou kapav aide bann dimoune pou levé dan zot sommeil spirituel?
KI SA VEDIR DORMI LOR PLAN SPIRITUEL?
3. Couma ou pou decrire enn dimoune ki pé dormi lor plan spirituel?
3 En general, bann dimoune ki dormi, zot pa actif. Parkont, bann dimoune ki dormi lor plan spirituel, kitfois zot bien occupé—mais pa avek bann kitsoz spirituel. Kitfois zot bien occupé avek zot bann l’activité toulé-jour ou-soit pou rod bann plaisir, enn grand position, ou-soit la richesse. A cause tou sa bann kitsoz-la, zot pa montré enn grand l’interet pou zot besoin spirituel. Mais bann dimoune ki pa pé dormi lor plan spirituel realisé ki nou pé vive “dan bann dernier jour,” alors zot faire tou seki zot kapav pou reste bien actif pou faire volonté Bondié.—2 Pierre 3:3, 4; Luc 21:34-36.
4. Kan Paul ti dire: “Fodé pa ki nou dormi couma lezot pé faire,” ki l’importance sa conseil-la ena?
4 Lire 1 Thessaloniciens 5:4-8. Ici, l’apotre Paul ti pé encourage so bann compagnon pou zot pa “dormi couma lezot pé faire.” Ki sa vedir? Enn fason couma nou kapav “dormi” c’est kan nou pa prend compte bann principe moral Jéhovah. Enn lot fason ki nou kapav “dormi” c’est kan nou pa prend compte ki ler finn arrivé pou Bondié detruire bann mauvais dimoune. Nou bizin faire attention ki sa bann mauvais dimoune-la pa influence nou pou faire pareil couma zot ek pou imite zot l’attitude.
5. Ki qualité l’attitude bann dimoune ki pé dormi lor plan spirituel ena?
5 Certain dimoune pa croire ki ena enn Bondié ki pou demann zot bann compte. (Ps. 53:1) Ena lezot pensé ki Bondié pa interessé ar bann dimoune, alors zot pa trouve okenn raison pou interessé ar Li. Ena lezot encore ki pensé ki si zot dan enn religion, sa pou faire zot vinn bann camarade ar Bondié. Tou sa bann dimoune-la pé dormi lor plan spirituel. Zot bizin sorti dan zot sommeil. Couma nou kapav aide zot?
FODÉ KI NOU-MEM NOU PA PÉ DORMI
6. Kifer bann chretien bizin faire zeffort pou pa dormi lor plan spirituel?
6 Pou nou kapav leve lezot, fodé ki nou-mem nou pa pé dormi. Ki sa impliké? Parole Bondié associé sommeil symbolik ar “bann kitsoz ki faire dan noir”—bann fête kot pena okenn controle, bann paryaz boire, bann relation sexuel immoral, enn conduite devergondé, bagarre ek jalousie. (Lire Romains 13:11-14.) Kitfois li difficile pou rejette sa qualité conduite-la. Li bien important ki nou reste lor nou garde. Enn chauffeur ki pa trouve danger pou gagne sommeil lor volant pé riské so la vie. Alors, li bien important ki enn chretien conscient ki si li gagne sommeil lor plan spirituel, sa kapav faire li perdi so la vie!
7. Couma enn fausse l’opinion lor bann dimoune kapav influence nou?
7 Par exemple, kitfois enn chretien kapav pensé ki tou dimoune dan so territoire inn fini rejette la bonne nouvelle. (Prov. 6:10, 11) Kitfois li kapav ena sa raisonnement-la: ‘Si personne pa pou accepté la bonne nouvelle, kifer nou bizin faire sa quantité zeffort-la pou aide bann dimoune?’ Oui, li possible ki beaucoup dimoune pé dormi lor plan spirituel, mais zot situation ek zot l’attitude kapav changé. Certain levé ek accepté nou message. Nou kapav aide zot si nou-mem nou pa pé dormi. Par exemple, nou kapav essaye bann nouveau fason pou presente message lor Royaume Bondié pou attire bann dimoune. Pou nou kapav reste lor nou garde ek pa dormi, nou bizin rappel kifer nou ministere li bien important.
KIFER NOU MINISTERE BIEN IMPORTANT?
