Vinn proche ar Bondié ki ecoute la priere

BEAUCOUP dimoune ki dire zot croire dan Bondié, pa kapav expliké kifer zot ena la foi. Zot pa kapav aussi expliké kifer bann religion souvent faire bann mauvais kitsoz ek kifer Bondié permette la souffrance. Tou seki zot kapav faire c’est zis prié enn Bondié mem si zot pa comprend kifer Li permette la souffrance.

Mais ou, ou kapav vinn pli proche ar Bondié, ki sa bann dimoune-la. Ou kapav augmente ou la foi lor enn connaissance Bondié ki pou faire ou content Li ek faire Li ena l’importance dan ou la vie. Vrai la foi basé lor bann preuve. (Hébreux 11:1) Si ou aprann la verité lor Bondié, ou pou kapav konn Li ek koz ar Li couma enn camarade. Anou guette l’experience certain ki ti habitué prié mem si zot ti ena bann doute lor l’existence Bondié.

◼ Patricia, ki nou ti mentionné dan premier lartik. “Enn jour, mo ti avek enn groupe kot ti ena apepré dix camarade ek zot ti commence discute lor la religion. Mo ti dire zot ki mo ti sorti kot moi pou evite tann enn conversation entre mo papa, ki ti enn athée, ek enn Témoin de Jéhovah ki ti vinn visite nou. Enn mo bann camarade ti dire: ‘Kitfois bann Témoins de Jéhovah ena raison.’

“Enn lot ti dire: ‘Kifer nou pa al dan enn zot bann reunion pou nou koné?’ Et c’est seki nou ti faire. Mem si nou ti ena bann doute, certain parmi nou ti contigne al reunion zis parski bann Témoins ti bien amical.

“Selman, enn dimanche, mo ti tann enn kitsoz ki ti change mo l’attitude. Orateur-la ti expliké kifer bann dimoune souffert. Jamais mo pa ti comprend ki au commencement Bondié ti crée bann dimoune parfait ek ki peché ek la mort ti commencé avek enn zom ek plitar tou dimoune ti faire peché ek ti mort. Orateur-la ti expliké aussi kifer la mort Jésus ti necessaire pou ré-donne l’humanité seki premier zom ti perdi.a (Romains 5:12, 18, 19) Enn coute, tou ti ena enn sens pou moi. Mo ti tire sa conclusion-la: ‘Vrai-mem ena enn Bondié ki interessé ar nou.’ Mo ti contigne etudié la Bible ek bien vite, pou premier fois dan mo la vie, mo ti’nn decouvert ki mo ti kapav prié enn kikenn ki vrai-mem existé.”

◼ Allan, ki nou ti aussi mentionné dan premier lartik. “Enn jour, bann Témoins de Jéhovah ti vinn visite nou, ek mo madame ti invite zot pou rentré parski li ti interessé ar seki zot ti pé dire lor la vie eternel lor la terre. Mo ti agacé. Alors, nou ti laisse bann visiteur-la dan salon, mo ti amenn mo madame dan la cuisine ek mo ti dire li: ‘Ki to pé gagné, to pa kapav croire bann kitsoz coumsa!’

“Li ti reponn moi: ‘Eh bien, to nek ena pou al dan salon ek prouve zot ki seki zot pé dire pa vrai.’

“Bien sur, mo pa ti kapav prouve nanyé. Mais zot ti bien gentil ek zot ti quitte enn livre ar moi ki koz lor la vie, si la vie inn crée ou-soit inn evolué. Logik ki ti ena dan sa livre-la ti tellement clair ek bien developpé ki mo ti decidé pou konn plus lor Bondié. Mo ti commence etudié la Bible avek bann Témoins, ek mo pa ti tardé pou rann-moi compte ki seki la Bible dire bien different ar tou seki mo ti croire avant lor la religion. A mesure ki mo ti aprann lor Jéhovah, mo ti commence prié Li dan enn fason pli precis. Mo ti ena bann mauvais maniere, alors mo ti prié pou gagne l’aide Bondié. Mo sur ki Jéhovah ti reponn mo bann la priere.”

◼ Andrew, ki reste en Angleterre. “Mem si mo ti ena bann l’opinion bien ferme ek mo ti bien interessé ar la science, mo ti croire dan theorie l’evolution surtout parski lezot dimoune ti dire ki c’est enn kitsoz ki’nn prouvé. Mo pa ti croire Bondié a cause tou bann mauvais kitsoz ki pé arrivé.

“Pourtant, parfois mo ti reflechi ek mo ti dire: ‘Si ena enn Bondié la-haut, alors mo envie koné ki tousala vedir. Kifer ena sa quantité violence ek la guerre-la?’ Kan mo ti dan probleme, parfois mo ti prié pou gagne l’aide, mais mo pa ti koné ar kisannla mo ti pé kozé.

