Kisannla ki ecoute la priere?

SI ENA enn kikenn ki ecoute la priere, li logik ki li bizin le Createur. A part sa Createur ki finn crée ou cerveau-la, kisannla pou kapav lire ou bann pensée? A part Li, kisannla pou kapav reponn bann la priere ek donne bann dimoune l’aide ki zot bizin? Mais kitfois ou demann ou-mem: ‘Eski li logik pou croire dan enn Createur?’

Beaucoup dimoune pensé ki pou croire dan enn Createur, bizin rejette bann preuve ki la science moderne donné. Mais sa pensée-la li pa vrai. Guette seki prochain paragraphe montré.

◼ Dapré enn l’etude ki’nn faire pa trop longtemps avek 1,646 professeur science dan 21 grand l’université en Amérique, selman enn tiers ti choisir option, “Mo pa croire dan Bondié,” pou decrire zot fason pensé.

Sa montré ki beaucoup scientifik croire ki Bondié existé.

Preuve ki ena enn Createur

Eski sa vedir ki nou bizin accepté sans okenn preuve ki ena enn Kikenn ki ecoute nou la priere? Pa ditou. Li pa vrai pou dire ki la foi vedir croire dan enn kitsoz sans ki ena bann preuve. La Bible decrire la foi couma “enn preuve sur ki bann kitsoz ki pourtant nou pa trouvé, zot enn realité.” (Hébreux 11:1) Enn lot traduction la Bible dire ki la foi “faire nou ena l’assurance dan bann realité ki nou pa trouvé.” (The New English Bible) Par exemple, ou pa kapav trouve bann onde radio, mais ou telephone portable montré bien ki sa bann onde invisible ki transmette la voix-la, existé; alors, ou accepté ki ena sa bann onde-la. Li pareil pou nou aussi, mem si nou pa trouve sa Kikenn ki ecoute la priere-la, ena bann preuve ki nou kapav examiné pou convaink nou ki Li vrai-mem existé.

Kot-sa nou kapav gagne bann preuve ki Bondié existé? Nou zis bizin guette autour nou. Guette raisonnement ki ena dan la Bible: “Bien sur, tou lakaz inn construire par enn kikenn, mais Celui ki finn crée tou kitsoz, c’est Bondié.” (Hébreux 3:4) Eski ou d’accord avek logik ki ena dan sa raisonnement-la? Kan ou reflechi lor l’ordre ki ena dan l’univers, couma la vie inn commencé, ou-soit-mem lor nou cerveau, kitsoz pli compliké ki ena lor la terre, kitfois ou dire ki bizin ena enn kikenn ki pli grand ki bann dimoune.a

Mais la creation kapav enseigne nou zis certain kitsoz lor Bondié. Kan nou observe la creation pou trouve bann preuve ki Bondié existé, c’est coumadir nou tann bann pas enn dimoune ki pé vini, derriere enn la porte ki fermé. Ou koné ena enn kikenn derriere la porte, mais ou pa koné kisannla sa! Pou ou koné, ou bizin ouvert la porte-la. Nou bizin faire pareil si nou envie koné kisannla ki derriere la creation.

La Bible c’est enn la porte ki permette nou aprann lor Bondié. Kan ou ouvert sa la porte-la ek ou examine certain so bann prophetie ki bien detaillé ek zot realisation, ou pou trouve bann preuve ki Bondié existé.b Mais en plus, bann recit ki koz lor fason ki Bondié agir avek bann dimoune, montré personnalité sa Kikenn ki ecoute la priere-la.

Ki nou koné lor sa Bondié-la?

La Bible faire nou koné ki sa Kikenn ki ecoute bann la priere-la Li enn personne ek ki nou kapav aprann pou konn Li. Pena doute ki zis enn personne ki kapav ecoute ek comprend nou. Sa rassure-nou kan nou lire: “Toi ki ecoute la priere, oui tou qualité dimoune pou vinn vers toi.” (Psaume 65:2) Li ecoute bann ki prié Li avek la foi. Ek Li ena enn nom. La Bible dire: “Jéhovah loin ar bann mauvais dimoune, mais Li ecoute la priere bann dimoune juste.”​—Proverbes 15:29.

Jéhovah ena bann sentiment. Li enn “Bondié l’amour” ek la Bible appel Li “Bondié heureux.” (2 Corinthiens 13:11; 1 Timothée 1:11) Dan enn lepok kot mechanceté ti pé rempli la terre, guette seki la Bible dire lor so reaction: “So leker ti faire mal.” (Genèse 6:5, 6) Alors, li pa vrai kan certain dire ki Bondié faire bann dimoune souffert pou testé zot. La Bible dire: “Jamais vrai Bondié pou faire le mal.” (Job 34:10) Mais, kitfois ou demann ou-mem: ‘Si Bondié Li Createur Tout-Puissant, kifer Li permette ki la souffrance contigné?’

Jéhovah inn donne bann dimoune liberté pou choisir, ek sa montré nou ki qualité Bondié Li été. Eski nou pa apprecié liberté ki nou ena pou choisir couma nou pou vive? Mais malheureusement, beaucoup dimoune pa bien servi zot liberté ek faire zot-mem ek lezot souffert. Asterla, anou guette enn question ki vaut la peine ki nou bien reflechi: Couma Bondié pou kapav tire la souffrance sans ki Li prive bann dimoune ar zot liberté? Nou pou examine sa question-la dan prochain lartik.

[Notes]

[L’encadré page 5]

Eski la religion faire ou douté ki Bondié existé?

Malheureusement, c’est la religion ki faire beaucoup dimoune douté ki ena enn Kikenn ki ena compassion, ki ecoute bann la priere. Kan la religion implik-li dan la guerre, dan terrorisme, ek tolere bann agression sexuel lor bann zenfant, sa pousse mem bann dimoune ki habitué prié Bondié pou dire: “Mo pa croire dan Bondié.”

Kifer souvent la religion faire bann mauvais kitsoz? Parski bann mauvais dimoune finn faire bann mauvais kitsoz au nom la religion. La Bible ti predire ki ti pou ena bann dimoune ki ti pou controle vrai religion chretien ek servi li pou faire bann kitsoz ki contraire ar volonté Bondié. L’apotre Paul ti dire bann surveillant chretien: “Parmi zot-mem, pou ena bann zom ki pou levé ek pou deforme la verité ek pou faire bann disciple suive zot.”​—Actes 20:29, 30.

Bondié ena degout pou la fausse religion. En realité, Parole Bondié, la Bible, dire ki fausse religion responsable “di-sang . . . tou bann ki li finn touyé lor la terre.” (Révélation 18:24) Bann fausse religion coupable devant Bondié parski zot pa finn enseigne bann dimoune concernant vrai Bondié, ki enn Bondié rempli ar l’amour.​—1 Jean 4:8.

Sa Kikenn ki ecoute la priere-la ena sentiment pou bann ki victime bann religion ki domine-zot. Bientot, l’amour ki Bondié ena pou bann dimoune pou pousse-Li pou servi Jésus pou juge tou bann dimoune religieux ki hypocrite. Jésus ti dire: “Sa jour-la beaucoup pou dire moi: ‘Seigneur, Seigneur, eski c’est pa par to nom ki nou’nn prophetisé?’ . . . Pourtant, lerla, mo pou dire zot franc: Jamais mo ti konn zot! Sorti devant moi, allé, zot ki pratik seki kont la Loi.”​—Matthieu 7:22, 23.