Enn confiance total en Jéhovah faire nou senti-nou en securité
“Jéhovah Li-mem pou tendé kan mo pou appel Li.”—Ps. 4:3.
1, 2. (a) Dan ki situation bien dangereux David ti été? (b) Ki deux psaume nou pou examiné?
LE ROI David ti regne lor Israël pendant enn certain temps, mais asterla li ti pé faire face ar enn situation bien dangereux. So garson Absalom, ki ti pé comploté kont li, ti’nn faire li-mem vinn le roi ek David ti obligé quitte Jérusalem. Enn conseiller en ki li ti ena confiance, ti’nn trahir li, ek asterla, avek deux trois dimoune ki ti encore fidele envers li, David ti pé ploré ek li ti pé marche pied-nu lor mont des Oliviers. En plus, Shiméï, ki ti dan enn famille ki ti reste dan lakaz Saül, ti jette bann roche ek la poussiere lor David ek en mem temps li ti pé maudit David.—2 Sam. 15:30, 31; 16:5-14.
2 Eski sa l’epreuve-la ti pou faire David mort dan chagrin ek deshonneur? Non, parski li ti ena confiance en Jéhovah. Nou trouve sa bien dan Psaume 3, ki David ti ecrire kan li ti pé sauvé a cause Absalom. Li ti aussi ecrire Psaume 4. Toulé-deux psaume montré l’assurance ki Bondié ecoute ek reponn bann la priere. (Ps. 3:4; 4:3) Sa bann psaume-la donne nou l’assurance ki la-nuit li-jour, Jéhovah Li avek so bann serviteur ki fidele, Li beni zot, Li soutenir zot ek Li donne zot la paix ek enn sentiment securité. (Ps. 3:5; 4:8) Alors, anou examine sa bann psaume-la ek guetté couma zot faire nou senti-nou en securité ek faire nou ena confiance en Bondié.
Kan ‘beaucoup pé leve kont nou’
3. Dapré Psaume 3:1, 2, dan ki situation David ti été?
3 Enn messager ti vinn dire David: “Leker bann zom en Israël avek Absalom.” (2 Sam. 15:13) David ti demann li-mem couma Absalom ti reussi rassemblé sa quantité dimoune-la dan so coté. Li ti dire: “Ah Jéhovah, kifer mo bann l’ennemi inn vinn beaucoup? Kifer beaucoup pé leve kont moi? Beaucoup pé dire lor mo nâme: ‘Pena delivrance pou li ar Bondié.’” (Ps. 3:1, 2) Beaucoup Israélite ti pensé ki Jéhovah pa ti pou delivré David ar malheur ki Absalom ek so bann zom ti pé faire li gagné.
4, 5. (a) Ki l’assurance David ti ena? (b) Ki sa vedir “to-mem ki leve mo la tête”?
4 Mais David ti senti-li en securité parski li ti ena enn confiance total en Bondié. Li ti chanté: “Pourtant toi, o Jéhovah, to enn bouclier autour moi, to mo la gloire ek to-mem ki leve mo la tête.” (Ps. 3:3) David ti sur ki Jéhovah ti pou protege li pareil couma enn bouclier protege enn soldat. Oui, sa le roi agé-la ti pé sauvé, li ti couvert ek li ti baisse so la tête parski so bann l’ennemi ti’nn humilié li. Sa Kikenn ki Pli Grand-la ti pou change situation David ek ti pou faire li gagne la gloire. Jéhovah ti pou faire li deboute droite, Li ti pou leve so la tête ek faire li garde so la tête haute. David ti criyé vers Bondié avek l’assurance ki Li ti pou reponn li. Eski ou manifesté mem confiance en Jéhovah?
