Mo Lavi Ti Pe Vinn Deplizanpli Pir

MO PASE:

Mo’nn grandi dan plizir landrwa dan Los Angeles, Californie, dan l’États-Unis. Ek sa bann landrwa-la ti ena move repitasion akoz bann bandi ki ti ena laba ek akoz ladrog. Mo bann paran ti ena sis zanfan, ek mwa mo ti deziem.

Mo mama ti elve nou kouma bann manb legliz evanzelik. Selman, antan ki adolesan, mo ti amenn enn doub lavi. Dimans mo ti sante dan koral. Me lezot zour lasemenn, mo ti fer fet, pran ladrog, ek komet limoralite sexiel.

Mo ti ena enn karakter so ek mo ti violan. Mo ti servi ninport ki kitsoz ki mo ti gagne kouma enn zarm pou pa perdi enn lager. Seki mo ti aprann legliz pa ti ed mwa. Mo ti abitie dir: “Lesegner li vanze​—ek mwa mo so linstriman!” Ver lafin bann lane 1960, kan mo ti pe al lekol segonder, mo ti inflianse par bann Black Panthers, enn group politik ki ti pe lit pou bann drwa sivil. Mo ti rant dan enn mouvman bann zelev ki ti lit pou bann drwa sivil. Plizir fwa nou ti fer bann manifestasion, ek sak fwa ti ferm lekol pandan enn tan akoz sa.

Koumadir sa bann manifestasion-la pa ti arive satisfer mo karakter violan. Alor mo ti koumans partisip dan bann aksion ki motive par laenn. Par exanp, enn zour mwa ek mo bann kamarad ti get bann fim lor bann esklav Afriken ki’nn soufer dan l’Amérique dan lepase. Nou ti ankoler kan nou ti trouv sa bann linzistis-la, alor nou ti koumans bat bann zenn blan ki ti dan lasal sinema. Apre sa nou ti al dan bann teritwar kot ti ena bann blan ek nou ti rod ankor dimounn pou bate.

Kan mo ti pre pou gagn vin-t-an, mwa ek mo bann frer ti vinn bann vwayou bien renome. Souvan nou ti gagn problem avek lapolis. Enn mo bann ti frer ti manb dan enn group bandi ki ti bien seleb, ek mo’si mo ti rant dan sa group-la. Mo lavi ti pe vinn deplizanpli pir.

KOUMA LABIB INN SANZ MO LAVI:

Enn mo kamarad so bann paran ti Temwin Zeova. Zot ti invit mwa pou asiste renion dan zot kongregasion, ek mo ti aksepte. Depi koumansman mem mo ti trouve kouma bann Temwin Zeova diferan. Zot tou ti ena enn Labib ek ti pe servi sa pandan renion. Mem bann zenn ti partisipe! Mo ti inpresione kan mo ti aprann ki nom Bondie se Zeova ek kan mo ti tann bannla servi sa nom-la. (Psom 83:18, NW.) Dan kongregasion ti ena bann dimounn dan diferan nasionalite, me li kler ki pa ti ena divizion.

O-koumansman, mo pa ti interese pou etidie Labib avek bann Temwin, me mo ti kontan al zot bann renion. Enn swar, kan mo ti dan enn sa bann renion-la, sertin mo bann kamarad ti al enn konser. Laba, zot ti bat enn zenn amor parski li pa ti rod donn zot so jaket kwir. Zot ti fier seki zot ti’nn fer, parski so landemin zot ti pe rakont seki zot inn fer san okenn laont. Zot pa ti konsider zot krim kouma enn kitsoz grav ek zot ti mem riye kan zot ti pe pas lakour. Laplipar parmi zot ti kondane avi dan prizon. Pa bizin dir kouma mo ti kontan mo pa ti avek zot sa swar-la. Mo ti desid pou sanz mo lavi ek pou koumans etidie Labib.

