Couma ou kapav reussi dan la vie?

1, 2. (a) Pou beaucoup dimoune ki sa vedir enn kikenn ki’nn reussi dan la vie? (b) Couma ou kapav analyse ou fason pensé lor enn dimoune ki’nn reussi dan la vie?

KI SA vedir reussi dan la vie? Pose sa question-la bann dimoune, ou pou gagne different reponse. Par exemple, beaucoup dimoune pensé ki, bann ki’nn reussi dan la vie, c’est bann ki ena beaucoup kass, bann ki ena enn bon travail, ou-soit bann ki’nn faire bann grand l’etude. Certain dire ki nou bizin ena bann bon relation avek nou famille, bann camarade, ou-soit bann dimoune ki travail ensam avek nou. Bann ki servi Bondié kapav pensé ki zot inn reussi a cause certain responsabilité ki zot ena dan congregation ou-soit a cause bann bon resultat ki zot gagné dan predication.

² Pou ou, ki sa vedir enn dimoune ki’nn reussi dan la vie? Ou kapav ecrire nom certain dimoune ki ou pli admiré ek respecté, ki ou pensé inn reussi dan la vie. Ki qualité dimoune zot été? Eski zot riche ou-soit zot populaire? Eski zot ena enn grand position? Ou bann reponse kitfois montré seki ou ena dan ou leker. Bann kitsoz ki ou donne valeur, kapav influence beaucoup bann choix ki ou faire ek bann l’objectif ki ou fixé.​—Luc 6:45.

3. (a) Ki Josué ti bizin faire pou li reussi? (b) Ki nou pou examiné asterla?

³ Seki pli important c’est pou koné ki Jéhovah pensé lor seki faire enn dimoune reussi dan la vie, parski nou la vie depann lor So faveur. Kan Jéhovah ti donne Josué sa grand responsabilité pou amenn bann Israélite dan la Terre promise-la, Li ti dire li lire la Loi mosaïk “la-nuit li-jour” ek veille bien pou obeir tou seki finn ecrire ladan. Bondié ti donne li sa l’assurance-la: “Lerla to pou reussi dan seki to faire ek to pou agir avek sagesse.” (Jos. 1:7, 8) Surement ou koné ki Josué ti vrai-mem reussi dan seki li ti faire. Ki nou kapav dire lor nou? Couma nou kapav koné si fason ki nou considere seki faire enn dimoune reussi dan la vie, li pareil avek fason pensé Bondié? Pou aide nou konn sa bann reponse-la, anou considere la vie deux zom ki la Bible mentionné.

ESKI SALOMON TI’NN REUSSI DAN LA VIE?

4. Kifer nou kapav dire ki Salomon ti reussi dan seki li ti faire?

⁴ Dan plusieurs domaine, Salomon ti reussi dan enn fason extraordinaire. Kifer? Parski pendant plusieurs l’année, li ti obeir ek li ti ena la crainte pou Jéhovah ek Jéhovah ki ti bien beni li. Nou rappel kan Jéhovah ti dire Salomon demann seki li envie, li ti demande la sagesse pou dirige le peuple. Lerla, Jéhovah ti donne li sagesse ek bann richesse, toulé-deux. (Lire 1 Rois 3:10-14.) So sagesse ti “beaucoup pli grand ki sagesse tou bann dimoune ki ti reste dan l’Orient ek tou sagesse dan l’Égypte.” (1 Rois 4:30, 31) “Tou bann nation tout autour” ti konn grand reputation ki Salomon ti ena. Li ti aussi bien riche, toulé l’année li ti gagne apepré 25 tonne l’or! (2 Chron. 9:13) Li ti faire construire bann joli batiment, li ti koné couma pou garde bann bon relation avek bann lezot nation ek li ti faire commerce avek zot. Oui, tant ki Salomon ti reste fidele envers Bondié, li ti reussi dan seki li ti faire.​—2 Chron. 9:22-24.

5. Ki Salomon ti dire lor seki faire enn dimoune vrai-mem reussi devant Bondié?

⁵ Seki Salomon ti ecrire dan livre Ecclésiaste montré ki li pa ti pensé ki c’est la richesse ek pouvoir ki faire enn dimoune reussi ek ena la joie. Au contraire, li ti ecrire: “Mo finn aprann ki pena nanyé ki pli bon pou zot ki zot dan la joie ek ki zot faire seki bien dan zot la vie; ek aussi ki chaque dimoune mangé, ek boire ek gagne satisfaction pou tou sa travail dur ki li’nn faire-la. Sa c’est enn don ki Bondié donné.” (Eccl. 3:12, 13) Salomon ti realisé aussi ki sa bann bon kitsoz-la kapav faire enn dimoune vrai-mem heureux, a condition ki li ena bann bon relation avek Bondié. Salomon ti dire: “Conclusion, apré ki’nn fini tann tou kitsoz: Ena la crainte pou vrai Bondié ek garde so bann commandement. Parski c’est tou l’obligation ki enn dimoune ena.”​—Eccl. 12:13.