5 Kan David dire “to-mem ki leve mo la tête,” li ti reconette ki Jéhovah ti pou aide li. Dan enn traduction la Bible, (Today’s English Version) nou lire: “Mais toi, o Seigneur, to toujours mo bouclier kont bann danger; to donne moi la victoire ek to redonne moi mo courage.” En rapport avek l’expression “to-mem ki leve mo la tête,” enn livre dire: “Kan Bondié leve . . . la ‘tête’ enn dimoune, Li rempli li avek l’espoir ek confiance.” Kan li ti obligé abandonne trone Israël, David ti ena enn bon raison pou li decouragé. Selman, kan Bondié ti ‘pou leve so la tête’ sa ti pou ré-donne David courage, l’assurance ek enn confiance total en Bondié.
‘Jéhovah pou reponn!’
6. Kifer David ti dire ki Jéhovah ti reponn so la priere depuis So montagne ki saint?
6 David ti ena confiance en Jéhovah ek li ti koné ki Li reponn bann la priere. David ajouté: “Avek mo la voix, mo pou appel Jéhovah Li-mem, ek Li pou reponn moi lor so montagne ki saint.” (Ps. 3:4) Dapré bann l’ordre ki David ti donné, ti’nn amenn l’arche de l’alliance, ki ti enn symbol presence Bondié, lor montagne Sion. (Lire 2 Samuel 15:23-25.) Alors, li ti approprié ki David dire ki Jéhovah ti reponn so la priere depuis So montagne ki saint.
7. Kifer David pa ti peur?
7 David ti sur ki so la priere ar Bondié pa ti pou dan vide ek a cause sa, li pa ti peur. Au contraire, li ti chanté: “Moi, mo pou al allongé pou mo dormi; oui, mo pou levé, parski Jéhovah Li-mem contigne soutenir moi.” (Ps. 3:5) Mem a-soir, kan ti ena pli beaucoup risk ki bann l’ennemi attaké sans ki li attann, David pa ti peur pou al dormi. Li ti sur ki li pou levé, parski par bann l’experience ki li ti’nn faire dan le passé, li ti koné ki li kapav ena enn confiance total dan soutien Bondié. Nou aussi nou kapav ena mem confiance si nou suive “bann chemin Jéhovah” ek si jamais nou pa abandonne Li.—Lire 2 Samuel 22:21, 22.
8. Couma Psaume 27:1-4 montré ki David ti ena confiance en Bondié?
8 Dan enn lot psaume ki David ti ecrire, nou retrouve sentiment securité ki li ti ena ek so confiance total dan Bondié. Sa psaume ki li ti inspiré pou ecrire-la, dire: “Jéhovah Li mo la lumiere ek mo delivrance. Kisannla mo pou bizin peur? Jéhovah Li forteresse mo la vie. Pou kisannla mo pou bizin ena la crainte? . . . Mem si enn camp dresse so bann la tente kont moi, mo leker pa pou peur. . . . Mo finn demann Jéhovah enn kitsoz—c’est sa-mem ki mo pou rodé: Ki mo reste dan lakaz Jéhovah toulé-jour ki mo vive, pou admire charme ki Jéhovah ena ek pou guette so temple avek admiration.” (Ps. 27:1-4) Si ou ena mem sentiment ki David ek si ou situation permette, regulierement ou pou assisté bann reunion la congregation avek bann lezot adorateur Jéhovah.—Héb. 10:23-25.
9, 10. Malgré bann parole ki ena dan Psaume 3:6, 7, kifer ou kapav dire ki David pa ti ena tendance pou tire vengeance?
9 Mem si David ti faire face avek trahison Absalom ek l’infidelité beaucoup lezot dimoune, li ti chanté: “Mo pa pou peur plusieurs dizaine millier dimoune ki finn entoure moi ek ki kont moi. Leve toi, o Jéhovah, sauve moi, o mo Bondié! Parski to bizin batte tou mo bann l’ennemi lor zot la machoire. To bizin casse lé-dent bann mauvais dimoune.”—Ps. 3:6, 7.
