“Pou kisannla mo pou bizin ena la frayeur?”
“Mem si enn la guerre levé kont moi, kan-mem sa mo pou ena confiance.”—PS. 27:3.
DAPRÉ SA BANN VERSET-LA, KI KAPAV AIDE OU POU ENA COURAGE?
Psaume 27:1
Psaume 27:4
Psaume 27:11
1. Ki Psaume 27 pou aide nou pou comprend?
KIFER nou l’activité predication pé augmenté malgré ki bann condition pé vinn pli difficile dan le monde? Kifer nou pé donne nou le temps ek nou la force volontairement, alors ki beaucoup dimoune pé konn bann grand probleme economik? Couma nou kapav contigne ena courage kan beaucoup lezot dimoune pé peur l’avenir? Nou gagne bann reponse dan enn cantik ki Bondié ti inspire le roi David pou ecrire dan Psaume 27.
2. Ki l’effet enn grand la frayeur kapav ena lor enn dimoune, mais ki l’assurance nou kapav ena?
2 David commence sa psaume-la coumsa: “Jéhovah Li mo la lumiere ek mo delivrance. Kisannla mo pou bizin peur? Jéhovah Li forteresse mo la vie. Pou kisannla mo pou bizin ena la frayeur?” (Ps. 27:1) La peur kapav affaibli enn dimoune, mais enn grand la frayeur kapav encore pli pire. Selman, enn kikenn ki ena confiance en Jéhovah, pena okenn raison pou laisse la frayeur bouleverse li. (1 Pierre 3:14) Kan nou faire Jéhovah nou forteresse, nou “pou reste en securité ek [nou] pou vive trankil sans ki [nou] peur okenn malheur.” (Prov. 1:33; 3:25) Kifer?
“JÉHOVAH LI MO LA LUMIERE EK MO DELIVRANCE”
3. Dan ki sens eski Jéhovah Li nou la lumiere, mais ki nou bizin faire?
3 Kan David ti dire: “Jéhovah Li mo la lumiere,” sa vedir ki Jéhovah delivré nou ar l’ignorance ek noirté spirituel. (Ps. 27:1) La lumiere kapav aide nou pou trouve enn danger ou-soit enn obstacle lor nou chemin, mais li pa pou tire li. C’est nou ki bizin koné ki pou faire. Dan mem fason, Jéhovah faire nou konn signification bann l’evenement ki ena dan le monde. Li mette nou en garde kont bann danger ki ena dan sa systeme-la. Li donne nou bann principe biblik ki touletan efficace, mais nou bizin applik seki nou aprann. Enn psalmiste ti dire ki bann commandement Jéhovah ti faire li vinn pli sage ki so bann l’ennemi ek tou so bann enseignant. Kan nou applik bann principe biblik, nou aussi nou kapav vinn bien sage.—Ps. 119:98, 99, 130.
4. (a) Kifer David ti kapav dire avek l’assurance: “Jéhovah Li mo . . . delivrance”? (b) Kan surtout eski Jéhovah pou vinn nou delivrance?
4 Bann parole David dan Psaume 27:1 montré ki li ti rappel couma Jéhovah ti’nn delivré li ou-soit ti sauve li plusieurs fois dan le passé. Par exemple, Jéhovah ti delivré li “dan la patte enn lion ek dan la patte enn l’ours.” Jéhovah ti aussi faire li gagne la victoire lor enn geant ki ti appel Goliath. Plitar, le roi Saül ti envoye enn lance lor David pou touye li, mais a chaque fois Jéhovah ti delivré David. (1 Sam. 17:37, 49, 50; 18:11, 12; 19:10) Li pa etonnant ki David ti kapav dire avek l’assurance: “Jéhovah Li mo . . . delivrance”! Jéhovah pou sauve so bann serviteur pareil couma Li ti sauve David. Couma? Kan Li pou delivré so bann adorateur pendant “la grande tribulation” ki pé vini.—Rév. 7:14; 2 Pierre 2:9.
RAPPEL CHAQUE FOIS KI JÉHOVAH FINN AIDE OU
5, 6. (a) Couma bann experience ki nou’nn faire kapav aide nou pou ena plus courage? (b) Couma seki Jéhovah inn faire pou so bann serviteur dan le passé kapav aide nou pou ena plus courage?