Mo ti’nn viv dan enn lanvironnman kot ti ena boukou diskriminasion rasial, alor ti ena sertin kitsoz ki mo ti trouve ant bann Temwin ki ti bien etonn mwa. Par exanp, kan enn Temwin blan ti bizin vwayaze pou al enn lot pei, li ti kit so bann zanfan avek enn fami nwar. Enn lot lexanp, se kan enn zenn garson nwar ti bizin enn plas pou reste, enn fami blan ti fer li vinn res kot zot. Sa ti konvink mwa ki bann parol ki Zezi ti dir dan Zan 13:35 aplik bien ar bann Temwin Zeova. Sa verse-la dir: “Si zot ena lamour pou zot kamarad, tou dimoun pou kone ki zot mo disip.” Mo ti kone ki mo ti’nn trouv enn vre fami bann frer.

Kan mo’nn etidie Labib, mo’nn koumans konpran ki mo bizin sanz mo fason panse. Mo ti bizin renouvle mo fason panse pou ki mo pa zis viv anpe, me pou ki mo osi trouv sa kouma meyer fason viv. (Romin 12:2) Tigit-tigit mo’nn fer bann progre. An Zanvie 1974, mo’nn pran batem antan ki enn Temwin Zeova.

Mem apre mo batem mo’nn bizin kontign fer zefor pou travay lor mo karakter. Par exanp, enn zour kan mo ti pe prese lakaz-lakaz, mo ti galoup deryer enn voler ki ti kokin radio ki ti dan mo loto. Kan mo ti pre pou atrap li, li’nn zet radio-la li’nn sove li’nn ale. Kan mo ti rakont bann ki ti avek mwa kouma mo’nn regagn mo radio, enn ansien ki ti la ti demann mwa: “Stephen, ki to ti pou fer si to ti reisi trap li?” Sa kestion-la ti fer mwa reflesi ek ti ankouraz mwa pou kontign fer zefor pou favoriz lape.

An Oktob 1974, mo ti koumans fer servis aplintan. Sak mwa mo ti pas 100 er-tan pou ansegn bann dimounn Labib. Plitar, mo ti ena privilez pou travay kouma volonter dan biro mondial bann Temwin Zeova dan Brooklyn, New York. An 1978, mo ti retourn Los Angeles pou okip mo mama ki ti malad. De-z-an apre, mo ti marye avek Aarhonda, mo madam ki mo bien kontan. Li finn bien soutenir mwa letan nou ti pe okip mo mama. Li’nn fer sa ziska mo mama mor. Avek letan, mwa ek Aarhonda ti asiste Lekol Biblik Gilead ek ti avoy nou servi dan Panama, kot nou ankor pe servi kouma misioner.

Depi mo batem, mo’nn fer fas ar plizir sitiasion ki ti kapav fer mwa reazir avek violans. Mo’nn aprann pou ignor bann dimounn ki rod provok mwa ouswa pou esey kalme sitiasion-la dan lezot fason. Plizir dimounn, parmi ena mo madam, finn felisit mwa lor fason ki mo’nn azir dan sa bann sitiasion-la. Momem mo pa ti pe atann mo ti pou kapav azir koumsa! Se pa par momem ki mo’nn kapav fer sa bann sanzman-la dan mo personalite. Okontrer, mo panse ki se enn prev ki Labib ena pouvwar pou transform bann dimounn.​—Ebre 4:12.

KI BENEDIKSION MO FINN GAGNE?:

Labib finn donn mo lavi enn sans ek inn ansegn mwa kouma pou vremem viv anpe. Mo nepli bat dimounn; okontrer, mo ed zot pou devlop enn bon relasion avek Bondie. Mo ti mem ansegn Labib enn mo bann lennmi ki ti al mem kolez ki mwa! Apre ki li’nn pran batem, pandan enn tan nou ti partaz mem lasam. Ziska zordi nou bann bon kamarad. Mwa ek mo madam inn ed plis ki 80 dimounn pou vinn Temwin Zeova gras-a letid Labib ki nou’nn fer avek zot.

Mo ena enn gran rekonesans anver Zeova parski Li’nn donn mwa enn lavi ki ena enn sans ek Li’nn permet mwa ena gran lazwa pou form parti dan enn vre fami bann frer.