10 David pa ti ena tendance pou tire vengeance. Si so bann l’ennemi ti bizin gagne ‘batté lor zot la machoire,’ c’est Bondié ki ti pou faire sa. Le roi David ti’nn ecrire enn copie la Loi pou li-mem ek li ti koné ki ladan Jéhovah ti dire: “Vengeance ek punition pou moi.” (Deut. 17:14, 15, 18; 32:35) C’est aussi Bondié ki ti pou “casse lé-dent bann mauvais dimoune.” Casse zot lé-dent vedir ki Bondié ti pou faire zot perdi zot pouvoir pou faire di-tort. Jéhovah koné kisannla ki mauvais parski “Li trouve seki ena dan leker.” (1 Sam. 16:7) Nou bien reconnaissant ki Bondié donne nou la foi ek la force pou tini ferme kont sa kikenn ki pli mauvais-la, Satan. Bientot li pou fermé dan l’abime, li pou couma enn lion ki pé criyé mais ki pena lé-dent, ek ki zis bon pou destruction!—1 Pierre 5:8, 9; Rév. 20:1, 2, 7-10.
“Delivrance li pou Jéhovah”
11. Kifer nou bizin prié pou nou bann frere ek soeur?
11 David ti realisé ki zis Jéhovah tousel ki kapav amenn sa delivrance ki li ti bien bizin-la. Mais sa psalmiste-la pa ti pense zis li tousel. Ki nou kapav dire lor le peuple en entier, peuple ki Bondié ti donne so faveur? Li ti approprié ki David termine seki li ti inspiré pou ecrire par sa bann parole-la: “Delivrance li pou Jéhovah. To benediction li lor to peuple.” (Ps. 3:8) Li vrai ki David ti ena bann grand probleme, mais li ti pense peuple Jéhovah en general ek li ti sur ki Bondié pou beni zot. Li bien important ki nou aussi nou pense nou bann frere ek soeur. Anou pense zot dan nou la priere, ek demann Jéhovah pou donne zot so l’esprit saint pou ki zot kapav gagne courage ek enn grand confiance pou annonce la bonne nouvelle.—Éph. 6:17-20.
12, 13. Ki ti arrive Absalom, ek couma David ti reagir?
12 Absalom ti mort dan enn grand deshonneur. C’est enn l’avertissement pou tou bann ki faire dominere ar lezot, surtout ar bann ki Bondié finn oint, pareil couma David. (Lire Proverbes 3:31-35.) Ti ena enn la guerre, ek l’armée Absalom ti perdi. Absalom li-mem ti pé sauvé lor enn bourrik; li ti ena beaucoup cheveux ek kan li ti pé sauvé, so cheveux ti maye dan enn branche ki ti bas dan enn grand pié. Li ti apendan—li ti toujours vivant, mais li pa ti kapav faire nanyin—ziska ki Yoab ti touye li avek trois baton ki li ti fonce dan so leker.—2 Sam. 18:6-17.
13 Eski David ti content kan li ti aprann seki ti’nn arrive so garson? Non. Au contraire, li ti marché, allé-vini dan so la chambre, li ti bien affecté ek li ti ploré: “Mo garson Absalom, mo garson, mo garson Absalom! Ah! kifer pa moi ki ti mort dan to place, Absalom mo garson, mo garson!” (2 Sam. 18:24-33) David ti bien accablé, ek zis bann parole Yoab ki ti empeche li pou accablé plus encore. La vie Absalom ti fini dan enn fason bien triste parski so l’ambition egoïste ti pousse-li pou la guerre kont so prop papa—ki Jéhovah ti oint—ek sa ti amenn malheur lor li-mem!—2 Sam. 19:1-8; Prov. 12:21; 24:21, 22.
Encore enn fois, David ti exprime so confiance en Bondié
14. Ki nou kapav dire lor Psaume 4?
14 Pareil couma Psaume 3, Psaume 4 aussi c’est enn la priere bien sincere ki David ti faire, ki montré so confiance total en Jéhovah. (Ps. 3:4; 4:3) Kitfois David ti ecrire sa cantik-la pou exprime so soulagement ek so reconnaissance envers Bondié, apré ki coup d’etat Absalom ti’nn raté. Ou-soit li possible ki li ti ecrire sa kan li ti pé pense bann chanteur lévite. Dan toulé-deux cas, si nou medite lor la, sa kapav augmente nou confiance en Jéhovah.