5 Nou trouve enn kitsoz important ki pou aide nou pou ena plus courage dan Psaume 27:2, 3. (Lire.) David ti rappel bann l’evenement kot Jéhovah ti delivré li. (1 Sam. 17:34-37) Sa bann souvenir-la ti faire li ena enn grand l’assurance ek ti permette li faire face avek bann pli grand difficulté. Eski ou aussi ou tire mem conclusion avek bann l’experience ki ou’nn faire? Par exemple, kan ou ti dan enn situation bien difficile, eski ou finn prié Jéhovah ek ou’nn trouvé couma Li finn donne ou la sagesse ou-soit la force pou faire face ar sa l’epreuve-la? Eski ou kapav rappel couma Jéhovah finn tire bann obstacle ki ti empeche ou faire ou service avek la joie? Ou-soit, eski ou rappel couma Li finn ouvert enn grand la porte ki’nn permette ou servi Li plus? (1 Cor. 16:9) Kan ou rappel sa bann l’evenement-la zordi, ki l’effet sa ena lor ou? Eski bann souvenir coumsa pa contigne convaink ou ki Jéhovah kapav aide ou pou surmonte ou-soit pou endure bann pli grand probleme ek difficulté?—Rom. 5:3-5.
6 Ki nou pou faire si enn gouvernement bien puissant faire enn complot pou detruire net l’organisation bann Témoins de Jéhovah? Beaucoup dimoune dan nou lepok finn essaye faire sa, mais zot pa’nn reussi. Kan nou reflechi couma Jéhovah finn aide so peuple dan le passé, sa pou aide nou pou guette l’avenir avek confiance.—Dan. 3:28.
NOU L’AMOUR POU VRAI L’ADORATION
7, 8. (a) Dapré Psaume 27:4, ki David ti demann Jéhovah? (b) Ki été grand temple spirituel Jéhovah, ek couma nou adore Li dan sa temple-la?
7 Enn lot kitsoz important ki faire nou agir avek courage, c’est nou l’amour pou vrai l’adoration. (Lire Psaume 27:4.) Dan lepok David, c’est tabernacle ki ti “lakaz Jéhovah”. C’est David li-mem ki ti prend bann disposition pou ki so garson Salomon construire enn joli temple. Plusieurs siecle apré, Jésus ti expliké ki ti pou arrive enn lepok kot ti pou nepli necessaire ki bann dimoune al dan temple pou zot kapav adore Jéhovah dan enn fason acceptable. (Jean 4:21-23) Dan Hébreux chapitre 8 ziska 10, l’apotre Paul ti montré ki enn grand temple spirituel ti commence existé kan Jésus ti prend bapteme en l’an 29 nou lepok, kan li ti presente-li-mem pou faire volonté Bondié. (Héb. 10:10) Sa grand temple spirituel-la, c’est disposition ki Jéhovah inn prend pou ki, a travers nou la foi dan sacrifice Jésus, nou kapav approche ar Li dan fason ki Li accepté. Couma nou adore Li dan sa temple-la? Kan nou prié “avek enn leker sincere, avek enn l’assurance total dan la foi”; kan nou preche avek courage; ek kan nou interesse-nou avek lezot adorateur Jéhovah, nou motive zot ek nou encourage zot dan reunion ek dan nou l’adoration en famille. (Héb. 10:22-25) Nou l’amour pou vrai l’adoration, fortifié nou dan sa bann dernier jour difficile-la.
8 Partout lor la terre, bann serviteur fidele Jéhovah pé faire plus dan zot ministere, zot pé aprann bann nouveau langue, ek zot pé demenagé pou al dan bann l’endroit kot bizin plus proclamateur. Pareil couma sa psalmiste-la, zot pé montré par zot action ki zot ena enn sel kitsoz pou demann Jéhovah. Zot envie apprecié bann joli qualité ki Jéhovah ena ek participe dan service sacré, n’importe ki arrivé.—Lire Psaume 27:6.
ENA CONFIANCE DAN L’AIDE BONDIÉ
9, 10. L’assurance ki ena dan Psaume 27:10, ki sa impliké?
9 David ti montré ki quantité li ti ena confiance dan l’aide Jéhovah kan li ti dire: “Mem si mo papa ek mo mama quitte moi, Jéhovah Li-mem pou ramasse moi.” (Ps. 27:10) Kan nou guette bann l’evenement ki mentionné dan 1 Samuel chapitre 22, nou koné ki bann parent David pa ti abandonne li. Mais, azordi ena beaucoup dimoune ki zot famille finn rejette zot net. Pourtant, beaucoup parmi zot finn gagne l’aide ek protection dan congregation chretien kot ena l’amour.