6. Couma l’exemple Salomon aide nou pou comprend seki vedir reussi dan la vie?

⁶ Pendant plusieurs l’année, Salomon ti ena la crainte pou Bondié. La Bible dire ki li ti “contigne content Jéhovah, li ti marche dapré bann la loi so papa, David.” (1 Rois 3:3) Eski ou pa pensé ki sa ti vrai-mem enn succès? Avek direction Bondié, Salomon ti construire enn temple extraordinaire pou vrai l’adoration ek li ti ecrire trois livre la Bible. Bien sur nou pa pou kapav faire exactement tou seki Salomon ti faire, mais so l’exemple kan li ti fidele envers Bondié, aide nou pou comprend seki vedir reussi dan la vie ek seki nou bizin faire pou nou reussi nou aussi. La plupart dimoune pensé ki la richesse, sagesse, enn grand reputation ek pouvoir, c’est bann kitsoz ki pou faire zot reussi dan la vie. Mais Bondié ti inspire Salomon pou ecrire ki sa bann kitsoz-la pena vrai-mem valeur. Zot pa rapporte nanyé, ek si nou pé faire tou pou rod zot, coumadir nou “pé galope derriere di-vent.” Eski ou pa finn remarké ki bann dimoune ki content la richesse zot toujours rod encore plus? Ek souvent zot tracassé pou seki zot deja ena. En plus, enn jour zot bann richesse pou al pou lezot dimoune.​—Lire Ecclésiaste 2:8-11, 17; 5:10-12.

7, 8. Couma Salomon ti vinn desobeissant, ek ki’nn arrive li?

⁷ Surement ou koné ki finalement Salomon ti arrete obeir Jéhovah. Parole Bondié dire: “Ek kan Salomon ti’nn vinn vié, so bann madame ti’nn detourne so leker pou faire li suive lezot bondié; ek so leker pa ti complet pou Jéhovah so Bondié, pareil couma leker David, so papa. . . . Salomon ti commence faire seki mauvais devant lizié Jéhovah.”​—1 Rois 11:4-6.

⁸ Jéhovah pa ti content seki Salomon ti faire ek Li ti dire li: “Parski . . . to pa’nn garde mo l’alliance ek mo bann la loi ki mo ti donne toi couma enn l’ordre, mo pa pou manké pou rass royaume ar toi ek vrai-mem mo pou donne sa to serviteur.” (1 Rois 11:11) Sa ti enn grand malheur! Mem si Salomon ti bien reussi dan plusieurs fason, avek le temps Jéhovah pa ti attann ki li ti pou vinn coumsa apré. Salomon pa ti reussi faire seki pli important dan la vie, setadir reste fidele envers Bondié. Sakenn parmi nou kapav demandé: ‘Eski mo bien decidé pou tire leson dan seki mo’nn aprann lor la vie Salomon pou ki sa aide moi pou reussi dan la vie?’

ENN DIMOUNE KI’NN REUSSI DAN LA VIE

9. Pou le monde, eski Paul ti reussi so la vie? Expliké.

⁹ La vie l’apotre Paul ti bien different avek la vie le roi Salomon. Paul pa ti ena enn trone en ivoire ek li pa ti faire fête avek bann le roi. Au contraire, ti ena bann moment kot li pa ti ena assez mangé ek boire, li ti gagne frais ek li ti mank linge. (2 Cor. 11:24-27) Apré ki li ti accepté Jésus couma le Messie, Paul ti nepli ena enn grand position dan la religion juif. Au contraire, bann chef religieux juif ti ena la haine pou li. Bann Juif ti faire mette li dan prison, li ti gagne coute fouette, coute baton, ek coute roche. Paul ti dire ki bann dimoune ti insulté li ek so bann compagnon chretien, ti persecute zot ek ti sali zot reputation. Li ti dire: “Nou finn vinn pareil couma bann saleté ki ena dan le monde, ziska ler nou couma bann kitsoz ki’nn rejeté parmi tou kitsoz.”​—1 Cor. 4:11-13.