15. Kifer nou kapav prié Jéhovah avek enn grand l’assurance a travers so Garson?
15 Encore enn fois, David ti manifesté enn confiance total en Bondié ek li ti montré ki li ti sur ki Bondié ti ecoute ek ti reponn so la priere. Li ti chanté: “Kan mo appel toi, o mo Bondié ki juste, reponn moi! Dan mo malheur, to bizin faire moi gagne enn grand l’espace. Montré moi to faveur ek ecoute mo la priere.” (Ps. 4:1) Nou aussi nou kapav ena mem confiance si nou pratik la justice. Nou koné ki Jéhovah, nou “Bondié ki juste,” beni so bann serviteur ki droite. Alors, avek enn grand l’assurance, nou kapav prié Li par so Garson, avek la foi dan sacrifice Jésus. (Jean 3:16, 36) Sa donne nou vrai-mem enn grand la paix!
16. Kifer David ti decouragé?
16 Parfois, nou kapav faire face ar enn situation bien decourageant ki faire nou mank confiance. Li possible ki sa ti arrive David pou enn ti moment, parski li ti chanté: “Garson bann zom, ziska kan mo la gloire pou couma enn insulte, alors ki zot pé contigne content bann kitsoz inutile, alors ki zot pé contigne rod enn mensonge?” (Ps. 4:2) Pena doute ki l’expression “garson bann zom” faire reference ar bann dimoune dan enn sens negatif. Bann l’ennemi David ti “content bann kitsoz inutile.” Dan enn traduction la Bible, (New International Version) sa verset-la inn traduire par: “Comié le temps to pou content bann kitsoz ki pa vrai ek rod bann fausse bondié?” Mem si nou decouragé par seki lezot pé faire, anou contigne prié avek tou nou leker ek manifesté enn confiance total dan sel vrai Bondié.
17. Expliké couma nou kapav agir en accord avek Psaume 4:3.
17 Li ti clair ki David ti ena confiance en Bondié, kan nou lire sa bann parole-la: “Alors, aprann ki Jéhovah pou vrai-mem reconette so serviteur fidele; Jéhovah Li-mem pou tendé kan mo pou appel Li.” (Ps. 4:3) Nou bizin ena courage ek enn confiance total en Bondié pou nou kapav reste fidele envers Li. Par exemple, enn famille chretien bizin sa bann qualité-la kan enn membre la famille exclu parski li pa’nn repenti. Bondié beni bann dimoune ki fidele envers Li ek suive so bann chemin avek fidelité. En retour, kan nou fidele ek kan nou ena enn confiance total en Jéhovah, sa favorise la joie parmi so bann serviteur.—Ps. 84:11, 12.
18. En accord avek Psaume 4:4, ki nou bizin faire si enn kikenn finn dire ou-soit finn faire bann kitsoz pou blesse nou?
18 Mais ki nou pou faire si enn kikenn dire ou-soit faire enn kitsoz ki faire nou en colere? Nou kapav garde nou la joie si nou faire seki David ti dire: “Zot kapav en colere, mais pa faire peché. Lor zot lili, koz dan zot leker, ek reste trankil.” (Ps. 4:4) Si enn kikenn finn dire bann parole ou-soit finn faire bann action pou blesse nou, fodé pa nou tire vengeance, sinon nou pou faire enn peché. (Rom. 12:17-19) Dan la priere, nou kapav dire seki nou ressenti lor la kan nou lor nou lili. Si nou prié lor sa sujet-la, kitfois nou pou trouve seki’nn passé dan enn fason different ek sa kapav pousse-nou pou pardonné par amour. (1 Pierre 4:8) Conseil ki l’apotre Paul ti donné dan sa domaine-la, li bien interessant. Kitfois li ti base-li lor Psaume 4:4, kan li ti dire: “Zot kapav en colere, mais pa faire peché; pa laisse soleil couché alors ki zot encore en colere, ek pa donne Satan okenn l’occasion.”—Éph. 4:26, 27.
