Couma Nous Kapav Donne Nou Bann Familles, Témoignage?
1. Kifer nous bizin discernement kan nous pé donne nou bann familles témoignage?
1 Rentre dans le monde nouveau ensam avec nou bann familles, ek servi Jéhovah avec zot dans l’unité, péna pli grand la joie ki sa! Sa kapav vinn enn réalité si nous donne zot témoignage. Mais, pou faire sa dans enn façon ki zot pou accepté, nous bizin éna discernement. Enn surveillant circonscription ti faire sa remarque-la: “Bann Chrétiens ki, de temps en temps koz lor bann sujets ki éveille l’intérêt zot bann familles, gagne bann pli bon résultats.” Mais couma nous kapav faire sa?
2. Couma eski enn l’intérêt sincère pou ou bann familles kapav aide ou pou faire zot envie konn plus?
2 Éveille Zot l’Interêt: Réfléchi à l’avance couma ou kapav éveille l’intérêt ou bann familles. (Prov. 15:28) Ki kitsoz intéresse zot ek tracasse zot? Ki problèmes zot gagné? Kitfois ou kapav montré zot enn l’article ou-soit cite enn verset Biblique lor enn sujet ki pou intéresse zot. Si ou bann familles pa reste près kot ou, kitfois ou kapav faire sa par lettre ou-soit par téléphone. Sans ki ou trop touffe zot, sème bann grains la vérité dans zot léker, ek faire confiance en Jéhovah pou ki Li faire sa bann la-grains-la poussé.—1 Cor. 3:6.
3. Couma eski l’intérêt ki nou bann familles manifesté pou nous kapav ouvert chemin pou donne zot enn témoignage?
3 Guette séki Jésus ti dire enn misié lor ki li ti’nn tire beaucoup démons: “Al dans to famille, ek raconte zot tou séki Jéhovah finn faire pou toi ek couma Li’nn éna pitié pou toi.” (Marc 5:19) Imaginé ki l’effet sa finn éna lor so famille! Même si ou pa’nn faire sa qualité l’expérience-la, sûrement ou bann familles intéressé avec bann kitsoz ki ou ek ou bann zenfants faire. Si ou koz lor enn devoir ki ou’nn faire dans l’École du Ministère Théocratique, enn l’assemblée ki ou’nn assisté, visite ki ou’nn faire au Béthel, ou-soit enn l’évenement spécial, kitfois sa kapav ouvert chemin pou faire zot konn plus lor Jéhovah ek so l’organisation.
4. Ki bann pièges nous bizin évité kan nous pé donne témoignage nou bann familles?
4 Nous Bizin Éna Discernement: Kan ou pé donne témoignage ou bann proches, évite dire zot trop beaucoup enn seul coup. Enn frère rappelle l’époque kan li ti fek commence étudié la Bible. Li reconnaite: “Mo ti touffe mo maman avec bann l’explications lor presque tou séki mo ti aprann dans la Bible, ek souvent sa ti fini par bann la-guerres, surtout avec mo papa.” Même si enn membre ou famille montré l’intérêt pou la vérité, réponn li dans enn façon ki pou éveille so l’intérêt. (Prov. 25:7) Li bon ki ou toujours montré respect, bonté ek patience, pareil couma ou pou faire kan ou koz avec bann étrangers dans la prédication.—Col. 4:6.
5. Ki nous bizin faire si nou bann familles pa intéressé kan nous prêche avec zot?
5 Ti arrive enn moment kot bann familles Jésus ti pensé ki li ti’nn perdi la tête. (Marc 3:21) Mais plitar, certains inn vinn bann croyants. (Actes 1:14) Si, ou bann familles pa’nn écoute ou premier fois ki ou’nn donne zot témoignage, pa baisse lé bras. Bann circonstances ek l’attitude bann dimoune kapav changé. Contigne rode bann lézot l’occasion pou partage enn pensée ki kapav éveille zot l’intérêt. Kitfois ou pou gagne la joie pou aide zot pou commence marche lor chemin la vie pou touletan.—Mat. 7:13, 14.