“Enn tipé apré sa, enn kikenn ti donne mo madame enn tract ki publié par bann Témoins de Jéhovah, ki appel: Le monde actuel survivra-t-il ? C’est exactement sa question-la ki souvent mo ti posé. Sa tract-la ti faire moi pose enn question en rapport avek la Bible: ‘Eski li vaut la peine examine bann reponse ki li donné?’ Plitar, kan mo ti en vacance, enn kikenn ti donne moi livre La Bible : Parole de Dieu ou des hommes ?b Kan mo ti rann-moi compte ki la Bible en accord avek vrai science, mo ti ena sentiment ki mo ti bizin aprann plus lor la Bible. Alors, kan enn Témoin de Jéhovah ti propose moi pou etudié la Bible, mo ti accepté. Kan mo ti comprend ki projet Jéhovah ena, mo ti ena l’impression ki mo ti konn Li couma enn kikenn ki réel, enn kikenn ar ki mo ti pou kapav vrai-mem kozé dan la priere.”

◼ Jan, ki ti elevé dan religion protestant, dan Londres. “L’hypocrisie ki ena dan la religion ek souffrance ki ena partout ti faire moi arrete suive la religion. Mo ti aussi arrete al l’université ek mo ti commence chanté ek joué la guitare pou gagne kass. C’est lerla ki mo ti zwenn Pat. Li ti’nn grandi dan religion catholique ek li ti vinn enn athée pareil couma moi.

“Nou ti reste dan enn lakaz abandonné ensam avek plusieurs lezot jeune ki ti’nn abandonne zot l’etude ek ki ti interessé avek bann religion oriental. Nou ti gagne bann conversation bien profond lor sens ki la vie ena, ziska bien tard a-soir. Mem si Pat ek moi nou pa ti croire dan Bondié, nou ti pensé ki bizin ena enn ‘la force ki’nn crée la vie.’

“Apré ki nou ti al vive dan le nord l’Angleterre pou rod travail couma musicien, nou garson ti né. Enn soir, li ti tombe malade, ek mo ti trouve mo-mem pé prié sa Bondié ki mo pa ti croire-la. Enn tipé apré, bann relation entre Pat ek moi ti commence deterioré, ek mo ti prend mo ti-baba, mo ti allé. Encore enn fois, mo ti prié pou gagne l’aide, zis en cas ki ti ena enn kikenn ki ti pé ecoute moi. Mo pa ti koné, mais Pat aussi ti faire pareil.

“Inpé plitar sa jour-la, deux Témoins de Jéhovah ti al preche kot Pat ek ti montré li certain conseil pratik ki ena dan la Bible. Pat ti sonne moi ek ti demann moi si mo ti pou d’accord pou etudié la Bible avek li ek bann Témoins. Nou pa ti tardé pou aprann ki nou ti bizin marié civil pou faire Bondié plaisir. Sa ti parette bien difficile parski sa pa ti pé marche bien entre nou.

“Nou ti envie konn plus lor realisation bann prophetie la Bible, pou ki raison ena la souffrance, ek lor signification Royaume Bondié. Tigit-tigit, nou ti rann-nou compte ki Bondié interessé ar bann dimoune, ek nou ti envie faire seki Li dire. Nou finn marié. Sagesse ki ena dan Parole Bondié ti aide nou pou elevé nou trois zenfant. Nou sur ki Jéhovah ti ecoute nou la priere.”

Examine bann preuve par ou-mem

Pareil couma plusieurs million lezot dimoune, bann ki’nn cité dan sa lartik-la pa finn laisse fausse religion embete zot, ek zot ti decouvert kifer Bondié permette la souffrance. Eski ou finn remarké ki dan chaque cas c’est enn connaissance exact lor la Bible ki finn convaink sa bann dimoune-la ki Jéhovah vrai-mem ecoute la priere?

Eski ou ti pou content examine bann preuve ki Bondié existé? Bann Témoins de Jéhovah pou bien content aide ou pou aprann la verité lor Jéhovah ek couma ou kapav vinn proche ar sa Bondié “ki ecoute la priere[-la].”​—Psaume 65:2.

[Note]

[L’encadré page 10]

“Kan mo ti comprend ki projet Jéhovah ena, mo ti ena l’impression ki mo ti konn Li couma enn kikenn ki réel, enn kikenn ar ki mo pou kapav vrai-mem kozé dan la priere.”

[Zimage page 9]

Vrai la foi basé lor bann preuve ek lor desir pou konn la verité lor Bondié