19. Couma Psaume 4:5 kapav aide nou dan nou l’adoration?
19 Pou montré l’importance pou ena confiance en Bondié, David ti chanté: “Faire sacrifice bann sacrifice la justice, ek mette zot confiance en Jéhovah.” (Ps. 4:5) Bann sacrifice ki bann Israélite ti offert ti ena valeur, zis si le peuple ti faire sa avek bann bon mobile. (Is. 1:11-17) Pou ki Bondié accepté nou l’adoration, nou aussi nou bizin ena bann bon mobile ek nou bizin ena enn confiance total en Li.—Lire Proverbes 3:5, 6; Hébreux 13:15, 16.
20. Ki sa vedir ‘la lumiere figure Jéhovah’?
20 David ti contigne dire: “Beaucoup dimoune dire: ‘Kisannla pou faire nou trouve seki bon?’ Faire la lumiere to figure vinn lor nou, o Jéhovah!” (Ps. 4:6) ‘La lumiere figure Jéhovah’ represente so faveur. (Ps. 89:15) Alors kan David ti prié: “Faire la lumiere to figure vinn lor nou,” li ti pé rod dire ‘montré nou to faveur.’ Nou ena confiance en Jéhovah, a cause sa nou ena so faveur ek enn grand la joie pou faire so volonté.
21. Ki l’assurance nou ena si nou participe avek zele dan recolte spirituel zordi?
21 David ti attann avek impatience la joie ki Bondié ti pou donne li. Sa la joie-la ti pli grand ki seki ti ena dan lepok recolte. Alors, David ti chante pou Jéhovah: “Vrai-mem, to pou mette la joie dan mo leker, enn la joie pli grand ki dan lepok kan zot la grain ek zot di-vin nouveau ti en abondance.” (Ps. 4:7) Nou kapav sur ki nou aussi nou pou gagne enn grand la joie si nou participe avek zele dan recolte spirituel zordi. (Luc 10:2) Avek bann chretien oint ki pé prend la tête, nou bien content zordi kan nou trouvé ki bann ‘travailleur dan sa recolte-la’ pé contigne augmenté. (Is. 9:3) Sa recolte spirituel-la faire nou gagne enn grand la joie. Eski ou vrai-mem satisfait ar seki ou pé faire ladan?
Contigne perseveré avek enn confiance total en Bondié
22. En accord avek Psaume 4:8, couma bann Israélite ti senti-zot kan zot ti garde la Loi Bondié?
22 David ti termine sa psaume-la par sa bann parole-la: “Mo envie allongé ek aussi dormi en paix, parski to tousel, o Jéhovah, to faire moi reste en securité.” (Ps. 4:8) Kan bann Israélite ti garde la Loi Jéhovah, zot ti en paix avek Li ek zot ti senti-zot en securité. Par exemple, ‘Juda ek Israël ti vive en securité’ pendant regne Salomon. (1 Rois 4:25) Bann ki ti ena confiance en Bondié ti ena la paix, mem kan bann nation tout autour ti opposé ar zot. Pareil couma David, nou dormi en paix parski Bondié faire nou senti-nou en securité.
23. Ki nou pou gagné si nou ena enn confiance total en Bondié?
23 Anou contigne perseveré dan service Jéhovah. Anou prié aussi avek la foi ek coumsa gagne “la paix Bondié ki depasse tou pensée.” (Phil. 4:6, 7) Sa faire nou gagne vrai-mem enn grand la joie! Pena doute ki nou pa pou peur seki pé attann nou dan l’avenir, si nou contigne garde enn confiance total en Jéhovah.
Couma ou pou reponn?
• Ki bann probleme David ti gagné a cause Absalom?
• Couma Psaume 3 faire nou gagne confiance?
• Dan ki different fason Psaume 4 kapav augmente nou confiance en Jéhovah?
• Si nou ena enn confiance total en Bondié, ki bienfait nou pou gagné?
[Zimage page 32]
Eski ou mette tou ou confiance en Jéhovah?