10. Kifer beaucoup dimoune ti kapav pensé ki Paul pa ti reussi so la vie?

¹⁰ Beaucoup ki ti konn l’apotre Paul pli jeune ek kan li ti encore appel Saul, ti kapav pensé ki li ti ena enn grand l’avenir devant li. Li ti sorti kitfois dan enn grand famille, li ti etudié avek Gamaliel, enn enseignant ki bann dimoune ti bien respecté. Plitar, Paul ti ecrire: “Mo ti pé faire pli grand progré dan religion juif ki beaucoup parmi bann ki ti dan mo l’age.” (Gal. 1:14) Saul ti konn koz bien langue hébreu ek grec ek li ti ena nationalité romain. Grace a sa, li ti ena bann privilege ek bann droit special ki lezot ti envie gagné. Si li ti choisir pou faire enn grand carriere dan le monde, kitfois li ti pou ena enn grand position ek li ti pou bien riche. Au contraire, li ti choisir enn la vie ki bann dimoune​—kitfois-mem bann membre so famille​—ti considere couma enn folie. Kifer?

11. Ki kitsoz ek ki bann l’objectif ti ena valeur pou Paul, ek kifer?

¹¹ Paul ti content Jéhovah ek li ti envie gagne so faveur plus ki bann richesse ek enn grand position parmi bann dimoune. Paul ti gagne enn connaissance exact lor la verité, alors, li ti donne valeur la ranson, so ministere chretien, l’esperance pou vive dan le ciel​—bann kitsoz ki le monde pa prend compte. Satan ti pretann ki li kapav detourne bann dimoune ar Bondié. Alors, Paul ti realisé ki li ti bizin montré so position dan sa domaine-la. (Job 1:9-11; 2:3-5) N’importe ki l’epreuve li ti gagné, Paul ti bien decidé pou reste fidele ek pou contigne adore vrai Bondié. C’est enn l’objectif ki pena lor programme bann dimoune dan le monde ki envie reussi dan la vie.

12. Kifer ou finn choisir pou mette ou confiance dan Bondié?

¹² Eski ou ena mem l’objectif ki Paul? Mem si li pa toujours facile pou reste fidele, nou koné ki sa faire nou gagne benediction ek faveur Jéhovah, ek c’est sa ki faire enn dimoune vrai-mem reussi so la vie. (Prov. 10:22) Nou gagne bann bienfait asterla, ek nou kapav attann pou gagne bann benediction dan l’avenir. (Lire Marc 10:29, 30.) Alors, nou ena bann bon raison pou mette nou confiance, pa “dan bann richesse ki pa garanti nanyé, mais dan Bondié, ki donne nou tou kitsoz en abondance pou nou plaisir.” Nou ‘garde couma enn tresor pou nou-mem, enn bon base pou l’avenir, pou ki nou kapav bien saisi vrai la vie.’ (1 Tim. 6:17-19) Oui, nou kapav sur ki dan cent an, mem dan mille an ou-soit plus, nou pou kapav guette derriere ek dire: “Pena okenn doute, mo finn vrai-mem reussi mo la vie!”

KOT-SA NOU TRESOR ÉTÉ?

13. Ki conseil Jésus ti donné concernant ramasse bann tresor?

¹³ Concernant bann tresor, Jésus ti dire: “Arrete ramasse bann tresor pou zot lor la terre, kot ti bebete ek la rouille rongé, ek kot bann voleur perce trou pou rentré ek kokin. Plutot, ramasse bann tresor dan le ciel, kot pena ni ti bebete ni la rouille pou rongé, ek kot bann voleur pa perce trou pou rentré ek kokin. Parski kot to tresor été, la-mem to leker pou été.”​—Mat. 6:19-21.

14. Kifer li pa sage pou ramasse bann tresor lor la terre?

¹⁴ Kitfois c’est pa zis l’argent ki enn dimoune ramassé couma enn tresor lor la terre. Sa kapav aussi n’importe ki kitsoz ki Salomon ti mentionné ek ki bann dimoune considere couma enn succès​—gagne enn grand position, enn grand reputation, ou-soit pouvoir. Pareil couma Salomon ti dire dan livre Ecclésiaste, Jésus aussi ti dire ki bann tresor ki ena dan sa le monde-la pa dure touletan. Kitfois ou finn remarké ki zordi dan le monde li bien facile pou perdi sa bann tresor-la ek zot detruire vite. Concernant sa bann tresor-la, professeur F. Dale Bruner ecrire ki ‘enn dimoune populaire pa reste touletan populaire. Enn dimoune ki’nn gagne beaucoup l’argent sa l’année-la, kapav perdi tou l’année apré. [Jésus] content bann dimoune, c’est a cause sa ki li averti zot ki la gloire kapav disparette bien vite ek laisse zot sans okenn l’espoir. Jésus pa envie ki so bann disciple gagne sa qualité deception-la.’ Sa professeur-la ti dire ‘ki toulé-jour le monde devire lor enn kikenn ki ti pé fek assize lor li.’ La plupart dimoune d’accord avek commentaire sa professeur-la. Mais parmi, ki quantité laisse bann parole Jésus influence zot la vie? Eski ou, ou pou laisse conseil Jésus influence ou la vie?