10 Si Jéhovah pré pou soutenir so bann serviteur kan lezot abandonne zot, eski Li pa pou aussi soutenir so bann serviteur dan n’importe ki situation difficile? Par exemple, si nou pé tracassé couma nou pou donne nou famille seki li bizin lor plan materiel, eski nou pa bizin ena l’assurance ki Jéhovah pou aide nou? (Héb. 13:5, 6) Li comprend situation tou so bann serviteur ki fidele ek Li koné seki zot bizin.
11. Kan nou ena confiance en Jéhovah, ki l’effet sa kapav ena lor lezot? Donne enn l’exemple.
11 Guette l’exemple Victoria ki ti etudié la Bible dan Libéria. Alors ki li ti pé faire bann progré pou prend bapteme, sa missié avek ki li ti pé vive-la, ti quitte li ek so trois zenfant. Mem si li pa ti ena enn lakaz ek enn travail, li ti contigne faire bann progré spirituel. Apré ki Victoria ti prend bapteme, so tifi ki ti ena 13 an ti trouve enn porte-monnaie rempli ar kass. Pou evite tombe dan tentation, zot ti decidé pou pa mem compte sa kass-la. Au contraire, zot ti degazé prend contact ar soldat ki ti perdi sa porte-monnaie-la. Li ti dire zot si tou dimoune ti honnete pareil couma bann Témoins de Jéhovah, bann dimoune ti pou vive pli bien ek ti pou ena plus la paix dan le monde. Victoria ti servi la Bible pou montré sa soldat-la promesse Jéhovah concernant enn monde nouveau. Sa soldat-la ti tellement impressionné par l’integrité Victoria ki li ti donne li enn gros somme l’argent dan sa kass ki Victoria ti retourne li-la. Oui, bann Témoins de Jéhovah ena confiance dan capacité ki Jéhovah ena pou soutenir zot. A cause sa, bann dimoune a travers le monde konn zot couma bann dimoune honnete.
12. Ki nou montré kan nou contigne servi Jéhovah mem si nou perdi bann kitsoz lor plan materiel? Donne enn l’exemple.
12 Maziné ki Thomas, enn proclamateur ki pa ti encore baptisé dan Sierra Leone, kitfois ti ressenti. Li ti commence travail professeur dan enn lekol secondaire, mais li pa ti kapav gagne so la paye pendant preské enn an parski tou demarche en rapport avek so bann papier pa ti encore fini. Ki dernier kitsoz Thomas ti bizin faire avant ki li ti pou gagne so la paye ek so bann remboursement? Li ti bizin faire enn interview avek responsable sa lekol-la, ki ti enn pretre. Sa pretre-la ti explik Thomas ki sa lekol-la pa ti accepté bann croyance Témoins de Jéhovah. Li ti oblige Thomas pou choisir entre so travail ek so croyance ki basé lor la Bible. Thomas ti quitte sa travail-la mem si li pa ti gagne kass ki li ti supposé gagné pendant enn an. Apré sa, li ti gagne enn lot travail. Li ti repare bann radio ek bann telephone portable. Sa l’exemple-la ek beaucoup lezot l’exemple montré ki si nou ena confiance en Jéhovah, jamais nou pa pou peur pangar nou pa gagne seki nou bizin. Parski Jéhovah inn crée tou kitsoz ek Li touletan protege so peuple, nou koné ki Li pou prend nou soin.
13. Kifer travail predication pé progressé dan bann pays kot bann dimoune pena beaucoup kitsoz lor plan materiel?
13 Dan beaucoup pays kot la vie bien difficile lor plan economik, bann proclamateur souvent bien actif. Kifer? Enn filiale ti ecrire: “Beaucoup dimoune ki accepté enn l’etude, pena travail, alors zot ena plus le temps pou etudié pendant la journée. Bann frere ek soeur aussi ena plus le temps pou preché. Li pa necessaire ki dire bann dimoune ki nou pé vive dan bann dernier jour, surtout bann ki reste dan bann l’endroit kot bann condition la vie bien difficile; zot-mem zot trouve bann condition ki ena autour zot.” Enn missionnaire ki pendant plus ki 12 an pé servi dan enn pays kot chaque proclamateur conduire en moyenne plus ki trois l’etude la Bible, ecrire: “Parski beaucoup proclamateur ena enn la vie bien simple ek enn tigit distraction, en general zot kapav passe plus le temps dan predication ek faire bann l’etude.”