8. Kifer nou ministere ena enn grand l’importance?
8 Rappel ki n’importe ki reaction bann dimoune ena zordi, nou predication honore Jéhovah ek joué enn role dan realisation so projet. Bientot, Bondié pou juge ek pou puni bann ki pa obeir la bonne nouvelle. Pou faire sa jugement-la, Li pou base-Li lor fason ki bann dimoune pé reagir ar nou predication. (2 Thess. 1:8, 9) En plus, enn chretien pou faire erreur si li pensé ki pa necessaire faire bann grand zeffort pou preché parski “pou ena enn resurrection bann dimoune ki juste ek bann dimoune ki pa juste, toulé-deux.” (Actes 24:15) Parole Bondié aide nou pou comprend ki bann dimoune ki Bondié pou juge couma “bann cabri,” pou gagne “enn destruction eternel.” A travers nou predication, Jéhovah montré so misericorde, sa aide bann dimoune pou changé ek pou gagne “la vie eternel.” (Mat. 25:32, 41, 46; Rom. 10:13-15) Si nou pa preché, couma bann dimoune pou tann message ki kapav faire zot gagne la vie?
9. Couma predication inn faire ou ek lezot gagne bann bienfait?
9 Nou aussi nou gagne bann bienfait kan nou preche la bonne nouvelle. (Lire 1 Timothée 4:16.) Eski ou pa finn remarké ki kan ou koz lor Jéhovah ek lor l’esperance ki Royaume Bondié donné, sa fortifié ou la foi ek ou l’amour pou Bondié? Eski sa pa finn aide ou pou developpe bann qualité chretien? Kan ou preché ou pé montré ou l’attachement pou Bondié, pa vrai? Eski sa pa augmente ou la joie? Beaucoup chretien ki finn ena privilege pou enseigne lezot la verité, finn ena la joie pou trouve l’esprit saint aide sa bann dimoune-la pou ameliore zot fason vive.
VINN BANN BON OBSERVATEUR
10, 11. (a) Couma Jésus ek Paul ti montré ki zot ti bann bon observateur? (b) Montré couma nou kapav ameliore nou ministere kan nou vinn bann bon observateur.
10 Nou kapav servi different fason pou faire bann dimoune interessé ar la bonne nouvelle. Alors, bann proclamateur bizin vinn bann bon observateur. Jésus inn laisse nou enn bon l’exemple. Li ti parfait, alors li ti kapav trouvé ki enn Pharisien ti en colere mem si sa Pharisien-la pa ti dire nanyin. Li ti kapav trouve repentance sincere enn madame ki ti faire peché ek l’esprit sacrifice ki enn veuve ti manifesté. (Luc 7:37-50; 21:1-4) Jésus ti kapav donne sa bann dimoune-la seki zot ti bizin lor plan spirituel. Mais enn serviteur Bondié, li pa bizin parfait pou vinn enn bon observateur. L’exemple l’apotre Paul montré nou sa. Li ti adapté so presentation pou attire tou sorte qualité dimoune.—Actes 17:22, 23, 34; 1 Cor. 9:19-23.
11 Si nou faire zeffort pou vinn bann bon observateur couma Jésus ek Paul, nou pou trouve bann bon fason pou faire bann dimoune interessé ar nou message. Par exemple, kan ou joinde bann dimoune, rod bann ti detail ki kapav faire ou koné ki zot croyance, bann kitsoz ki interesse zot ou-soit ki zot situation familial. Kitfois ou kapav trouvé ki zot pé faire, ek dire deux-trois ti parole gentil lor la kan ou commence ou conversation.
12. Kan nou dan predication, kifer nou bizin faire attention ar nou bann conversation?
12 Enn bon observateur pa laisse-li distraire par bann lezot kitsoz. Bann conversation ki nou gagné avek sa proclamateur avek ki nou pé preché-la kapav encourage nou. Mais selman, fodé pa nou blié ki nou l’objectif kan nou dan predication, c’est pou preché. (Eccl. 3:1, 7) Alors, nou bizin veillé ki bann conversation ki nou gagné entre deux lakaz pa empeche nou preché. Kan nou discute lor bann l’idée ki nou kapav servi avek bann dimoune ki interessé, c’est enn bon fason pou fixé nou l’esprit lor nou l’objectif. Mem si parfois enn portable kapav aide nou dan nou ministere, nou bizin faire attention ki enn call telephone pa derange nou dan nou conversation avek enn dimoune.