15. Ki zeffort nou bizin faire pou nou reussi nou la vie couma Jéhovah envie?

¹⁵ Certain chef religieux finn enseigné ki li mauvais ki bann dimoune faire zeffort pou reussi zot la vie. Mais remarké ki Jésus pa ti condamne sa qualité zeffort-la. Au contraire, li ti pé encourage so bann disciple pou faire zeffort pou reussi zot la vie dan enn lot fason. Li ti encourage zot pou ramasse “bann tresor dan le ciel” ki pou duré pou touletan. Nou pli grand desir c’est reussi nou la vie couma Jéhovah envie. Oui, seki Jésus ti dire faire nou rappel ki nou ena enn choix pou faire concernant seki nou pé rodé dan la vie. En realité, nou pou faire zeffort pou gagne seki ena dan nou leker, pou gagne seki pli important pou nou.

16. Dan ki conseil nou kapav ena enn confiance total?

¹⁶ Si dan nou leker nou envie faire Jéhovah plaisir, nou kapav sur ki Li pou veillé ki nou gagne seki nou bizin. Kitfois Li kapav permette ki pendant enn certain temps, nou pena mangé ek boire, pareil couma l’apotre Paul. (1 Cor. 4:11) Selman, nou kapav ena enn confiance total dan bon conseil ki Jésus ti donné: “Fodé jamais zot tracassé ek zot dire: ‘Ki nou pou mangé?’ ou-soit: ‘Ki nou pou boire?’ ou-soit: ‘Ki nou pou metté?’ C’est tou sa bann kitsoz-la ki bann nation pé faire tou pou gagné. Mais zot Papa ki dan le ciel, koné ki zot bizin tousala. Alors, avant tou kitsoz, contigne rod le royaume ek so justice, ek zot pou gagne aussi tou sa bann lezot kitsoz-la.”​—Mat. 6:31-33.

REUSSI OU LA VIE DEVANT BONDIÉ

17, 18. (a) Lor ki kitsoz vrai succès depann? (b) Lor ki kitsoz vrai succès pa depann?

¹⁷ Enn point important c’est: pou nou vrai-mem reussi dan la vie, sa pa depann lor bann grand kitsoz ki nou reussi faire ou-soit lor nou position devant lizié bann dimoune dan le monde. En plus, vrai succès pa vedir gagne enn certain privilege dan l’organisation Jéhovah. Mais, sa benediction-la ena enn rapport avek seki vrai-mem faire nou reussi dan la vie: nou l’obeissance ek nou fidelité envers Bondié. La Bible dire: “Bondié attann ki bann administrateur montré ki zot fidele.” (1 Cor. 4:2) Nou bizin contigne montré-nou fidele. Jésus ti dire: “Seki enduré ziska la fin, li-mem ki pou sapé.” (Mat. 10:22) Eski ou pa d’accord ki enn dimoune ki pou gagne la vie sauve, finn vrai-mem reussi dan la vie?

¹⁸ Kan nou reflechi lor seki nou finn examiné la-haut, nou kapav trouvé ki fidelité envers Bondié pa depann lor enn grand position, ni lor l’education, l’argent ou-soit niveau social. Sa pa depann aussi lor l’intelligence, talent ou-soit capacité ki enn dimoune ena. Dan n’importe ki situation, nou kapav montré nou fidelité envers Bondié. Parmi bann serviteur Bondié dan premier siecle, certain ti riche ek certain ti pauvre. Paul ti conseil bann ki ti riche “pou faire le bien, pou vinn riche dan bann bon action, pou vinn genereux, pré pou partagé.” Bann riche ek bann pauvre toulé-deux ti bizin “saisi vrai la vie.” (1 Tim. 6:17-19) Zordi aussi pareil. Nou tou nou ena mem possibilité ek mem responsabilité: nou bizin reste fidele ek “vinn riche dan bann bon action.” Si nou faire sa, nou pou reussi nou la vie devant lizié nou Createur ek nou pou ena la joie pou koné ki nou pé faire Li plaisir.​—Prov. 27:11.

19. Ki ou bien decidé pou faire pou reussi dan la vie?

¹⁹ Kitfois ou pa kapav controle tou bann situation ki arrivé dan ou la vie, mais ou kapav controle fason ki ou faire face ar sa bann situation-la. Faire zeffort pou reste fidele, dan n’importe ki situation ou été. Li vaut la peine ki ou faire sa. Ou kapav sur ki Jéhovah pou beni ou beaucoup​—asterla ek dan l’avenir. Jamais pa blié seki Jésus ti dire bann chretien oint: “Reste fidele ziska la mort ek mo pou donne [zot] couronne la vie.” (Rév. 2:10) C’est sa ki vedir reussi dan la vie!