14. Cite bann fason ki Bondié pou protege la grande foule.
14 Jéhovah inn promette ki Li pou aide, protege ek delivré so peuple en tant ki enn groupe, lor plan physik ek spirituel, ek nou faire Li confiance. (Ps. 37:28; 91:1-3) La foule ki pou sapé pendant “la grande tribulation” pou vrai-mem bien grand. (Rév. 7:9, 14) Alors, Bondié pou protege sa la foule-la en tant ki enn groupe pou ki li pa disparette pendant bann dernier jour sa systeme-la. Jéhovah pou aussi donne zot tou seki zot bizin pou endure bann l’epreuve ek garde zot bann bon relation avek Li. Ek pendant dernier l’etape sa grand tribulation-la, Jéhovah pou protege so peuple.
“ENSEIGNE MOI DAN TO CHEMIN, O JÉHOVAH”
15, 16. Couma nou gagne bann bienfait kan nou suive bann l’instruction ki Bondié donné? Donne enn l’exemple.
15 Pou nou touletan ena courage, nou bizin contigne laisse Bondié enseigne nou. Nou trouve sa bien dan seki David ti demann Bondié: “Enseigne moi dan to chemin, o Jéhovah, ek guide moi dan sa sentier ki droite-la, a cause mo bann l’ennemi.” (Ps. 27:11) Agir en accord avek sa la priere-la vedir ki nou ecoute bien tou bann l’instruction biblik ki nou gagné a travers l’organisation Jéhovah ek ki nou pa tardé pou applik zot. Beaucoup, ki finn paye zot bann dette, kapav confirmé couma kan zot finn applik bann conseil sage pou simplifié zot la vie, sa finn aide zot pendant crise economik. Au lieu ki zot bizin travail dur pou contigne paye pou bann kitsoz ki zot pa vrai-mem bizin, zot libre pou faire plus dan predication. Sakenn parmi nou bizin demann-li-mem: ‘Eski mo applik desuite tou seki mo lire dan la Bible ek dan bann publication ki l’esclave fidele et avisé donne nou, mem si mo bizin faire bann sacrifice dan mo la vie personnel?’—Mat. 24:45.
16 Kan nou laisse Jéhovah enseigne nou ek guide nou lor sa sentier ki droite-la, nou pa pou ena okenn raison pou peur. Kan enn pionnier permanent dan l’Amérique ti faire enn application pou enn travail ki ti pou aide so famille contigne faire pionnier, so supervisor ti dire li ki jamais li pou gagne sa travail-la sans enn diplome l’université. Si sa ti arrive ou, eski ou ti pou regretté ki ou finn choisir pou faire pionnier au lieu ki ou finn faire bann grand l’etude? Deux semaine plitar, contrat sa supervisor-la ti fini, ek enn lot manager ti demann sa frere-la ki l’objectif li ti ena. Li ti expliké ki li ek so madame zot bann Témoins de Jéhovah, zot preche a plein temps ek ki zot ti pou content contigné. Avant ki frere-la ti dire enn lot kitsoz, manager-la ti dire: “Mo ti koné ki ena enn kitsoz different avek ou! Kan mo papa ti pré pou mort, deux parmi ou bann camarade ti vinn lire la Bible avek li toulé-jour. Mo ti promette ki si jamais mo gagne enn l’occasion pou aide enn Témoin de Jéhovah, mo pou faire li.” Lendemain gramatin, sa frere-la ti gagne travail ki sa ancien supervisor-la ti refuse pou donne li. Vrai-mem, kan nou mette bann l’interet Royaume Bondié en premier dan nou la vie, Jéhovah pou tini so promesse pou donne nou tou seki nou bizin.—Mat. 6:33.
LA FOI EK L’ESPERANCE BIEN IMPORTANT
17. Ki pou permette nou faire face ar l’avenir avek confiance?
17 Apré, David montré ki la foi ek l’esperance bien important kan li dire: “Si mo pa ti’nn ena la foi ki mo ti pou trouve bonté Jéhovah dan pays bann vivant . . . !” (Ps. 27:13) Avredir, kot-sa nou ti pou été sans sa l’esperance ki Bondié donne nou-la ek si nou pa ti konn bann kitsoz ki nou finn examiné dan Psaume 27! Alors, anou contigne prié avek confiance pou gagne la force ek delivrance pendant ki nou pé faire face ar bann l’evenement ki pé amenn nou vers Har-Maguédôn.—Lire Psaume 27:14.
[Zimage page 23]
David ti gagne la force kan li ti rappel bann delivrance ki Jéhovah ti faire
[Zimage page 25]
Eski nou trouve crise economik couma enn l’occasion pou faire plus dan nou ministere?