MONTRÉ ENN L’INTERET PERSONNEL
13, 14. (a) Couma nou kapav koné ki interesse enn dimoune? (b) Ki kapav faire bann dimoune interessé ar bann kitsoz spirituel?
13 Bann proclamateur ki bann bon observateur ecoute bien bann dimoune ki zot joinde. Ki question ou kapav posé pou encourage enn dimoune dan ou territoire pou exprime so bann sentiment? Eski li tracassé ar quantité religion ki ena, bann violence ki ena dan so l’endroit, ou-soit parski bann gouvernement pa pé reussi reglé bann probleme? Eski ou kapav aide sa dimoune-la pou interessé ar bann kitsoz spirituel? Ou kapav faire sa kan ou faire bann commentaire lor fason extraordinaire ki Bondié finn faire bann creature vivant, ou-soit kan ou montré ki bann conseil biblik ena enn valeur pratik. Bann dimoune different culture, mem bann dimoune ki pa croire dan Bondié, interessé ar la priere. Beaucoup demann-zot si ena enn kikenn ki ecoute bann la priere. Lezot kitfois envie konn reponse sa bann question-la: Eski Bondié ecoute tou bann la priere? Sinon, ki nou bizin faire pou Bondié ecoute nou?
14 Kitfois nou kapav aprann pou commence bann bon conversation kan nou observe bann proclamateur ki ena l’experience. Guetté couma zot evite donne l’impression ki coumadir zot pé faire enn l’enquete ou-soit ki zot pé rente dan la vie privé bann dimoune. Couma ton zot la voix ek l’expression zot figure montré ki zot comprend seki dimoune-la pensé?—Prov. 15:13.
BONTÉ EK EFFICACITÉ
15. Kifer nou bizin agir avek bonté kan nou preché?
15 Eski ou content kan leve ou dan enn profond sommeil? Beaucoup dimoune pena enn bon reaction kan leve zot brite. Zot prefere ki leve zot avek douceur. Li pareil kan nou essaye tire enn dimoune dan so sommeil spirituel. Par exemple, si enn dimoune en colere kan ou pé preche ar li, en general ki pli bon ou faire? Avek bonté, prend so bann sentiment en consideration, remercié li pou so franchise, ek avek calme sorti, allé. (Prov. 15:1; 17:14; 2 Tim. 2:24) Parski ou finn agir avek bonté, sa kapav pousse li pou reagir dan enn fason positif prochaine fois ki bann Témoins passe kot li.
16, 17. Couma nou kapav agir avek discernement dan nou ministere?
16 Dan lezot situation, kitfois ou kapav contigne ou conversation mem si dimoune-la dire ou ki li pa interessé ou-soit ki li ena so prop religion. Kitfois li pé dire ou sa zis parski li envie arrete sa conversation-la. Pourtant, dan enn fason efficace ek avek bonté, ou kapav pose enn question ki pou faire sa dimoune-la interessé ar bann kitsoz spirituel.—Lire Colossiens 4:6.
17 Parfois kan nou joinde bann dimoune ki dire nou zot trop occupé ek zot pa pou kapav ecoute nou, li bon ki nou prend sa compte ek nou allé. Mais parfois, ou pou trouvé ki en deux-trois mot, ou kapav dire enn kitsoz ki pou touche li. Certain proclamateur reussi ouvert la Bible, lire enn verset ki pou faire dimoune-la reflechi, ek quitte li avek enn question—tousala dan moins ki enn minute. Parfois, sa presentation bien precis-la inn tellement capté l’attention bann dimoune ki zot finn trouvé ki zot pa trop occupé pou gagne enn ti conversation. Kifer ou pa essaye faire sa kan situation permette?
18. Ki nou kapav faire pou nou vinn pli efficace kan nou rann temoignage informel?
18 Kan nou joinde bann dimoune dan nou bann l’activité toulé-jour, souvent nou kapav faire zot interessé ar la bonne nouvelle si nou finn prepare-nou pou rann temoignage informel. Beaucoup frere ek soeur amenn bann publication dan zot poche ou-soit dan zot sac. Kitfois zot ena aussi enn verset la Bible bien precis dan zot l’esprit pou partage avek lezot si zot gagne l’occasion. Ou kapav koz avek surveillant service ou-soit bann pionnier dan ou congregation ki kapav aide ou pou rann temoignage informel.
AVEK DOUCEUR, LEVE NOU FAMILLE LOR PLAN SPIRITUEL
19. Kifer nou bizin contigne faire zeffort pou aide nou famille?
19 Li normal ki nou envie ki nou famille accepté la bonne nouvelle. (Jos. 2:13; Actes 10:24, 48; 16:31, 32) Si zot pa’nn ecoute nou premier fois, sa kapav diminué nou l’enthousiasme pou essaye encore enn fois. Nou kapav pensé ki pena beaucoup kitsoz ki nou kapav dire ou-soit faire pou change zot l’attitude. Mais selman, ena bann l’evenement ki kapav change la vie ou-soit fason pensé nou famille. Ou-soit li kapav arrivé ki nou-mem nou finn ameliore nou capacité pou explik la verité ek ki asterla nou kapav gagne enn pli bon resultat.
20. Kifer li important ki nou ena tact kan nou koz avek nou famille?
20 Fodé pa ki nou reste indifferent ar bann sentiment nou famille. (Rom. 2:4) Eski nou pa bizin koz avek zot avek bonté pareil couma nou koz avek bann dimoune dan predication? Koz avek douceur ek respé. Au lieu ki touletan ou koz la Bible ar zot, montré zot couma la verité inn faire ou di-bien. (Éph. 4:23, 24) Explik zot dan enn fason clair couma Jéhovah inn faire ou gagne enn pli bon la vie parski Li’nn “enseigne [ou] pou [ou] profit.” (Is. 48:17) Faire ou famille trouvé par ou l’exemple couma enn chretien bizin vive.
21, 22. Donne enn l’exemple ki montré ki nou bizin perseveré dan nou zeffort pou aide nou famille lor plan spirituel.
21 Pa trop longtemps enn soeur ti ecrire: “Par mo bann parole ek mo conduite mo finn touletan essaye rann temoignage avek mo 13 frere ek soeur. Mo pa laisse enn l’année passé sans ki mo ecrire sakenn parmi zot. Mem sa, pendant 30 an, zis mo tousel ti Témoin dan mo famille.”
22 Sa soeur-la ti dire aussi: “Enn jour, mo ti telephone enn mo bann soeur ki reste plusieurs centaine kilometre depuis kot mo resté. Li ti dire moi ki li ti demann so pasteur pou etudié la Bible avek li, mais jamais li pa ti faire nanyin. Kan mo ti dire li ki mo ti pou bien content aide li, li ti dire: ‘D’accord, mais mo fini dire toi asterla-mem: jamais mo pou vinn enn Témoin de Jéhovah.’ Mo ti posté li livre Ki la Bible enseigné vrai-mem? ek apré chaque deux-trois jour mo ti telephone li. Mais li pa ti encore ouvert livre-la. Finalement, mo ti demann li pou amenn so livre, ek pendant apepré 15 minute lor telephone nou ti lire ek discute certain passage la Bible ki ti’nn cité dan sa livre-la. Apré ki nou’nn faire sa deux-trois fois, li ti envie etudié pou plus ki 15 minute. Apré, c’est li-mem ki ti commence appel moi pou so l’etude, parfois avant-mem ki mo ti leve lor mo lili ek parfois deux fois par jour. L’année apré li ti prend bapteme, ek enn an plitar, li ti commence faire pionnier.”
23. Kifer nou bizin contigne faire bann zeffort pou aide bann dimoune levé lor plan spirituel?
23 Nou bizin vinn efficace ek contigne faire bann zeffort pou aide bann dimoune pou levé lor plan spirituel. Oui, bann dimoune humble encore pé reagir ar la bonne nouvelle. En moyenne, plus ki 20,000 dimoune toulé-mois prend bapteme. Alors, anou prend compte conseil ki Paul ti donne Archippe, enn chretien premier siecle: “Contigne veille lor ministere ki to finn accepté dan nou Seigneur, pou ki to accompli li.” (Col. 4:17) Prochain lartik pou aide nou pou comprend kifer nou travail predication bien urgent.
[L’encadré page 13]
KI OU BIZIN FAIRE POU PA DORMI LOR PLAN SPIRITUEL
▪ Reste bien occupé pou faire volonté Bondié
▪ Evite bann pratik ki faire dan noir
▪ Rappel ki li dangereux pou dormi lor plan spirituel
▪ Garde enn l’attitude positif lor bann dimoune dan ou territoire
▪ Essaye bann nouveau fason pou preche avek lezot
▪ Rappel ki ou ministere bien important